Акафист святому праведному Павлу Таганрогскому
Утвержден Священным Синодом 14.05.2018 (журнал № 38).
Память: 23 марта (10 марта ст. ст.); 20 июня (07 июня ст. ст.)
Утвержден для общецерковного использования.
Конда́к 1.
Избра́нный чудотво́рче и уго́дниче Христо́в, пути́ небла́зненнаго ко спасе́нию о́браз подава́яй и ду́ха теплото́ю ми́ра хла́д согрева́яй, благода́рно воспева́ем ти́, о́тче Па́вле; ты́ же, име́яй ве́лие дерзнове́ние ко Го́споду, от вся́кия ско́рби свободи́ ве́рою зову́щих ти́:
Ра́дуйся, святы́й пра́ведный Па́вле, преди́вный чудотво́рче.
И́кос 1.
А́нгелом уподо́битися возжеле́вый, на земли́ живы́й, богому́дре Па́вле, от ю́ности твоея́ кра́сная ми́ра сего́ отве́ргл еси́; Христа́ ра́ди земна́я расточи́вый, небе́сная преумно́жил еси́. Те́мже ны́не слы́шиши от все́х похвалу́ сицеву́ю:
Ра́дуйся, ве́тве благопло́днаго дре́ва земна́го; ра́дуйся, сонасле́дниче Ца́рствия Небе́снаго.
Ра́дуйся, пути́ те́снаго ко спасе́нию избра́ние; ра́дуйся, неусы́пное благода́ти стяжа́ние.
Ра́дуйся, ева́нгельскаго жития́ о́браз яви́вый; ра́дуйся, пре́лесть ми́ра те́м обличи́вый.
Ра́дуйся, фимиа́ме чистоты́ благоуха́нный; ра́дуйся, све́том Бо́жия любве́ осия́нный.
Ра́дуйся, утеше́ние люде́й благочести́вых; ра́дуйся, похвало́ иере́ев боголюби́вых.
Ра́дуйся, моли́твы непреста́нное де́лание; ра́дуйся, моле́ний ско́рое услы́шание.
Ра́дуйся, святы́й пра́ведный Па́вле, преди́вный чудотво́рче.
Конда́к 2.
Ви́девый ре́вность твою́ о спасе́нии души́, боголюбе́зне Па́вле, роди́тель тво́й, про́мыслу Бо́жию вне́м, отпусти́ тя на стези́ стра́нничества, благослове́ние ти́ препода́в; ты́ же, о го́рнем помышля́я, вы́ну ко Го́споду взыва́л еси́: Аллилу́иа.
И́кос 2.
Разуме́ние богоразу́мное достоя́ние твое́ бы́сть, блаже́нне Па́вле, я́ко до́м о́тчий оста́вил еси́, Ца́рствия Небе́снаго взыску́я, и поко́й теле́сный презре́в, в простоту́ и нестяжа́ние обле́клся еси́; лю́дие же ве́рнии, тща́ние твое́ зря́ще, во умиле́нии пою́т ти́:
Ра́дуйся, по́чести ми́ра ни во что́же вмени́вый; ра́дуйся, стра́нническое житие́ возлюби́вый.
Ра́дуйся, о смиренному́дрии раде́ние; ра́дуйся, в моли́твенном по́двизе поспеше́ние.
Ра́дуйся, рабо́м свои́м свобо́ду дарова́вый; ра́дуйся, себе́ раба́ ве́рна Бо́гу сотвори́вый.
Ра́дуйся, поста́ ра́достное несе́ние; ра́дуйся, поко́я тле́ннаго отверже́ние.
Ра́дуйся, су́етнаго бога́тства отврати́выйся; ра́дуйся, да́ры духо́вными обогати́выйся.
Ра́дуйся, и́стиннаго богопозна́ния обре́тение; ра́дуйся, Про́мысла Госпо́дня явле́ние.
Ра́дуйся, святы́й пра́ведный Па́вле, преди́вный чудотво́рче.
Конда́к 3.
Си́лою благода́ти свы́ше укрепля́емь, по́двиг пра́веднаго жития́ всему́ ми́ру яви́л еси́, тру́дниче Бо́жий, в трезве́нии же и моли́тве дни́ и но́щи пребыва́я, стро́гостию воздержа́ния пло́ть умертви́л еси́, я́коже и А́нгелом диви́тися кре́пости твое́й, воспева́ющим Творцу́: Аллилу́иа.
И́кос 3.
Име́я ве́ру непосты́дную и любо́вь нелицеме́рную ко Го́споду, смиренному́дре Па́вле, ве́лиих дарова́ний от Него́ удосто́ился еси́, во е́же наставля́ти заблу́ждшия на стези́ спасе́ния, глаго́лющим ти́:
Ра́дуйся, избра́нниче Небе́с преудо́бренный; ра́дуйся, сосу́де, Свята́го Ду́ха испо́лненный.
Ра́дуйся, та́йны ду́ш челове́ческих прозрева́яй; ра́дуйся, судьбы́ Бо́жия лю́дем открыва́яй.
Ра́дуйся, опло́те благоче́стия, Про́мыслом Бо́жиим ми́ру явле́нный; ра́дуйся, свети́льниче, Го́споду возжже́нный.
Ра́дуйся, ве́ру в немощны́х укрепля́яй; ра́дуйся, вра́жия наве́ты разруша́яй.
Ра́дуйся, неради́вых покая́нное пробужде́ние; ра́дуйся, нечу́вствием окамене́нных умиле́ние.
Ра́дуйся, вино́ цельбоно́сное, ра́ны омыва́ющее; ра́дуйся, ми́ро чудотво́рное, сердца́ исцеля́ющее.
Ра́дуйся, святы́й пра́ведный Па́вле, преди́вный чудотво́рче.
Конда́к 4.
Бу́рею скорбе́й потопля́еми и в грехо́вную печа́ль погружа́еми, с наде́ждею взира́ем на тя́, святы́й ко́рмчий, я́ко моли́твою не́когда мо́ря волне́ние укроти́вшаго; те́мже и ны́не ко бре́гу спасе́ния тобо́ю направля́еми, с благода́рностию вопие́м Бо́гови: Аллилу́иа.
И́кос 4.
Слы́шаще о благомо́щии твое́м, вси́ тружда́ющиися и обремене́ннии притека́ют к тебе́, уго́дниче Христо́в, зане́ вои́стину подае́т Госпо́дь моли́твами твои́ми поко́й и ра́дование все́м, та́ко велича́ющим тя́:
Ра́дуйся, в ско́рби ра́дости подая́ние; ра́дуйся, во отча́янии луче́ спасе́ния.
Ра́дуйся, благопристу́пный уте́шителю; ра́дуйся, неистощи́мый ми́лости пода́телю.
Ра́дуйся, ча́д наде́жное сохране́ние; ра́дуйся, неду́гов и́х во здра́вие преложе́ние.
Ра́дуйся, роди́тельския сле́зы осуша́яй; ра́дуйся, упова́нию на Го́спода науча́яй.
Ра́дуйся, укроще́ние стихи́и страсте́й; ра́дуйся, разсе́яние мглы́ напа́стей.
Ра́дуйся, лампа́до неугаси́мая доброде́лания; ра́дуйся, свеще́ присногоря́щая милосе́рдия.
Ра́дуйся, святы́й пра́ведный Па́вле, преди́вный чудотво́рче.
Конда́к 5.
Богопросвеще́нный ра́зум стяжа́в, любому́дре Па́вле, о спасе́нии бли́жних раде́л еси́ и, труды́ человеколю́бия неосла́бне творя́, те́х науча́л еси́ возноси́ти хвалу́ Бо́гу: Аллилу́иа.
И́кос 5.
Ви́дяще по́двиги твоя́, душеве́дче Па́вле, не́кий тщесла́вный челове́к с надме́нием дерза́ше подража́ти тебе́; оба́че ты́, вну́тренняя прозрева́я, ве́тхому ме́ху того́ уподо́бил еси́. Помози́ и на́м, свя́те, тщесла́вие побежда́ти и се́тей вра́жиих избега́ти, вопию́щим такова́я:
Ра́дуйся, ве́ры богоизбра́нный учи́телю; ра́дуйся, усе́рдия самочи́ннаго обличи́телю.
Ра́дуйся, прельще́нных нело́жное вразумле́ние; ра́дуйся, го́рдости умовре́дныя посрамле́ние.
Ра́дуйся, ста́рче, сокрове́нная устроя́яй; ра́дуйся, о́тче, в послуша́нии ча́д твои́х наставля́яй.
