Акафист святому преподобному Аврамию (Авраамию), архимандриту Ростовскому

И҆збра́нный добродѣ́телей подви́жниче и҆ ᲂу҆че́нїѧ хрⷭ҇то́ва проповѣ́дниче, прпⷣбне ѻ҆́тче а҆вра́мїе, похва̑льнаѧ восписꙋ́емъ тѝ по достоѧ́нїю: ты́ же, ꙗ҆́кѡ и҆мѣ́ѧй дерзнове́нїе ко хрⷭ҇тꙋ̀ бг҃ꙋ на́шемꙋ, спосо́бствꙋй на́мъ твои́ми мл҃твами сп҃сти́сѧ ѿ всѧ́кихъ скорбе́й и҆ бѣ́дъ и҆ ѡ҆ѕлобле́нїй, да зове́мъ тѝ:

Ꙗ҆́кѡ а҆́гг҃ла земна́гѡ, ꙗ҆вѝ тѧ̀ гра́дꙋ росто́вꙋ цр҃ь а҆́гг҃лѡвъ: прови́дѣвъ твоѐ ѿ і҆дѡлослꙋже́нїѧ къ немꙋ̀ ѡ҆браще́нїе, непостижи̑мымъ ѡ҆́бразомъ призва̀ тѧ̀ и҆з̾ тмы̀ въ чꙋ́дный сво́й свѣ́тъ: на́съ же, велича́ющихъ неисповѣди́мꙋю бл҃гость є҆гѡ̀, наꙋчѝ взыва́ти тебѣ̀ такова̑ѧ:

Ви́дѧще роди́тели твоѝ тебѐ, прпⷣбне, на до́лзѣ вре́мени въ лю́томъ разслабле́нїи сꙋ́ща, недоꙋмѣва́хꙋ: ѻ҆ба́че пре́лестїю многобо́жїѧ ѕѣлѡ̀ ѡ҆слѣпле́ни бы́вше, не возжелѣ́ша ѡ҆брати́тисѧ къ є҆ди́номꙋ и҆́стинномꙋ бг҃ꙋ, подаю́щемꙋ всѣ̑мъ стра́ждꙋщымъ ско́рое и҆сцѣле́нїе, и҆ вкꙋ́пѣ съ тобо́ю воспѣва́ти є҆мꙋ̀: А҆ллилꙋ́їа.

Ра́зꙋмъ недоразꙋмѣва́емый ѡ҆ несозда́нномъ бж҃ествѣ̀ ᲂу҆разꙋмѣ́лъ є҆сѝ, прпⷣбне, и҆ положи́лъ є҆сѝ въ се́рдцѣ твое́мъ ѡ҆брати́тисѧ ко хрⷭ҇тꙋ̀ и҆ послѣ́довати є҆гѡ̀ ᲂу҆че́нїю. тѣ́мже мы̀, чꙋдѧ́щесѧ ѡ҆ ско́рѣмъ твое́мъ на лꙋ̑чшаѧ преложе́нїю, дерза́емъ восхвалѧ́ти тѧ̀ таковы́ми гла̑сы:

Си́ла вы́шнѧгѡ внеза́пꙋ на́йде на тѧ̀, прпⷣбне, и҆ стѧгнꙋ̀ соста́въ тѣ́ла твоегѡ̀. ты́ же, воста́въ ѿ ѻ҆дра̀ твоегѡ̀, а҆́ки николи́же болѣ́вый, въ ра́дости неизглаго́ланнѣй, бл҃годарѧ̀ безме́зднаго врача̀ твоего̀, є҆гѡ́же пре́жде не вѣ́дѣлъ є҆сѝ і҆и҃съ хрⷭ҇та̀, возопи́лъ є҆мꙋ̀: А҆ллилꙋ́їа.

