А҆ка́ѳїстъ прпⷣбномꙋ серафі́мꙋ саро́вскомꙋ чꙋдотво́рцꙋ.
Конда́къ а҃.
И҆збра́нный чꙋдотво́рче и҆ преди́вный ᲂу҆го́дниче хрⷭ҇то́въ, ско́рый помо́щниче и҆ моли́твенниче на́шъ, прпⷣбне ѻ҆́тче серафі́ме! Велича́юще просла́вльшаго тѧ̀ гдⷭ҇а, воспѣва́емъ тѝ похва̑льнаѧ. Ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, зовꙋ́щихъ:
Ра́дꙋйсѧ, прпⷣбне серафі́ме, саро́вскїй чꙋдотво́рче.
І҆́косъ а҃.
А҆́гг҃лѡвъ творе́цъ и҆збра́ тѧ и҆знача́ла, да просла́виши житїе́мъ твои́мъ пречꙋ́дное и҆́мѧ ст҃ы́ѧ трⷪ҇цы: ꙗ҆ви́лсѧ бо є҆сѝ вои́стиннꙋ а҆́гг҃лъ на землѝ и҆ во пло́ти серафі́мъ: ꙗ҆́кѡ лꙋ́чь пресвѣ́тлый вѣ́чнагѡ сл҃нца пра́вды, просвѣти́сѧ житїѐ твоѐ. Мы́ же, зрѧ́ще прехва̑льныѧ трꙋды̀ твоѧ̑, съ бл҃гоговѣ́нїемъ и҆ ра́достїю глаго́лемъ тѝ сицева̑ѧ:
Ра́дꙋйсѧ, пра́вило вѣ́ры и҆ бл҃гоче́стїѧ: ра́дꙋйсѧ, ѡ҆́бразе кро́тости и҆ смире́нїѧ.
Ра́дꙋйсѧ, пресла́вное вѣ́рныхъ велича́нїе: ра́дꙋйсѧ, прети́хое скѡ́рбнымъ ᲂу҆тѣше́нїе.
Ра́дꙋйсѧ, прелюби́мое и҆́нокѡвъ похвале́нїе: ра́дꙋйсѧ, живꙋ́щымъ въ мі́рѣ преди́вное поможе́нїе.
Ра́дꙋйсѧ, рѡссі́йскїѧ держа́вы сла́во и҆ ѡ҆гражде́нїе: ра́дꙋйсѧ, тамбо́вскїѧ страны̀ свѧще́нное ᲂу҆краше́нїе.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ в҃.
Ви́дѧщи ма́ти твоѧ̀, прпⷣбне ѻ҆́тче серафі́ме, те́плꙋю любо́вь твою̀ ко и҆́ноческомꙋ житїю̀, позна̀ ст҃ꙋ́ю во́лю гдⷭ҇ню ѡ҆ тебѣ̀, и҆ бг҃ꙋ ꙗ҆́кѡ да́ръ соверше́нъ приносѧ́щи, бл҃гослови́ тѧ на тѣ́сный пꙋ́ть и҆́ноческїй ст҃ы́мъ кресто́мъ свои́мъ, є҆го́же до конца̀ житїѧ̀ твоегѡ̀ на пе́рсехъ носи́лъ є҆сѝ, зна́менꙋѧ ве́лїю любо́вь твою̀ къ распе́ншемꙋсѧ за ны̀ хрⷭ҇тꙋ̀ бг҃ꙋ на́шемꙋ, є҆мꙋ́же всѝ со ᲂу҆миле́нїемъ зове́мъ: А҆ллилꙋ́їа.
І҆́косъ в҃.
Ра́зꙋмъ нбⷭ҇ный тебѣ̀ дарова́сѧ, свѧ́тче бж҃їй: ѿ ю҆́ности твоеѧ̀ не престаѧ̀ помышлѧ́ти ѡ҆ нбⷭ҇нѣмъ, ѡ҆ста́вилъ є҆сѝ до́мъ ѻ҆́тчїй, црⷭ҇твїѧ бж҃їѧ ра́ди и҆ пра́вды є҆гѡ̀. Сегѡ̀ ра́ди прїимѝ ѿ на́съ похвалы̑ сїѧ̑:
Ра́дꙋйсѧ, гра́да кꙋ́рска ча́до бг҃оизбра́нное: ра́дꙋйсѧ, роди́телей бл҃гочести́выхъ ѻ҆́трасле пречестна́ѧ.
Ра́дꙋйсѧ, добродѣ́тєли ма́тере своеѧ̀ ᲂу҆наслѣ́дивый: ра́дꙋйсѧ, бл҃гоче́стїю и҆ мл҃твѣ є҆́ю наꙋче́нный.
Ра́дꙋйсѧ, на по́двиги ѿ ма́тере кресто́мъ бл҃гослове́нный: ра́дꙋйсѧ, бл҃гослове́нїе сїѐ ꙗ҆́кѡ ст҃ы́ню до сме́рти соблюды́й.
