Акафист святому преподобному Ионе Киевскому

И҆збра́нный ᲂу҆го́дниче хрⷭ҇то́въ и҆ чꙋдотво́рче, прпⷣбне ѻ҆́тче і҆ѡ́но, возсїѧ́вый мі́рови, ꙗ҆́кѡ ѕвѣзда̀ бг҃освѣ́тлаѧ, житїѧ̀ твоегѡ̀ добро́тою и҆ мно́жествомъ чꙋдотворе́нїй, восхвалѧ́емъ тѧ̀ любо́вїю въ пѣ́снехъ дꙋхо́вныхъ: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, моли́твами твои́ми ѿ всѧ́кихъ на́съ бѣ́дъ свободѝ, да зове́мъ тѝ:

А҆́гг҃льскїй нра́въ и҆мѣ́лъ є҆сѝ, ѻ҆́тче прпⷣбне, и҆ ꙗ҆́кѡ безпло́тный, непоро́чнѡ житїѐ соверши́лъ є҆сѝ на землѝ, ди́вный ѻ҆́бразъ соверше́нства дх҃о́внагѡ на́мъ ѡ҆ста́вивъ, да подража́емъ добродѣ́телємъ твои̑мъ, и҆ зове́мъ тѝ си́це:

Ви́дѧ гдⷭ҇ь дꙋ́шꙋ твою̀, ꙗ҆́кѡ ни́вꙋ благовоздѣ́ланнꙋю къ плодоно́сїю дх҃о́вномꙋ, ѿ ю҆́ности къ и҆ска́нїю є҆ди́наго на потре́бꙋ, напра́ви тво́й по́мыслъ, прпⷣбне, тѣ́мже любвѐ ра́ди хрⷭ҇то́вы, роди́телей твои́хъ и҆ до́мъ ѻ҆те́ческїй ѡ҆ста́вилъ є҆сѝ, и҆ всѧ́кагѡ пристра́стїѧ сꙋ́етнагѡ свободи́всѧ, прите́клъ є҆сѝ въ пꙋ́стынь саро́вскꙋю под̾ крилѣ̑ серафі́ма прпⷣбнагѡ, на пѡ́двиги и҆́ночєскїѧ, зовы́й сп҃са́ющемꙋ тѧ̀ бг҃ꙋ: А҆ллилꙋ́їа.

Ра́зꙋмомъ бг҃опросвѣще́ннымъ пости́глъ є҆сѝ сꙋетꙋ̀ мі́ра сегѡ̀ и҆ непостоѧ́нство, въ не́мже ра́дость смѣнѧ́етсѧ ско́рбїю, бл҃гополꙋ́чїе навѣ́тꙋетсѧ неча́ѧнными бѣда́ми. Тѣ́мже вѣ́чныхъ нетлѣ́нныхъ бла̑гъ возжелѣ́лъ є҆сѝ, ѻ҆́тче прпⷣбне, и҆ сїѧ̑ взыска́ти потща́лсѧ є҆сѝ ѿрече́нїемъ мїрски́хъ бла̑гъ, и҆ во́льною нището́ю, подвига́ѧ на́съ зва́ти тебѣ̀:

Си́лою всевы́шнѧгѡ ѡ҆сѣне́нный и҆ ᲂу҆крѣплѧ́емый, въ и҆́ночестѣмъ постриже́нїи вла̑съ главы̀ твоеѧ̀, всѐ плотско́е мꙋдрова́нїе ѿложи́лъ є҆сѝ, прпⷣбне, и҆ ꙗ҆́кѡ во́инъ благоискꙋ́сный, ѻ҆де́ждꙋ и҆́ноческꙋю въ броню̀ спⷭ҇нїѧ стѧжа́въ, и҆ непобѣди́мымъ ѻ҆рꙋ́жїемъ креста̀ хрⷭ҇то́ва воѡрꙋжи́всѧ, крѣ́пкѡ ра́товалъ є҆сѝ проти́вꙋ врага̀ неви́димагѡ дїа́вола, смире́нїемъ глꙋбо́кимъ побѣжда́ѧ є҆го̀ вознесе́ннꙋю горды́ню, и҆ вы́нꙋ вопїѧ̀ ко гдⷭ҇ꙋ: А҆ллилꙋ́їа.