Ра́дуйся, я́ко всему́дренне ду́ши врачу́еши; ра́дуйся, я́ко смире́ния о́браз показу́еши.
Ра́дуйся, плодо́в духо́вных умноже́ние; ра́дуйся, пра́веднаго жития́ зна́мение.
Ра́дуйся, кро́тости Христо́вой уподобле́ние; ра́дуйся, земли́ блаже́нных насле́дование.
Ра́дуйся, святы́й пра́ведный Па́вле, преди́вный чудотво́рче.
Конда́к 6.
Пропове́дуя житие́м твои́м све́т Ева́нгелия во тьме́ грехо́вней пребыва́ющим, ве́рный ра́бе Бо́жий, на распу́тиих призыва́л еси́ на пи́р бра́чный ни́щия и бе́дныя, слепы́я и хромы́я, да возвели́чат и́мя Госпо́дне, немо́лчно пою́ще: Аллилу́иа.
И́кос 6.
Возсия́нием ри́з твои́х, досточу́дне Па́вле, я́ко светови́ден сто́лп яви́ тя Госпо́дь лю́дем Свои́м, дивя́щимся сни́тию свы́ше на тебе́ благода́ти и сла́вящим тя́:
Ра́дуйся, любо́вию О́тчею осия́нный; ра́дуйся, да́ры Свята́го Ду́ха сниска́вый.
Ра́дуйся, и́мя Христо́во непреста́нно помина́вый; ра́дуйся, Стра́сти Его́ благогове́йно почита́вый.
Ра́дуйся, слу́жбы Бо́жия ревни́телю; ра́дуйся, благоле́пия хра́мов попечи́телю.
Ра́дуйся, ве́рности Пресвяте́й Тро́ице горе́ние; ра́дуйся, при́сное па́мятование о спасе́нии.
Ра́дуйся, сердца́ я́ко лампа́ды возжига́вый; ра́дуйся, в ду́се любве́ насле́дие воспита́вый.
Ра́дуйся, скрижа́ле, Творце́м начерта́нная; ра́дуйся, броне́ пра́вды, во бра́ни испыта́нная.
Ра́дуйся, святы́й пра́ведный Па́вле, преди́вный чудотво́рче.
Конда́к 7.
Не хотя́ утаи́ти безве́стная и та́йная прему́дрости Бо́жия, ди́вный ста́рче, священнои́ноку еди́ному предре́кл еси́ служе́ние ве́лие во гра́де Иерусали́мсте; внегда́ же ви́дети тому́ сверше́ние проро́чества, хвалу́ Вы́шнему вознесе́: Аллилу́иа.
И́кос 7.
Новозаве́тнаго открове́ния прия́телище и за́поведей Госпо́дних усе́рдный исполни́телю, Христа́ все́м се́рдцем возлюби́л еси́, подо́бне и и́скренняго своего́ до конца́; сего́ ра́ди ны́не слы́шиши благода́рное пе́ние:
Ра́дуйся, блаже́нство ева́нгельское избра́вый; ра́дуйся, наслажде́ние тле́нное попра́вый.
Ра́дуйся, одея́ние смире́ния боготка́нное; ра́дуйся, ковче́же ми́лости Боже́ственныя.
Ра́дуйся, тала́нты земны́я умно́живый; ра́дуйся, сокро́вища небе́сная собра́вый.
Ра́дуйся, озаре́ние свы́ше прие́мый; ра́дуйся, от избы́тка се́рдца бли́жнему подава́вый.
Ра́дуйся, водо́ю живо́ю ду́ши напоя́яй; ра́дуйся, ко Исто́чнику жи́зни обраща́яй.
Ра́дуйся, со́ле земли́, е́юже да осоли́мся; ра́дуйся, све́те ми́ру, и́мже да просвети́мся.
Ра́дуйся, святы́й пра́ведный Па́вле, преди́вный чудотво́рче.
Конда́к 8.
Стра́нничеством ду́х укрепля́я, богоблаже́нне, пришле́ц на земли́ яви́лся еси́, к Небе́сному же Оте́честву устремля́яся, о́браз ревнова́ния о го́рнем показа́л еси́ взыску́ющим Го́спода и вопию́щим: Аллилу́иа.
И́кос 8.
Все́м вся́ бы́л еси́, о́тче Па́вле, собира́я о́вцы под кро́в тво́й и пу́ть спасе́ния си́м указу́я, ста́рца тя́ нарица́ющим и глаго́лющим ти́:
Ра́дуйся, Спа́су Христу́ послужи́вый; ра́дуйся, па́ству Его́ соблюды́й.
Ра́дуйся, ка́ющихся и заблу́ждших окормле́ние; ра́дуйся, о Бо́зе стра́нствующих попече́ние.
Ра́дуйся, све́том ду́ха омраче́нныя озаря́яй; ра́дуйся, по́мощию многочу́дною те́х осеня́яй.
Ра́дуйся, изсо́хших ду́ш любо́вию ороше́ние; ра́дуйся, в си́х благода́рности Созда́телю взраще́ние.
Ра́дуйся, оти́шие наде́жное стра́ждущих; ра́дуйся, насыще́ние а́лчущих и жа́ждущих.
Ра́дуйся, дво́ре, от стужа́ющих укрыва́яй; ра́дуйся, ста́рче, во оби́тели Отца́ Небе́снаго приводя́й.
Ра́дуйся, святы́й пра́ведный Па́вле, преди́вный чудотво́рче.
Конда́к 9.
Вся́ким глаго́лом, исходя́щим из у́ст Бо́жиих, пра́ведне Па́вле, живы́й, неуста́нный пропове́дник прича́стия Святы́х Та́ин яви́лся еси́, о еди́нем Хле́бе Небе́снем все́х, приходя́щих к тебе́, пещи́ся наставля́я и поуча́я Бо́гу воспева́ти: Аллилу́иа.
И́кос 9.
Вети́йство суесло́вное презре́в, честны́й Па́вле, му́дрость ева́нгельския простоты́ избра́л еси́, науча́я чи́стым се́рдцем сла́вити Го́спода. Те́мже взыва́ем ти́:
Ра́дуйся, у́мныя моли́твы де́лателю; ра́дуйся, покая́ния возвести́телю.
Ра́дуйся, нищету́ духо́вную стяжа́вый; ра́дуйся, помышле́ния твоя́ горе́ воздвиза́вый.
Ра́дуйся, в Бо́жиих свиде́ниих наставле́ние; ра́дуйся, из се́тей безве́рия избавле́ние.
Ра́дуйся, я́ко любе́зне с кро́ткими бесе́довал еси́; ра́дуйся, я́ко ро́пщущих прему́дро увещава́л еси́.
Ра́дуйся, гордели́ваго разжже́ния угаше́ние; ра́дуйся, хла́дных серде́ц возгре́яние.
Ра́дуйся, мре́же, Христу́ челове́ков уловля́ющая; ра́дуйся, земле́, се́мя до́брое прозяба́ющая.
Ра́дуйся, святы́й пра́ведный Па́вле, преди́вный чудотво́рче.
Конда́к 10.
Спасе́ния хотя́ коему́ждо, милосе́рдне Па́вле, бли́жних к покая́нию призыва́л еси́; де́нно и но́щно о си́х моли́твы со слеза́ми вознося́, непреста́нно вопия́л еси́ к Бо́гу: Аллилу́иа.
И́кос 10.
Сте́ны ка́менныя темни́цы не возбрани́ша любви́ твое́й к заключе́нным дости́гнути, и́бо ра́ди Христа́ ми́лость сию́ твори́л еси́, заточе́нных печа́льниче, а́лчущих пита́я, жа́ждущих напоя́я, наги́х одева́я. Те́мже приими́ от на́с славосло́вие сицево́е:
Ра́дуйся, десни́це щедро́т неоскудева́ющая; ра́дуйся, руко́, из пучи́ны бе́д извлека́ющая.
Ра́дуйся, призре́ние ни́щих и оби́димых; ра́дуйся, приста́нище ти́хое томи́мых.
Ра́дуйся, сле́зных проше́ний благоприя́тие; ра́дуйся, сокрове́нным воздыха́нием вня́тие.
Ра́дуйся, я́ко рыда́ющих на пе́рси прие́млеши; ра́дуйся, я́ко немощны́х на ра́мена подъе́млеши.
Ра́дуйся, вся́кия тесноты́ разреши́телю; ра́дуйся, во обстоя́ниих су́щих изба́вителю.
