Акафист святителю Василию Кинешемскому

Возбра́нный архипа́стырю и испове́дниче Христо́в, в годи́ну безбо́жия в Росси́йстей земле́ пострада́вый, и ве́лие дерзнове́ние пред Го́сподом стяжа́вый, моли́ о лю́дех, недосто́йными устна́ми воспева́ющих ти́ похва́льная, да изба́вимся от злы́я напа́сти и обстоя́ний, зову́щи: Ра́дуйся, святи́телю Васи́лие, ве́ры правосла́вныя кре́пкий испове́дниче.

А́нгелом светоно́сным подража́телю и земноро́дных наста́вниче бы́л еси́, святи́телю о́тче Васи́лие; пои́стине ца́рским путе́м к небожи́телем возше́л еси́, отону́дуже призира́я вы́ну на ны́ гре́шныя, услы́ши во умиле́нии вопию́щих ти́ си́це: Ра́дуйся, на служе́ние апо́стольское от страны́ Росси́йския при́званный, Ра́дуйся, избра́ние твое́ испове́данием ве́ры правосла́вныя оправда́вый, Ра́дуйся, житие́ пра́ведное от ю́ности возлюби́вый, Ра́дуйся, доброде́тели роди́телей благочести́вых унасле́дивый, Ра́дуйся, послуша́ние ди́вное роди́телем богому́дрым яви́вый, Ра́дуйся, измла́да воздержа́нию, моли́тве и посту́ прилежа́вый, Ра́дуйся, вся́ собла́зны ми́ра сего́ презре́вый, Ра́дуйся, Христу́ Еди́ному рабо́тати вожделе́вый, Ра́дуйся, святи́телю Васи́лие, ве́ры правосла́вныя кре́пкий испове́дниче.

Ви́дя Промысли́тель о все́х Госпо́дь добро́ту души́ твоея́, возжела́ поста́вити тя́ архипа́стыря слове́сных ове́ц Свои́х; чуде́сным у́бо о́бразом от потопле́ния в реце́ Во́лзе тя́, святи́телю, избавля́я, да во умиле́нии се́рдца вопие́ши Бо́гу: Аллилу́иа.

Ра́зумом Богопросвеще́нным уразуме́л еси́, свя́те Васи́лие, нищету́ стяжа́ний земны́х и тле́нных, в небе́сная и ве́чная у́м впери́в, возжела́л еси́ прия́ти о́браз а́нгельский, святи́теля Вели́каго Васи́лия небе́сным покрови́телем име́я; приими́ же и от на́с недосто́йныя похвалы́ сия́: Ра́дуйся, целому́дрия ди́вное украше́ние, Ра́дуйся, чистоты́ душе́вныя и теле́сныя усе́рдный храни́телю, Ра́дуйся, всеце́ло ду́ху твоему́ пло́ть порабо́тивый, Ра́дуйся, нестяжа́нием твои́м вся́ удиви́вый, Ра́дуйся, я́ко прилежа́л еси́ моли́твам усе́рдным и коленопреклоне́нным, Ра́дуйся, каждодне́вным служе́нием Бо́гу угоди́вый, Ра́дуйся, горе́ устреми́вый вся́ по́мыслы души́ твоея́, Ра́дуйся, су́етство привре́менное презре́вый, Ра́дуйся, святи́телю Васи́лие, ве́ры правосла́вныя кре́пкий испове́дниче.

Си́лою Боже́ственною преизря́дно укрепля́ем, свя́те Васи́лие, каждодне́вныя Бо́гу служе́ния исправля́л еси́, пропове́дуя Сло́во Бо́жие па́стве твое́й, обходя́ гра́ды и ве́си, посеща́я все́х, ча́ющих утеше́ния твоего́ и науча́я богоприя́тно пе́ти все́х Творцу́: Аллилу́ия.