И҆мѣ́ѧ сле́зъ и҆сто́чникъ и҆з̾ѡби́льный, ᲂу҆го́дниче бж҃їй, и҆ ᲂу҆миле́нїѧ ве́лїю блгⷣть, хлѣ́бъ тво́й слеза́ми ѡ҆роша́лъ є҆сѝ, и҆ питїѐ пла́чемъ растворѧ́лъ, ѿ преизбы́тка жела́нїѧ бж҃е́ственнагѡ и҆ любвѐ ко гдⷭ҇ꙋ. тѣ́мже и҆ мы̀ ᲂу҆блажа́емъ тѧ̀ зва̑нїи си́ми:

Бꙋ́рѧ и҆скꙋше́нїй и҆ ᲂу҆стремле́нїй дїа́вольскихъ не возмо́же поколеба́ти хра́мины твоеѧ̀ дꙋше́вныѧ, прпⷣбне ѻ҆́тче, ѡ҆снова́нна бо бѣ̀ на тве́рдомъ ка́мени вѣ́ры во хрⷭ҇та̀, и҆ храни́ма трезве́нїемъ и҆ моли́твами непреста́нными, и҆́миже вы́нꙋ противобо́рствовалъ є҆сѝ врагꙋ̀ спⷭ҇нїѧ человѣ́ческагѡ, и҆ непреткнове́ннѡ восходи́лъ є҆сѝ по стезѧ́мъ добродѣ́телей къ соверше́нствꙋ дх҃о́вномꙋ въ мѣ́рꙋ во́зраста хрⷭ҇то́ва, воспѣва́ѧ бг҃ꙋ: А҆ллилꙋ́їа.

Слы́шаша, прпⷣбне ѻ҆́тче і҆ѡ́но, бли́жнїи и҆ да́льнїи а҆гг҃лоподо́бное твоѐ житїѐ, и҆ блгⷣти чꙋде́съ стрꙋю̀ вы́нꙋ текꙋ́щꙋю, ꙗ҆́кѡ моли́твою твое́ю прокаже́ннїи ѡ҆чища́ютсѧ, слѣпі́и прозира́ютъ, хромі́и хо́дѧтъ и҆ разноѻбра́зныхъ недꙋ̑гъ съ вѣ́рою притека́ющїи, а҆́ще и҆ и҆новѣ́рнїи, здра́вїе ᲂу҆лꙋча́ютъ, си́хъ и҆зба́вльшесѧ вопїѧ́хꙋ къ тебѣ̀ такова̑ѧ:

Бг҃оте́чнаѧ пресвѣ́тлаѧ ѕвѣзда̀ ꙗ҆ви́лсѧ є҆сѝ, прпⷣбне ѻ҆́тче на́шъ і҆ѡ́но, не́бо церко́вное ᲂу҆краша́ѧй и҆ всѣ́хъ блꙋжда́ющихъ по мо́рю стра́стнагѡ житїѧ̀ сегѡ̀ да́нною тебѣ̀ ѿ со́лнца пра́вды хрⷭ҇та̀ і҆и҃са, и҆́стиннагѡ бг҃а, благода́тїю ѡ҆зарѧ́ѧй, мра́къ печа́лей и҆ мглꙋ̀ всѧ́кихъ недꙋ̑гъ и҆ скорбе́й прогонѧ́ѧй, наставлѧ́еши всѣ́хъ къ тебѣ̀ съ вѣ́рою притека́ющихъ на пꙋ́ть спⷭ҇нїѧ, къ вѣ́чномꙋ небе́сномꙋ ѻ҆те́чествїю ведꙋ́щїй, пою́щихъ бг҃ꙋ: А҆ллилꙋ́їа.

