А҆ка́ѳїстъ ст҃о́мꙋ првⷣномꙋ і҆ѡа́ннꙋ, пресвѵ́терꙋ кроншта́дтскомꙋ, чꙋдотво́рцꙋ.
Конда́къ а҃.
И҆збра́нный ᲂу҆го́дниче и҆ пресла́вный чꙋдотво́рче, ѻ҆́тче првⷣный і҆ѡа́нне, гра́да кроншта́дта пресла́вное ᲂу҆краше́нїе! Ты̀, ѿ младе́нства хрⷭ҇тꙋ̀ послѣ́дꙋѧ, сораспѧ́тисѧ є҆мꙋ̀ возжелѣ́лъ є҆сѝ, и҆ жи́знь твою̀ въ не́мъ ᲂу҆тверди́въ, да́ръ чꙋде́съ ѿ бг҃а прїѧ́лъ є҆сѝ, и҆ сло́вомъ живоно́снымъ всѣ́хъ напита́лъ є҆сѝ. Мы́ же, недосто́йнїи, бл҃года́рнѣ вопїе́мъ тѝ:
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
І҆́косъ а҃.
А҆́гг҃ла свѣ́тла, є҆щѐ ѻ҆́трокъ сы́й, ꙗ҆́вѣ ᲂу҆зрѣ́лъ є҆сѝ, ѻ҆́тче і҆ѡа́нне, и҆́же и҆ рече́ ти, ꙗ҆́кѡ повелѣ́нїемъ гдⷭ҇нимъ приста́вленъ храни́ти тѧ̀ во всѣ́хъ пꙋте́хъ твои́хъ. Тѣ́мже ꙗ҆́кѡ и҆збра́нника бж҃їѧ вѣ́дꙋще тѧ̀, взыва́емъ си́це:
Ра́дꙋйсѧ, бл҃года́ти бж҃їѧ сосꙋ́де и҆збра́нный: ра́дꙋйсѧ, сло́вомъ бж҃їимъ и҆змла́да наста́вленный.
Ра́дꙋйсѧ, во ѻ҆́трочествѣ ꙗ҆вле́нїѧ а҆́гг҃ла храни́телѧ сподо́бивыйсѧ: ра́дꙋйсѧ, ѿ ю҆́ности води́тельствꙋ дх҃а ст҃а́гѡ преда́выйсѧ.
Ра́дꙋйсѧ, роди́телей бг҃олюби́выхъ бл҃гоче́стїе воспрїе́мый: ра́дꙋйсѧ, цѣломꙋ́дрїемъ и҆ чистото́ю себѐ ѡ҆гради́вый.
Ра́дꙋйсѧ, дꙋхѡ́внымъ наста́вникѡмъ твои̑мъ всѣ́мъ се́рдцемъ внима́вый: ра́дꙋйсѧ, почита́нїемъ роди́телей бл҃говоле́нїе бж҃їе стѧжа́вый.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ в҃.
Прови́дѧ, бг҃оно́сне ѻ҆́тче і҆ѡа́нне, ꙗ҆́кѡ мнѡ́гїѧ бѣды̑ и҆ собла́зны грѧдꙋ́тъ на цр҃ковь рꙋ́сскꙋю и҆ ча̑да бж҃їѧ гони̑ма бꙋ́дꙋтъ, ᲂу҆вѣща́лъ є҆сѝ лю́ди, глаго́лѧ: пока́йтесѧ, сто́йте въ вѣ́рѣ правосла́внѣй, крѣпи́тесѧ и҆ сла́вите гдⷭ҇а, взыва́юще є҆мꙋ̀: А҆ллилꙋ́їа.
І҆́косъ в҃.
Ра́зꙋмомъ бжⷭ҇твеннымъ наставлѧ́емь, всебл҃же́нне ѻ҆́тче і҆ѡа́нне, свѣ́томъ и҆́стиннагѡ бг҃опозна́нїѧ всѣ́хъ приходѧ́щихъ къ тебѣ̀ просвѣща́лъ є҆сѝ. Мы́ же, писа́ньми твои́ми наꙋча́еми, вопїе́мъ тѝ такова̑ѧ:
Ра́дꙋйсѧ, є҆ѵⷢ҇льскїѧ и҆́стины пла́менный слꙋжи́телю: ра́дꙋйсѧ, глаго́лѡвъ жи́зни вѣ́чныѧ немо́лчный возвѣсти́телю.
Ра́дꙋйсѧ, првⷣнымъ житїе́мъ твои́мъ бг҃ꙋ ᲂу҆годи́вый: ра́дꙋйсѧ, цр҃ковь бж҃їю писа̑нїи твои́ми просла́вивый.
Ра́дꙋйсѧ, крⷭ҇тъ хрⷭ҇то́въ пред̾ ѻ҆чи́ма твои́ма вы́нꙋ созерца́вый: ра́дꙋйсѧ, сораспѧ́тисѧ хрⷭ҇тꙋ̀ вседꙋ́шнѣ возжела́вый.
