А҆ка́ѳїстъ ст҃и́телю тѵ́хѡнꙋ, є҆пⷭ҇копꙋ воро́нежскомꙋ, чꙋдотво́рцꙋ.
Конда́къ а҃.
И҆збра́нный ᲂу҆го́дниче хрⷭ҇то́въ, ст҃и́телю ѻ҆́ч҃е тѵ́хѡне, возсїѧ́вый мі́рови, ꙗ҆́кѡ свѣтоза́рное свѣти́ло, прославлѧ́юще просла́вльшаго тѧ̀ гдⷭ҇а, дарова́вшаго на́мъ въ тебѣ̀ но́ваго вели́каго мл҃твенника и҆ помо́щника, ско́раго недꙋ́гѡвъ дꙋше́вныхъ же и҆ тѣле́сныхъ цѣли́телѧ, похва́льное воспѣва́емъ тѝ пѣ́нїе: ты́ же, и҆мѣ́ѧй ве́лїе дерзнове́нїе къ влⷣцѣ небесѐ и҆ землѝ, ѿ всѧ́кихъ на́съ бѣ́дъ свободѝ зовꙋ́щихъ:
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
І҆́косъ а҃.
А҆́гг҃лѡвъ собесѣ́дниче и҆ человѣ́кѡвъ наста́вниче, ны́нѣ, ꙗ҆́кѡ бж҃їй слꙋжи́тель, предстоѧ̀ съ вы́шними ли̑ки, ст҃и́телю тѵ́хѡне, мо́лиши ѡ҆ всѣ́хъ на́съ хрⷭ҇та̀ бг҃а на́шего и҆ къ вѣ́дѣнїю спасе́нїѧ ны̀ рꙋково́диши. Сегѡ̀ ра́ди бл҃года́рнѣ во ᲂу҆миле́нїи вопїе́мъ тѝ:
Ра́дꙋйсѧ, пречестно́е ст҃ы́ѧ трⷪ҇цы селе́нїе: ра́дꙋйсѧ, чистото́ю и҆ ст҃ы́нею а҆́гг҃лѡмъ ᲂу҆подобле́нїе.
Ра́дꙋйсѧ, свѣти́льниче бжⷭ҇твеннагѡ свѣ́та: ра́дꙋйсѧ, всесвѣ́тлое бл҃года́ти прїѧ́телище.
Ра́дꙋйсѧ, при́сный пред̾ гдⷭ҇емъ на́шъ застꙋ́пниче: ра́дꙋйсѧ, те́плый пред̾ ни́мъ ѡ҆ на́съ моли́твенниче.
Ра́дꙋйсѧ, ско́рый въ нꙋ́ждахъ и҆ ско́рбехъ сꙋ́щымъ помо́щниче: ра́дꙋйсѧ, до́брый дꙋ́шъ на́шихъ наста́вниче.
Ра́дꙋйсѧ, цр҃кве правосла́вныѧ ᲂу҆твержде́нїе: ра́дꙋйсѧ, всеѧ̀ землѝ рѡссі́йскїѧ свѣ́тлое ѡ҆заре́нїе.
Ра́дꙋйсѧ, воро́нежскїѧ па́ствы похвало̀: ра́дꙋйсѧ, ѻ҆би́тели задо́нскїѧ ᲂу҆краше́нїе.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ в҃.
Ви́дѧ въ творе́нїихъ, а҆́ки въ зерца́лѣ, премꙋ́дрость и҆ сла́вꙋ творца̀ всѧ́ческихъ бг҃а, къ немꙋ̀ дх҃омъ вы́нꙋ возноси́лсѧ є҆сѝ, бг҃омꙋ́дре: свѣ́томъ же бг҃оразꙋ́мїѧ твоегѡ̀ и҆ на́съ ѡ҆зарѝ, да вопїе́мъ кꙋ́пнѡ съ тобо́ю: А҆ллилꙋ́їа.
І҆́косъ в҃.
Ра́зꙋмъ тво́й бжⷭ҇твенными ᲂу҆че́ньми просвѣти́лъ є҆сѝ, бг҃омꙋ́дре тѵ́хѡне, ѿве́ргнꙋвъ всѧ́ко плотско́е мꙋдрова́нїе, съ ра́зꙋмомъ же и҆ во́лю повинꙋ́лъ є҆сѝ гдⷭ҇еви: тѣ́мъ же сосꙋ́дъ чи́стъ и҆ селе́нїе дх҃ꙋ и҆́стины ꙗ҆ви́лсѧ є҆сѝ. Сегѡ̀ ра́ди, ꙗ҆́кѡ бг҃омꙋ́драго наста́вника, тѧ̀ ᲂу҆блажа́юще, воспѣва́емъ си́це:
Ра́дꙋйсѧ, бж҃їѧ премꙋ́дрости созерца́телю и҆ проповѣ́дниче: ра́дꙋйсѧ, ꙗ҆́кѡ ѿ тлѣ́ннагѡ мі́ра дꙋхо́вное сокро́вище, ᲂу҆слажда́ющее дꙋ́шы вѣ́рныхъ, собра́лъ є҆сѝ.
