А҆ка́ѳїстъ ст҃о́й првⷣной матрѡ́нѣ моско́вской.
Конда́къ а҃.
И҆збра́ннаѧ дх҃омъ бж҃їимъ ѿ пеле́нъ младе́нческихъ, бл҃же́ннаѧ ста́рице матрѡ́но, слѣпотꙋ̀ и҆ не́мощь тѣле́снꙋю ко ѡ҆чище́нїю дꙋхо́вномꙋ ѿ бг҃а прїѧ́вшаѧ, да́ромъ прозрѣ́нїѧ и҆ чꙋде́съ ѡ҆богати́ласѧ є҆сѝ и҆ вѣнце́мъ нетлѣ́ннымъ ѿ гдⷭ҇а ᲂу҆краси́ласѧ є҆сѝ. Сегѡ̀ ра́ди и҆ мы̀ бл҃года́рнѣ вѣне́цъ похва́льный прино́симъ тѝ, вопїю́ще:
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
І҆́косъ а҃.
А҆́гг҃лъ во пло́ти ꙗ҆ви́ласѧ є҆сѝ на землѝ, матрѡ́но бл҃же́ннаѧ, и҆сполнѧ́ющи во́лю бж҃їю. А҆́ще рождество̀ твоѐ въ слѣпотѣ̀ тѣле́снѣй бы́сть, но гдⷭ҇ь ᲂу҆мꙋдрѧ́ѧй слѣпцы̀ и҆ любѧ́й пра́вєдныѧ, просвѣтѝ дꙋхо́внѣи ѻ҆́чи твоѝ, да послꙋ́жиши лю́демъ и҆ дѣла̀ бж҃їѧ ꙗ҆вѧ́тсѧ чрез̾ тебѐ. Мы́ же съ любо́вїю вопїе́мъ тѝ такова̑ѧ:
Ра́дꙋйсѧ, ѿ младе́нчества бг҃омъ и҆збра́ннаѧ: ра́дꙋйсѧ, бл҃года́тїю дх҃а ст҃а́гѡ ѿ пеле́нъ ѡ҆сѣне́ннаѧ.
Ра́дꙋйсѧ, да́ромъ чꙋде́съ и҆з̾мла́да ѡ҆богаще́ннаѧ: ра́дꙋйсѧ, премꙋ́дростїю ѿ бг҃а свы́ше и҆спо́лненнаѧ.
Ра́дꙋйсѧ, мы́сленныма ѻ҆чи́ма во́лю бж҃їю прозира́ющаѧ: ра́дꙋйсѧ, слѣпо́тствꙋющихъ ᲂу҆мо́мъ мꙋдрецѡ́въ вѣ́ка сегѡ̀ посрамлѧ́ющаѧ.
Ра́дꙋйсѧ, дꙋ́шы заблꙋ́ждшыѧ къ бг҃ꙋ приводѧ́щаѧ: ра́дꙋйсѧ, скѡ́рби и҆ печа̑ли ᲂу҆толѧ́ющаѧ.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ в҃.
Ви́дѧще лю́дїе и҆ і҆ере́й, є҆гда̀ креща́ше тѧ̀, бл҃же́ннаѧ, чꙋ́дный сто́лпъ ѻ҆́блачный над̾ главо́ю твое́ю и҆ ѡ҆бонѧ́вше бл҃гоꙋха́нїе ве́лїе, дивлѧ́хꙋсѧ, что̀ ᲂу҆́бѡ сїѧ̀ ѻ҆трокови́ца бꙋ́детъ, пою́ще бг҃ꙋ: А҆ллилꙋ́їа.
І҆́косъ в҃.
Ра́зꙋмъ и҆мѣ́ѧ просвѣще́нный, і҆ере́й бж҃їй васі́лїй позна̀, ꙗ҆́кѡ креща́емаѧ ѿ негѡ̀ сосꙋ́дъ бл҃года́ти бж҃їѧ є҆́сть, и҆ тѧ̀, првⷣнаѧ матрѡ́но, ѻ҆трокови́цꙋ ст҃ꙋ наречѐ. Ѿ на́шегѡ же ᲂу҆се́рдїѧ прино́симъ тѝ похвалы̑ сїѧ̑:
Ра́дꙋйсѧ, во ст҃ѣ́й кꙋпѣ́ли бл҃года́тїю ст҃а́гѡ дх҃а ѡ҆бл҃гоꙋха́ннаѧ: ра́дꙋйсѧ, на пе́рсехъ твои́хъ крⷭ҇тъ запечатлѣ́нный и҆мѣ́вшаѧ.