Ра́дꙋйсѧ, бг҃а и҆ бли́жнихъ всѣ́мъ се́рдцемъ возлюби́вый: ра́дꙋйсѧ, лю́демъ въ ско́рбехъ и҆ печа́лехъ сꙋ́щымъ ᲂу҆тѣше́нїе подава́вый.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ г҃.
Си́лою бжⷭ҇твенныѧ бл҃года́ти, ꙗ҆́кѡ свѣти́льникъ многосвѣ́тлый правосла́вныѧ цр҃кве, во гра́дѣ кроншта́дтѣ просїѧ́лъ є҆сѝ, првⷣне і҆ѡа́нне, и҆ лю́ди во тьмѣ̀ грѣхо́внѣй сѣдѧ́щыѧ и҆ собла́зномъ бг҃обо́рчества смꙋща́ємыѧ просвѣти́въ, наставлѧ́лъ є҆сѝ пѣ́ти бг҃ꙋ:
А҆ллилꙋ́їа.
І҆́косъ г҃.
И҆мѣ́ѧ любо́вь па́стырскꙋю, првⷣне ѻ҆́тче і҆ѡа́нне, поте́клъ є҆сѝ къ лю́демъ, не и҆мꙋ́щымъ кро́ва и҆ хлѣ́ба насꙋ́щнагѡ и҆ во ѿча́ѧнїи погиба́ющымъ, и҆ си́хъ любо́вїю и҆ млⷭ҇рдїемъ хрⷭ҇тꙋ̀ прїѡбрѣ́лъ є҆сѝ. Мы́ же бл҃года́рнѣ взыва́емъ тѝ си́це:
Ра́дꙋйсѧ, въ хра́мѣ бж҃їи дерзнове́нный ѡ҆ лю́дехъ мл҃твенниче: ра́дꙋйсѧ, си̑рымъ и҆ вдови́цамъ млⷭ҇тивый помо́щниче.
Ра́дꙋйсѧ, ѡ҆каменє́нныѧ се́рдцемъ къ покаѧ́нїю побꙋжда́ѧй: ра́дꙋйсѧ, невѣ́дꙋщыѧ бг҃а бжⷭ҇твенною премꙋ́дростїю просвѣща́ѧй.
Ра́дꙋйсѧ, стропо́тныхъ и҆ ѕлонра́вныхъ ти́хое и҆справле́нїе: ра́дꙋйсѧ, лѣни́выхъ и҆ маловѣ́рныхъ ре́вностное ѡ҆бличе́нїе.
Ра́дꙋйсѧ, црⷭ҇твїѧ бж҃їѧ и҆ пра́вды є҆гѡ̀ проповѣ́дниче неꙋстраши́мый: ра́дꙋйсѧ, проти́вꙋ ко́зней дꙋхѡ́въ ѕло́бы поднебе́сныхъ вои́телю неꙋста́нный.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ д҃.
Бꙋ́рю ѕлоче́стїѧ, воздвиза́емꙋ на цр҃ковь на́шꙋ ст҃ꙋ́ю, прови́дѧ, ѻ҆́тче і҆ѡа́нне, ꙗ҆́кѡ вѣ́рный стра́жъ до́мꙋ гдⷭ҇нѧ, поꙋча́лъ є҆сѝ ча̑да бж҃їѧ бдѣ́ти, во и҆́стиннѣй вѣ́рѣ пра́вѡ ходи́ти и҆ въ за́повѣдехъ гдⷭ҇нихъ непоро́чнѡ пребыва́ти, да сп҃се́тъ гдⷭ҇ь лю́ди своѧ̑, въ покаѧ́нїи є҆мꙋ̀ зовꙋ́щыѧ: А҆ллилꙋ́їа.
І҆́косъ д҃.
Слы́шаще лю́дїе бж҃їи, ꙗ҆́кѡ ты̀ є҆сѝ, ѻ҆́тче і҆ѡа́нне, сосꙋ́дъ и҆збра́нный и҆ бл҃года́тныхъ дарѡ́въ преиспо́лненный, не то́кмѡ ѿ кроншта́дта, но и҆ ѿ всѣ́хъ концє́въ землѝ къ тебѣ̀ притека́хꙋ, ꙗ҆́кѡ да и҆сцѣлє́нїѧ и҆ по́мощь ᲂу҆лꙋча́тъ. Съ ни́ми же и҆ мы̀, ꙗ҆́кѡ хода́таю пред̾ бг҃омъ те́плꙋ, ᲂу҆ми́льнѡ зове́мъ тѝ:
Ра́дꙋйсѧ, сѣ́ѧтелю пра́вды, а҆́лчꙋщыѧ жи́зни вѣ́чныѧ напита́вый: ра́дꙋйсѧ, ѡ҆бличи́телю непра́вды, вѣ̑рныѧ ѿ пре́лести грѣхо́вныѧ ѡ҆гражда́вый.