Ра́дуйся, несокруши́мый на́ш засту́пниче; ра́дуйся, добропобе́дный миротво́рче.
Ра́дуйся, святы́й пра́ведный Па́вле, преди́вный чудотво́рче.
Конда́к 11.
Пе́ние ра́достне творя́ще, святи́и А́нгели вознесо́ша на не́бо ду́шу твою́, пра́ведниче Па́вле, да уве́дят тя́ избра́нника Бо́жия вси́ сумня́щиися, и прозре́вше возопию́т Вседержи́телю: Аллилу́иа.
И́кос 11.
Светозаре́нием со́лнца сликовству́ет небе́сная Це́рковь Це́ркви земно́й о пренесе́нии честны́х моще́й твои́х, святы́й Па́вле, и прославля́юще просла́вльшаго тя́ Бо́га, воспева́ют ти́ А́нгели и челове́цы:
Ра́дуйся, звездо́, на тве́рди церко́вней явле́нная; ра́дуйся, све́том Со́лнца пра́вды Христа́ озаре́нный.
Ра́дуйся, я́ко в тебе́ благода́ть Бо́жия яви́ся; ра́дуйся, я́ко ли́к святы́х и́менем твои́м украси́ся.
Ра́дуйся, Небе́сныя Трапе́зы прича́стниче; ра́дуйся, на земли́ оста́вльшихся печа́льниче.
Ра́дуйся, гра́да при мо́ри покрови́телю; ра́дуйся, Гра́да Небе́снаго жи́телю.
Ра́дуйся, пла́чущим обетова́нное утеше́ние; ра́дуйся, се́тования в ра́дость претворе́ние.
Ра́дуйся, наде́ждо, проше́ния предваря́ющая; ра́дуйся, упова́ние, тьму́ уны́ния разгоня́ющее.
Ра́дуйся, святы́й пра́ведный Па́вле, преди́вный чудотво́рче.
Конда́к 12.
Благода́тныя по́мощи кла́дязь неизсяка́емый ты́ еси́, святы́й Па́вле, животворя́щую бо твою́ к на́м любо́вь и по успе́нии твое́м явля́еши, неуста́нно моля́ся о на́с пред Престо́лом Госпо́дним, да попече́нием таковы́м в ве́ре укрепля́еми, Бо́гу непреста́нно сла́ву возсыла́ем: Аллилу́иа.
И́кос 12.
Пое́м многосла́вимыя по́двиги твоя́, земны́й а́нгеле, поели́ку чудеса́ твоя́ умно́жишася зело́, и, ублажа́юще тебе́ я́ко многомо́щнаго о на́с предста́теля, восхваля́ем тя́:
Ра́дуйся, умире́ния оби́льный исто́чниче; ра́дуйся, благоуве́тливый в ско́рбех помо́щниче.
Ра́дуйся, духо́вных боле́зней исцеле́ние; ра́дуйся, теле́сных неду́гов врачева́ние.
Ра́дуйся, сосу́де еле́я освяще́ннаго; ра́дуйся, пшени́це чи́стая, благослове́нная.
Ра́дуйся, цве́те целому́дрия богоро́сный; ра́дуйся, дре́во доброде́телей плодоно́сное.
Ра́дуйся, отча́янных кре́пкое наде́яние; ра́дуйся, путе́й непра́ведных исправле́ние.
Ра́дуйся, неосла́бное о ча́дех твои́х предста́ние; ра́дуйся, Го́спода ве́рное достоя́ние.
Ра́дуйся, святы́й пра́ведный Па́вле, преди́вный чудотво́рче.
Конда́к 13.
О чудотво́рче преди́вный и пресла́вный, святы́й пра́ведный Па́вле! Ны́нешнее на́ше прие́м приноше́ние, не оста́ви на́с, в не́мощех и нестрое́ниих су́щих, грехи́ мно́гими обремене́нных, бу́ди на́м помо́щник необори́мый, моли́твенник дерзнове́нный и хода́тай усе́рдный, на Стра́шнем же суди́щи Христо́ве испроси́ на́м уде́ла избра́нных, да сподо́бимся с тобо́ю воспева́ти Бо́гу: Аллилу́иа.
Этот конда́к читается трижды, затем и́кос 1-й, и конда́к 1-й.
И́кос 1.
А́нгелом уподо́битися возжеле́вый, на земли́ живы́й, богому́дре Па́вле, от ю́ности твоея́ кра́сная ми́ра сего́ отве́ргл еси́; Христа́ ра́ди земна́я расточи́вый, небе́сная преумно́жил еси́. Те́мже ны́не слы́шиши от все́х похвалу́ сицеву́ю:
Ра́дуйся, ве́тве благопло́днаго дре́ва земна́го; ра́дуйся, сонасле́дниче Ца́рствия Небе́снаго.
Ра́дуйся, пути́ те́снаго ко спасе́нию избра́ние; ра́дуйся, неусы́пное благода́ти стяжа́ние.
Ра́дуйся, ева́нгельскаго жития́ о́браз яви́вый; ра́дуйся, пре́лесть ми́ра те́м обличи́вый.
Ра́дуйся, фимиа́ме чистоты́ благоуха́нный; ра́дуйся, све́том Бо́жия любве́ осия́нный.
Ра́дуйся, утеше́ние люде́й благочести́вых; ра́дуйся, похвало́ иере́ев боголюби́вых.
Ра́дуйся, моли́твы непреста́нное де́лание; ра́дуйся, моле́ний ско́рое услы́шание.
Ра́дуйся, святы́й пра́ведный Па́вле, преди́вный чудотво́рче.
Конда́к 1.
Избра́нный чудотво́рче и уго́дниче Христо́в, пути́ небла́зненнаго ко спасе́нию о́браз подава́яй и ду́ха теплото́ю ми́ра хла́д согрева́яй, благода́рно воспева́ем ти́, о́тче Па́вле; ты́ же, име́яй ве́лие дерзнове́ние ко Го́споду, от вся́кия ско́рби свободи́ ве́рою зову́щих ти́:
Ра́дуйся, святы́й пра́ведный Па́вле, преди́вный чудотво́рче.
Моли́тва.
О вели́кий уго́дниче Бо́жий и чудотво́рче, о́тче Па́вле! Ты́, на высоту́ доброде́телей возше́д, я́ко пресве́тлая звезда́, житие́м твои́м возсия́л еси́ и, стра́нническое жи́тельство избра́в, ми́ра сего́ кра́сная ни во что́же вмени́л еси́. Те́мже Всепра́ведный Судия́ мно́гими чудесы́ тя́ просла́ви, ду́шу же твою́ святу́ю в Небе́сныя оби́тели всели́, иде́же, любве́ Бо́жия наслажда́яся, на́ша ну́жды зри́ши и проше́ния слы́шиши. Сего́ ра́ди бу́ди на́м в неду́зех цели́тель, по мо́рю пла́вающим ко́рмчий и утопа́ющим благонаде́жное избавле́ние. О Па́вле блаже́нне, испроси́ все́м, во вся́цей ну́жде су́щим и ко твоему́ заступле́нию прибега́ющим, вся́кий да́р коему́ждо благопотре́бен: ве́ры и любве́ преспе́яние, благоче́стия умноже́ние, ми́ра утвержде́ние, больны́м исцеле́ние, печа́льным утеше́ние, бе́дствующим по́мощь, оби́димым заступле́ние. И сподо́би ны́, уго́дниче Бо́жий, моли́твами твои́ми благоче́стно житие́ земно́е сконча́ти, Небе́сное Ца́рствие и живо́т ве́чный унасле́дити со все́ми святы́ми во ве́ки веко́в. Ами́нь.
А҆ка́ѳїстъ ст҃о́мꙋ првⷣномꙋ па́ѵлꙋ таганро́гскомꙋ.
Конда́къ а҃.
И҆збра́нный чꙋдотво́рче и҆ ᲂу҆го́дниче хрⷭ҇то́въ, пꙋтѝ небла́зненнагѡ ко сп҃се́нїю ѻ҆́бразъ подава́ѧй и҆ дꙋ́ха теплото́ю мі́ра хла́дъ согрѣва́ѧй, бл҃года́рнѡ воспѣва́емъ тѝ, ѻ҆́тче па́ѵле: ты́ же и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кїѧ ско́рби свободѝ вѣ́рою зовꙋ́щихъ тѝ:
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
І҆́косъ а҃.