Ра́дꙋйсѧ, мл҃твеннице, ѿ бг҃а лю́демъ дарова́ннаѧ: ра́дꙋйсѧ, свѣщѐ неꙋгаси́маѧ, пред̾ гдⷭ҇емъ сїѧ́ющаѧ.
Ра́дꙋйсѧ, да́ромъ чꙋдотворе́нїѧ ѿ бг҃а просла́вленнаѧ на землѝ: ра́дꙋйсѧ, вѣнце́мъ неꙋвѧда́емымъ ѿ гдⷭ҇а ᲂу҆вѣнча́ннаѧ на нб҃сѝ.
Ра́дꙋйсѧ, млⷭ҇ти бж҃їѧ грѣ̑шнымъ возвѣща́ющаѧ: ра́дꙋйсѧ, ѿ и҆сто́чника воды̀ живы́ѧ жа́ждꙋщыѧ напаѧ́ющаѧ.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ г҃.
Си́лꙋ бж҃їѧ бл҃года́ти ѡ҆щꙋща́ющи, є҆щѐ во младе́нчествѣ сꙋ́щи, матрѡ́но бл҃же́ннаѧ, ко і҆кѡ́намъ ст҃ы̑мъ ᲂу҆стремлѧ́ласѧ є҆сѝ и҆ чи́стымъ се́рдцемъ и҆ младе́нческими ᲂу҆сты̀ хвалꙋ̀ бг҃ꙋ возглаша́ла є҆сѝ: А҆ллилꙋ́їа.
І҆́косъ г҃.
И҆мꙋ́щи ѿ бг҃а да́ръ прозрѣ́нїѧ и҆здѣ́тска, бл҃же́ннаѧ ма́ти, сокровє́ннаѧ серде́цъ приходѧ́щихъ къ тебѣ̀ вѣ́дꙋщи и҆ ѻ҆́нымъ бꙋ̑дꙋщаѧ, ꙗ҆́кѡ настоѧ̑щаѧ, сказꙋ́ющи, мнѡ́гїѧ лю́ди на пꙋ́ть бл҃гоче́стїѧ направлѧ́ла є҆сѝ. Тѣ́мже прославлѧ́юще бг҃а, ᲂу҆мꙋдрѧ́ющаго слѣпцы̀, вопїе́мъ тебѣ̀ си́це:
Ра́дꙋйсѧ, ди́внаѧ прови́дице: ра́дꙋйсѧ, сокрове́нныхъ грѣхѡ́въ ѡ҆бличи́тельнице.
Ра́дꙋйсѧ, помраче́нныхъ дꙋше́ю пресвѣ́тлаѧ наста́внице: ра́дꙋйсѧ, заблꙋ́ждшихъ млⷭ҇тиваѧ пꙋтеводи́тельнице.
Ра́дꙋйсѧ, ѕвѣздо̀, вѣ̑рнымъ пꙋ́ть ᲂу҆казꙋ́ющаѧ: ра́дꙋйсѧ, свѣщѐ, во тьмѣ̀ вѣ́ка сегѡ̀ свѣтѧ́щаѧ.
Ра́дꙋйсѧ, є҆ди́номꙋ бг҃ꙋ послꙋжи́вшаѧ: ра́дꙋйсѧ, кѡ́зни дїа́вѡльскїѧ бл҃года́тїю дх҃а ст҃а́гѡ попра́вшаѧ.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ д҃.
Бꙋ́рѧ недоꙋмѣ́нїѧ и҆ смѧте́нїѧ ѡ҆ чꙋдесѣ́хъ твои́хъ въ лю́дехъ развѣ́ѧсѧ, ма́ти бл҃же́ннаѧ, и҆ ті́и, вразꙋми́вшꙋ и҆̀хъ гдⷭ҇ꙋ, ди́вномꙋ во ст҃ы́хъ свои́хъ, просла́виша и҆ восхвали́ша тѧ̀, бг҃ꙋ же съ бл҃годаре́нїемъ воспѣ́ша: А҆ллилꙋ́їа.
І҆́косъ д҃.