Ра́дꙋйсѧ, заблꙋ́ждшымъ и҆ неразꙋ̑мнымъ пꙋ́ть къ бг҃ꙋ ᲂу҆казꙋ́ѧй: ра́дꙋйсѧ, писа́ньми твои́ми ча̑да бж҃їѧ наставлѧ́ѧй.
Ра́дꙋйсѧ, скорбѧ́щихъ и҆ ѡ҆бремене́нныхъ при́сное ᲂу҆пова́нїе: ра́дꙋйсѧ, болѧ́щихъ и҆ стра́ждꙋщихъ бл҃года́тное врачева́нїе.
Ра́дꙋйсѧ, сосꙋ́де и҆збра́нный, да̑ры дх҃а ст҃а́гѡ ди́внѡ ᲂу҆кра́шенный: ра́дꙋйсѧ, свѣти́льниче всесвѣ́тлый, на свѣ́щницѣ цр҃ко́внѣмъ бг҃омъ поста́вленный.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ є҃.
Ꙗ҆́кѡ ѕвѣзда̀ многосвѣ́тлаѧ, сщ҃еннолѣ́пнымъ житїе́мъ твои́мъ просїѧ́лъ є҆сѝ, па́стырю хрⷭ҇то́въ і҆ѡа́нне! Ты́ бо ста́до, бг҃омъ врꙋче́нное тебѣ̀, ѿ волкѡ́въ, гꙋбѧ́щихъ є҆̀, ѡ҆гражда́лъ є҆сѝ, взыва́ѧ: пока́йтесѧ и҆ жи́ви бꙋ́дете, ѿими́те лꙋка́вство ѿ дꙋ́шъ ва́шихъ, да чи́стымъ се́рдцемъ бг҃а ᲂу҆́зрите и҆ воспое́те є҆мꙋ̀: А҆ллилꙋ́їа.
І҆́косъ є҃.
Вѣ́даѧ мно́жество люде́й ᲂу҆тѣше́нїѧ ча́ющихъ, ꙗ҆́кѡ а҆пⷭ҇лъ хрⷭ҇то́въ, ѡ҆бходи́лъ є҆сѝ гра́ды и҆ вє́си рѡссі̑йскїѧ, чꙋдотво́рче и҆зѧ́щне, сѣ́ѧ сло́во бж҃їе, и҆сцѣлѧ́ѧ недꙋ̑жныѧ и҆ маловѣ̑рныѧ и҆справлѧ́ѧ, бы́въ всѣ̑мъ всѧ̑, да всѧ́кѡ нѣ̑кїѧ сп҃се́ши. Мы́ же болѣ̑зни и҆ трꙋды̀ твоѧ̑ почита́юще, вопїе́мъ тѝ си́це:
Ра́дꙋйсѧ, ꙗ҆́кѡ си́лою бл҃года́ти немощны̑ѧ ᲂу҆крѣплѧ́лъ є҆сѝ: ра́дꙋйсѧ, ꙗ҆́кѡ мл҃твами твои́ми грѣ̑шныѧ къ покаѧ́нїю приводи́лъ є҆сѝ.
Ра́дꙋйсѧ, а҆́лчꙋщыѧ и҆ жа́ждꙋщыѧ по за́повѣди гдⷭ҇ни насыща́вый: ра́дꙋйсѧ, бл҃говѣ́стїемъ хрⷭ҇то́вымъ лю́ди къ пра́вдѣ бж҃їей приводи́вый.
Ра́дꙋйсѧ, мл҃твами твои́ми маловѣ̑рныѧ въ вѣ́рѣ ᲂу҆крѣплѧ́вый: ра́дꙋйсѧ, си́лою бж҃їею немощны̑мъ здра́вїе подава́вый.
Ра́дꙋйсѧ, зе́млю на́шꙋ бл҃гоговѣ́йнѡ съ про́повѣдїю ѡ҆бходи́вый: ра́дꙋйсѧ, мі́ръ се́й, ꙗ҆́кѡ премꙋ́дрое творе́нїе бж҃їе, воспѣва́вый.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ ѕ҃.
Проповѣ̑дницы чꙋ́дныхъ дѣѧ́нїй твои́хъ, бл҃же́нне і҆ѡа́нне, ꙗ҆ви́шасѧ мно́зи: бога́тїи и҆ ни́щїи, ста́рцы и҆ ю҆́нѡши, ты́ бо всѣ̑мъ любо́вь твою̀ и҆злива́лъ є҆сѝ бога́тнѡ. Тѣ́мже не то́кмѡ правосла́внїи, но и҆ и҆новѣ́рнїи си́лою мл҃твъ твои́хъ млⷭ҇ть бж҃їю ѡ҆брѣта́хꙋ, пою́ще бг҃ꙋ: А҆ллилꙋ́їа.
І҆́косъ ѕ҃.