А҆́гг҃лѡмъ ᲂу҆подо́битисѧ возжелѣ́вый, на землѝ живы́й, бг҃омꙋ́дре па́ѵле, ѿ ю҆́ности твоеѧ̀ кра̑снаѧ мі́ра сегѡ̀ ѿве́рглъ є҆сѝ: хрⷭ҇та̀ ра́ди земна̑ѧ расточи́вый, нбⷭ҇наѧ преꙋмно́жилъ є҆сѝ. Тѣ́мже ны́нѣ слы́шиши ѿ всѣ́хъ похвалꙋ̀ сицевꙋ́ю:
Ра́дꙋйсѧ, вѣ́тве бл҃гопло́днагѡ дре́ва земна́гѡ: ра́дꙋйсѧ, сонаслѣ́дниче црⷭ҇твїѧ нбⷭ҇нагѡ.
Ра́дꙋйсѧ, пꙋтѝ тѣ́снагѡ ко сп҃се́нїю и҆збра́нїе: ра́дꙋйсѧ, неꙋсы́пное бл҃года́ти стѧжа́нїе.
Ра́дꙋйсѧ, є҆ѵⷢ҇льскагѡ житїѧ̀ ѻ҆́бразъ ꙗ҆ви́вый: ра́дꙋйсѧ, пре́лесть мі́ра тѣ́мъ ѡ҆бличи́вый.
Ра́дꙋйсѧ, ѳѷмїа́ме чⷭ҇тоты̀ бл҃гоꙋха́нный: ра́дꙋйсѧ, свѣ́томъ бж҃їѧ любвѐ ѡ҆сїѧ́нный.
Ра́дꙋйсѧ, ᲂу҆тѣше́нїе люде́й бл҃гочести́выхъ: ра́дꙋйсѧ, похвало̀ і҆ере́євъ бг҃олюби́выхъ.
Ра́дꙋйсѧ, мл҃твы непреста́нное дѣ́ланїе: ра́дꙋйсѧ, моле́нїй ско́рое ᲂу҆слы́шанїе.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ в҃.
Ви́дѣвый ре́вность твою̀ ѡ҆ сп҃се́нїи дꙋшѝ, бг҃олюбе́зне па́ѵле, роди́тель тво́й, про́мыслꙋ бж҃їю вне́мъ, ѿпꙋсти́ тѧ на стєзѝ стра́нничества, бл҃гослове́нїе тѝ препода́въ: ты́ же ѡ҆ го́рнѣмъ помышлѧ́ѧ, вы́нꙋ ко гдⷭ҇ꙋ взыва́лъ є҆сѝ: А҆ллилꙋ́їа.
І҆́косъ в҃.
Разꙋмѣ́нїе бг҃оразꙋ́мное достоѧ́нїе твоѐ бы́сть, бл҃же́нне па́ѵле, ꙗ҆́кѡ до́мъ ѻ҆́тчїй ѡ҆ста́вилъ є҆сѝ, црⷭ҇твїѧ нбⷭ҇нагѡ взыскꙋ́ѧ, и҆ поко́й тѣле́сный презрѣ́въ, въ простотꙋ̀ и҆ нестѧжа́нїе ѡ҆бле́клсѧ є҆сѝ: лю́дїе же вѣ́рнїи, тща́нїе твоѐ зрѧ́ще, во ᲂу҆миле́нїи пою́тъ тѝ:
Ра́дꙋйсѧ, по́чєсти мі́ра нивочто́же вмѣни́вый: ра́дꙋйсѧ, стра́нническое житїѐ возлюби́вый.
Ра́дꙋйсѧ, ѡ҆ смиренномꙋ́дрїи радѣ́нїе: ра́дꙋйсѧ, въ мл҃твенномъ по́двизѣ поспѣше́нїе.
Ра́дꙋйсѧ, рабѡ́мъ свои̑мъ свобо́дꙋ дарова́вый: ра́дꙋйсѧ, себѐ раба̀ вѣ́рна бг҃ꙋ сотвори́вый.
Ра́дꙋйсѧ, поста̀ ра́достное несе́нїе: ра́дꙋйсѧ, поко́ѧ тлѣ́ннагѡ ѿверже́нїе.
Ра́дꙋйсѧ, сꙋ́етнагѡ бога́тства ѿврати́выйсѧ: ра́дꙋйсѧ, да̑ры дꙋхо́вными ѡ҆богати́выйсѧ.
Ра́дꙋйсѧ, и҆́стиннагѡ бг҃опозна́нїѧ ѡ҆брѣ́тенїе: ра́дꙋйсѧ, про́мысла гдⷭ҇нѧ ꙗ҆вле́нїе.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ г҃.
Си́лою бл҃года́ти свы́ше ᲂу҆крѣплѧ́емь, по́двигъ првⷣнагѡ житїѧ̀ всемꙋ̀ мі́рꙋ ꙗ҆ви́лъ є҆сѝ, трꙋ́дниче бж҃їй, въ трезве́нїи же и҆ мл҃твѣ дни̑ и҆ нѡ́щи пребыва́ѧ, стро́гостїю воздержа́нїѧ пло́ть ᲂу҆мертви́лъ є҆сѝ, ꙗ҆́коже и҆ а҆́гг҃лѡмъ диви́тисѧ крѣ́пости твое́й, воспѣва́ющымъ творцꙋ̀: А҆ллилꙋ́їа.
І҆́косъ г҃.
И҆мѣ́ѧ вѣ́рꙋ непосты́днꙋю и҆ любо́вь нелицемѣ́рнꙋю ко гдⷭ҇ꙋ, смиренномꙋ́дре па́ѵле, ве́лїихъ дарова́нїй ѿ негѡ̀ ᲂу҆досто́илсѧ є҆сѝ, во є҆́же наставлѧ́ти заблꙋ́ждшыѧ на стєзѝ сп҃се́нїѧ, глаго́лющымъ тѝ:
Ра́дꙋйсѧ, и҆збра́нниче нб҃съ преꙋдо́бренный: ра́дꙋйсѧ, сосꙋ́де, ст҃а́гѡ дх҃а и҆спо́лненный.
Ра́дꙋйсѧ, та̑йны дꙋ́шъ человѣ́ческихъ прозрѣва́ѧй: ра́дꙋйсѧ, сꙋдьбы̑ бж҃їѧ лю́демъ ѿкрыва́ѧй.
Ра́дꙋйсѧ, ѡ҆пло́те бл҃гоче́стїѧ, про́мысломъ бж҃їимъ мі́рꙋ ꙗ҆вле́нный: ра́дꙋйсѧ, свѣти́льниче, гдⷭ҇ꙋ возжже́нный.
Ра́дꙋйсѧ, вѣ́рꙋ въ немощны́хъ ᲂу҆крѣплѧ́ѧй: ра́дꙋйсѧ, вра̑жїѧ навѣ́ты разрꙋша́ѧй.
Ра́дꙋйсѧ, неради́выхъ покаѧ́нное пробꙋжде́нїе: ра́дꙋйсѧ, нечꙋ́вствїемъ ѡ҆камене́нныхъ ᲂу҆миле́нїе.
Ра́дꙋйсѧ, вїно̀ цѣльбоно́сное, ра̑ны ѡ҆мыва́ющее: ра́дꙋйсѧ, мѵ́ро чꙋдотво́рное, сердца̀ и҆сцѣлѧ́ющее.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ д҃.
Бꙋ́рею скорбе́й потоплѧ́еми и҆ въ грѣхо́внꙋю печа́ль погрꙋжа́еми, съ наде́ждею взира́емъ на тѧ̀, ст҃ы́й ко́рмчїй, ꙗ҆́кѡ мл҃твою нѣ́когда мо́рѧ волне́нїе ᲂу҆кроти́вшаго: тѣ́мже и҆ ны́нѣ ко бре́гꙋ сп҃се́нїѧ тобо́ю направлѧ́еми, съ бл҃года́рностїю вопїе́мъ бг҃ови: А҆ллилꙋ́їа.
І҆́косъ д҃.
Слы́шаще ѡ҆ бл҃гомо́щїи твое́мъ, всѝ трꙋжда́ющїисѧ и҆ ѡ҆бремене́ннїи притека́ютъ къ тебѣ̀, ᲂу҆го́дниче хрⷭ҇то́въ, занѐ вои́стиннꙋ подае́тъ гдⷭ҇ь мл҃твами твои́ми поко́й и҆ ра́дованїе всѣ̑мъ, та́кѡ велича́ющымъ тѧ̀:
Ра́дꙋйсѧ, въ ско́рби ра́дости подаѧ́нїе: ра́дꙋйсѧ, во ѿча́ѧнїи лꙋчѐ сп҃се́нїѧ.