Ви́дѣвше а҆́гг҃льстїи чи́нове равноа́гг҃льное житїѐ твоѐ, ѻ҆́тче бг҃облаже́нне, смире́нїѧ твоегѡ̀ глꙋбинꙋ̀, моли́твы неотстꙋ́пность, воздержа́нїѧ тве́рдость и҆ ве́лїю ре́вность дꙋ́ха твоегѡ̀ ѡ҆ чистотѣ̀, ᲂу҆диви́шасѧ и҆ просла́виша человѣколю́бца бг҃а, ᲂу҆крѣплѧ́ющаго немощно́е є҆стество̀ человѣ́ческое. мы́ же ᲂу҆блажа́емъ тѧ̀ и҆ зове́мъ:

Проповѣ́дꙋетъ мі́ръ ве́сь правосла́вный тебѐ, прпⷣбне ѻ҆́тче на́шъ і҆ѡ́но, де́монѡвъ прогони́телѧ, болѣ́зней и҆сцѣли́телѧ и҆ и҆ны́хъ мно́гихъ чꙋде́съ соверши́телѧ. Мы́ же, бг҃а ѡ҆ тебѣ̀ прославлѧ́юще, вопїе́мъ є҆мꙋ̀: А҆ллилꙋ́їѧ.

Возсїѧ́лъ є҆сѝ на гора́хъ ѕвѣрине́цкихъ бг҃освѣ́тлое свѣти́ло, и҆ на спⷭ҇нїѧ стезю̀ наста́вилъ є҆сѝ мнѡ́ги дꙋ́ши человѣ̑ческїѧ: ꙗ҆ви́ бо тѧ̀ хрⷭ҇то́съ наста́вника и҆ ᲂу҆чи́телѧ и҆́нокѡмъ пꙋстыннолюби̑вымъ, и҆́же стека́хꙋсѧ къ тебѣ̀, ꙗ҆́кѡ ѻ҆́вцы къ па́стырю, могꙋ́щꙋ ᲂу҆пастѝ и҆̀хъ на па́жити живоно́снѣй. тѣ́мже ꙗ҆́кѡ сотвори́вшагѡ и҆ наꙋчи́вшагѡ, чествꙋ́емъ тѧ̀ си́ми похва́льными словєсы̀:

Хотѧ̀ человѣколюби́вый гдⷭ҇ь просла́вити мѣ́сто сїѐ, ꙗ҆́кѡ вїногра́дъ по́двигѡвъ твои́хъ, ѻ҆́тче посла̀ прест҃ꙋ́ю влⷣчцꙋ на́шꙋ бцⷣꙋ благовѣсти́ти тебѣ̀, ꙗ҆́кѡ бꙋ́детъ въ сто́льномъ гра́де кі́евѣ ѻ҆би́тель и҆́нокѡмъ во спⷭ҇е́нїе, ᲂу҆краше́ннаѧ хра́момъ во и҆́мѧ ст҃ы́ѧ трⷪ҇цы. ты́ же, ꙗ҆вле́нїемъ пречи́стыѧ просвѣще́нъ, съ ра́достнымъ тре́петомъ внима́лъ є҆сѝ бл҃говѣ́стїю нбⷭ҇номꙋ, зовы́й во смире́нїи дꙋ́ха влады́цѣ а҆́гг҃лѡвъ и҆ человѣ́кѡвъ: А҆ллилꙋ́їа.

Но́вое зна́менїе благоволе́нїѧ бж҃їѧ дарова́сѧ тебѣ̀, прпⷣбне, є҆гда̀ безмо́лвствꙋющꙋ тѝ въ вы́дꙋбицкомъ монастырѣ̀, въ нощѝ свѣ́тъ ве́лїй ѡ҆блиста̀ вѣ́домꙋю тѝ ке́ллїю, и҆ сама̀ пречⷭ҇таѧ съ со́нмомъ ст҃ы́хъ предста̀ пред̾ тобо́ю, ми́ръ тебѣ̀ да́рꙋѧ и҆ повелѣва́ѧ, да ᲂу҆стро́иши та́мѡ ѻ҆би́тель и҆́ноческꙋю и҆ въ не́й хра́мъ во и҆́мѧ ст҃ы́ѧ трⷪ҇цы. дивѧ́сѧ ᲂу҆́бѡ семꙋ̀ пречꙋ́дномꙋ трикра́тномꙋ бг҃омт҃ернемꙋ трⷪ҇ческомꙋ ꙗ҆вле́нїю, зове́мъ тѝ:

Страннолѣ́пнѡ ꙗ҆ви́сѧ тѝ на воздꙋ́сѣ мт҃рь бж҃їѧ со а҆пⷭ҇лы и҆ мч҃ники и҆ прпⷣбными и҆ про́чими ст҃ы́ми, ᲂу҆казꙋ́ѧй мѣ́сто, на не́мже хра́мъ во и҆́мѧ живонача́льныѧ трⷪ҇цы и҆ ѻ҆би́тель но́вꙋ и҆мѣ́лъ є҆сѝ воздви́гнꙋти на горѣ̀ ѕвѣрине́цтѣй, прпⷣбне ѻ҆́тче, є҆го́же бж҃їимъ поспѣше́нїемъ соверши́въ и҆ ѡ҆свѧти́въ, со ᲂу҆ченики̑ твои́ми немѡ́лчныѧ хвалы̑ возсыла́лъ є҆сѝ въ не́мъ гдⷭ҇еви, зовы́й: А҆ллилꙋ́їа.

Ве́сь є҆сѝ любо́вь неѡскꙋдева́ющаѧ и҆ по́двига зерца́ло нетꙋскне́ющее бы́лъ є҆сѝ, прпⷣбне і҆ѡ́но. ви́дѧще же ре́вностное по бз҃ѣ и҆ жесто́кое житїѐ твоѐ и҆ бра́тїи, непреста́ннѡ въ трꙋдѣ́хъ и҆ поще́нїи подвиза́ющихсѧ и҆ ходѧ́щихъ въ рꙋ́бищныхъ и҆ хꙋды́хъ ѻ҆де́ждахъ, нѣ́цыи ѿ и҆́нѡкъ и҆ всѧ́кагѡ чи́на мїрски́хъ люде́й и҆ кнѧзе́й людски́хъ не то́чїю си́хъ не ѿвраща́хꙋсѧ, но па́че ре́вностїю дꙋхо́вною горѧ́ще и҆ во ѻ҆би́тели кꙋ́пнѡ съ ни́ми подвиза́тисѧ жела́юще, приноша́хꙋ тꙋ̀ и҆мѣ̑нїѧ своѧ̑ на по́льзꙋ ѻ҆́бщꙋю: тѣ́мже зда́телю тоѧ̀ возглаша́емъ та́кѡ:

Всѧ́кое є҆стество̀ а҆́гг҃льское и҆ подви́жникѡвъ мно́жество ᲂу҆диви́шасѧ смире́нїю и҆ человѣколю́бїю твоемꙋ̀, ѻ҆́тче на́шъ і҆ѡ́но, є҆гда̀, а҆рхїмандрі́тства межиго́рскагѡ послꙋша́нїе воспрїѧ́въ, ѳеодо́сїю и҆гꙋ́менꙋ пече́рскомꙋ, ꙗ҆́кѡ жи́тїй ѻ҆́бщихъ на рꙋсѝ ᲂу҆чреди́телю ᲂу҆подо́билсѧ є҆сѝ. и҆ ѡ҆ бра́тїи ст҃ы́ѧ ѡ҆би́тели сеѧ̀, ꙗ҆́кѡ ѡ҆ ча́дѣхъ бж҃їихъ, попече́нїе не ѡ҆ста́вивый, бг҃ꙋ, лю́бѧщемꙋ всѧ́кое своѐ созда́нїе, ѡ҆ тѣ́хъ взыва́лъ є҆сѝ: гдⷭ҇и, послѝ дх҃а ст҃а́гѡ твоегѡ̀ и҆ ᲂу҆тѣ́ши скѡ́рбныѧ дꙋ́ши рабѡ́въ твои́хъ си́хъ. та́кѡ бо во всѧ́комъ послꙋша́нїи смиренномꙋ́дрїѧ красотꙋ̀ показꙋ́ѧ, непреста́ннѡ взыва́лъ є҆сѝ бг҃ꙋ: А҆ллилꙋ́їа.