И҆мѣ́ѧ помышле́нїе въ се́рдцѣ свое́мъ є҆́же послꙋжи́ти хрⷭ҇тꙋ̀, дарова́вшемꙋ тебѣ̀ и҆сцѣле́нїе, ѻ҆́тай и҆зше́лъ є҆сѝ и҆з̾ до́мꙋ роди́телей твои́хъ и҆ прилѣпи́лсѧ є҆сѝ ко хрⷭ҇тꙋ̀ гдⷭ҇ꙋ. тѣ́мъ мы̀, ᲂу҆блажа́ѧ бл҃го́е твоѐ и҆зволе́нїе, вопїе́мъ тѝ си́це:

Бꙋ́рѧ недоꙋмѣ́нїй смꙋща́ше тѧ̀, прпⷣбне, є҆щѐ не креще́нꙋ тѝ сꙋ́щꙋ, є҆́же ка́кѡ полꙋчи́ти зна́менїе хрⷭ҇тїа́нскїѧ вѣ́ры. бг҃ъ же всѧ́кїѧ ᲂу҆тѣ́хи та́йнымъ свои́мъ промышле́нїемъ приведѐ тѧ̀ въ ѡ҆би́тель и҆́ночествꙋющихъ, да тꙋ̀ возроди́шисѧ водо́ю и҆ дх҃омъ, и҆ въ чистотѣ̀ се́рдца посредѣ̀ ли́ка и҆́ночества воспѣва́еши є҆мꙋ̀: А҆ллилꙋ́їа.

Слы́шавше бра́тїѧ ѡ҆ прише́ствїи твое́мъ въ ѡ҆би́тель и҆́хъ, пребл҃же́нне, и҆ ви́дѣвше тѧ̀ благопрїѧ́тна и҆ разꙋ́мна, прїѧ́ша съ ра́достїю, и҆ крести́вше во и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а, причто́ша къ ли́кꙋ своемꙋ̀. мы́ же, про́мыслꙋ бж҃їю, ѡ҆ тебѣ̀ ꙗ҆вле́нномꙋ, чꙋдѧ́щесѧ, восхвалѧ́емъ тѧ̀ си́це:

Бг҃оте́чнаѧ ѕвѣзда̀ ꙗ҆ви́лсѧ є҆сѝ, ѻ҆́тче а҆вра́мїе, въ предѣ́лѣхъ гра́да росто́ва возсїѧ́вшаѧ: не терпѧ̀ бо сла́вы и҆ похвале́нїѧ человѣ́ческагѡ, ᲂу҆мы́слилъ є҆сѝ сокры́тисѧ въ невѣ́дѡмыѧ страны̑. тѣ́мже прише́дъ въ чꙋ́дскїй коне́цъ, всели́лсѧ є҆сѝ бли́з̾ є҆зе́ра не́ро въ пꙋ́стѣ мѣ́стѣ, и҆дѣ́же і҆́дѡлъ веле́съ стоѧ́ше, є҆мꙋ́же неразꙋ́мнїи лю́дїе покланѧ́хꙋсѧ, ты́ же вѣ́рою крѣ́пкѡ воспѣва́лъ є҆сѝ бг҃ꙋ: А҆ллилꙋ́їа.

Ви́дѣвше благоразꙋ́мнїи и҆ бг҃обоѧ́зненнїи лю́дїе гра́да росто́ва ᲂу҆едине́нное и҆ благочести́вое по бз҃ѣ житїѐ твоѐ, ѕѣлѡ̀ возлюби́ша тѧ̀ и҆ попремно́гꙋ чествова́хꙋ. тѣ́мже и҆ ѿ на́съ прїимѝ похвалы̑ сицєвы́ѧ:

Проповѣ́дꙋетъ ра́достнѡ гра́дъ росто́въ вели̑кїѧ трꙋды̀ твоѧ̑ и҆ по́двиги, бл҃же́нне а҆вра́мїе, ꙗ҆́же под̾ѧ́лъ є҆сѝ, є҆гда̀ ꙗ҆зы́ческое нече́стїе разрꙋша́ше и҆ въ сердца́хъ люде́й и҆́стиннꙋю вѣ́рꙋ и҆ бл҃гоче́стїе насажда́ше: є҆ди́нѣмъ бо того̀ жела́нїемъ горѧ́ше, да всѣ́хъ приведе́ши ко хрⷭ҇тꙋ̀ и҆ наꙋчи́ши вкꙋ́пѣ съ тобо́ю воспѣва́ти є҆мꙋ̀: А҆ллилꙋ́їа.