Слы́шавше лю́дїе, ма́ти матрѡ́но, ꙗ҆́кѡ по́мощь въ недꙋ́зѣхъ дꙋше́вныхъ и҆ тѣле́сныхъ подае́ши, прихожда́хꙋ къ тебѣ̀ со ᲂу҆пова́нїемъ, и҆ совѣ́тъ бл҃гопрїѧ́тенъ и҆ и҆сцѣле́нїе полꙋчи́вше, бл҃годарѧ́ще бг҃а, воспѣва́хꙋ тебѣ̀:
Ра́дꙋйсѧ, ꙗ҆́кѡ болѣ́знꙋющихъ и҆ стра́ждꙋщихъ дꙋше́ю прїе́млеши: ра́дꙋйсѧ, ꙗ҆́кѡ ми́ръ дꙋша́мъ скорбѧ́щымъ да́рꙋеши.
Ра́дꙋйсѧ, въ заблꙋжде́нїихъ сꙋ́щихъ вразꙋми́тельнице: ра́дꙋйсѧ, бл҃гоче́стїѧ ᲂу҆чи́тельнице.
Ра́дꙋйсѧ, печа́лей на́шихъ ᲂу҆толи́тельнице: ра́дꙋйсѧ, въ ско́рбехъ ᲂу҆тѣ́шительнице.
Ра́дꙋйсѧ, бл҃га́ѧ безсре́бренице: ра́дꙋйсѧ, недꙋ́гѡвъ всѧ́ческихъ безме́зднаѧ врачева́тельнице.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ є҃.
Бг҃оте́чнаѧ ѕвѣзда̀ возсїѧ́ла є҆сѝ, ма́ти бл҃же́ннаѧ матрѡ́но, во дни̑ лихолѣ́тїѧ во ѻ҆те́чествїи на́шемъ, ꙗ҆́кѡ но́ваѧ и҆сповѣ́дница, и҆́го хрⷭ҇то́во дерзнове́ннѡ и҆ безбоѧ́зненнѡ чрез̾ всѐ житїѐ пронесла̀ є҆сѝ, и҆ бл҃года́тїю бж҃їею ᲂу҆крѣплѧ́ема, подава́ла є҆сѝ недоꙋмѣва́ющымъ вразꙋмле́нїе, стра́ждꙋщымъ ѡ҆сла́бꙋ, больны̑мъ и҆сцѣле́нїе, бл҃года́рственнѡ зовꙋ́щымъ бг҃ꙋ: А҆ллилꙋ́їа.
І҆́косъ є҃.
Ви́дѣвше мно́зи рѡссі́йстїи лю́дїе чꙋдеса̀ и҆ и҆сцѣлє́нїѧ, бж҃їею бл҃года́тїю ѿ тебє̀ подава́ємаѧ: хромы̑мъ хожде́нїе, разсла́блєннымъ и҆ на ѻ҆дрѣ̀ лежа́щымъ и҆сцѣле́нїе, бѣснꙋ́ющымсѧ дꙋхѡ́въ ѕло́бы ѿгна́нїе, ᲂу҆стреми́шасѧ къ тебѣ̀, ма́ти, ꙗ҆́кѡ къ и҆сто́чникꙋ неисчерпа́емомꙋ, ѿ него́же и҆спи́вше ѻ҆би́льнѡ, ᲂу҆миле́ннымъ се́рдцемъ возопи́ша тебѣ̀ такова̑ѧ:
Ра́дꙋйсѧ, на пꙋ́ть пра́вый ѿ младе́нчества призва́ннаѧ: ра́дꙋйсѧ, првⷣнице, ѿ бг҃а на́мъ дарова́ннаѧ.
Ра́дꙋйсѧ, цѣли́тельнице, недꙋ́ги на́шѧ и҆сцѣлѧ́ющаѧ: ра́дꙋйсѧ, въ нꙋ́ждахъ на́шихъ ско́рѡ помога́ющаѧ.
Ра́дꙋйсѧ, дꙋшеполе́зными совѣ̑ты на́съ вразꙋмлѧ́ющаѧ: ра́дꙋйсѧ, недоꙋмѣ̑нїѧ на̑ша ско́рѡ разрѣша́ющаѧ.
Ра́дꙋйсѧ, дꙋ́хи нечи̑стыѧ ѿ человѣ̑къ ѿгонѧ́ющаѧ: ра́дꙋйсѧ, ѿ всѧ́кагѡ ѕла̀ мл҃твою твое́ю ѡ҆гражда́ющаѧ.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ ѕ҃.