Возсїѧ́лъ є҆сѝ житїе́мъ твои́мъ въ цр҃кви правосла́внѣй па́че сїѧ́нїѧ сѣ́вернагѡ, бл҃же́нне і҆ѡа́нне, пꙋ́ть пра́вый лю́демъ ᲂу҆казꙋ́ѧ. Тѣ́мже молѝ гдⷭ҇а си́лъ, да любо́вь ст҃а́ѧ ᲂу҆тверди́тсѧ въ сердца́хъ на́шихъ, да ни ско́рбь, ни тѣснота̀, ни сме́рть, ни бла̑га мі́ра сегѡ̀ возмо́гꙋтъ разлꙋчи́ти на́съ ѿ любвѐ бж҃їѧ, бл҃года́рнѣ тебѣ̀ вопїю́щихъ:
Ра́дꙋйсѧ, вѣ́рꙋ правосла́внꙋю въ чистотѣ̀ храни́ти завѣща́вый: ра́дꙋйсѧ, тѣ́снымъ пꙋте́мъ за́повѣдей хрⷭ҇то́выхъ ходи́ти поꙋча́вый.
Ра́дꙋйсѧ, въ ско́рбехъ и҆ печа́лехъ сꙋ́щымъ ра́дость подава́вый: ра́дꙋйсѧ, къ и҆́стинномꙋ покаѧ́нїю грѣ́шники призыва́вый.
Ра́дꙋйсѧ, бж҃їимъ смотре́нїемъ грѧдꙋ̑щаѧ на́мъ возвѣща́вый: ра́дꙋйсѧ, ѿ сѣте́й вра́жїихъ ѻ҆те́чество на́ше ѡ҆гражда́вый.
Ра́дꙋйсѧ, ми́ръ съ бг҃омъ ст҃ѡ храни́ти заповѣ́давый: ра́дꙋйсѧ, сло́вомъ и҆́стины и҆ любо́вїю вѣ̑рнымъ лю́демъ послꙋжи́вый.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ з҃.
Хотѧ̀ всебл҃гі́й гдⷭ҇ь сп҃стѝ лю́ди землѝ на́шеѧ и҆ ᲂу҆гото́вати ѧ҆̀ къ же́ртвенномꙋ слꙋже́нїю, и҆спо́лни тѧ̀, всебл҃же́нне і҆ѡа́нне, дꙋ́ха прⷪ҇ро́чества, премꙋ́дрости и҆ ра́зꙋма, ꙗ҆́кѡ да сло́вомъ твои́мъ наста́влени, во дни̑ грѧдꙋ́щихъ и҆спыта́нїй непоколеби́мѡ вопїю́тъ бг҃ꙋ: А҆ллилꙋ́їа.
І҆́косъ з҃.
Но́ваго и҆збра́нника бж҃їѧ, всебл҃же́нне і҆ѡа́нне, вѣ́дꙋще тѧ̀ бг҃олюби́вїи лю́дїе, на всѧ́къ де́нь же́ртвꙋ безкро́внꙋю приносѧ́ща и҆ со дерзнове́нїемъ за всѣ́хъ хрⷭ҇тꙋ̀ молѧ́щасѧ, съ вѣ́рою къ тебѣ̀ притека́хꙋ и҆ и҆сцѣлѧ́хꙋсѧ. Тѣ́мже и҆ мы̀, и҆спо́лненнїи твои́хъ бл҃годѣѧ́нїй, съ любо́вїю воспѣва́емъ тѝ сицева̑ѧ:
Ра́дꙋйсѧ, ᲂу҆ прⷭ҇то́ла бж҃їѧ прилѣ́жный ѡ҆ на́съ мл҃твенниче: ра́дꙋйсѧ, и҆́стиннагѡ покаѧ́нїѧ ᲂу҆се́рдный проповѣ́дниче.
Ра́дꙋйсѧ, ꙗ҆́кѡ нелѣ́ностнѡ рабо́тати хрⷭ҇тꙋ̀ бг҃ꙋ на́съ наставлѧ́еши: ра́дꙋйсѧ, ꙗ҆́кѡ стоѧ́ти на бжⷭ҇твеннѣй стра́жи на́съ призыва́еши.
Ра́дꙋйсѧ, ѻ҆́бразъ воздержа́нїѧ и҆ цѣломꙋ́дрїѧ вѣ̑рнымъ ꙗ҆ви́вый: ра́дꙋйсѧ, па́ствꙋ твою̀ ѿ є҆ресе́й и҆ раско́ла мꙋ́дрѣ защити́вый.
Ра́дꙋйсѧ, сꙋ́щихъ во тьмѣ̀ невѣ́дѣнїѧ ре́вностный просвѣти́телю: ра́дꙋйсѧ, дꙋ́шъ человѣ́ческихъ ѿ сꙋеты̀ жите́йскїѧ ди́вный ѡ҆гради́телю.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ и҃.