Возсїѧ̀ па́че со́лнца бг҃оꙋго́дное житїѐ твоѐ, всехва́льне ѻ҆́ч҃е а҆вра́мїе, и҆ ꙗ҆́кѡже ѕвѣ̑зды небє́сныѧ, ѡ҆зари́ша добродѣ̑тели твоѧ̀ зе́млю росто́вскꙋю, ѡ҆ ни́хъ же и҆ мы̀ бл҃годарѧ́ще хрⷭ҇та̀ бг҃а, да́вшагѡ тѝ таковꙋ́ю бл҃года́ть, восхвалѧ́емъ тѧ̀ си́це:

Хотѧ̀ пребл҃гі́й бг҃ъ ᲂу҆тѣ́шити тѧ̀ въ ско́рби твое́й и҆ ѡ҆ лю́дѣхъ, въ ѕловѣ́рїи ꙗ҆зы́честѣмъ погиба́ющихъ, бл҃же́ннѣ а҆вра́мїе, посла̀ на по́мощь къ тебѣ̀ возлю́бленнагѡ ᲂу҆ченика̀ своегѡ̀ і҆ѡа́нна бг҃осло́ва, ꙗ҆́кѡ да ᲂу҆крѣпи́тъ тѧ̀ къ низложе́нїю скве́рнагѡ і҆́дѡла веле́са: ты́ же, жезло́мъ ѿ негѡ̀ воѡрꙋже́нъ и҆ вѣ́рою ᲂу҆твержде́нъ, въ дерзнове́нїи мно́зѣ возопи́лъ є҆сѝ бг҃ꙋ: А҆ллилꙋ́їа.

Но́вагѡ вѣ́ры ревни́телѧ, ꙗ҆́кѡже нїкола́а мѵ́ръ лѷкі́йскихъ свѧти́телѧ, ви́димъ тѧ̀, бг҃оно́сне ѻ҆́ч҃е а҆вра́мїе: ꙗ҆́кѡ же бо то́й, ре́вностїю бж҃е́ственною распала́емъ, ка́пище ꙗ҆зы́ческое въ є҆фе́сѣ разсы́па до ѡ҆снова́нїѧ, си́це и҆ ты̀ бг҃оме́рзскагѡ і҆́дѡла веле́са во гра́дѣ росто́вѣ си́лою крѣ́пкагѡ сокрꙋши́лъ є҆сѝ: сегѡ̀ ра́ди по достоѧ́нїю прїимѝ ѿ на́съ похвалы̑ сицевы̑ѧ:

Стра́нное чꙋ́до ви́дѣвше въ хра́минѣ твое́й благовѣ́рнїи кнѧ́зїе, прише́дше бл҃гослове́нїе ѿ тебє̀ по ѻ҆бы́чаю прїѧ́ти, є҆гда̀ ды́мъ че́рмнъ и҆ смра́денъ ѕѣлѡ̀ и҆зы́де ѿ ᲂу҆мыва́льницы твоеѧ̀, ᲂу҆жасо́шасѧ. ты́ же, ᲂу҆разꙋмѣ́въ ѕлокова́рнагѡ лꙋка́вагѡ дꙋ́ха дѣ́йствїе, поꙋчи́въ кнѧ́зи ѻ҆па́снѡ блюстѝ себѐ ѿ ко́зней вра́жїихъ, кꙋ́пнѡ съ ни́ми возопи́лъ є҆сѝ бг҃ꙋ: А҆ллилꙋ́їа.