Ра́дꙋйсѧ, любвѐ ра́ди гдⷭ҇а до́мъ ѻ҆те́ческїй ѡ҆ста́вивый: ра́дꙋйсѧ, всѧ̑ кра̑снаѧ мі́ра сегѡ̀ ни во что́ же вмѣни́вый.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ г҃.
Си́ла вы́шнѧгѡ ѿ ю҆́ности твоеѧ̀ вои́стиннꙋ хранѧ́ше тѧ̀, прпⷣбне: съ высоты́ бо хра́ма спа́дша сохрани́ тѧ гдⷭ҇ь неврежде́нна, и҆ стра́ждꙋщꙋ тѝ лю́тѣ сама̀ влⷣчца мі́ра ꙗ҆ви́сѧ, съ нб҃съ и҆сцѣле́нїе прине́сши, занѐ и҆змла́да вѣ́рнѡ слꙋжи́лъ є҆сѝ бг҃ꙋ, вы́нꙋ взыва́ѧ є҆мꙋ̀: А҆ллилꙋ́їа.
І҆́косъ г҃.
И҆мѣ́ѧ тща́нїе ѡ҆ по́двизѣ и҆́ноческагѡ равноа́гг҃льнагѡ житїѧ̀, во гра́дъ ст҃ы́й кі́евъ поклоне́нїѧ ра́ди прпⷣбнымъ печє́рскимъ прите́клъ є҆сѝ, и҆ ѿ ᲂу҆́стъ прпⷣбнагѡ досїѳе́а повелѣ́нїе прїи́мъ въ пꙋсты́ню саро́вскꙋю пꙋ́ть сво́й ᲂу҆пра́вити, вѣ́рою и҆здале́ча ѡ҆блобыза́лъ є҆сѝ мѣ́сто ст҃о́е сїѐ, и҆ та́мѡ всели́всѧ житїѐ твоѐ бг҃оꙋго́дное сконча́лъ є҆сѝ. Мы́ же, дивѧ́щесѧ таково́мꙋ ѡ҆ тебѣ̀ бж҃їю промышле́нїю, со ᲂу҆миле́нїемъ вопїе́мъ тѝ:
Ра́дꙋйсѧ, мїрскі́ѧ сꙋеты̀ ѿрѣши́выйсѧ: ра́дꙋйсѧ, нбⷭ҇нагѡ ѻ҆те́чества пла́меннѣ возжела́вый.
Ра́дꙋйсѧ, хрⷭ҇та̀ все́мъ се́рдцемъ возлюби́вый: ра́дꙋйсѧ, бл҃го́е и҆́го хрⷭ҇то́во на себє̀ воспрїе́мый.
Ра́дꙋйсѧ, соверше́ннагѡ послꙋша́нїѧ и҆спо́лненный: ра́дꙋйсѧ, ст҃ы́хъ за́повѣдей гдⷭ҇нихъ блюсти́телю вѣ́рный.
Ра́дꙋйсѧ, ᲂу҆́мъ тво́й и҆ се́рдце въ бз҃ѣ мл҃твеннѡ ᲂу҆тверди́вый: ра́дꙋйсѧ, сто́лпе бл҃гоче́стїѧ непоколеби́мый.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ д҃.
Бꙋ́рю ѕлы́хъ напа́стей ᲂу҆тиша́ѧ, проше́лъ є҆сѝ ве́сь пꙋ́ть тѣ́сный и҆ ско́рбный по́двига и҆́ноческагѡ, несы́й ꙗ҆ре́мъ пꙋсты́ннагѡ житїѧ̀, затво́ра и҆ молча́нїѧ, многоно́щнагѡ бдѣ́нїѧ, и҆ та́кѡ бл҃года́тїю бж҃їею восходѧ̀ ѿ си́лы въ си́лꙋ, ѿ дѣѧ́нїѧ къ бг҃овидѣ́нїю, пресели́лсѧ є҆сѝ во ѡ҆би́тєли гѡ́рнїѧ, и҆дѣ́же со а҆́гг҃лы пое́ши бг҃ꙋ: А҆ллилꙋ́їа.
І҆́косъ д҃.
Слы́шаще и҆ ви́дѧще ст҃о́е житїѐ твоѐ, прпⷣбне ѻ҆́тче серафі́ме, всѧ̑ бра́тїѧ твоѧ̑ ᲂу҆дивлѧ́хꙋсѧ тебѣ̀, и҆ приходѧ́ще къ тебѣ̀, поꙋча́хꙋсѧ ѡ҆ словесѣ́хъ твои́хъ и҆ по́двизѣхъ, сла́вѧще гдⷭ҇а, ди́внаго во ст҃ы́хъ свои́хъ. И҆ мы̀ всѝ съ вѣ́рою и҆ любо́вїю восхвалѧ́емъ тѧ̀, прпⷣбне ѻ҆́тче, и҆ вопїе́мъ тѝ си́це:
Ра́дꙋйсѧ, всего̀ себє̀ въ же́ртвꙋ гдⷭ҇еви принесы́й: ра́дꙋйсѧ, на высотꙋ̀ безстра́стїѧ возше́дый.