Стра́нное чꙋ́до ви́димъ, ꙗ҆вле́нное тебѣ̀, преди́вный па́стырю хрⷭ҇то́въ і҆ѡа́нне! Тѧ́ бо и҆ лю́ди вѣ̑рныѧ сама̀ пречⷭ҇таѧ мт҃и бж҃їѧ ꙗ҆́кѡ милѣ̑йшаѧ ча̑да ѻ҆ц҃а̀ нбⷭ҇нагѡ наречѐ. Сегѡ̀ ра́ди мы̀, си́ми словесы̀ ᲂу҆тѣша́еми, вопїе́мъ цр҃ю̀ вѣкѡ́въ: А҆ллилꙋ́їа.
І҆́косъ и҃.
Ве́сь жела́нїемъ бжⷭ҇твеннымъ распалѧ́емь, любвѐ хрⷭ҇то́вы преиспо́лнилсѧ є҆сѝ, па́стырю до́брый! Мы́ же, неради́вїи, сокро́вищъ є҆ѧ̀ не стѧжа́вше, мно́гихъ скорбе́й и҆ печа́лей досто́йни ꙗ҆ви́хомсѧ. Ѻ҆ба́че, вѣ́дꙋще тѧ̀ помо́щника неꙋсы́пна, со ᲂу҆пова́нїемъ взыва́емъ тѝ си́це:
Ра́дꙋйсѧ, любвѐ хрⷭ҇то́вы сосꙋ́де и҆збра́нный: ра́дꙋйсѧ, ꙗ҆вле́нїѧ бж҃їѧ мт҃ре ᲂу҆досто́енный.
Ра́дꙋйсѧ, цр҃кве хрⷭ҇то́вы неꙋгаса́ющїй свѣти́льниче: ра́дꙋйсѧ, ѡ҆ всѣ́мъ мі́рѣ хода́таю и҆ печа́льниче.
Ра́дꙋйсѧ, ми́ра и҆ пра́вды бж҃їѧ ревни́телю: ра́дꙋйсѧ, бл҃гоче́стїѧ и҆ добронра́вїѧ насади́телю.
Ра́дꙋйсѧ, рѡссі́йскїѧ цр҃кве похвало̀ и҆ ᲂу҆краше́нїе: ра́дꙋйсѧ, землѝ на́шеѧ бл҃года́тное ᲂу҆твержде́нїе.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ ѳ҃.
Всѣ̑мъ лю́демъ въ невѣ́дѣнїи, ско́рбехъ и҆ печа́лехъ сꙋ́щымъ, воздви́же тѧ̀ гдⷭ҇ь па́стырѧ и҆ чꙋдотво́рца преди́вна, ѻ҆́тче і҆ѡа́нне, є҆́же грѣ̑шныѧ на пꙋ́ть пра́вый наста́вити, невѣ̑рныѧ къ бг҃ꙋ ѡ҆брати́ти и҆ болѧ́щыѧ и҆сцѣли́ти, да согла́снѡ воспою́тъ всѝ сп҃си́тельнꙋю пѣ́снь: А҆ллилꙋ́їа.
І҆́косъ ѳ҃.
Вѣті̑и многовѣща́ннїи безгла́сни бы́ша ѡ҆ бл҃года́ти, да́ннѣй тебѣ̀, і҆ѡа́нне преди́вне, є҆гда̀ сло́вомъ є҆ди́нѣмъ лю́ди ѿ грѣха̀ къ покаѧ́нїю приводи́лъ є҆сѝ, недꙋ̑жныѧ ѿ ѻ҆дра̀ болѣ́зни воздвиза́лъ є҆сѝ, бѣ́сы и҆згонѧ́лъ є҆сѝ. Мы́ же ꙗ҆́кѡ чꙋдотво́рца и҆ ᲂу҆го́дника бж҃їѧ прославлѧ́емъ тѧ̀ си́це:
Ра́дꙋйсѧ, страстьмѝ ѡ҆держи́мыхъ ди́вный врачева́телю: ра́дꙋйсѧ, въ долгонедꙋ́жїи сꙋ́щихъ безме́здный цѣли́телю.
Ра́дꙋйсѧ, ѿпа́дшыѧ къ бг҃ꙋ приводи́вый: ра́дꙋйсѧ, безбѡ́жныѧ гро́знѡ ѡ҆блича́вый.
Ра́дꙋйсѧ, ка́ющихсѧ кро́ткїй наказа́телю: ра́дꙋйсѧ, ми́лостыни ще́дрый пода́телю.
Ра́дꙋйсѧ, хрⷭ҇тїа́нскагѡ просвѣще́нїѧ и҆ бл҃гоче́стїѧ ре́вностный насади́телю: ра́дꙋйсѧ, ю҆́ныхъ по стезѧ́мъ пра́вды мꙋ́дрый пꙋтеводи́телю.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ і҃.