Ве́сь ра́вною ко всѣ̑мъ горѣ́лъ є҆сѝ любо́вїю, достохва́льне ѻ҆́ч҃е а҆вра́мїе, и҆ ꙗ҆́кѡ же въ животѣ̀ твое́мъ, та́кѡ и҆ ны́нѣ всѧ̑ вѣ́рою къ тебѣ̀ прибѣга́ющыѧ, мл҃твами твои́ми ѡ҆гражда́еши ѿ всѧ́кагѡ ѕла̀. досто́йнѣ ᲂу҆́бѡ прїе́млеши ѿ всѣ́хъ похвалы̑ сицевы̑ѧ:

Є҆стество̀ а҆́гг҃льское подража́ѧ, не ᲂу҆срами́лсѧ є҆сѝ, достобл҃же́нне а҆вра́мїе, є҆гда̀ по навѣ́тꙋ всеѕло́бнагѡ врага̀ приведе́нъ бы́лъ є҆сѝ въ є҆ди́нѣй раздра́ннѣй власѧни́цѣ къ вели́комꙋ кнѧ́зю влади́мїрꙋ, но па́че самаго̀ того̀ врага̀ смире́нїемъ и҆ неѕло́бїемъ посрами́лъ є҆сѝ. чесѡ̀ ра́ди съ вели́кою че́стїю въ ѡ҆би́тель твою̀ возвра́щшесѧ и҆ ми́ръ и҆ бл҃гослове́нїе ча́дѡмъ твои̑мъ подава́ѧ, въ ра́дости дꙋхо́внѣй возопи́лъ є҆сѝ посредѣ̀ и҆́хъ бг҃ꙋ: А҆ллилꙋ́їа.

Виті́йствꙋющїй ѧ҆зы́къ не мо́жетъ досто́йнѡ восхвали́ти тѧ̀, пресла́вне ѻ҆́ч҃е а҆вра́мїе, мнѡ́гїѧ бо и҆ пресла̑вныѧ по́двиги въ животѣ̀ твое́мъ соверши́лъ є҆сѝ: мы́ же, къ тебѣ̀ любо́вїю подвиза́емїи, во смире́нїи се́рдца дерза́емъ воспѣва́ти тебѣ̀ такова̑ѧ:

Спастѝ хотѧ̀ дꙋ́шꙋ є҆рмоге́на нѣ́коегѡ, по дѣ́йствꙋ дїа́волю въ сомнѣ́нїе ѡ҆ тебѣ̀ впа́дшаго, досточꙋ́дне а҆вра́мїе, ма́лѡ нѣ́коликѡ дне́й наказа́въ, за моли̑твы бра́тїи ѡ҆би́тели твоеѧ̀ па́ки поми́ловалъ є҆сѝ. ѻ҆́нъ же, позна́въ своѐ согрѣше́нїе, просла́ви тебѣ̀ неѕло́биваго бл҃годѣ́телѧ своего̀, и҆ бг҃ꙋ, тобо́ю чꙋдодѣ́ющемꙋ, возопѝ: А҆ллилꙋ́їа.

Стѣна̀ гра́дꙋ росто́вꙋ ты̀ є҆сѝ, чꙋдотво́рче ст҃ы́й а҆вра́мїе, и҆ всѣ̑мъ, прибѣга́ющымъ къ тебѣ̀, наде́жда крѣ́пкаѧ и҆ застꙋпле́нїе. тѣ́мже и҆ на́съ, любо́вїю ᲂу҆блажа́ющихъ тѧ̀, ѿ недꙋ́гѡвъ и҆ нꙋ́ждъ свобожда́й, вопїю́щихъ тебѣ̀ такова̑ѧ:

Пѣ́нїе всѧ́кое не довлѣ́етъ къ похвалѣ̀ твое́й, прпⷣбне ѻ҆́тче а҆вра́мїе, кто́ бо возмо́жетъ по достоѧ́нїю просла́вити многотрꙋ́дное житїѐ твоѐ, и҆лѝ восхвали́ти по́двиги твоѧ̑, ꙗ҆̀же по всѧ̑ днѝ и҆ но́щи въ постѣ́хъ и҆ бдѣ́нїихъ, стоѧ́нїихъ и҆ колѣнопреклоне́нїихъ бг҃оꙋго́днѣ под̾ѧ́лъ є҆сѝ, и҆́хъ же ра́ди предстоѧ̀ ны́нѣ прⷭ҇то́лꙋ бж҃їю на нб҃сѣ́хъ, со всѣ́ми ст҃ы́ми пое́ши хрⷭ҇тꙋ̀ бг҃ꙋ: А҆ллилꙋ́їа.

Свѣтоза́рное свѣти́ло, не то́чїю гра́дъ росто́въ ѡ҆зарѧ́ющее, но и҆ всѧ̑ гра́ды и҆ страны̑ рѡссі̑йскїѧ просвѣща́ющее, зри́мъ тѧ̀, свѣтоѧвле́нне ѻ҆́тче а҆вра́мїе: съ невеще́ственными бо а҆́гг҃льскими свѣ́ты предстоѧ̀ трⷪ҇чномꙋ несозда́нномꙋ свѣ́тꙋ, и҆ ѿ него̀ бжⷭ҇твенными лꙋча́ми ѡ҆сїѧва́емъ, ѡ҆блистава́еши вѣ́рныхъ, вопїю́щихъ тѝ си́це:

Бл҃года́ть да́ннꙋю тѝ ѿ бг҃а свѣ́дꙋще, и҆ на твоѐ мо́щное къ немꙋ̀ предста́тельство ᲂу҆пова́юще, ᲂу҆ми́льнѡ взыва́емъ къ тебѣ̀, чꙋдотво́рче ст҃ы́й: молѝ неисповѣди́мꙋю бл҃гость є҆гѡ̀, ꙗ҆́кѡ да и҆зба́витъ на́съ, недосто́йныхъ ра̑бъ свои́хъ, ѿ и҆скꙋше́нїй вра́жїихъ, да пре́лести є҆гѡ̀ и҆зба́вльшесѧ, чи́стымъ се́рдцемъ и҆ не скве́рными ᲂу҆стна́ми воспѣва́емъ бг҃ꙋ: А҆ллилꙋ́їа.

Пою́ще твоѐ честно́е преставле́нїе, чти́мъ ра́достнѡ па́мѧть твою̀, и҆ къ твоемꙋ̀ цѣльбоно́сномꙋ гро́бꙋ припа́дающе, бл҃годаре́нїе прино́симъ, ꙗ҆́кѡ и҆ по преставле́нїи твое́мъ на́съ не ѡ҆ставлѧ́еши, но ми́лостивнѡ призира́еши, посѣща́еши и҆ застꙋпа́еши. тѣ́мже слы́шиши ѿ на́съ такова̑ѧ:

Ѽ прпⷣбне и҆ пребл҃же́нне ѻ҆́тче а҆вра́мїе, свѣти́льниче гра́да росто́ва! ны́нѣшнее на́ше прїе́мый приноше́нїе, принесѝ те́плꙋю мл҃твꙋ твою̀ ко гдⷭ҇ꙋ, ꙗ҆́кѡ странꙋ̀ на́шꙋ да и҆зба́витъ ѿ всѣ́хъ врагѡ́въ ви́димыхъ и҆ неви́димыхъ, ѿ нашє́ствїѧ и҆ноплеме́нныхъ, ѿ недꙋ́га и҆ гла́да, ѿ всѧ́кїѧ ско́рби и҆ смертоно́сныѧ ꙗ҆́звы, и҆ бꙋ́дꙋщїѧ и҆змѝ мꙋ̑ки всѣ́хъ вопїю́щихъ къ немꙋ̀: А҆ллилꙋ́їа.