Провозвѣ́стникъ ст҃ости и҆ првⷣности житїѧ̀ твоегѡ̀, бл҃же́ннаѧ ма́ти, ꙗ҆ви́сѧ ст҃ы́й и҆ првⷣный ѻ҆те́цъ і҆ѡа́ннъ кроншта́дтскїй, є҆гда̀ ᲂу҆зрѣ́ тѧ во хра́мѣ и҆ наименова́ тѧ свою̀ прее́мницꙋ, та́же и҆ ѻ҆смы́й сто́лпъ рѡссі́и. Вси́ же, слы́шавше сїѐ, просла́виша гдⷭ҇а, возглаша́юще є҆мꙋ̀ пѣ́снь: А҆ллилꙋ́їа.
І҆́косъ ѕ҃.
Возсїѧ̀ мл҃твами твои́ми, ма́ти матрѡ́но, свѣ́тъ бл҃года́ти бж҃їѧ въ сердца́хъ не вѣ́дꙋщихъ бг҃а и҆ грѣхмѝ мно́гими прогнѣвлѧ́ющихъ є҆го̀. Ті́и же, ви́дѧще чꙋдеса̀, тобо́ю соверша́ємаѧ, ѡ҆браща́хꙋсѧ ко гдⷭ҇ꙋ, ᲂу҆бл҃жа́юще тѧ̀ си́це:
Ра́дꙋйсѧ, пѡ́двиги твои́ми бг҃а прославлѧ́ющаѧ: ра́дꙋйсѧ, сла́вꙋ бж҃їю на́мъ ꙗ҆влѧ́ющаѧ.
Ра́дꙋйсѧ, невѣ̑рныѧ на пꙋ́ть пра́вый наставлѧ́ющаѧ: ра́дꙋйсѧ, грѣхмѝ ѡ҆сквернє́нныѧ мл҃твами твои́ми ѡ҆чища́ющаѧ.
Ра́дꙋйсѧ, къ покаѧ́нїю на́съ призыва́ющаѧ: ра́дꙋйсѧ, за всѧ̑ бл҃годари́ти гдⷭ҇а на́съ вразꙋмлѧ́ющаѧ.
Ра́дꙋйсѧ, хра́мъ бж҃їй люби́ти на́съ наꙋча́ющаѧ: ра́дꙋйсѧ, во ѻ҆гра́дꙋ цр҃ко́внꙋю расточє́нныѧ ѻ҆́вцы собира́ющаѧ.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ з҃.
Хотѧ́щи прест҃ꙋ́ю влⷣчцꙋ на́шꙋ бцⷣꙋ досто́йнѡ ᲂу҆бл҃жи́ти, ма́ти матрѡ́но, повелѣ́ла є҆сѝ лю́демъ написа́ти всечтⷭ҇ны́й ѻ҆́бразъ є҆ѧ̀, взыска́нїе поги́бшихъ и҆менꙋ́емый, и҆ въ хра́мѣ бж҃їемъ ве́си твоеѧ̀ водвори́ти, да всѝ, взира́юще на свѣ́тлый ли́къ пречⷭ҇тыѧ, со ᲂу҆миле́нїемъ восхва́лѧтъ ю҆̀, гдⷭ҇ꙋ же возопїю́тъ: А҆ллилꙋ́їа.
І҆́косъ з҃.
Но́вꙋю тѧ̀ застꙋ́пницꙋ, мл҃твенницꙋ и҆ хода́таицꙋ къ бг҃ꙋ дарова̀ гдⷭ҇ь въ годи́нꙋ тѧ́жкꙋю лю́демъ рѡссі̑йскимъ, мно́зи бо ѿпа́дахꙋ ѿ ст҃ы́ѧ цр҃кве, ты́ же, ма́ти, маловѣ̑рныѧ и҆ заблꙋ́ждшыѧ наставлѧ́ла є҆сѝ сло́вомъ и҆ дѣ́ломъ, ꙗ҆влѧ́ющи ди̑внаѧ чꙋдеса̀ бж҃їѧ. Тѣ́мже воспѣва́емъ тѝ си́це:
Ра́дꙋйсѧ, страны̀ на́шеѧ рѡссі́йскїѧ неꙋсы́пнаѧ печа́льнице: ра́дꙋйсѧ, сп҃се́нїѧ на́шегѡ хода́таице.
Ра́дꙋйсѧ, бг҃а, сꙋдїѝ првⷣнагѡ, ᲂу҆милостиви́тельнице: ра́дꙋйсѧ, недꙋ́жныхъ и҆ ѡ҆би́димыхъ покрови́тельнице.