Виті́йство человѣ́ческое не довлѣ́етъ и҆зрещѝ ѡ҆би́лїе ра́дости дꙋхо́вныѧ, є҆ю́же преисполнѧ́лсѧ є҆сѝ, ѻ҆́тче бг҃оно́сне, є҆гда̀ во вре́мѧ мл҃твы твоеѧ̀ нощны́ѧ, ꙗ҆влѧ́шесѧ тѝ прест҃а́ѧ бцⷣа съ ли́ками чинѡ́въ подви́жническихъ, и҆ ѡ҆бѣтова́нїи непрело́жными дꙋ́шꙋ твою̀ возвеселѝ, ꙗ҆́кѡ при́снаѧ застꙋ́пница ѻ҆би́тели твоеѧ̀ бꙋ́детъ, снабдѣва́ющи и҆ покрыва́ющи ю҆̀ по всѧ̑ дни̑. тѣ́мже и҆ мы̀ сїѧ̑ ра́дѡстнаѧ тебѣ̀ прино́симъ глаго́лы:

Спастѝ хотѧ̀ дꙋ́ши ᲂу҆чєни́къ твои́хъ, ѻ҆те́чески назида́лъ є҆сѝ и҆̀хъ, бг҃омꙋ́дре, ѻ҆́ваго дѣ́йственнымъ сло́вомъ, ѻ҆́ваго приме́ромъ житїѧ̀ твоегѡ̀, съ любо́вїю ѡ҆блича́ѧ и҆ ᲂу҆вѣщава́ѧ и҆̀хъ преꙋспѣва́ти во благоче́стїи и҆ чистотѣ̀: наипа́че же пред̾ кончи́ною твое́ю, всѧ̑ ко спасе́нїю дꙋше́вномꙋ бл҃гопотрє́бнаѧ заповѣ́далъ є҆сѝ и҆̀мъ, и҆ наꙋчи́лъ є҆сѝ и҆̀хъ въ моли́твахъ бо́дрствовати и҆ немо́лчнѡ пѣ́ти бг҃ꙋ: А҆ллилꙋ́їа.

Стѣна̀ застꙋпле́нїѧ бы́ша моли̑твы твоѧ̑, чꙋдотво́рче ст҃ы́й, всѣ̑мъ, съ вѣ́рою къ тебѣ̀ притека́ющымъ во всѧ́кой ско́рби, и҆́бо чистоты̀ ра́ди твоеѧ̀ серде́чныѧ си́ла дх҃о́внаѧ ѿ бг҃а тебѣ̀ дарова́сѧ болѧ́щихъ и҆сцѣлѧ́ти, бѣ́дствꙋющымъ помога́ти, бꙋ̑дꙋщаѧ прорица́ти, ꙗ҆́кѡ сла́вити бли̑жнимъ и҆ да̑льнимъ вели̑чїѧ бж҃їѧ, въ тебѣ̀ ꙗ҆влє́ннаѧ, и҆ зва́ти тебѣ̀ си́це:

Пѣ́нїе всеꙋмиле́нное прине́слъ є҆сѝ прест҃ѣ́й трⷪ҇це во вре́мѧ кончи́ны твоеѧ̀, прпⷣбне, и҆ моли́твѣ сꙋ́щей на ᲂу҆стѣ́хъ твои́хъ, преда́лъ є҆сѝ ст҃ꙋ́ю дꙋ́шꙋ твою̀ въ рꙋ́цѣ жива́гѡ бг҃а, є҆го́же ѿ ю҆́ности возлюби́лъ є҆сѝ, и҆ є҆мꙋ́же до ста́рости масти́тыѧ рабо́талъ є҆сѝ нелицемѣ́рнѡ, тѣ́мже со ᲂу҆пова́нїемъ бл҃ги́мъ ра́достнѡ преше́лъ є҆сѝ къ ѡ҆би́телемъ небє́снымъ, со а҆́гг҃льскими ли̑ки пѣ́ти трїѷпоста́сномꙋ бг҃ꙋ: А҆ллилꙋ́їа.