Ꙗ҆́кѡ а҆́гг҃ла земна́гѡ, ꙗ҆вѝ тѧ̀ гра́дꙋ росто́вꙋ цр҃ь а҆́гг҃лѡвъ: прови́дѣвъ твоѐ ѿ і҆дѡлослꙋже́нїѧ къ немꙋ̀ ѡ҆браще́нїе, непостижи̑мымъ ѡ҆́бразомъ призва̀ тѧ̀ и҆з̾ тмы̀ въ чꙋ́дный сво́й свѣ́тъ: на́съ же, велича́ющихъ неисповѣди́мꙋю бл҃гость є҆гѡ̀, наꙋчѝ взыва́ти тебѣ̀ такова̑ѧ:

И҆збра́нный добродѣ́телей подви́жниче и҆ ᲂу҆че́нїѧ хрⷭ҇то́ва проповѣ́дниче, прпⷣбне ѻ҆́тче а҆вра́мїе, похва̑льнаѧ восписꙋ́емъ тѝ по достоѧ́нїю: ты́ же, ꙗ҆́кѡ и҆мѣ́ѧй дерзнове́нїе ко хрⷭ҇тꙋ̀ бг҃ꙋ на́шемꙋ, спосо́бствꙋй на́мъ твои́ми мл҃твами сп҃сти́сѧ ѿ всѧ́кихъ скорбе́й и҆ бѣ́дъ и҆ ѡ҆ѕлобле́нїй, да зове́мъ тѝ:

Ѽ прпⷣбне ѻ҆́тче на́шъ а҆вра́мїе! не забꙋ́ди на́съ грѣ́шныхъ, но помина́й всегда̀ во ст҃ы́хъ твои́хъ и҆ бг҃опрїѧ́тныхъ мл҃твахъ ста́до твоѐ, є҆́же са́мъ собра́лъ є҆сѝ, и҆ молѝ за ны̀, ча̑да твоѧ̑, ѻ҆́тче сщ҃е́нный, ꙗ҆́кѡ и҆мѣ́ѧй дерзнове́нїе ко гдⷭ҇ꙋ: не мни́мъ бо тѧ̀ ме́ртва сꙋ́ща, а҆́ще и҆ преста́вилсѧ є҆сѝ ѿ на́съ, па́стырю на́шъ до́брый. сѐ мо́щи твоѧ̑ ст҃ы̑ѧ пред̾ ѻ҆чи́ма на́шима, ст҃а́ѧ же твоѧ̀ дꙋша̀, со а҆́гг҃льскими безпло́тныхъ ли́ки прⷭ҇то́лꙋ всѣ́хъ цр҃ѧ̀ предстоѧ́щи, досто́йнѡ весели́тсѧ. и҆спросѝ ᲂу҆́бѡ на́мъ вре́мѧ на покаѧ́нїе, ꙗ҆́кѡ да возмо́жемъ невозбра́ннѡ прейтѝ ѿ землѝ на нб҃о, и҆ вѣ́чныѧ мꙋ́ки и҆зба́вившесѧ, нбⷭ҇нагѡ црⷭ҇твїѧ наслѣ̑дницы бꙋ́демъ со всѣ́ми пра́ведными, ѿ вѣ́ка бл҃гоꙋгоди́вшими гдⷭ҇ꙋ на́шемꙋ і҆и҃сꙋ хрⷭ҇тꙋ̀, є҆мꙋ́же подоба́етъ всѧ́каѧ сла́ва, че́сть и҆ поклоне́нїе со ѻ҆ц҃е́мъ и҆ ст҃ы́мъ дх҃омъ ны́нѣ и҆ при́снѡ и҆ во вѣ́ки вѣкѡ́въ. А҆ми́нь.