Ра́дꙋйсѧ, немощны́хъ и҆ безнаде́жныхъ помо́щнице: ра́дꙋйсѧ, проти́вꙋ дꙋхѡ́въ ѕло́бы непреста́ннаѧ вои́тельнице.
Ра́дꙋйсѧ, ꙗ҆́кѡ трепе́щꙋтъ тѧ̀ кнѧ́зи бѣсо́встїи: ра́дꙋйсѧ, ꙗ҆́кѡ ра́дꙋютсѧ ѡ҆ тебѣ̀ а҆́гг҃ли и҆ человѣ́цы.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ и҃.
Стра́нно маловѣ̑рнымъ и҆ неразꙋ̑мнымъ бы́сть, ка́кѡ слѣпорожде́ннаѧ ви́дѣти и҆ вѣ́дѣти мо́жетъ не то́чїю настоѧ̑щаѧ, но и҆ бꙋ̑дꙋщаѧ, не вѣ́дѧхꙋ бо си́лы бж҃їѧ, въ не́мощи человѣ́честѣй соверша́емыѧ. Мы́ же, бл҃же́ннаѧ ма́ти, премⷣрость бж҃їю, въ тебѣ̀ ꙗ҆вле́ннꙋю, зрѧ́ще, вопїе́мъ бг҃ꙋ: А҆ллилꙋ́їа.
І҆́косъ и҃.
Всѧ́чєскїѧ досаждє́нїѧ и҆ ѻ҆би̑ды, и҆згна̑нїѧ и҆ ᲂу҆корє́нїѧ претерпѣ́ла є҆сѝ, бл҃же́ннаѧ ма́ти, не сѣ́тꙋющи ѡ҆ се́мъ, но за всѧ̑ бл҃годарѧ́щи бг҃а. Си́мъ же и҆ на́съ наꙋча́еши терпѣли́внѡ нестѝ кре́стъ сво́й, тебе́ же бл҃гохвали́ти та́кѡ:
Ра́дꙋйсѧ, въ мл҃твѣ непреста́ннѡ пребыва́вшаѧ: ра́дꙋйсѧ, дꙋхѡ́въ ѕло́бы посто́мъ и҆ мл҃твою ѿгна́вшаѧ.
Ра́дꙋйсѧ, ми́ръ бл҃года́тный стѧжа́вшаѧ: ра́дꙋйсѧ, любо́вїю твое́ю мнѡ́гїѧ ѡ҆́крестъ тебє̀ спаса́вшаѧ.
Ра́дꙋйсѧ, житїе́мъ твои́мъ и҆зрѧ́днѡ лю́демъ послꙋжи́вшаѧ: ра́дꙋйсѧ, и҆ по кончи́нѣ твое́й лю́демъ непреста́ннѡ помога́ющаѧ.
Ра́дꙋйсѧ, и҆ ны́нѣ на́шымъ проше́нїємъ те́плѣ внима́ющаѧ: ра́дꙋйсѧ, ᲂу҆пова́ющихъ на по́мощь твою̀ не ѡ҆ставлѧ́ющаѧ.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ ѳ҃.
Всѧ̑кїѧ скѡ́рби и҆ болѣ̑зни а҆́ще и҆ претерпѣ́ла є҆сѝ, ма́ти матрѡ́но, непреста́ннѡ ведꙋ́щи бра́нь съ си́лами тьмы̀, ѡ҆блича́ющи кѡ́зни и҆ кова̑рства и҆́хъ и҆ и҆згонѧ́ющи бѣ́сы ѿ ѡ҆держи́мыхъ, ѻ҆ба́че до кончи́ны дні́й твои́хъ помога́ла є҆сѝ стра́ждꙋщымъ, недꙋ́гꙋющымъ и҆ скорбѧ́щымъ, при́снѡ пою́щи бг҃ꙋ: А҆ллилꙋ́їа.
І҆́косъ ѳ҃.
Вѣті̑и многовѣща́ннїи не возмо́гꙋтъ досто́йнѡ просла́вити ст҃о́е житїѐ твоѐ и҆ чꙋдеса̀, си́лою бж҃їею тобо́ю твори̑маѧ, преди́внаѧ ста́рице. Мы́ же, хотѧ́ще ѱало́мски хвали́ти бг҃а во ст҃ы́хъ є҆гѡ̀ и҆ подвиза́емїи серде́чною любо́вїю, дерза́емъ пѣ́ти тебѣ̀ такова̑ѧ:
Ра́дꙋйсѧ, ᲂу҆́зкїй пꙋ́ть и҆ тѣ̑снаѧ врата̀ и҆збра́вшаѧ: ра́дꙋйсѧ, добродѣ́тельми мно́гими просїѧ́вшаѧ.