Име́я ре́вность о спасе́нии па́ствы твоея́, от зве́ря душетле́ннаго ста́до твое́ соблюда́я, скве́рная уче́ния беззако́нных облича́л еси́, и я́ко о́гнь опаля́ющь для безбо́жных и злы́х бы́л еси́. Мы́ же почита́юще твое́ непоколеби́мое му́жество, с любо́вию взыва́ем си́це: Ра́дуйся, гро́ме, сокруша́яй ерети́ческое злоче́стие, Ра́дуйся, ка́ющихся гре́шников наде́ждо и увеселе́ние, Ра́дуйся, заблужда́ющих исправи́телю прекро́ткий, Ра́дуйся, беззако́нных обличи́телю незло́бивый, Ра́дуйся, лжи́ и вся́каго нече́стия истреби́телю, Ра́дуйся, ста́да Христо́ва от волко́в хи́щных огради́телю, Ра́дуйся, Сло́ва Бо́жия неутоми́мый пропове́дниче, Ра́дуйся, Благода́ти Бо́жией вмести́лище, Ра́дуйся, святи́телю Васи́лие, ве́ры правосла́вныя кре́пкий испове́дниче.

Бу́ри ерети́ческаго злосло́вия не убоя́лся еси́, святи́телю о́тче Васи́лие, егда́ ме́рзкое обновле́нчество раски́ну се́ти своя́, уловля́я слабоду́шныя и малове́рныя лю́ди в поги́бель. Егда́ же изгна́ша тя́ из хра́ма вла́стию беззако́нною и богоме́рзкою, соверша́л еси́ служе́ние посреди́ гра́да, оби́льно ороша́я лани́ты своя́, слезя́ и вопия́ Бо́гу: Аллилу́ия.

Слы́шавше словеса́ спасе́ния от медоточи́вых усте́н твои́х излива́емыя, мно́жество правосла́вных люде́й на Богослуже́ния твоя́ стека́шеся. Сло́вом и́стины утеша́еми, прославля́ше Го́спода за такова́го преди́внаго архипа́стыря, в годи́ну лю́тую и́м дарова́ннаго; приими́ и от на́с велича́ние сие́: Ра́дуйся, я́ко веща́ние твое́ во вся́ концы́ земли́ на́шея изы́де, Ра́дуйся, я́ко сла́ва твоя́ в ро́ды родо́в дости́же; Ра́дуйся, ма́лым сирота́м пита́телю и помо́щниче, Ра́дуйся, неиму́щих бога́тое сокро́вище, Ра́дуйся, струя́ми благода́ти сердца́ ни́щих напои́вый, Ра́дуйся, пи́щею слове́с Бо́жиих ве́рныя изоби́льно насы́тивый, Ра́дуйся, моли́твенниче на́ш ко Го́споду непреста́нный, Ра́дуйся, те́плый о на́с гре́шных пред Бо́гом предста́телю, Ра́дуйся, святи́телю Васи́лие, ве́ры правосла́вныя кре́пкий испове́дниче.

Боготе́чный исто́чниче ми́лости Бо́жия бы́л еси́ на земли́, свя́те Васи́лие, прия́л бо еси́ вла́сть неду́зи душе́вныя и теле́сныя исцеля́ти, пра́вую ве́ру укрепля́ти, благода́тными и прему́дрыми словесы́ твои́ми науча́я ста́до свое́ воспева́ти Бо́гу: Аллилу́ия.

Ви́девше жи́тели гра́да Ки́нешмы и о́крест лежа́щия ве́си тя́, достохва́льне о́тче, архипа́стыря преди́вна, житие́ нескве́рно иму́ща; богому́дрым бо словесе́м твои́м уми́льно внима́юще, прославля́ху Еди́наго Бо́га в Тро́ице сла́вимаго. Те́мже и мы́ прино́сим ти́ сицева́я: Ра́дуйся, ско́рби жития́ сего́ претерпе́вый и да́нныя ти́ тала́нты приумно́живый, Ра́дуйся, поноше́ния за возлю́бленнаго Го́спода прия́вый, Ра́дуйся, пле́велы суему́дрия мече́м Сло́ва Бо́жия посеца́яй, Ра́дуйся, благонра́вное житие́ в та́йных по́двизех исправля́яй, Ра́дуйся, я́ко многоча́дную ма́терь со одра́ сме́ртнаго моли́твою твое́ю воздви́гл еси́, Ра́дуйся, сле́з ско́рбныя отрокови́цы о умира́ющем отце́ не презре́л еси́, Ра́дуйся, я́ко твои́м предста́тельством здра́вие о́ному дарова́л еси́, Ра́дуйся, я́ко безча́дным роди́телем ча́до моли́твенно у Бо́га испроси́л еси́, Ра́дуйся, святи́телю Васи́лие, ве́ры правосла́вныя кре́пкий испове́дниче.