Ра́дꙋйсѧ, бл҃гопристꙋ́пный ᲂу҆тѣ́шителю: ра́дꙋйсѧ, неистощи́мый млⷭ҇ти пода́телю.
Ра́дꙋйсѧ, ча̑дъ наде́жное сохране́нїе: ра́дꙋйсѧ, недꙋ́гѡвъ и҆́хъ во здра́вїе преложе́нїе.
Ра́дꙋйсѧ, роди́тєльскїѧ сле́зы ѡ҆сꙋша́ѧй: ра́дꙋйсѧ, ᲂу҆пова́нїю на гдⷭ҇а наꙋча́ѧй.
Ра́дꙋйсѧ, ᲂу҆кроще́нїе стїхі́и страсте́й: ра́дꙋйсѧ, разсѣ́ѧнїе мглы̀ напа́стей.
Ра́дꙋйсѧ, лампа́до неꙋгаси́маѧ добродѣ́ланїѧ: ра́дꙋйсѧ, свѣщѐ присногорѧ́щаѧ млⷭ҇рдїѧ.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ є҃.
Бг҃опросвѣще́нный ра́зꙋмъ стѧжа́въ, любомꙋ́дре па́ѵле, ѡ҆ сп҃се́нїи бли́жнихъ радѣ́лъ є҆сѝ, и҆ трꙋды̀ человѣколю́бїѧ неѡсла́бнѣ творѧ̀, тѣ́хъ наꙋча́лъ є҆сѝ возноси́ти хвалꙋ̀ бг҃ꙋ: А҆ллилꙋ́їа.
І҆́косъ є҃.
Ви́дѧще по́двиги твоѧ̀, дꙋшевѣ́дче па́ѵле, нѣ́кїй тщесла́вный человѣ́къ съ надме́нїемъ дерза́ше подража́ти тебѣ̀: ѻ҆ба́че ты̀, внꙋ́трєннѧѧ прозрѣва́ѧ, ве́тхомꙋ мѣ́хꙋ того̀ ᲂу҆подо́билъ є҆сѝ. Помозѝ и҆ на́мъ, ст҃е, тщесла́вїе побѣжда́ти и҆ сѣ́тей вра́жїихъ и҆збѣга́ти, вопїю́щымъ такѡва́ѧ:
Ра́дꙋйсѧ, вѣ́ры бг҃оизбра́нный ᲂу҆чи́телю: ра́дꙋйсѧ, ᲂу҆се́рдїѧ самочи́ннагѡ ѡ҆бличи́телю.
Ра́дꙋйсѧ, прельще́нныхъ нело́жное вразꙋмле́нїе: ра́дꙋйсѧ, го́рдости ᲂу҆мовре́дныѧ посрамле́нїе.
Ра́дꙋйсѧ, ста́рче, сокровє́ннаѧ ᲂу҆строѧ́ѧй: ра́дꙋйсѧ, ѻ҆́тче, въ послꙋша́нїи ча̑дъ твои́хъ наставлѧ́ѧй.
Ра́дꙋйсѧ, ꙗ҆́кѡ всемꙋ́дреннѣ дꙋ́шы врачꙋ́еши: ра́дꙋйсѧ, ꙗ҆́кѡ смире́нїѧ ѻ҆́бразъ показꙋ́еши.
Ра́дꙋйсѧ, плодѡ́въ дꙋхо́вныхъ ᲂу҆множе́нїе: ра́дꙋйсѧ, првⷣнагѡ житїѧ̀ зна́менїе.
Ра́дꙋйсѧ, кро́тости хрⷭ҇то́вой ᲂу҆подобле́нїе: ра́дꙋйсѧ, землѝ бл҃же́нныхъ наслѣ́дованїе.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ ѕ҃.
Проповѣ́дꙋѧ житїе́мъ твои́мъ свѣ́тъ є҆ѵⷢ҇лїа во тьмѣ̀ грѣхо́внѣй пребыва́ющымъ, вѣ́рный ра́бе бж҃їй, на распꙋ́тїихъ призыва́лъ є҆сѝ на пи́ръ бра́чный ни́щыѧ и҆ бѣ̑дныѧ, слѣпы̑ѧ и҆ хромы̑ѧ, да возвели́чатъ и҆́мѧ гдⷭ҇не, немо́лчнѡ пою́ще: А҆ллилꙋ́їа.
І҆́косъ ѕ҃.
Возсїѧ́нїемъ ри́зъ твои́хъ, досточꙋ́дне па́ѵле, ꙗ҆́кѡ свѣтови́денъ сто́лпъ ꙗ҆ви́ тѧ гдⷭ҇ь лю́демъ свои̑мъ, дивѧ́щымсѧ сни́тїю свы́ше на тебѐ бл҃года́ти и҆ сла́вѧщымъ тѧ̀:
Ра́дꙋйсѧ, любо́вїю ѻ҆́ч҃ею ѡ҆сїѧ́нный: ра́дꙋйсѧ, да́ры ст҃а́гѡ дх҃а сниска́вый.
Ра́дꙋйсѧ, и҆́мѧ хрⷭ҇то́во непреста́ннѡ помина́вый: ра́дꙋйсѧ, стрⷭ҇ти є҆гѡ̀ бл҃гоговѣ́йнѡ почита́вый.
Ра́дꙋйсѧ, слꙋ́жбы бж҃їѧ ревни́телю: ра́дꙋйсѧ, бл҃голѣ́пїѧ хра́мѡвъ попечи́телю.
Ра́дꙋйсѧ, вѣ́рности прест҃ѣ́й трⷪ҇цѣ горѣ́нїе: ра́дꙋйсѧ, при́сное па́мѧтованїе ѡ҆ сп҃се́нїи.
Ра́дꙋйсѧ, сердца̀ ꙗ҆́кѡ лампа̑ды возжига́вый: ра́дꙋйсѧ, въ дꙋ́сѣ любвѐ наслѣ́дїе воспита́вый.
Ра́дꙋйсѧ, скрижа́ле, творце́мъ начерта́ннаѧ: ра́дꙋйсѧ, бронѐ пра́вды, во бра́ни и҆спыта́ннаѧ.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ з҃.
Не хотѧ̀ ᲂу҆таи́ти безвѣ̑стнаѧ и҆ та̑йнаѧ премꙋ́дрости бж҃їѧ, ди́вный ста́рче, сщ҃еннои́нокꙋ є҆ди́номꙋ предре́клъ є҆сѝ слꙋже́нїе ве́лїе во гра́дѣ і҆ерⷭ҇ли́мстѣ: внегда́ же ви́дѣти томꙋ̀ сверше́нїе прⷪ҇ро́чества, хвалꙋ̀ вы́шнемꙋ вознесѐ: А҆ллилꙋ́їа.
І҆́косъ з҃.
Новозавѣ́тнагѡ ѿкрове́нїѧ прїѧ́телище и҆ за́повѣдей гдⷭ҇нихъ ᲂу҆се́рдный и҆сполни́телю, хрⷭ҇та̀ всѣ́мъ се́рдцемъ возлюби́лъ є҆сѝ, подо́бнѣ и҆ и҆́скреннѧго своего̀ до конца̀: сегѡ̀ ра́ди ны́нѣ слы́шиши бл҃года́рное пѣ́нїе:
Ра́дꙋйсѧ, бл҃же́нство є҆ѵⷢ҇льское и҆збра́вый: ра́дꙋйсѧ, наслажде́нїе тлѣ́нное попра́вый.
Ра́дꙋйсѧ, ѡ҆дѣѧ́нїе смире́нїѧ бг҃отка́нное: ра́дꙋйсѧ, ковче́же млⷭ҇ти бжⷭ҇твенныѧ.
Ра́дꙋйсѧ, тала́нты земны̑ѧ ᲂу҆мно́живый: ра́дꙋйсѧ, сокрѡ́вища нбⷭ҇наѧ собра́вый.
Ра́дꙋйсѧ, ѡ҆заре́нїе свы́ше прїе́мый: ра́дꙋйсѧ, ѿ и҆збы́тка се́рдца бли́жнемꙋ подава́вый.
Ра́дꙋйсѧ, водо́ю живо́ю дꙋ́шы напоѧ́ѧй: ра́дꙋйсѧ, ко и҆сто́чникꙋ жи́зни ѡ҆браща́ѧй.