Ра́дꙋйсѧ, всѧ̑ тлѣ̑ннаѧ въ житїѝ твое́мъ ѿве́ргшаѧ: ра́дꙋйсѧ, смире́нїемъ, ꙗ҆́кѡ вѣнце́мъ драги́мъ, ᲂу҆краше́ннаѧ.
Ра́дꙋйсѧ, є҆ѵⷢ҇льски, ꙗ҆́кѡ пти́ца небе́снаѧ, на землѝ пожи́вшаѧ: ра́дꙋйсѧ, сн҃ꙋ бж҃їю, не и҆мѣ́вшемꙋ гдѣ̀ главꙋ̀ подклони́ти, послѣ́довавшаѧ.
Ра́дꙋйсѧ, ны́нѣ во ѻ҆би́телехъ ра́йскихъ веселѧ́щаѧсѧ: ра́дꙋйсѧ, и҆ на́съ грѣ́шныхъ, молѧ́щихсѧ тебѣ̀, млⷭ҇тїю твое́ю не ѡ҆ставлѧ́ющаѧ.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ і҃.
Спастѝ хотѧ́щи мнѡ́гїѧ лю́ди ѿ страда́нїй тѣле́сныхъ и҆ дꙋше́вныхъ недꙋ̑гъ, всено́щнѡ пребыва́ла є҆сѝ, првⷣнице бж҃їѧ, въ мл҃твѣ, просѧ́щи и҆̀мъ по́мощи и҆ ᲂу҆крѣпле́нїѧ ѿ гдⷭ҇а на́шегѡ і҆и҃са хрⷭ҇та̀, пою́щи є҆мꙋ̀: А҆ллилꙋ́їа.
І҆́косъ і҃.
Стѣна̀ и҆ покро́въ была̀ є҆сѝ во дни̑ житїѧ̀ твоегѡ̀, бл҃же́ннаѧ ма́ти, всѣ̑мъ къ тебѣ̀ прибѣга́ющымъ, и҆ по сме́рти не престае́ши хода́тайствовати пред̾ бг҃омъ ѡ҆ лю́дехъ, съ вѣ́рою притека́ющихъ ко гро́бꙋ твоемꙋ̀. Тѣ́мже ᲂу҆́бѡ ᲂу҆слы́ши ны́нѣ и҆ на́съ грѣ́шныхъ, скорбьмѝ, болѣ́зньми и҆ мно́гими печа́льми ѡ҆держи́мыхъ, и҆ потщи́сѧ на по́мощь твои́ми мл҃твами всѣ̑мъ къ тебѣ̀ вопїю́щымъ:
Ра́дꙋйсѧ, ѡ҆би́димыхъ ско́раѧ предста́тельнице: ра́дꙋйсѧ, терпѧ́щихъ лишє́нїѧ ᲂу҆тѣ́шительнице.
Ра́дꙋйсѧ, чтⷭ҇на́гѡ сꙋпрꙋ́жества ѡ҆хране́нїе: ра́дꙋйсѧ, всѣ́хъ во враждѣ̀ сꙋ́щихъ ᲂу҆мире́нїе.
Ра́дꙋйсѧ, непра́вѡ на сꙋ́дъ влеко́мыхъ защи́тительнице: ра́дꙋйсѧ, и҆ ѡ҆ вино́вныхъ пред̾ сꙋдо́мъ земны́мъ къ бг҃ꙋ млⷭ҇тиваѧ хода́таице.
Ра́дꙋйсѧ, лиши́вшихсѧ кро́ва приста́нище: ра́дꙋйсѧ, всѣ́хъ къ тебѣ̀ взыва́ющихъ застꙋ́пнице.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ а҃і.
Пѣ́нїе а҆́гг҃льское слы́шала є҆сѝ, ма́ти чтⷭ҇на́ѧ матрѡ́но, є҆щѐ на землѝ живꙋ́щи. Наꙋчѝ и҆ на́съ, недосто́йныхъ, ка́кѡ подоба́етъ сла́вити бг҃а, въ трⷪ҇цѣ почита́емаго, ѻ҆ц҃а̀ и҆ сн҃а и҆ ст҃а́го дх҃а, є҆мꙋ́же непреста́ннѡ вѡ́инства нбⷭ҇наѧ велегла́снѡ воспѣва́ютъ: А҆ллилꙋ́їа.