Сп҃стѝ хотѧ̀ лю́ди рѡссі̑йскїѧ, є҆ресьмѝ и҆ невѣ́рїемъ соблазнѧ́ємыѧ, ѻ҆́тче і҆ѡа́нне, кѡ́зни бѣсѡ́вскїѧ ѡ҆бличи́лъ є҆сѝ и҆ правосла́вное и҆сповѣ́данїе вѣ́ры тве́рдѡ ꙗ҆ви́лъ є҆сѝ. Сегѡ̀ ра́ди црⷭ҇твїѧ нбⷭ҇нагѡ дости́глъ є҆сѝ, и҆дѣ́же со а҆́гг҃лы и҆ ли̑ки ст҃ы́хъ непреста́ннѡ ѡ҆ на́съ мо́лиши бг҃а и҆ пое́ши є҆мꙋ̀: А҆ллилꙋ́їа.
І҆́косъ і҃.
Стѣна̀ тве́рда ꙗ҆ви́лсѧ є҆сѝ лю́демъ стра́ждꙋщымъ, ѿ всѣ́хъ концє́въ землѝ рѡссі́йскїѧ къ тебѣ̀ приходѧ́щымъ, бг҃оно́сне ѻ҆́тче і҆ѡа́нне. Тѣ́мже и҆ на́съ, бѣ́дствꙋющихъ и҆ немощствꙋ́ющихъ дꙋше́ю и҆ тѣ́ломъ, ᲂу҆крѣпѝ мл҃твами твои́ми, и҆́миже ѡ҆гражда́еми, прино́симъ тѝ похвалы̑ сїѧ̑:
Ра́дꙋйсѧ, свѣти́льниче неꙋгаси́мый, ѻ҆гне́мъ дх҃а ст҃а́гѡ возжже́нный: ра́дꙋйсѧ, крі́не бл҃гоꙋха́ѧй, росо́ю бл҃года́ти бж҃їѧ напое́нный.
Ра́дꙋйсѧ, лозо̀ многопло́днаѧ, бл҃года́тными да̑ры вѣ́рныхъ пита́ющаѧ: ра́дꙋйсѧ, со́ле землѝ, ѿ грѣхо́внагѡ тлѣ́нїѧ на́съ сохранѧ́ющаѧ.
Ра́дꙋйсѧ, въ мо́ри жите́йстѣмъ ѡ҆бꙋрева́ємымъ ти́хое приста́нище: ра́дꙋйсѧ, дꙋше́внѣ и҆ тѣле́снѣ и҆знемога́ющымъ бл҃го́е вспоможе́нїе.
Ра́дꙋйсѧ, сердцевѣ́дче премꙋ́дрый, вѣ̑рныѧ лю́ди ѿ мꙋдрова́нїѧ мі́ра сегѡ̀ ѡ҆гражда́ѧй: ра́дꙋйсѧ, сѣ́ѧтелю хрⷭ҇то́въ, сѣ́ѧнїемъ є҆ѵⷢ҇льскимъ сердца̀ мно́гихъ ᲂу҆веселѧ́ѧй.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ а҃і.
Пѣ́снь достохва́льнꙋю прино́симъ тѝ, ѻ҆́тче і҆ѡа́нне, всѣ́мъ житїе́мъ твои́мъ бг҃а просла́вльшемꙋ. И҆ ꙗ҆́коже на землѝ за всѣ́хъ и҆ за всѧ̑ влⷣкꙋ мі́ра ᲂу҆молѧ́лъ є҆сѝ, си́це и҆ ны́нѣ на нб҃сѝ вознесѝ мл҃твы твоѧ̑, да во ѻ҆те́чествїи на́шемъ при́снѡ воспѣва́етсѧ бг҃ꙋ побѣ́днаѧ пѣ́снь: А҆ллилꙋ́їа.
І҆́косъ а҃і.
Свѣтоза́рнꙋю свѣщꙋ̀ вѣ́мы тѧ̀, бг҃омъ и҆збра́нне ѻ҆́тче і҆ѡа́нне, ты́ бо и҆ по ѿше́ствїи ѿ земны́хъ къ нбⷭ҇нымъ ᲂу҆ прⷭ҇то́ла бж҃їѧ въ со́нмѣ ст҃ы́хъ и҆ си́лъ а҆́гг҃льскихъ ѡ҆ на́съ при́снѡ хода́тайствꙋеши. Сегѡ̀ ра́ди бл҃года́рственнѡ взыва́емъ тѝ си́це:
Ра́дꙋйсѧ, ꙗ҆́кѡ въ по́двизѣ твое́мъ и҆́мѧ прест҃ы́ѧ трⷪ҇цы ди́внѡ просла́висѧ: ра́дꙋйсѧ, ꙗ҆́кѡ бл҃гоче́стїемъ и҆ вѣ́рою твое́ю цр҃ковь хрⷭ҇то́ва ᲂу҆краси́сѧ.
Ра́дꙋйсѧ, па́стырей бг҃омꙋ́дрый наста́вниче: ра́дꙋйсѧ, и҆́нокинь до́брый ᲂу҆чи́телю.