Ра́дꙋйсѧ, со́ле землѝ, є҆́юже да ѡ҆соли́мсѧ: ра́дꙋйсѧ, свѣ́те мі́рꙋ, и҆́мже да просвѣти́мсѧ.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ и҃.
Стра́нничествомъ дꙋ́хъ ᲂу҆крѣплѧ́ѧ, бг҃обл҃же́нне, пришле́цъ на землѝ ꙗ҆ви́лсѧ є҆сѝ, къ нбⷭ҇номꙋ же ѻ҆ч҃ествꙋ ᲂу҆стремлѧ́ѧсѧ, ѻ҆́бразъ ревнова́нїѧ ѡ҆ го́рнѣмъ показа́лъ є҆сѝ взыскꙋ́ющымъ гдⷭ҇а и҆ вопїю́щымъ: А҆ллилꙋ́їа.
І҆́косъ и҃.
Всѣ̑мъ всѧ̑ бы́лъ є҆сѝ, ѻ҆́тче па́ѵле, собира́ѧ ѻ҆́вцы под̾ кро́въ тво́й и҆ пꙋ́ть сп҃се́нїѧ си̑мъ ᲂу҆казꙋ́ѧ, ста́рца тѧ̀ нарица́ющымъ и҆ глаго́лющымъ тѝ:
Ра́дꙋйсѧ, сп҃сꙋ хрⷭ҇тꙋ̀ послꙋжи́вый: ра́дꙋйсѧ, па́ствꙋ є҆гѡ̀ соблюды́й.
Ра́дꙋйсѧ, ка́ющихсѧ и҆ заблꙋ́ждшихъ ѡ҆кормле́нїе: ра́дꙋйсѧ, ѡ҆ бз҃ѣ стра́нствꙋющихъ попече́нїе.
Ра́дꙋйсѧ, свѣ́томъ дꙋ́ха ѡ҆мрачє́нныѧ ѡ҆зарѧ́ѧй: ра́дꙋйсѧ, по́мощїю многочꙋ́дною тѣ́хъ ѡ҆сѣнѧ́ѧй.
Ра́дꙋйсѧ, и҆зсо́хшихъ дꙋ́шъ любо́вїю ѡ҆роше́нїе: ра́дꙋйсѧ, въ си́хъ бл҃года́рности созда́телю взраще́нїе.
Ра́дꙋйсѧ, ѡ҆ти́шїе наде́жное стра́ждꙋщихъ: ра́дꙋйсѧ, насыще́нїе а҆́лчꙋщихъ и҆ жа́ждꙋщихъ.
Ра́дꙋйсѧ, дво́ре, ѿ стꙋжа́ющихъ ᲂу҆крыва́ѧй: ра́дꙋйсѧ, ста́рче, во ѻ҆би́тєли ѻ҆ц҃а̀ нбⷭ҇нагѡ приводѧ́й.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ ѳ҃.
Всѧ́кимъ глаго́ломъ, и҆сходѧ́щимъ и҆з̾ ᲂу҆́стъ бж҃їихъ, првⷣне па́ѵле, живы́й, неꙋста́нный проповѣ́дникъ прича́стїѧ ст҃ы́хъ та̑инъ ꙗ҆ви́лсѧ є҆сѝ, ѡ҆ є҆ди́нѣмъ хлѣ́бѣ нбⷭ҇нѣмъ всѣ́хъ, приходѧ́щихъ къ тебѣ̀, пещи́сѧ наставлѧ́ѧ и҆ поꙋча́ѧ бг҃ꙋ воспѣва́ти: А҆ллилꙋ́їа.
І҆́косъ ѳ҃.
Вѣті́йство сꙋесло́вное презрѣ́въ, чⷭ҇тны́й па́ѵле, мꙋ́дрость є҆ѵⷢ҇льскїѧ простоты̀ и҆збра́лъ є҆сѝ, наꙋча́ѧ чи́стымъ се́рдцемъ сла́вити гдⷭ҇а. Тѣ́мже взыва́емъ тѝ:
Ра́дꙋйсѧ, ᲂу҆́мныѧ мл҃твы дѣ́лателю: ра́дꙋйсѧ, покаѧ́нїѧ возвѣсти́телю.
Ра́дꙋйсѧ, нищетꙋ̀ дꙋхо́внꙋю стѧжа́вый: ра́дꙋйсѧ, помышлє́нїѧ твоѧ̑ горѣ̀ воздвиза́вый.
Ра́дꙋйсѧ, въ бж҃їихъ свидѣ́нїихъ наставле́нїе: ра́дꙋйсѧ, и҆з̾ сѣ́тей безвѣ́рїѧ и҆збавле́нїе.
Ра́дꙋйсѧ, ꙗ҆́кѡ любе́знѣ съ кро́ткими бесѣ́довалъ є҆сѝ: ра́дꙋйсѧ, ꙗ҆́кѡ ро́пщꙋщихъ премꙋ́дрѡ ᲂу҆вѣщава́лъ є҆сѝ.
Ра́дꙋйсѧ, гордели́вагѡ разжже́нїѧ ᲂу҆гаше́нїе: ра́дꙋйсѧ, хла́дныхъ серде́цъ возгрѣ́ѧнїе.
Ра́дꙋйсѧ, мре́же, хрⷭ҇тꙋ̀ человѣ́кѡвъ ᲂу҆ловлѧ́ющаѧ: ра́дꙋйсѧ, землѐ, сѣ́мѧ до́брое прозѧба́ющаѧ.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ і҃.
Сп҃се́нїѧ хотѧ̀ коемꙋ́ждо, млⷭ҇рдне па́ѵле, бли́жнихъ къ покаѧ́нїю призыва́лъ є҆сѝ: де́ннѡ и҆ но́щнѡ ѡ҆ си́хъ мл҃твы со слеза́ми возносѧ̀, непреста́ннѡ вопїѧ́лъ є҆сѝ къ бг҃ꙋ: А҆ллилꙋ́їа.
І҆́косъ і҃.
Стѣ́ны ка́мєнныѧ темни́цы не возбрани́ша любвѝ твое́й къ заключє́ннымъ дости́гнꙋти, и҆́бо ра́ди хрⷭ҇та̀ млⷭ҇ть сїю̀ твори́лъ є҆сѝ, заточе́нныхъ печа́льниче, а҆́лчꙋщихъ пита́ѧ, жа́ждꙋщихъ напоѧ́ѧ,
наги́хъ ѡ҆дѣва́ѧ. Тѣ́мже прїимѝ ѿ на́съ славосло́вїе сицево́е:
Ра́дꙋйсѧ, десни́це щедро́тъ неѡскꙋдѣва́ющаѧ: ра́дꙋйсѧ, рꙋко̀, и҆з̾ пꙋчи́ны бѣ́дъ и҆звлека́ющаѧ.
Ра́дꙋйсѧ, призрѣ́нїе ни́щихъ и҆ ѡ҆би́димыхъ: ра́дꙋйсѧ, приста́нище ти́хое томи́мыхъ.
Ра́дꙋйсѧ, сле́зныхъ проше́нїй бл҃гопрїѧ́тїе: ра́дꙋйсѧ, сокровє́ннымъ воздыха́нїємъ внѧ́тїе.
Ра́дꙋйсѧ, ꙗ҆́кѡ рыда́ющихъ на пе́рси прїе́млеши: ра́дꙋйсѧ, ꙗ҆́кѡ немощны́хъ на ра́мена под̾е́млеши.
Ра́дꙋйсѧ, всѧ́кїѧ тѣсноты̀ разрѣши́телю: ра́дꙋйсѧ, во ѡ҆бстоѧ́нїихъ сꙋ́щихъ и҆зба́вителю.
Ра́дꙋйсѧ, несокрꙋши́мый на́шъ застꙋ́пниче: ра́дꙋйсѧ, добропобѣ́дный миротво́рче.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ а҃і.
Пѣ́нїе ра́достнѣ творѧ́ще, ст҃і́и а҆́гг҃ли вознесо́ша на не́бо дꙋ́шꙋ твою̀, првⷣниче па́ѵле, да ᲂу҆вѣ́дѧтъ тѧ̀ и҆збра́нника бж҃їѧ всѝ сꙋмнѧ́щїисѧ, и҆ прозрѣ́вше возопїю́тъ вседержи́телю: А҆ллилꙋ́їа.
І҆́косъ а҃і.