Ра́дꙋйсѧ, во́ине хрⷭ҇то́въ добропобѣ́дный: ра́дꙋйсѧ, нбⷭ҇нагѡ домовлады́ки ра́бе бл҃гі́й и҆ вѣ́рный.
Ра́дꙋйсѧ, предста́телю ѡ҆ на́съ пред̾ гдⷭ҇емъ непосты́дный: ра́дꙋйсѧ, къ бцⷣѣ мл҃твенниче на́шъ неꙋсы́пный.
Ра́дꙋйсѧ, пречꙋ́днагѡ бл҃гоꙋха́нїѧ крі́не пꙋсты́нный: ра́дꙋйсѧ, бл҃года́ти бж҃їѧ сосꙋ́де непоро́чный.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ є҃.
Бж҃е́ственный свѣ́тъ ѡ҆сїѧ̀ жили́ще твоѐ, прпⷣбне, є҆гда̀ болѧ́щꙋ тѝ и҆ на ѻ҆дрѣ̀ сме́ртнѣмъ лежа́щꙋ, сама̀ пречⷭ҇таѧ дв҃а прише́дши къ тебѣ̀ со ст҃ы́ми а҆пⷭ҇лы петро́мъ и҆ і҆ѡа́нномъ, речѐ: Се́й є҆́сть ѿ ро́да на́шегѡ, и҆ главѣ̀ твое́й коснꙋ́сѧ. А҆́бїе же и҆сцѣлѣ́въ, воспѣ́лъ є҆сѝ бл҃года́рнѣ гдⷭ҇еви: А҆ллилꙋ́їа.
І҆́косъ є҃.
Ви́дѧ вра́гъ ро́да человѣ́ча чи́стое и҆ ст҃о́е житїѐ твоѐ, прпⷣбне серафі́ме, восхотѣ̀ погꙋби́ти тѧ̀: наведе́ бо на тѧ̀ лю́ди ѕлы̑, и҆̀же беззако́ннѡ и҆стѧза́хꙋ тѧ̀ и҆ є҆́ле жи́ва сꙋ́ща ѡ҆ста́виша: ты́ же, ѻ҆́тче ст҃ы́й, ꙗ҆́кѡ а҆́гнецъ кро́токъ, всѧ̑ претерпѣ́лъ є҆сѝ, за ѡ҆би́дѧщихъ тѧ̀ гдⷭ҇еви молѧ́сѧ. Тѣ́мже мы̀ всѝ, таково́мꙋ твоемꙋ̀ неѕло́бїю дивѧ́щесѧ, вопїе́мъ тѝ:
Ра́дꙋйсѧ, въ кро́тости и҆ смире́нїи твое́мъ хрⷭ҇тꙋ̀ бг҃ꙋ подража́вый: ра́дꙋйсѧ, неѕло́бїемъ твои́мъ дꙋ́ха ѕло́бы побѣди́вый.
Ра́дꙋйсѧ, чистоты̀ дꙋше́вныѧ и҆ тѣле́сныѧ храни́телю ᲂу҆се́рдный: ра́дꙋйсѧ, пꙋсты́нниче, дара́ми бл҃года́тными преиспо́лненный.
Ра́дꙋйсѧ, подви́жниче бг҃опросла́вленный и҆ прозорли́вый: ра́дꙋйсѧ, наста́вниче мона́хѡвъ преди́вный и҆ бг҃омꙋ́дрый.
Ра́дꙋйсѧ, ст҃ы́ѧ цр҃кве похвало̀ и҆ ра́дованїе: ра́дꙋйсѧ, ѡ҆би́тели саро́вскїѧ сла́во и҆ ᲂу҆добре́нїе.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ ѕ҃.
Проповѣ́дꙋетъ пꙋсты́нѧ саро́вскаѧ по́двиги и҆ трꙋды̀ твоѧ̑, бг҃оно́сне ᲂу҆го́дниче хрⷭ҇то́въ: дє́бри бо и҆ лѣса̀ є҆ѧ̀ мл҃твою ѡ҆благоꙋха́лъ є҆сѝ, прⷪ҇ро́кꙋ бж҃їю и҆лїѝ и҆ крⷭ҇ти́телю гдⷭ҇ню і҆ѡа́ннꙋ подража́ѧ, и҆ ꙗ҆ви́лсѧ є҆сѝ пꙋсты́ни прозѧбе́нїе многопло́дное дара́ми дх҃а ст҃а́гѡ, є҆гѡ́же дѣ́йствїемъ мнѡ́гаѧ и҆ пресла̑внаѧ соверши́лъ є҆сѝ, подвиза́ѧ вѣ́рныхъ воспѣва́ти бл҃ги́хъ пода́телю бг҃ꙋ: А҆ллилꙋ́їа.