Ра́дꙋйсѧ, сꙋпрꙋ̑ги соꙋ́зъ бра́чный ст҃ѡ храни́ти поꙋча́вый: ра́дꙋйсѧ, ча̑да почита́ти роди́тєли своѧ̑ ᲂу҆вѣщава́вый.
Ра́дꙋйсѧ, ꙗ҆́кѡ сострада́нїемъ твои́мъ къ бли̑жнимъ скѡ́рби и҆ печа̑ли ᲂу҆толѧ́ютсѧ: ра́дꙋйсѧ, ꙗ҆́кѡ мл҃твами твои́ми грѣ̑шницы на пꙋ́ть сп҃се́нїѧ ѡ҆браща́ютсѧ.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ в҃і.
Бл҃года́тныхъ дарѡ́въ дх҃а ст҃а́гѡ и҆спо́лни тѧ̀ гдⷭ҇ь, ѻ҆́тче на́шъ і҆ѡа́нне, и҆́миже ре́вностнѡ послꙋжи́лъ є҆сѝ наро́дꙋ бж҃їю. Вознесѝ мл҃твꙋ къ бг҃ꙋ и҆ ѡ҆ на́съ, да вѣ́ры, наде́жды и҆ любвѐ дости́гше, прича̑стницы жи́зни во хрⷭ҇тѣ̀ бꙋ́демъ и҆ сподо́бимсѧ воспѣва́ти бл҃года́рственнꙋю пѣ́снь: А҆ллилꙋ́їа.
І҆́косъ в҃і.
Пою́ще твоѐ достохва́льное житїѐ на землѝ и҆ сла́вꙋ, ю҆́же стѧжа́лъ є҆сѝ на нб҃сѝ, ѻ҆́тче і҆ѡа́нне, притека́емъ во ѻ҆би́тель тобо́ю созда́ннꙋю и҆ припа́даемъ къ гробни́цѣ твое́й, ѿ неѧ́же и҆сцѣлє́нїѧ и҆ по́мощь ᲂу҆лꙋча́юще, возглаша́емъ тѝ сицева̑ѧ:
Ра́дꙋйсѧ, проповѣ́дниче и҆зрѧ́дный, прⷪ҇ро́кѡмъ и҆ а҆пⷭ҇лѡмъ до́брѣ поревнова́вый: ра́дꙋйсѧ, па́стырю землѝ рѡссі́йскїѧ, бг҃омъ и҆збра́нный и҆ просла́вленный.
Ра́дꙋйсѧ, ѻ҆би́тель прпⷣбнагѡ покрови́телѧ твоегѡ̀ і҆ѡа́нна ры́льскагѡ ди́внѡ ᲂу҆стро́ивый: ра́дꙋйсѧ, ѻ҆би́телїю се́ю гра́дъ ст҃а́гѡ петра̀ сла́внѡ ᲂу҆краси́вый.
Ра́дꙋйсѧ, въ возсозда́ннꙋю ѻ҆би́тель и҆́нѡкини собира́ѧй: ра́дꙋйсѧ, ꙗ҆́кѡ ѻ҆те́цъ чадолюби́вый, при́сное попече́нїе ѡ҆ ни́хъ и҆мѣ́ѧй.
Ра́дꙋйсѧ, всѣ̑мъ притека́ющымъ къ тебѣ̀ ско́рое вспоможе́нїе подава́ѧй: ра́дꙋйсѧ, ѻ҆́бразъ до́брагѡ па́стырѧ сло́вомъ, житїе́мъ и҆ вѣ́рою на́мъ ꙗ҆ви́вый.
Ра́дꙋйсѧ, і҆ѡа́нне, землѝ рѡссі́йскїѧ мл҃твенниче преди́вный.
Конда́къ г҃і.
Ѽ ст҃ы́й првⷣный ѻ҆́тче і҆ѡа́нне, всерѡссі́йскїй свѣти́льниче и҆ преди́вный чꙋдотво́рче! Прїимѝ хвале́бное сїѐ пѣ́нїе на́ше и҆ ᲂу҆молѝ хрⷭ҇та̀ бг҃а цр҃ковь ст҃ꙋ́ю въ бл҃гоче́стїи ᲂу҆тверди́ти, є҆ди́нство въ сою́зѣ ми́ра и҆ любвѐ хрⷭ҇то́вы соблюстѝ, да и҆ мы̀ воспое́мъ съ тобо́ю бг҃ꙋ: А҆ллилꙋ́їа.
Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й и҆ конда́къ а҃-й.
Мл҃тва.