Свѣтозаре́нїемъ со́лнца сликовствꙋ́етъ нбⷭ҇наѧ цр҃ковь цр҃кви земно́й ѡ҆ пренесе́нїи чⷭ҇тны́хъ моще́й твои́хъ, ст҃ы́й па́ѵле, и҆ прославлѧ́юще просла́вльшаго тѧ̀ бг҃а, воспѣва́ютъ тѝ а҆́гг҃ли и҆ человѣ́цы:
Ра́дꙋйсѧ, ѕвѣздо̀, на тве́рди цр҃ко́внѣй ꙗ҆вле́ннаѧ: ра́дꙋйсѧ, свѣ́томъ сл҃нца пра́вды хрⷭ҇та̀ ѡ҆заре́нный.
Ра́дꙋйсѧ, ꙗ҆́кѡ въ тебѣ̀ бл҃года́ть бж҃їѧ ꙗ҆ви́сѧ: ра́дꙋйсѧ, ꙗ҆́кѡ ли́къ ст҃ы́хъ и҆́менемъ твои́мъ ᲂу҆краси́сѧ.
Ра́дꙋйсѧ, нбⷭ҇ныѧ трапе́зы прича́стниче: ра́дꙋйсѧ, на землѝ ѡ҆ста́вльшихсѧ печа́льниче.
Ра́дꙋйсѧ, гра́да при мо́ри покрови́телю: ра́дꙋйсѧ, гра́да нбⷭ҇нагѡ жи́телю.
Ра́дꙋйсѧ, пла́чꙋщымъ ѡ҆бѣтова́нное ᲂу҆тѣше́нїе: ра́дꙋйсѧ, сѣ́тованїѧ въ ра́дость претворе́нїе.
Ра́дꙋйсѧ, наде́ждо, прошє́нїѧ предварѧ́ющаѧ: ра́дꙋйсѧ, ᲂу҆пова́нїе, тьмꙋ̀ ᲂу҆ны́нїѧ разгонѧ́ющее.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ в҃і.
Бл҃года́тныѧ по́мощи кла́дѧзь неизсѧка́емый ты̀ є҆сѝ, ст҃ы́й па́ѵле, животворѧ́щꙋю бо твою̀ къ на́мъ любо́вь и҆ по ᲂу҆спе́нїи твое́мъ ꙗ҆влѧ́еши, неꙋста́ннѡ молѧ́сѧ ѡ҆ на́съ пред̾ прⷭ҇то́ломъ гдⷭ҇нимъ, да попече́нїемъ таковы́мъ въ вѣ́рѣ ᲂу҆крѣплѧ́еми, бг҃ꙋ непреста́ннѡ сла́вꙋ возсыла́емъ: А҆ллилꙋ́їа.
І҆́косъ в҃і.
Пое́мъ многосла̑вимыѧ по́двиги твоѧ̑, земны́й а҆́гг҃ле, поели́кꙋ чꙋдеса̀ твоѧ̀ ᲂу҆мно́жишасѧ ѕѣлѡ̀, и҆, ᲂу҆бл҃жа́юще тебѐ ꙗ҆́кѡ многомо́щнаго ѡ҆ на́съ предста́телѧ, восхвалѧ́емъ тѧ̀:
Ра́дꙋйсѧ, ᲂу҆мире́нїѧ ѡ҆би́льный и҆сто́чниче: ра́дꙋйсѧ, бл҃гоꙋвѣ́тливый въ ско́рбехъ помо́щниче.
Ра́дꙋйсѧ, дꙋхо́вныхъ болѣ́зней и҆сцѣле́нїе: ра́дꙋйсѧ, тѣле́сныхъ недꙋ́гѡвъ врачева́нїе.
Ра́дꙋйсѧ, сосꙋ́де є҆ле́а ѡ҆сщ҃е́ннагѡ: ра́дꙋйсѧ, пшени́це чи́стаѧ, бл҃гослове́ннаѧ.
Ра́дꙋйсѧ, цвѣ́те цѣломꙋ́дрїѧ бг҃оро́сный: ра́дꙋйсѧ, дре́во добродѣ́телей плодоно́сное.
Ра́дꙋйсѧ, ѿча́ѧнныхъ крѣ́пкое надѣ́ѧнїе: ра́дꙋйсѧ, пꙋте́й непра́ведныхъ и҆справле́нїе.
Ра́дꙋйсѧ, неѡсла́бное ѡ҆ ча́дѣхъ твои́хъ предста́нїе: ра́дꙋйсѧ, гдⷭ҇а вѣ́рное достоѧ́нїе.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ г҃і.
Ѽ чꙋдотво́рче преди́вный и҆ пресла́вный, ст҃ы́й првⷣный па́ѵле! Ны́нѣшнее на́ше прїе́мъ приноше́нїе, не ѡ҆ста́ви на́съ, въ не́мощехъ и҆ нестрое́нїихъ сꙋ́щихъ, грѣхи̑ мнѡ́гими ѡ҆бремене́нныхъ, бꙋ́ди на́мъ помо́щникъ неѡбори́мый, мл҃твенникъ дерзнове́нный и҆ хода́тай ᲂу҆се́рдный, на стра́шнѣмъ же сꙋди́щи хрⷭ҇то́вѣ и҆спросѝ на́мъ ᲂу҆дѣ́ла и҆збра́нныхъ, да сподо́бимсѧ съ тобо́ю воспѣва́ти бг҃ꙋ: А҆ллилꙋ́їа.
Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й, и҆ конда́къ а҃-й.
І҆́косъ а҃.
А҆́гг҃лѡмъ ᲂу҆подо́битисѧ возжелѣ́вый, на землѝ живы́й, бг҃омꙋ́дре па́ѵле, ѿ ю҆́ности твоеѧ̀ кра̑снаѧ мі́ра сегѡ̀ ѿве́рглъ є҆сѝ: хрⷭ҇та̀ ра́ди земна̑ѧ расточи́вый, нбⷭ҇наѧ преꙋмно́жилъ є҆сѝ. Тѣ́мже ны́нѣ слы́шиши ѿ всѣ́хъ похвалꙋ̀ сицевꙋ́ю:
Ра́дꙋйсѧ, вѣ́тве бл҃гопло́днагѡ дре́ва земна́гѡ: ра́дꙋйсѧ, сонаслѣ́дниче црⷭ҇твїѧ нбⷭ҇нагѡ.
Ра́дꙋйсѧ, пꙋтѝ тѣ́снагѡ ко сп҃се́нїю и҆збра́нїе: ра́дꙋйсѧ, неꙋсы́пное бл҃года́ти стѧжа́нїе.
Ра́дꙋйсѧ, є҆ѵⷢ҇льскагѡ житїѧ̀ ѻ҆́бразъ ꙗ҆ви́вый: ра́дꙋйсѧ, пре́лесть мі́ра тѣ́мъ ѡ҆бличи́вый.
Ра́дꙋйсѧ, ѳѷмїа́ме чⷭ҇тоты̀ бл҃гоꙋха́нный: ра́дꙋйсѧ, свѣ́томъ бж҃їѧ любвѐ ѡ҆сїѧ́нный.
Ра́дꙋйсѧ, ᲂу҆тѣше́нїе люде́й бл҃гочести́выхъ: ра́дꙋйсѧ, похвало̀ і҆ере́євъ бг҃олюби́выхъ.
Ра́дꙋйсѧ, мл҃твы непреста́нное дѣ́ланїе: ра́дꙋйсѧ, моле́нїй ско́рое ᲂу҆слы́шанїе.
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Конда́къ а҃.
И҆збра́нный чꙋдотво́рче и҆ ᲂу҆го́дниче хрⷭ҇то́въ, пꙋтѝ небла́зненнагѡ ко сп҃се́нїю ѻ҆́бразъ подава́ѧй и҆ дꙋ́ха теплото́ю мі́ра хла́дъ согрѣва́ѧй, бл҃года́рнѡ воспѣва́емъ тѝ, ѻ҆́тче па́ѵле: ты́ же и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кїѧ ско́рби свободѝ вѣ́рою зовꙋ́щихъ тѝ:
Ра́дꙋйсѧ, ст҃ы́й првⷣный па́ѵле, преди́вный чꙋдотво́рче.
Мл҃тва.