Пропове́дник ве́ры Христо́вы тверде́йший адама́нта бы́л еси́, о́тче Васи́лие, я́ко до́брый во́ин Христо́в, огражда́я па́ству твою́ в годи́ну сме́ртных искуше́ний. Зло́бныя же богобо́рцы замы́слиша погуби́ти тя́; ты́ же я́ко а́гнец кро́ток на страда́ние за Христа́ изше́л еси́, воспева́я Промысли́телю о все́х Бо́гу: Аллилу́иа.

Возсия́л еси́ в Це́ркви Христо́ве, я́ко не́кое лучеза́рное свети́ло, архиере́ю Бо́жий, егда́ безбо́жныя вла́сти изгна́ша тя́ в кра́й Зыря́нский; я́ко во испове́дании твое́м не устраши́лся еси́ челове́ческих преще́ний, та́ко и мы́ недосто́йнии со тре́петом взыва́ем си́це: Ра́дуйся, А́гнец кро́ток, А́гнцу Христу́ закла́нному уподо́бивыйся, Ра́дуйся, во́лею свое́ю страда́ния за Христа́ прие́мый, Ра́дуйся, Го́сподеви, а не челове́ком угожда́вый, Ра́дуйся, И́мене Его́ ра́ди гоне́ния от отсту́пников прия́вый, Ра́дуйся, Златоу́стову терпе́нию в ссы́лках и темни́цах подража́вый, Ра́дуйся, испове́дниче, за грехи́ оте́чества твоего́ пострада́вый, Ра́дуйся, я́ко да́же до сме́рти ве́рен и́стине пребы́л еси́, Ра́дуйся, я́ко си́лою Бо́жией в по́двизех непобеди́м яви́лся еси́. Ра́дуйся, святи́телю Васи́лие, ве́ры правосла́вныя кре́пкий испове́дниче.

Хотя́й испыта́ти ве́ру наро́да Росси́йскаго, попусти́ Госпо́дь гоне́ния и ско́рби на лю́ди Своя́, да претерпе́вшии до конца́ спасе́ни бу́дут. Ты́ же, свя́те Васи́лие, вку́пе с му́ченики и испове́дники Росси́йскими просла́вил еси́ и́стиннаго Бо́га, взыва́я Ему́: Аллилу́ия.

Но́вый свети́льник возсия́л еси́ в Це́ркви Христо́ве, о́тче Васи́лие, благода́тию бо Бо́жиею укрепля́ем, ве́лия ско́рби и боле́зни претерпе́л еси́ и многоле́тныя ла́герныя труды́ поне́сл еси́ за благове́стие Христо́во; избие́ния, истяза́ния, муче́ния лю́тая в темни́цах прия́л еси́ от слу́г сатани́нских. Таково́му у́бо долготерпе́нию твоему́ дивя́щеся, восхваля́ем тя́ си́це: Ра́дуйся, за гре́шныя лю́ди Росси́йския земли́ пред Бо́гом те́плый хода́таю, Ра́дуйся, стране́ се́й и всему́ оте́честву на́шему многоце́нное украше́ние, Ра́дуйся, сердца́ на́ша в единомы́слии и любви́ ко оте́честву на́шему направля́яй, Ра́дуйся, от потопле́ния бу́рями жите́йскими росси́йския лю́ди спаса́яй, Ра́дуйся, я́ко тобо́ю па́ства Ки́нешемская просвети́ся, Ра́дуйся, я́ко ве́ра Христо́ва в не́й утверди́ся, Ра́дуйся, гра́да Ки́нешмы сла́во и утеше́ние, Ра́дуйся, Новому́чеников Росси́йских удобре́ние, Ра́дуйся, святи́телю Васи́лие, ве́ры правосла́вныя кре́пкий испове́дниче.