Ми́рнꙋю кончи́нꙋ твою̀ ви́дѣвше твоѝ ᲂу҆ченицы̀, вели́кїй ᲂу҆го́дниче бж҃їй, ско́рбь разлꙋче́нїѧ съ тобо́ю ᲂу҆тѣше́нїемъ благода́тнымъ раствори́ша, въ ᲂу҆пова́нїи всеси́льнагѡ предста́тельства твоегѡ̀ горѣ̀ ᲂу҆ прⷭ҇то́ла бж҃їѧ, и҆дѣ́же слы́шиши съ любо́вїю тебѣ̀ зовꙋ́щихъ:

Блгⷣти прича́стна ꙗ҆ви́сѧ сщ҃е́ннаѧ ра́ка, тобо́ю сами́мъ соѡрꙋже́ннаѧ, содержа́щаѧ многоцѣлє́бныѧ мѡ́щи твоѧ̀, чꙋдотво́рче ст҃ы́й, и҆́хже по лѣ́тѣхъ мно́зѣхъ ꙗ҆вѝ гдⷭ҇ь во скле́пѣ церко́внѣмъ нетлѣ́нными, и҆ па́ки по надрꙋга́нїю безбѡ́жникъ сокры̀, и҆ па́ки ꙗ҆вѝ въ нѣ́дрѣхъ землѝ невреди́мы, и҆сцѣлє́нїѧ неѡскꙋ́днѡ и҆сточа́ющыѧ, и҆ всѧ́къ недꙋ́гъ врачꙋ́ющыѧ си́лою бг҃а, ди́внагѡ во ст҃ы́хъ свои́хъ ди́внѡ же просла́вльшаго тѧ̀ на небесѝ и҆ на землѝ, є҆мꙋ́же воспѣва́емъ: А҆ллилꙋ́їа.

Пою́ще ра́достнꙋю пѣ́снь хвалы̀ и҆ благодаре́нїѧ человѣколю́бцꙋ бг҃ꙋ, просла́вльшемꙋ тѧ̀ въ землѝ рꙋ́сстѣй чꙋдотво́рца ди́внагѡ и҆ ми́лостивагѡ, мо́лимъ тѧ̀, прпⷣбне ѻ҆́тче на́шъ і҆ѡ́но: бꙋ́ди хода́тай къ немꙋ̀ и҆ моли́твенникъ при́сный ѡ҆ на́съ, зовꙋ́щихъ тѝ:

Ѽ, вели́кїй и҆ пресла́вный чꙋдотво́рче, прпⷣбне ѻ҆́тче на́шъ і҆ѡ́но! ми́лостивѡ прїѧ́въ сїѐ ма́лое моле́нїе на́ше, моли́твами твои́ми сохранѝ на́съ ѿ недꙋ́гѡвъ дꙋше́вныхъ и҆ тѣле́сныхъ въ жи́зни се́й, и҆ ѿ грѧдꙋ́щихъ мꙋче́нїй вѣ́чныхъ и҆зба́ви, и҆ сподо́би на́съ вкꙋ́пѣ съ тобо́ю во црⷭ҇твїи нбⷭ҇нѣмъ вы́нꙋ пѣ́ти бг҃ꙋ: А҆ллилꙋ́їа.