Ѽ вели́кїй ᲂу҆го́дниче бж҃їй и҆ чꙋдотво́рче, ѻ҆́тче па́ѵле! Ты̀ на высотꙋ̀ добродѣ́телей возше́дъ, ꙗ҆́кѡ пресвѣ́тлаѧ ѕвѣзда̀, житїе́мъ твои́мъ возсїѧ́лъ є҆сѝ, и҆ стра́нническое жи́тельство и҆збра́въ, мі́ра сегѡ̀ кра̑снаѧ нивочто́же вмѣни́лъ є҆сѝ. Тѣ́мже всепрвⷣный сꙋдїѧ̀ мно́гими чꙋдесы̀ тѧ̀ просла́ви, дꙋ́шꙋ же твою̀ ст҃ꙋ́ю въ нбⷭ҇ныѧ ѻ҆би́тєли вселѝ, и҆дѣ́же любвѐ бж҃їѧ наслажда́ѧсѧ, на́шѧ нꙋ̑жды зри́ши и҆ прошє́нїѧ слы́шиши. Сегѡ̀ ра́ди бꙋ́ди на́мъ въ недꙋ́зѣхъ цѣли́тель, по мо́рю пла́вающымъ ко́рмчїй, и҆ ᲂу҆топа́ющымъ бл҃гонаде́жное и҆збавле́нїе. Ѽ па́ѵле бл҃же́нне, и҆спросѝ всѣ̑мъ, во всѧ́цѣй нꙋ́ждѣ сꙋ́щымъ и҆ ко твоемꙋ̀ застꙋпле́нїю прибѣга́ющымъ, всѧ́кїй да́ръ коемꙋ́ждо бл҃гопотре́бенъ: вѣ́ры и҆ любвѐ преспѣ́ѧнїе, бл҃гоче́стїѧ ᲂу҆множе́нїе, мі́ра ᲂу҆твержде́нїе, больны̑мъ и҆сцѣле́нїе, печа̑льнымъ ᲂу҆тѣше́нїе, бѣ́дствꙋющымъ по́мощь, ѡ҆би̑димымъ застꙋпле́нїе. И҆ сподо́би ны̀, ᲂу҆го́дниче бж҃їй, мл҃твами твои́ми бл҃гоче́стнѡ житїѐ земно́е сконча́ти, нбⷭ҇ное црⷭ҇твїе и҆ живо́тъ вѣ́чный ᲂу҆наслѣ́дити со всѣ́ми ст҃ы́ми во вѣ́ки вѣкѡ́въ. А҆ми́нь.
Праведный Павел Таганрогский родился 8 ноября 1792 года в семье дворянина Черниговской губернии Кролевецкого уезда Павла Стожкова. При крещении назван в честь св. Павла Исповедника. Родители хотели обеспечить своему сыну образование и хорошее общественное положение, юноша же стремился ко спасению и богоугодной жизни в молитве и странничестве по святым местам. В 25 лет, следуя словам Господа: "...вся, елика имаши, продаждь и раздай нищим: и имети имаши сокровище на Небеси" (Лк.18:22), блаженный Павел раздал доставшуюся ему часть имения, отпустил на волю крестьян и, взяв благословение отца, отправился в заветное странствование по святым обителям, дабы под их кровом найти упокоение своей душе.
Около десяти лет продлилась его странническая жизнь, а затем он поселился в приморском городе Таганроге, где, забыв свое дворянское происхождение, говорил на простонародном малороссийском наречии, жил в землянке. Тяжелыми работами в порту и неустанной молитвой он очистил душу и тело от всего страстного и греховного, на нем явно почила благодать Божия, и он многим светил своей праведной жизнью, и невольно люди, под впечатлением его речей и дел, глубже вдумывались в смысл жизни и вспоминали о Небесном Отечестве. Они стали идти к нему за советами и утешением.
Придя в преклонные лета, он оставил тяжелые труды в порту и поселился в маленьком доме, молясь непрестанно Богу и служа людям. Каждый день с первым ударом церковного колокола он отправлялся в собор, молился за Литургией, поправлял лампады, для чего носил с собою маленькую скамеечку, а на плечах белое полотенце, которым вытирал святые иконы. Из храма блаженный Павел, по обыкновению, шел по базару. Увешанный двумя белыми холщовыми сумками, с палкой в руках, он обходил всех торгующих с обычными своими наставлениями и утешениями. Торговцы подавали ему милостыню, но от некоторых он не принимал никаких подаяний и даже отгонял таких от себя палкою. Ночи же, как и прежде, проводил в усердной, с коленопреклонением, молитве. Иисусова молитва никогда не сходила с его уст; учил он и всех приходящих к нему творить эту молитву и без нее никогда никого не впускал к себе в келью. Павел Павлович любил храмы и часто жертвовал на них иконы, лампады, свечи, елей и прочее. Он учил быть верными в малом, прививал любовь к святыне церковной и переносил это благоговейное отношение на предметы, освящающие жизнь человека в миру: просфоры, ладан, свечи.
Простой народ нашел в блаженном великого в добродетелях святого старца. Утвердившись в непорочной жизни, по закону Господню, блаженный Павел был как бы светильником на земле, сияющим добрыми делами. Он получил от Господа дар исцеления и прозорливости. И люди шли к нему со своими скорбями, бедами и вопросами. Многие приходили к блаженному и молили его дозволить остаться у него, дабы исполнились на них слова псалмопевца: «С преподобным преподобен будеши, и с мужем неповинным неповинен будеши: и со избранным избран будеши» (Пс.17:26-27). И некоторых он оставлял пожить у себя как бы на послушании.
Принеся в жертву Богу свои имения, блаженный Павел часто жертвовал ради Христа плодами дворянского воспитания и образованности, и под личиной напускной грубости искусно скрывал возвышенную и благородную свою душу. Случится прийти к блаженному Павлу какому-нибудь посетителю, имеющему нераскаянные грехи, — блаженный, не смущая пришедшего грубым откровением его тайн, притворно обрушивается на кого-нибудь из своих послушников: ругает, бранит, грозит палкой, при этом называя грехи посетителя, дабы подвигнуть того к покаянию. Послушник же кротко терпит и только повторяет: «Простите, батюшка, виноват».
Силою благодати Божией блаженный ясно видел и душу человека, и его будущее. Своему духовнику, иеромонаху Дамиану, он предсказал: «Ты будешь велыкый человек, такий, шо болыний буть не може», - и пророческие слова эти действительно исполнились в жизни отца Дамиана: в 1897 году он поставлен был патриархом Святого Града Иерусалима.
Приближаясь к концу своей земной жизни, блаженный все более ослабевал телесными силами, но святая душа его попрежнему пламенела любовью к Богу и ближним. Как и другим великим угодникам Божиим, Господь открыл ему день и час его кончины. Накануне он велел написать письмо своим близким с просьбой быть на его похоронах.
Скончался 10 марта 1879 года. Вечером он сделался крайне слаб и, приобщившись Святых Христовых Тайн от своего духовника отца Дамиана, предал свою праведную душу Богу. В момент кончины все предстоящие видели, что лицо угодника Божия просияло великой радостью, с благодатной головы его по всему телу до самых ног прошла как бы желтоватая тень, и после этого тело сделалось белое, подобно снегу. Все, видевшие это знамение благодати Божией над блаженным Павлом, умилились сердцем и прославили Бога за такую Его милость.
Местное прославление святого совершилось в воскресенье 20 июня 1999 года в городе Таганроге. Более десяти тысяч верующих Ростовской области и юга России приехали поклониться блаженному Павлу в день его канонизации. Поочередно несомый всеми священниками Ростовской епархии, ковчег со святыми мощами был торжественно перенесён из Всехсвятской церкви на старом кладбище в Свято-Никольский храм г. Таганрога, где архиепископом Ростовским и Новочеркасским Пантелеимоном было зачитано архиерейское определение о канонизации святого блаженного Павла Таганрогского и совершена Божественная литургия, после которой множество верующих приложились к мощам святого. Прославление ознаменовалось многочисленными чудесами. Торжественное перенесение мощей было предсказано преподобным незадолго до отшествия ко Господу, когда старец напевал: «Понесли Павла на могилу, а с могилы - да в собор» (в те годы Свято-Никольский храм имел статус собора).
Определением Архиерейского Собора Русской Православной Церкви 2-3 февраля 2016 года имя праведного Павла Таганрогского было включено в месяцеслов Русской Православной Церкви для общецерковного почитания[1]. 14 февраля того же года митрополит Ростовский Меркурий совершил чин великого освящения первого в России приходского храма во имя праведного Павла Таганрогского в посёлке Матвеевом Кургане[2].
Примечания
[1] Определение Освященного Архиерейского Собора Русской Православной Церкви об общецерковном прославлении ряда местночтимых святых, 3 февраля 2016.
[2] "Глава Донской митрополии совершил чин Великого освящения первого в России храма в честь святого праведного Павла Таганрогского", официальный сайт Таганрогского благочиния, 15 февраля 2016.