І҆́косъ ѕ҃.
Возсїѧ̀ въ тебѣ̀ но́вый бг҃ови́децъ, мѡѷсе́ю подо́бный, серафі́ме бл҃же́нне: непоро́чнѡ бо слꙋже́нїе ѻ҆лтарю̀ гдⷭ҇ню соверша́ѧ, сподо́билсѧ є҆сѝ зрѣ́ти хрⷭ҇та̀, во хра́мѣ со безпло́тными си́лами грѧдꙋ́ща. Семꙋ̀ бж҃їю ѡ҆ тебѣ̀ бл҃говоле́нїю дивѧ́щесѧ, воспѣва́емъ тѝ си́це:
Ра́дꙋйсѧ, бг҃ови́дче пресла́вный: ра́дꙋйсѧ, свѣ́томъ трисїѧ́ннымъ ѡ҆заре́нный.
Ра́дꙋйсѧ, прест҃ы́ѧ трⷪ҇цы слꙋжи́телю вѣ́рный: ра́дꙋйсѧ, дх҃а ст҃а́гѡ жили́ще ᲂу҆краше́нное.
Ра́дꙋйсѧ, хрⷭ҇та̀ со а҆́гг҃лы тѣле́сныма ѻ҆чи́ма лицезрѣ́вый: ра́дꙋйсѧ, въ бре́ннѣмъ тѣлесѝ ра́йскꙋю сла́дость предвкꙋси́вый.
Ра́дꙋйсѧ, хлѣ́бомъ жи́зни насыще́нный: ра́дꙋйсѧ, питїе́мъ безсме́ртїѧ напое́нный.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ з҃.
Хотѧ̀ чл҃вѣколю́бецъ гдⷭ҇ь ꙗ҆ви́ти въ тебѣ̀, прпⷣбне, своѐ неизрече́нное къ лю́демъ милосе́рдїе, показа́ тѧ ꙗ҆́кѡ вои́стиннꙋ свѣти́ло бг҃освѣ́тлое: дѣ́лы бо и҆ словєсы̀ твои́ми всѣ́хъ приводи́лъ є҆сѝ ко бл҃гоче́стїю и҆ любвѝ бж҃їей. Тѣ́мже, сїѧ́нїемъ по́двигѡвъ твои́хъ просвѣще́ни и҆ хлѣ́бомъ ᲂу҆че́нїѧ твоегѡ̀ насыще́ни, тебѐ ᲂу҆се́рднѡ велича́емъ и҆ просла́вльшемꙋ тѧ̀ хрⷭ҇тꙋ̀ вопїе́мъ: А҆ллилꙋ́їа.
І҆́косъ з҃.
Но́ваго ви́дѧще тѧ̀ и҆збра́нника бж҃їѧ, и҆здале́ча притека́хꙋ къ тебѣ̀ вѣ́рнїи въ ско́рбехъ и҆ болѣ́знехъ: и҆ си́хъ бѣда́ми ѡ҆тѧгче́нныхъ не ѿри́нꙋлъ є҆сѝ, и҆сточа́ѧ цѣлє́нїѧ, да́рꙋѧ ᲂу҆тѣше́нїе, предста́тельствꙋѧ въ мл҃твахъ. Тѣ́мже и҆схожда́ше во всю̀ зе́млю рѡссі́йскꙋю вѣща́нїе чꙋде́съ твои́хъ, и҆ си́це тѧ̀ сла́влѧхꙋ дꙋхѡ́внаѧ ча̑да твоѧ̑:
Ра́дꙋйсѧ, па́стырю на́шъ до́брый: ра́дꙋйсѧ, ѻ҆́тче млⷭ҇тивый и҆ кро́ткїй.
Ра́дꙋйсѧ, врачꙋ̀ на́шъ ско́рый и҆ бл҃года́тный: ра́дꙋйсѧ, не́мощей на́шихъ цѣли́телю милосе́рдый.
Ра́дꙋйсѧ, въ бѣда́хъ и҆ ѡ҆бстоѧ́нїихъ помо́щниче ско́рый: ра́дꙋйсѧ, дꙋ́шъ смѧте́нныхъ ᲂу҆мири́телю пресла́достный.
Ра́дꙋйсѧ, грѧдꙋ̑щаѧ ꙗ҆́кѡ настоѧ̑щаѧ прови́дѣвый: ра́дꙋйсѧ, прегрѣше́нїй сокрове́нныхъ ѡ҆бличи́телю прозорли́вый.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ и҃.