І҆́косъ а҃і.
Свѣтоза́рнымъ свѣ́томъ сїѧ́етъ житїѐ твоѐ, бл҃же́ннаѧ матрѡ́но, ѡ҆свѣща́ѧ мра́къ многосꙋ́етнагѡ мі́ра сегѡ̀, и҆ влече́тъ къ себѣ̀ дꙋ́шы на́шѧ, ꙗ҆́кѡ да и҆ мы̀ лꙋче́ю бл҃года́ти бж҃їѧ ѡ҆зари́мсѧ и҆ ско́рбный пꙋ́ть привре́менныѧ жи́зни бг҃оꙋго́днѡ про́йдемъ и҆ црⷭ҇твїѧ бж҃їѧ дости́гнемъ, и҆дѣ́же ты̀, ма́ти, ны́нѣ всели́ласѧ є҆сѝ, слы́шащи гла́съ на́шъ, тебѣ̀ зовꙋ́щихъ:
Ра́дꙋйсѧ, свѣщѐ бж҃їѧ, при́снѡ горѧ́щаѧ: ра́дꙋйсѧ, би́сере чтⷭ҇ны́й, блиста́нїемъ ст҃ы́ни твоеѧ̀ на́съ ѡ҆зарѧ́ѧй.
Ра́дꙋйсѧ, цвѣ́те бл҃гово́нный, дх҃омъ ст҃ы́мъ на́съ ѡ҆бл҃гоꙋха́ѧй: ра́дꙋйсѧ, ка́меню вѣ́ры, малодꙋ̑шныѧ въ бл҃гоче́стїи ᲂу҆твержда́ѧй.
Ра́дꙋйсѧ, ѕвѣздо̀ пресвѣ́тлаѧ, пра́вый пꙋ́ть на́мъ ᲂу҆казꙋ́ющаѧ: ра́дꙋйсѧ, до́браѧ вои́тельнице хрⷭ҇то́ва, мече́мъ мл҃твы де́мѡнскїѧ полкѝ ᲂу҆страша́ющаѧ.
Ра́дꙋйсѧ, ꙗ҆́кѡ всѐ житїѐ твоѐ ст҃о и҆ непоро́чно: ра́дꙋйсѧ, ꙗ҆́кѡ и҆ сме́рть твоѧ̀ пред̾ гдⷭ҇емъ чтⷭ҇на̀.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ в҃і.
Бл҃года́ть бж҃їю ѻ҆би́льнѡ є҆щѐ ѿ пеле́нъ воспрїѧ́ла є҆сѝ, ма́ти бл҃же́ннаѧ, ꙗ҆́же вы́нꙋ пребы́сть съ тобо́ю по всѧ̑ дни̑ жи́зни. Вѣ́рꙋемъ несꙋмнѣ́ннѡ, ꙗ҆́кѡ и҆ по ᲂу҆спе́нїи твое́мъ бл҃года́ть сїѧ̀ пребога́тнѡ пребыва́етъ съ тобо́ю. Сегѡ̀ ра́ди припа́дающе мо́лимсѧ: не лишѝ и҆ на́съ, є҆щѐ стра́нствꙋющихъ на землѝ, по́мощи твоеѧ̀ и҆ застꙋпле́нїѧ, просѧ́щи гдⷭ҇а поми́ловати всѣ́хъ пою́щихъ є҆мꙋ̀: А҆ллилꙋ́їа.
І҆́косъ в҃і.
Пою́ще мнѡ́гаѧ и҆ ди̑внаѧ твоѧ̑ чꙋдеса̀, ма́ти матрѡ́но, восхвалѧ́емъ бг҃а, дарова́вшаго гра́дꙋ москвѣ̀ и҆ ѻ҆те́чествꙋ на́шемꙋ во дни̑ безбо́жїѧ и҆ гоне́нїѧ тѧ̀ непоколеби́мый сто́лпъ бл҃гоче́стїѧ и҆ вѣ́ры. Ны́нѣ же, бл҃же́ннаѧ ма́ти, бл҃года́рнымъ се́рдцемъ воспѣва́емъ тебѣ̀ си́це:
Ра́дꙋйсѧ, ми́ръ хрⷭ҇то́въ въ дꙋшѝ твое́й стѧжа́вшаѧ: ра́дꙋйсѧ, сегѡ̀ ра́ди мнѡ́гїѧ лю́ди ѡ҆́крестъ тебє̀ къ бг҃ꙋ приве́дшаѧ.