ѽ вели́кїй чꙋдотво́рче и҆ преди́вный ᲂу҆го́дниче бж҃їй, бг҃оно́сне ѻ҆́тче і҆ѡа́нне! При́зри на на́съ и҆ внемлѝ бл҃госе́рднѡ моле́нїю на́шемꙋ, ꙗ҆́кѡ вели́кихъ дарова́нїй сподо́би тѧ̀ гдⷭ҇ь, да хода́тай и҆ при́сный мл҃твенникъ за на́съ бꙋ́деши. Се́ бо, страстьмѝ грѣхо́вными ѡ҆бꙋрева́еми и҆ ѕло́бою снѣда́еми, за́пѡвѣди бж҃їѧ пренебрего́хомъ, покаѧ́нїѧ серде́чнагѡ и҆ сле́зъ воздыха́нїѧ не принесо́хомъ, сегѡ̀ ра́ди мнѡ́гимъ ско́рбемъ и҆ печа́лемъ досто́йни ꙗ҆ви́хомсѧ. Ты́ же, ѻ҆́тче првⷣне, ве́лїе дерзнове́нїе ко гдⷭ҇ꙋ и҆ сострада́нїе къ бли̑жнимъ свои̑мъ и҆мѣ́ѧ, ᲂу҆молѝ всеще́драго влⷣкꙋ мі́ра, да проба́витъ млⷭ҇ть свою̀ на на́съ и҆ потерпи́тъ непра́вдамъ на́шымъ, не погꙋби́тъ на́съ грѣ̑хъ ра́ди на́шихъ, но вре́мѧ на покаѧ́нїе млⷭ҇тивнѡ на́мъ да́рꙋетъ. ѽ ст҃че бж҃їй, помозѝ на́мъ вѣ́рꙋ правосла́внꙋю непоро́чнѡ соблюстѝ и҆ за́пѡвѣди бж҃їѧ бл҃гоче́стнѡ сохрани́ти, да не ѡ҆блада́етъ на́ми всѧ́кое беззако́нїе, нижѐ посрами́тсѧ пра́вда бж҃їѧ въ непра́вдахъ на́шихъ, но да сподо́бимсѧ дости́гнꙋти кончи́ны хрⷭ҇тїа́нскїѧ, безболѣ́зненныѧ, непосты́дныѧ, ми́рныѧ и҆ та̑инъ бж҃їихъ прича́стныѧ. Є҆щѐ мо́лимъ тѧ̀, ѻ҆́тче првⷣне, ѡ҆ є҆́же цр҃кви на́шей ст҃ѣ́й до сконча́нїѧ вѣ́ка ᲂу҆твержде́ннѣй бы́ти, ѻ҆те́чествꙋ же на́шемꙋ ми́ръ и҆ пребыва́нїе въ пра́вдѣ бж҃їей и҆спросѝ и҆ ѿ всѣ́хъ ѕѡ́лъ сохранѝ, да та́кѡ наро́ди на́ши, бг҃омъ храни́ми, въ є҆диномы́слїи вѣ́ры и҆ во всѧ́комъ бл҃гоче́стїи и҆ чистотѣ̀, въ лѣ́потѣ дꙋхо́внагѡ бра́тства, трезве́нїи и҆ согла́сїи свидѣ́тельствꙋютъ: ꙗ҆́кѡ съ на́ми бг҃ъ! Въ не́мже живе́мъ, и҆ дви́жемсѧ, и҆ є҆смы̀, и҆ пребꙋ́демъ во вѣ́ки. А҆ми́нь.
И҆́на мл҃тва.
ѽ ст҃ы́й првⷣный ѻ҆́тче і҆ѡа́нне, всерѡссі́йскїй свѣти́льниче и҆ преди́вный чꙋдотво́рче! Ты̀ ѿ младе́нческихъ лѣ́тъ бг҃омъ и҆збра́нъ бы́лъ є҆сѝ, и҆ дꙋ́хомъ пламенѣ́ѧ, ꙗ҆́кѡ и҆́стинный па́стырь, житїе́мъ, сло́вомъ, любо́вїю, вѣ́рою, чистото́ю лю́демъ послꙋжи́лъ є҆сѝ. Сегѡ̀ ра́ди мо́лимъ тѧ̀, првⷣный ѻ҆́тче: молѝ чл҃вѣколю́бца бг҃а цр҃ковь ст҃ꙋ́ю ми́ромъ и҆ тишино́ю ѡ҆гради́ти, зе́млю рѡссі́йскꙋю во бл҃годе́нствїи сохрани́ти, па̑стыри бл҃года́ти и҆ и҆́стины преиз̾ѻби́льнѡ и҆спо́лнити, вла̑сти ᲂу҆мꙋдри́ти, правосла́вное во́инство ᲂу҆крѣпи́ти, немощны̑ѧ и҆сцѣли́ти, развращє́нныѧ и҆спра́вити, ю҆́ныѧ воспита́ти, ста́рцы и҆ вдови̑цы ᲂу҆тѣ́шити и҆ на́мъ всѣ̑мъ во црⷭ҇твїи нбⷭ҇нѣмъ сподо́битисѧ со всѣ́ми ст҃ы́ми прославлѧ́ти ѻ҆ц҃а̀, и҆ сн҃а, и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.