Стра́нное чꙋ́до ви́димъ на тебѣ̀, прпⷣбне: ꙗ҆́кѡ ста́рецъ сы́й немощны́й и҆ притрꙋ́дный, ты́сѧщꙋ дні́й и҆ ты́сѧщꙋ но́щїй на ка́мени въ мл҃твѣ пребыва́лъ є҆сѝ. Кто̀ дово́ленъ и҆зрещѝ болѣ̑зни и҆ борє́нїѧ твоѧ̑, бл҃же́нне ѻ҆́тче, ꙗ҆̀же претерпѣ́лъ є҆сѝ, воздѣ́ѧ прпⷣбнѣи рꙋ́цѣ твоѝ къ бг҃ꙋ, а҆мали́ка мы́сленнаго побѣжда́ѧ и҆ гдⷭ҇еви поѧ̀: А҆ллилꙋ́їа.
І҆́косъ и҃.
Ве́сь є҆сѝ жела́нїе, ве́сь сла́дость, сладча́йшїй і҆и҃се! Та́кѡ въ мл҃твахъ взыва́лъ є҆сѝ, ѻ҆́тче, въ пꙋсты́ннѣмъ безмо́лвїи твое́мъ. Мы́ же, сꙋето́ю помраче́ннїи и҆ во грѣсѣ́хъ всѐ житїѐ и҆жди́вшїи, восхвалѧ́юще любо́вь твою̀ ко гдⷭ҇ꙋ, си́це вопїе́мъ тѝ:
Ра́дꙋйсѧ, лю́бѧщымъ и҆ чтꙋ́щымъ тѧ̀ хода́таю сп҃се́нїѧ: ра́дꙋйсѧ, приводѧ́й грѣ́шникѡвъ ко и҆справле́нїю.
Ра́дꙋйсѧ, молча́льниче и҆ затво́рниче преди́вный: ра́дꙋйсѧ, мл҃твенниче ѡ҆ на́съ ᲂу҆се́рдный.
Ра́дꙋйсѧ, пла́меннꙋю любо́вь ко гдⷭ҇ꙋ показа́вый: ра́дꙋйсѧ, ѻ҆гне́мъ мл҃твы стрѣ́лы вра̑жїѧ попали́вый.
Ра́дꙋйсѧ, свѣщѐ неꙋгаси́маѧ, мл҃твою въ пꙋсты́ни пламенѣ́ющаѧ: ра́дꙋйсѧ, свѣти́льниче, горѧ́й и҆ свѣтѧ́й дарова̑нїи дх҃о́вными.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ ѳ҃.
Всѐ є҆стество̀ а҆́гг҃льское ᲂу҆диви́сѧ стра́нномꙋ зрѣ́нїю: ста́рцꙋ бо сꙋ́щꙋ въ затво́рѣ, нб҃сѐ и҆ землѝ цр҃и́ца ꙗ҆ви́сѧ, повелѣва́ющи, да ѿкры́етъ затво́ръ сво́й и҆ да не возбрани́тъ лю́демъ правосла̑внымъ вни́ти къ себѣ̀, но да всѣ́хъ пѣ́ти наꙋчи́тъ хрⷭ҇тꙋ̀ бг҃ꙋ: А҆ллилꙋ́їа.
І҆́косъ ѳ҃.
Вѣті̑и многовѣща́ннїи не возмо́гꙋтъ и҆зрещѝ крѣ́пость любвѐ твоеѧ̀, бл҃же́нне: преда́лъ бо є҆сѝ себє̀ на слꙋже́нїе всѣ̑мъ приходѧ́щымъ къ тебѣ̀, повелѣ́нїе бг҃омт҃ре и҆сполнѧ́ѧ, и҆ бы́лъ є҆сѝ недоꙋмѣва́ющымъ совѣ́тникъ бл҃гі́й, ᲂу҆ныва́ющымъ ᲂу҆тѣ́шитель, заблꙋжда́ющихсѧ кро́ткое вразꙋмле́нїе, болѧ́щихъ вра́чь и҆ цѣли́тель. Сегѡ̀ ра́ди вопїе́мъ тѝ:
Ра́дꙋйсѧ, ѿ мі́ра въ пꙋсты́ню всели́выйсѧ, да добродѣ́тєли прїѡбрѧ́щеши: ра́дꙋйсѧ, и҆з̾ пꙋсты́ни во ѡ҆би́тель возврати́выйсѧ, во є҆́же добродѣ́тели сѣ́мена сѣ́ѧти.
Ра́дꙋйсѧ, дх҃а ст҃а́гѡ бл҃года́тїю ѡ҆сїѧ́нный: ра́дꙋйсѧ, кро́тости и҆ смире́нїѧ и҆спо́лненный.
Ра́дꙋйсѧ, притека́вшымъ къ тебѣ̀ ѻ҆те́цъ чадолюби́вый: ра́дꙋйсѧ, въ словесѣ́хъ любвѐ ѡ҆бодре́нїе и҆ ᲂу҆тѣше́нїе и҆̀мъ подава́вый.