Стра́нника и прише́льца на земли́ се́й себе́ помышля́я, ре́вностно па́сл еси́ ста́до слове́сных ове́ц Христо́вых, досточу́дне о́тче Васи́лие, да обря́щеши вся́ пасо́мыя на нетле́нных па́житех небе́сных, вку́пе с ни́ми вопия́ Бо́гу: Аллилу́иа.

Ве́сь испо́лнен любве́ нелицеме́рныя к па́стве твое́й, о́тче честны́й Васи́лие, спасе́ние у́бо вся́цей душе́ христиа́нстей устроя́я, не иски́й свои́х си́, но по́льзы мно́гих, да не́кия спасе́ши. Сего́ ра́ди, почита́юще святу́ю па́мять твою́, усе́рдно взыва́ем ти́ такова́я: Ра́дуйся, ко спасе́нию до́брый путеводи́телю и наста́вниче, Ра́дуйся, архиере́ев добро́то, свяще́нников и и́ноков похвало́, Ра́дуйся, мона́шествующих нело́жный учи́телю, Ра́дуйся, ко спасе́нию ве́рный путеводи́телю, Ра́дуйся, от ересе́й и раско́лов кре́пкое огражде́ние, Ра́дуйся, па́стырем и пасо́мым до́брое поуче́ние, Ра́дуйся, путево́дная звездо́ блужда́ющим во мра́це безбо́жия, Ра́дуйся, о́блаче, источа́ющий ро́су уче́ний благочести́вых, Ра́дуйся, святи́телю Васи́лие, ве́ры правосла́вныя кре́пкий испове́дниче.

Все́м челове́ком хотя́щему спасти́ся Христу́, во изгна́ниих непреста́нно моли́лся о ча́дех твои́х, о́тче, да не и́мут в сердца́х свои́х зло́бы, да благотворя́т ненави́дящим, да благословля́ют проклина́ющия, я́ко вся́ поле́зная ко спасе́нию посыла́ет Госпо́дь лю́дем Свои́м. Мы́ же име́я тя́ моли́твенника те́плаго ко Го́споду, со дерзнове́нием пое́м Ему́: Аллилу́иа.

Вити́и ми́ра сего́ ри́торскими свои́ми язы́ки не возмо́гут изрещи́ тебе́ досто́йныя хвалы́, па́стырю ди́вный, мно́гих ра́ди твои́х по́двигов и боле́зней, я́же за Христа́ и Це́рковь подъя́л еси́ во́лею. Сего́ ра́ди и мы́ недоуме́я восхваля́ти тя́ по достоя́нию, воспева́ем си́це: Ра́дуйся, я́ко страда́ньми твои́ми ве́ра пра́вая утвержда́ется, Ра́дуйся, я́ко по словеси́ твоему́ Це́рковь Христо́ва в Росси́йстей земле́ возрожда́ется, Ра́дуйся, па́ству твою́ до кончи́ны своея́ попече́ньми не оста́вивый, Ра́дуйся, и по кончи́не при́сный о на́с хода́таю, Ра́дуйся, я́ко моли́тве смире́нной и покая́нной науча́еши, Ра́дуйся, я́ко любы́ ко Христу́ Бо́гу в ча́дех свои́х возгрева́еши. Ра́дуйся, му́жества и терпе́ния плоды́ Го́сподеви твоему́ принесы́й, Ра́дуйся, в пра́вде Христо́вой во дни́ испыта́ний кре́пце устоя́вый. Ра́дуйся, святи́телю Васи́лие, ве́ры правосла́вныя кре́пкий испове́дниче.

Спаси́теля ми́ра Христа́ Бо́га умоля́ти за ны́ не преста́й, святи́телю Васи́лие, тебе́ бо даде́ся благода́ть и ми́лость моли́тися за чту́щия па́мять твою́. Да с ве́рою притека́ющии ти́, благода́ти Бо́жией сподо́бимся, с любо́вию воспева́я Ему́: Аллилу́иа.