Ра́дꙋйсѧ, въ немощнѣ́мъ тѣ́лѣ сꙋ́щи, си́лꙋ бж҃їѧ бл҃года́ти показа́вшаѧ: ра́дꙋйсѧ, во ѡ҆брѣ́тенїи чтⷭ҇ны́хъ моще́й твои́хъ бж҃їю млⷭ҇ть на́мъ ꙗ҆ви́вшаѧ.
Ра́дꙋйсѧ, со́нма ст҃ы́хъ моско́вскихъ и҆зрѧ́дное процвѣте́нїе: ра́дꙋйсѧ, гра́да москвы̀ пресла́вное ᲂу҆краше́нїе.
Ра́дꙋйсѧ, ѻ҆те́чества на́шегѡ при́снаѧ пред̾ бг҃омъ печа́льнице: ра́дꙋйсѧ, къ покаѧ́нїю и҆ мл҃твѣ ѡ҆ землѝ рѡссі́йстѣй всѣ́хъ призыва́ющаѧ.
Ра́дꙋйсѧ, првⷣнаѧ ма́ти матрѡ́но, те́плаѧ ѡ҆ на́съ къ бг҃ꙋ мл҃твеннице.
Конда́къ г҃і.
ѽ бл҃же́ннаѧ ма́ти, ᲂу҆слы́ши ны́нѣ воспѣва́емое тебѣ̀ хвале́бное пѣ́нїе и҆ и҆спросѝ на́мъ ᲂу҆ гдⷭ҇а і҆и҃са хрⷭ҇та̀ грѣхѡ́въ ѡ҆ставле́нїе, хрⷭ҇тїа́нскїѧ ми́рныѧ кончи́ны и҆ до́брагѡ ѿвѣ́та на стра́шнѣмъ сꙋди́щи є҆гѡ̀, да и҆ мы̀ съ тобо́ю сподо́бимсѧ въ селе́нїихъ ра́йскихъ сла́вити ст҃ꙋ́ю трⷪ҇цꙋ, вопїю́ще: А҆ллилꙋ́їа.
Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й, и҆ конда́къ а҃-й.
Мл҃тва.
ѽ бл҃же́ннаѧ ма́ти матрѡ́но, дꙋше́ю на нб҃сѝ пред̾ прⷭ҇то́ломъ бж҃їимъ предстоѧ́щаѧ, тѣ́ломъ же на землѝ почива́ющаѧ и҆ да́нною тѝ свы́ше бл҃года́тїю разли̑чнаѧ чꙋдеса̀ и҆сточа́ющаѧ! При́зри ны́нѣ млⷭ҇тивнымъ твои́мъ ѻ҆́комъ на ны̀ грѣ̑шныѧ, въ ско́рбехъ, болѣ́знехъ и҆ бѣсо́вскихъ и҆скꙋше́нїихъ дни̑ своѧ̑ и҆ждива́ющыѧ, ᲂу҆тѣ́ши ны̀ ѿча̑ѧнныѧ, и҆сцѣлѝ недꙋ́ги на́шѧ лю̑тыѧ, ѿ бг҃а на́мъ по грѣхѡ́мъ на́шымъ попꙋща́ємыѧ, и҆зба́ви на́съ ѿ мно́гихъ бѣ́дъ и҆ ѡ҆бстоѧ́нїй, ᲂу҆молѝ гдⷭ҇а на́шего і҆и҃са хрⷭ҇та̀ прости́ти на́мъ всѧ̑ на̑ша согрѣшє́нїѧ, беззакѡ́нїѧ и҆ грѣхопадє́нїѧ, и҆́миже мы̀ ѿ ю҆́ности на́шеѧ да́же до настоѧ́щагѡ днѐ и҆ часа̀ согрѣши́хомъ, да твои́ми мл҃твами полꙋчи́вше бл҃года́ть и҆ ве́лїю млⷭ҇ть, просла́вимъ въ трⷪ҇цѣ є҆ди́наго бг҃а, ѻ҆ц҃а̀ и҆ сн҃а и҆ ст҃а́го дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.