Ра́дꙋйсѧ, приходѧ́щыѧ къ тебѣ̀ ра́достїю и҆ сокро́вищемъ и҆менова́вый: ра́дꙋйсѧ, за любо́вь твою̀ ст҃ꙋ́ю ра́достей нбⷭ҇нагѡ црⷭ҇твїѧ сподо́бивыйсѧ.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ і҃.
Спаси́тельнагѡ твоегѡ̀ по́двига, прпⷣбне, дости́гъ сконча́нїѧ, на мл҃твѣ колѣнопреклоне́ннѡ ст҃ꙋ́ю дꙋ́шꙋ твою̀ въ рꙋ́цѣ бж҃їи преда́лъ є҆сѝ, ю҆́же а҆́гг҃ли ст҃і́и вознесо́ша горѣ̀ ко прⷭ҇то́лꙋ вседержи́телѧ, да со всѣ́ми ст҃ы́ми предстои́ши во сла́вѣ невече́рней, воспѣва́ѧ пѣ́снь хвале́бнꙋю ст҃ы́хъ ст҃ѣ́йшемꙋ сло́вꙋ: А҆ллилꙋ́їа.
І҆́косъ і҃.
Стѣна̀ всѣ̑мъ ст҃ы̑мъ и҆ и҆́нокѡмъ ѿра́да, прест҃а́ѧ дв҃а пред̾ кончи́ною твое́ю ꙗ҆ви́сѧ тѝ, провозвѣсти́вши бли́зкое твоѐ къ бг҃ꙋ ѿше́ствїе. Мы́ же, дивѧ́щесѧ таково́мꙋ посѣще́нїю бг҃омт҃ре, вопїе́мъ тѝ:
Ра́дꙋйсѧ, нб҃сѝ и҆ землѝ цр҃и́цꙋ лицезрѣ́вый: ра́дꙋйсѧ, ꙗ҆вле́нїемъ бж҃їѧ мт҃ре ѡ҆бра́дованный.
Ра́дꙋйсѧ, вѣ́сть ѿ неѧ̀ ко преселе́нїю нбⷭ҇номꙋ прїе́мый: ра́дꙋйсѧ, пра́ведною кончи́ною свѧ́тость житїѧ̀ твоегѡ̀ показа́вый.
Ра́дꙋйсѧ, въ мл҃твѣ пред̾ і҆кѡ́ною бг҃омт҃ре ᲂу҆миле́нный дꙋ́хъ тво́й бг҃ꙋ преда́вый: ра́дꙋйсѧ, неболѣ́зненнымъ и҆схо́домъ проречє́нїѧ твоѧ̑ и҆спо́лнивый.
Ра́дꙋйсѧ, вѣнце́мъ безсме́ртїѧ ѿ рꙋкѝ вседержи́телѧ ᲂу҆вѣнча́нный: ра́дꙋйсѧ, бл҃же́нство ра́йское со всѣ́ми ст҃ы́ми ᲂу҆наслѣ́довавый.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ а҃і.
Пѣ́нїе непреста́нное прест҃ѣ́й трⷪ҇цѣ возносѧ̀, прпⷣбне, всѣ́мъ житїе́мъ твои́мъ подви́жникъ вели́кїй бл҃гоче́стїѧ ꙗ҆ви́лсѧ є҆сѝ, заблꙋ́ждшымъ на вразꙋмле́нїе, болѧ́щымъ дꙋше́ю и҆ тѣ́ломъ на и҆сцѣле́нїе. Мы́ же, бл҃года́рни сꙋ́ще гдⷭ҇еви за таковꙋ́ю млⷭ҇ть є҆гѡ̀ къ на́мъ, вы́нꙋ зове́мъ є҆мꙋ̀: А҆ллилꙋ́їа.
І҆́косъ а҃і.
Свѣтопода́тельный свѣти́льникъ бы́въ въ житїѝ, бг҃обл҃же́нне ѻ҆́тче, и҆ по сме́рти твое́й возсїѧ́лъ є҆сѝ ꙗ҆́кѡ свѣтоза́рное свѣти́ло рѡссі́йскїѧ землѝ: и҆сточа́еши бо ѿ чтⷭ҇ны́хъ моще́й твои́хъ то́ки чꙋде́съ всѣ̑мъ съ вѣ́рою и҆ любо́вїю къ тебѣ̀ притека́ющымъ. Тѣ́мже мы̀, ꙗ҆́кѡ мл҃твенникꙋ ѡ҆ на́съ те́пломꙋ и҆ чꙋдотво́рцꙋ, вопїе́мъ тѝ:
Ра́дꙋйсѧ, мно́жествомъ чꙋде́съ ѿ гдⷭ҇а просла́вленный: ра́дꙋйсѧ, любо́вїю твое́ю всемꙋ̀ мі́рꙋ возсїѧ́вый.
Ра́дꙋйсѧ, любвѐ хрⷭ҇то́вы вѣ́рный послѣ́дователю: ра́дꙋйсѧ, ᲂу҆тѣше́нїе всѣ̑мъ тре́бꙋющымъ твоеѧ̀ по́мощи.