Сте́ну тя́ непоколеби́му обре́тше, све́тло пра́зднуем святу́ю па́мять твою́, пресла́вне о́тче на́ш Васи́лие; ты́ еси́ покро́ве и непосты́дная наде́ждо припа́дающим и моля́щимся тебе́ си́це: Ра́дуйся, ве́дение Боже́ственных Та́йн преди́вно стяжа́вый, Ра́дуйся, терпе́нием скорбе́й и боле́зней дре́вним отце́м Це́ркви подража́вый, Ра́дуйся, я́ко сподо́бился еси́ зре́ти небе́сныя си́лы, Престо́лу Бо́жию предстоя́щии, Ра́дуйся, да́р прови́дения от Го́спода прие́мый, Ра́дуйся, непреста́нною моли́твою на высоту́ безстра́стия возше́дый, Ра́дуйся, до́брое се́мя в се́рдце свое́м возрасти́вый, Ра́дуйся, Богоначерта́нный сви́ток пра́выя ве́ры, Ра́дуйся, до́брый учениче́ небе́снаго Учи́теля Христа́, Ра́дуйся, святи́телю Васи́лие, ве́ры правосла́вныя кре́пкий испове́дниче.

Пе́ние немо́лчное и моле́ние те́плое приими́ от на́с немощны́х, святи́телю Бо́жий, не преста́й ми́лостивно взира́ти на па́ству твою́ земну́ю, на гра́д се́й и оби́тель сию́; зри́ши бо на́ши ско́рби и ну́жды, боле́знуеши о на́ших не́мощех и гресе́х, подвиза́я и на́с недосто́йных во умиле́нии глубо́цем пе́ти Го́сподеви: Аллилу́иа.

Светоно́сный свети́льник бы́л еси́, о́тче Васи́лие, в годи́ну лю́тыя ско́рби возже́нный в стране́ на́шей; не оста́ви ны́, сооте́чественницы твоя́, ны́не по мо́рю стра́стнаго жития́ блужда́ющия, простри́ ру́ку по́мощи, вопию́щим ти́ си́це: Ра́дуйся, до́брый и неусы́пный де́лателю ни́вы Христо́вой, Ра́дуйся, Еди́наго и́стиннаго Бо́га пропове́дниче, Ра́дуйся, пра́вды ре́вностный блюсти́телю, Ра́дуйся, па́стырскаго служе́ния непоколеби́мый исполни́телю, Ра́дуйся, церко́вных кано́нов прему́дрый насади́телю, Ра́дуйся, сокро́вищ Правосла́вныя ве́ры усе́рдный храни́телю, Ра́дуйся, я́ко от святы́х моще́й твои́х исцеле́ния подава́еши, Ра́дуйся, я́ко и по преставле́нии твое́м с на́ми пребыва́еши, Ра́дуйся, святи́телю Васи́лие, ве́ры правосла́вныя кре́пкий испове́дниче.

Благода́ти Бо́жия сокро́вище яви́ся всечестна́я ра́ка моще́й твои́х, святи́телю о́тче Васи́лие, е́юже неду́жнии исцеля́ются, озло́бленнии умиря́ются, скорбя́щии утеша́ются, омраче́ннии просвеща́ются, и вси́ прославля́ют Бо́га, ди́внаго во святы́х Свои́х, пою́ще Ему́: Аллилу́иа.