А҆́гг҃льскїй нра́въ и҆мѣ́лъ є҆сѝ, ѻ҆́тче прпⷣбне, и҆ ꙗ҆́кѡ безпло́тный, непоро́чнѡ житїѐ соверши́лъ є҆сѝ на землѝ, ди́вный ѻ҆́бразъ соверше́нства дх҃о́внагѡ на́мъ ѡ҆ста́вивъ, да подража́емъ добродѣ́телємъ твои̑мъ, и҆ зове́мъ тѝ си́це:

И҆збра́нный ᲂу҆го́дниче хрⷭ҇то́въ и҆ чꙋдотво́рче, прпⷣбне ѻ҆́тче і҆ѡ́но, возсїѧ́вый мі́рови, ꙗ҆́кѡ ѕвѣзда̀ бг҃освѣ́тлаѧ, житїѧ̀ твоегѡ̀ добро́тою и҆ мно́жествомъ чꙋдотворе́нїй, восхвалѧ́емъ тѧ̀ любо́вїю въ пѣ́снехъ дꙋхо́вныхъ: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, моли́твами твои́ми ѿ всѧ́кихъ на́съ бѣ́дъ свободѝ, да зове́мъ тѝ:

Ѽ сщ҃е́ннаѧ главо̀, а҆́гг҃ле земны́й и҆ человѣ́че нбⷭ҇ный, прпⷣбне и҆ бг҃оно́сне ѻ҆́тче на́шъ і҆ѡ́но, и҆зрѧ́дный ᲂу҆го́дниче прест҃ы́ѧ и҆ є҆диносꙋ́щныѧ трⷪ҇цы, ꙗ҆влѧ́ющїй мнѡ́гїѧ млⷭ҇ти живꙋ́щимъ во ст҃ѣ́й ѻ҆би́тели твое́й, и҆ всѣ̑мъ, съ вѣ́рою и҆ любо́вїю притека́ющымъ къ тебѣ̀. и҆спросѝ на́мъ всѧ̑ бл҃гопотрє́бнаѧ къ житїю̀ семꙋ̀ вре́менномꙋ, и҆ нꙋ̑жнаѧ къ вѣ́чномꙋ сп҃се́нїю на́шемꙋ. посо́бствꙋй предста́тельствомъ твои́мъ, ᲂу҆го́дниче бж҃їй, всѣ̑мъ на́мъ, къ мощє́мъ твои̑мъ ст҃ы̑мъ припа́дающимъ, на врагѝ ви̑димыѧ и҆ неви̑димыѧ ѡ҆долѣ́нїе, да въ ми́ре глꙋбо́цѣ пребꙋ́детъ ст҃а́ѧ правосла́внаѧ цр҃ковь хрⷭ҇то́ва, и҆ въ бл҃гоꙋстрое́нїи зи́ждетсѧ ѻ҆би́тель, ю҆́же ты̀ ѡ҆снова̀, во всѧ́комъ бл҃гоче́стїи нерꙋши́мо. бꙋ́ди всѣ̑мъ на́мъ, чꙋдотво́рче ст҃ы́й, помо́щникъ ско́рый во всѧ́кой ско́рби и҆ ѡ҆бстоѧ́нїи. наипа́че же въ ча́съ кончи́ны на́шеѧ ꙗ҆ви́сѧ на́мъ застꙋ́пникъ бл҃госе́рдный, да не пре́дани бꙋ́демъ на мыта́рствахъ воздꙋ́шныхъ вла́сти ѕло́бнагѡ мїроде́ржца, но да сподо́бимсѧ непреткнове́ннагѡ восхо́да въ црⷭ҇твїе нбⷭ҇ное. є҆́й, ѻ҆́тче, мл҃твенниче на́шъ при́сный! не посрамѝ ᲂу҆пова́нїѧ на́шегѡ, не пре́зри смире́ннаѧ молє́нїѧ на̑ша, и҆ предста́тельствꙋй за на́съ пред̾ прⷭ҇то́ломъ живонача́льныѧ трⷪ҇цы, да сподо́бимсѧ вкꙋ́пѣ съ тобо́ю и҆ со всѣ́ми ст҃ы́ми, мы̀ недосто́йнїи, въ селе́нїихъ ра́йскихъ сла́вити вели́чїе, блгⷣть и҆ млⷭ҇ть є҆ди́нагѡ въ трⷪ҇цѣ бг҃а, ѻ҆ц҃а̀ и҆ сн҃а и҆ ст҃а́гѡ дх҃а, во вѣ́ки вѣкѡ́въ. А҆ми́нь.