Ра́дꙋйсѧ, и҆сто́чниче чꙋде́съ неѡскꙋдѣва́емый: ра́дꙋйсѧ, болѧ́щихъ и҆ недꙋ́жныхъ и҆сцѣли́телю.
Ра́дꙋйсѧ, воды̀ многоцѣле́бныѧ кла́дѧзю неисчерпа́емый: ра́дꙋйсѧ, ꙗ҆́кѡ всѧ̑ концы̀ землѝ на́шеѧ любо́вїю твое́ю ѡ҆б̾ѧ́лъ є҆сѝ.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ в҃і.
Бл҃года́ть и҆ ве́лїе твоѐ дерзнове́нїе пред̾ бг҃омъ вѣ́дꙋще, тебѣ̀, прпⷣбне ѻ҆́тче, мо́лимсѧ: моли́сѧ те́плѣ ко гдⷭ҇ꙋ, да храни́тъ цр҃ковь свою̀ ст҃ꙋ́ю ѿ невѣ́рїѧ и҆ раско́ла, ѿ бѣ́дъ и҆ напа́стей, да пое́мъ тобо́ю бл҃годѣ́ющемꙋ на́мъ бг҃ꙋ: А҆ллилꙋ́їа.
І҆́косъ в҃і.
Пою́ще твоѐ прославле́нїе, ᲂу҆блажа́емъ тѧ̀, прпⷣбне, ꙗ҆́кѡ многомо́щна мл҃твенника ѡ҆ на́съ пред̾ гдⷭ҇емъ, ᲂу҆тѣ́шителѧ и҆ застꙋ́пника, и҆ съ любо́вїю возглаша́емъ тѝ си́це:
Ра́дꙋйсѧ, цр҃кве правосла́вныѧ похвало̀: ра́дꙋйсѧ, ѻ҆те́чествꙋ на́шемꙋ щи́тъ и҆ ѡ҆гражде́нїе.
Ра́дꙋйсѧ, пꙋтеводи́телю, всѣ́хъ къ нб҃сѝ направлѧ́ѧй: ра́дꙋйсѧ, защи́тниче на́шъ и҆ покрови́телю.
Ра́дꙋйсѧ, си́лою бж҃їею мнѡ́гаѧ чꙋдеса̀ содѣ́ѧвый: ра́дꙋйсѧ, ри́зою твое́ю мнѡ́гїѧ недꙋ̑жныѧ и҆сцѣли́вый.
Ра́дꙋйсѧ, всѧ̑ кѡ́зни дїа́вѡльскїѧ побѣди́вый: ра́дꙋйсѧ, ѕвѣ̑ри ди̑вїѧ кро́тостїю твое́ю покори́вый.
Ра́дꙋйсѧ, прпⷣбне серафі́ме, саро́вскїй чꙋдотво́рче.
Конда́къ г҃і.
Ѽ преди́вный ᲂу҆го́дниче и҆ вели́кїй чꙋдотво́рче, прпⷣбне ѻ҆́тче серафі́ме, прїимѝ ма́лое сїѐ моле́нїе на́ше, въ похвалꙋ̀ тебѣ̀ возноси́мое, и҆ предстоѧ̀ ны́нѣ прⷭ҇то́лꙋ цр҃ѧ̀ ца́рствꙋющихъ, гдⷭ҇а на́шегѡ і҆и҃са хрⷭ҇та̀, моли́сѧ ѡ҆ всѣ́хъ на́съ, да ѡ҆брѧ́щемъ милосе́рдїе є҆гѡ̀ въ де́нь сꙋ́дный, въ ра́дости пою́ще є҆мꙋ̀: А҆ллилꙋ́їа.
Се́й конда́къ глаго́ли три́жды, та́же і҆́косъ а҃-й, и҆ конда́къ а҃-й.
Мл҃тва а҃.