Пое́м и восхваля́ем Многоми́лостиваго Бо́га, дарова́вшаго оте́честву на́шему кре́пкаго предста́теля и засту́пника – святи́теля на́шего Васи́лия; чти́м страда́ния и боле́зни твоя́, ублажа́ем свято́е житие́ твое́, почита́ем честну́ю кончи́ну твою́ и прославля́ем свяще́нную па́мять твою́, от избы́тка се́рдца вопию́ще: Ра́дуйся, земли́ Росси́йския па́стырю предо́брый, Ра́дуйся, Це́ркве Росси́йския красото́, Ра́дуйся, ду́шу твою́ за дру́ги своя́ положи́вый, Ра́дуйся, дру́же Царя́ Небе́снаго, о спасе́нии мно́гих поревнова́вый, Ра́дуйся, я́ко гра́д верху́ горы́ от ве́рных и неве́рных не утаи́выйся, Ра́дуйся, благи́й ра́бе и ве́рный, вше́дый в ра́дость Го́спода твоего́, Ра́дуйся, непоколеби́мо стоя́ти за Правосла́вную ве́ру Христо́ву на́с науча́еши, Ра́дуйся, моли́твами твои́ми от ересе́й и раско́лов Це́рковь на́шу огражда́еши, Ра́дуйся, святи́телю Васи́лие, ве́ры правосла́вныя кре́пкий испове́дниче.

О, пресла́вный уго́дниче Христо́в, святи́телю о́тче Васи́лие, стране́ Росси́йстей удобре́ние, похвало́ и ра́дование. Вонми́ гла́су моле́ний на́ших, из глубины́ серде́ц возноси́мых; испроси́ у Всеще́драго Бо́га грехо́в оставле́ние на́м дарова́ти и ве́чнаго муче́ния изба́витися, да во Ца́рствии Его́ вы́ну воспева́ем: Аллилу́иа, Аллилу́иа, Аллилу́иа.

А́нгелом светоно́сным подража́телю и земноро́дных наста́вниче бы́л еси́, святи́телю о́тче Васи́лие; пои́стине ца́рским путе́м к небожи́телем возше́л еси́, отону́дуже призира́я вы́ну на ны́ гре́шныя, услы́ши во умиле́нии вопию́щих ти́ си́це: Ра́дуйся, на служе́ние апо́стольское от страны́ Росси́йския при́званный, Ра́дуйся, избра́ние твое́ испове́данием ве́ры правосла́вныя оправда́вый, Ра́дуйся, житие́ пра́ведное от ю́ности возлюби́вый, Ра́дуйся, доброде́тели роди́телей благочести́вых унасле́дивый, Ра́дуйся, послуша́ние ди́вное роди́телем богому́дрым яви́вый, Ра́дуйся, измла́да воздержа́нию, моли́тве и посту́ прилежа́вый, Ра́дуйся, вся́ собла́зны ми́ра сего́ презре́вый, Ра́дуйся, Христу́ Еди́ному рабо́тати вожделе́вый, Ра́дуйся, святи́телю Васи́лие, ве́ры правосла́вныя кре́пкий испове́дниче.

Возбра́нный архипа́стырю и испове́дниче Христо́в, в годи́ну безбо́жия в Росси́йстей земле́ пострада́вый, и ве́лие дерзнове́ние пред Го́сподом стяжа́вый, моли́ о лю́дех, недосто́йными устна́ми воспева́ющих ти́ похва́льная, да изба́вимся от злы́я напа́сти и обстоя́ний, зову́щи: Ра́дуйся, святи́телю Васи́лие, ве́ры правосла́вныя кре́пкий испове́дниче.

О, предо́брый предста́телю за погиба́ющия во гресе́х и междоусо́бных бране́х лю́ди Росси́йския земли́, кре́пкий испове́дниче Христо́в святи́телю о́тче Васи́лие! Ты́ бо до́блественне подвиза́лся еси́ в жи́зни вре́менней, Христа́ дерзнове́нно испове́дал еси́, и мно́гия за Него́ му́ки претерпе́л еси́, ве́ру Правосла́вную соблю́л еси́ да́же до сме́рти. Умоли́ Го́спода Бо́га, всея́ тва́ри Соде́теля, да пода́ст на́м о́браз покая́ния, да изба́вит на́с от обольще́ния бли́з гряду́щаго богобо́рца, и да сохрани́т на́с от кова́рной се́ти его́ и от все́х ко́зней его́ в сокрове́нной пусты́не Своего́ спасе́ния. Е́й, о́тче честны́й! Не посрами́ ны́, притека́ющия ко твое́й по́мощи, сотвори́ ны́ досто́йны прославля́ти на небесе́х со все́ми святы́ми Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.