Ѽ пречꙋ́дный ѻ҆́тче серафі́ме, вели́кїй саро́вскїй чꙋдотво́рче, всѣ̑мъ прибѣга́ющымъ къ тебѣ̀ скоропослꙋ́шный помо́щниче! Во дни̑ земна́гѡ житїѧ̀ твоегѡ̀ никто́же ѿ тебѣ̀ то́щь и҆ неꙋтѣ́шенъ ѿи́де, но всѣ̑мъ въ сла́дость бы́сть видѣ́нїе ли́ка твоегѡ̀ и҆ бл҃гоꙋвѣ́тливый гла́съ слове́съ твои́хъ. Къ си̑мъ же и҆ да́ръ и҆сцѣле́нїй, да́ръ прозрѣ́нїѧ, да́ръ немощны́хъ дꙋ́шъ врачева́нїѧ ѡ҆би́ленъ въ тебѣ̀ ꙗ҆ви́сѧ. Є҆гда́ же призва́ тѧ бг҃ъ ѿ земны́хъ трꙋдѡ́въ къ нбⷭ҇номꙋ ᲂу҆покое́нїю, николи́же любо́вь твоѧ̀ преста̀ ѿ на́съ, и҆ невозмо́жно є҆́сть и҆счи́слити чꙋдеса̀ твоѧ̑, ᲂу҆мнѡ́жившаѧсѧ, ꙗ҆́кѡ ѕвѣ́зды нбⷭ҇ныѧ: се́ бо по всѣ̑мъ концє́мъ землѝ на́шеѧ лю́демъ бж҃їимъ ꙗ҆влѧ́ешисѧ и҆ да́рꙋеши и҆̀мъ и҆сцѣлє́нїѧ. Тѣ́мже и҆ мы̀ вопїе́мъ тѝ: ѽ прети́хїй и҆ кро́ткїй ᲂу҆го́дниче бж҃їй, дерзнове́нный къ немꙋ̀ мл҃твенниче, николи́же призыва́ющыѧ тѧ̀ ѿрѣва́ѧй, вознесѝ ѡ҆ на́съ бл҃гомо́щнꙋю твою̀ мл҃твꙋ ко гдⷭ҇ꙋ си́лъ, да ᲂу҆крѣпи́тъ держа́вꙋ на́шꙋ, да́рꙋетъ на́мъ всѧ̑ бл҃гопотрє́бнаѧ въ жи́зни се́й и҆ всѧ̑ къ дꙋше́вномꙋ сп҃се́нїю полє́знаѧ, да ѡ҆гради́тъ на́съ ѿ паде́нїй грѣхо́вныхъ и҆ и҆́стинномꙋ покаѧ́нїю наꙋчи́тъ на́съ, во є҆́же безпреткнове́ннѡ вни́ти на́мъ въ вѣ́чное нбⷭ҇ное црⷭ҇тво, и҆дѣ́же ты̀ ны́нѣ въ незаходи́мѣй сїѧ́еши сла́вѣ, и҆ та́мѡ воспѣва́ти со всѣ́ми ст҃ы́ми живонача́льнꙋю трⷪ҇цꙋ во вѣ́ки вѣкѡ́въ. А҆ми́нь.
Моли́тва в҃.
Ѽ вели́кїй ᲂу҆го́дниче бж҃їй, прпⷣбне и҆ бг҃оно́сне ѻ҆́тче на́шъ серафі́ме! при́зри ѿ го́рнїѧ сла́вы на на́съ смире́нныхъ и҆ немощны́хъ, ѡ҆бремене́нныхъ грѣхмѝ мно́гими, твоеѧ̀ по́мощи и҆ ᲂу҆тѣше́нїѧ просѧ́щихъ. Прини́кни къ на́мъ бл҃госе́рдїемъ твои́мъ и҆ помозѝ на́мъ за́пѡвѣди гдⷭ҇ни непоро́чнѡ сохранѧ́ти, вѣ́рꙋ правосла́внꙋю крѣ́пкѡ содержа́ти, покаѧ́нїе во грѣсѣ́хъ на́шихъ ᲂу҆се́рднѡ бг҃ꙋ приноси́ти, во бл҃гоче́стїи хрⷭ҇тїа́нстѣмъ бл҃года́тнѡ преꙋспѣва́ти и҆ достѡ́йны бы́ти твоегѡ̀ ѡ҆ на́съ мл҃твеннагѡ къ бг҃ꙋ предста́тельства. Є҆́й, свѧ́тче бж҃їй, ᲂу҆слы́ши на́съ молѧ́щихсѧ тебѣ̀ съ вѣ́рою и҆ любо́вїю и҆ не пре́зри на́съ, тре́бꙋющихъ твоегѡ̀ застꙋпле́нїѧ: ны́нѣ и҆ въ ча́съ кончи́ны на́шеѧ помозѝ на́мъ и҆ застꙋпѝ на́съ мл҃твами твои́ми ѿ ѕло́бныхъ навѣ́тѡвъ дїа́вольскихъ, да не ѡ҆блада́етъ на́ми тѣ́хъ си́ла, но да сподо́бимсѧ по́мощїю твое́ю наслѣ́довати бл҃же́нство ѡ҆би́тели ра́йскїѧ. На тѧ́ бо ᲂу҆пова́нїе на́ше ны́нѣ возлага́емъ, ѻ҆́тче бл҃госе́рдый: бꙋ́ди на́мъ вои́стиннꙋ ко сп҃се́нїю пꙋтево́ждь и҆ приведѝ на́съ къ невече́рнемꙋ свѣ́тꙋ жи́зни вѣ́чныѧ бг҃опрїѧ́тнымъ предста́тельствомъ твои́мъ ᲂу҆ прⷭ҇то́ла прест҃ы́ѧ трⷪ҇цы, да сла́вимъ и҆ пое́мъ со всѣ́ми ст҃ы́ми достопокланѧ́емое и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а во вѣ́ки вѣкѡ́въ. А҆ми́нь.