Ра́дꙋйсѧ, и҆́стиннагѡ бг҃осло́вїѧ златослове́сный ᲂу҆чи́телю: ра́дꙋйсѧ, ꙗ҆́кѡ ᲂу҆ста̀ хрⷭ҇то́вы, и҆сточа̑юща словеса̀ жи́зни вѣ́чныѧ, бы́лъ є҆сѝ.
Ра́дꙋйсѧ, зако́на бж҃їѧ ѿ всеѧ̀ дꙋшѝ твоеѧ̀ взыска́вый: ра́дꙋйсѧ, свидѣ́нїй и҆ ѡ҆правда́нїй гдⷭ҇нихъ возжада́вый.
Ра́дꙋйсѧ, ꙗ҆́кѡ къ нб҃сѝ ведꙋ́щими стезѧ́ми невозвра́тнѡ ше́лъ є҆сѝ: ра́дꙋйсѧ, ꙗ҆́кѡ на высотꙋ̀ добродѣ́телей возше́лъ є҆сѝ.
Ра́дꙋйсѧ, ꙗ҆́кѡ мы́сленнымъ ѻ҆́комъ къ невече́рнемꙋ свѣ́тꙋ хрⷭ҇тꙋ̀ вы́нꙋ взира́лъ є҆сѝ: ра́дꙋйсѧ, ꙗ҆́кѡ видѣ́нїѧ пренбⷭ҇нагѡ свѣ́та сподо́билсѧ є҆сѝ.
Ра́дꙋйсѧ, бж҃їѧ ра́зꙋма и҆спо́лненный: ра́дꙋйсѧ, бл҃года́тїю дх҃а ст҃а́гѡ прїѡсѣне́нный.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ г҃.
Си́ла вы́шнѧгѡ чꙋде́снѡ спасе́ тѧ ѿ напра́сныѧ сме́рти и҆ ꙗ҆́вѣ показа́ тѧ сы́на црⷭ҇твїѧ хрⷭ҇то́ва сꙋ́ща, ст҃и́телю ѻ҆́ч҃е тѵ́хѡне, є҆гда̀ во всю̀ но́щь пребыва́ющꙋ тѝ въ бг҃омы́слїи, внеза́пꙋ небеса̀ ѿверзо́шасѧ, и҆ ꙗ҆ви́сѧ свѣ́тъ неизрече́нный. И҆ та́кѡ премі́рныѧ ра́дости и҆спо́лнивсѧ, возопи́лъ є҆сѝ бг҃ꙋ: А҆ллилꙋ́їа.
І҆́косъ г҃.
И҆мѣ́ѧ вѣ́рꙋ несꙋмнѣ́ннꙋ и҆ по́мыслъ чи́стъ, всѧ̑ кра̑снаѧ мі́ра сегѡ̀ презрѣ́лъ є҆сѝ, тѵ́хѡне бл҃же́нне, и҆ въ ѻ҆́бразѣ а҆́гг҃льстѣмъ нелѣ́ностнѡ послꙋжи́лъ є҆сѝ гдⷭ҇ꙋ бг҃ꙋ: тѣ́мъ же, а҆́ки ѕвѣзда̀ пꙋтево́днаѧ, свѣ́тиши всѣ̑мъ, хотѧ́щымъ жи́ти въ преподо́бїи и҆ вопїю́щымъ тебѣ̀:
Ра́дꙋйсѧ, житїю̀ безпло́тныхъ поревнова́вый: ра́дꙋйсѧ, по́двигѡмъ дре́внихъ ст҃ы́хъ ѻ҆ц҃ъ подража́вый.
Ра́дꙋйсѧ, ꙗ҆́кѡ прїи́мъ кре́стъ, хрⷭ҇тꙋ̀ послѣ́довалъ є҆сѝ: ра́дꙋйсѧ, ꙗ҆́кѡ ѻ҆́бразъ страсте́й є҆гѡ̀ въ се́рдцѣ твое́мъ преднаписа́лъ є҆сѝ.
Ра́дꙋйсѧ, ꙗ҆́кѡ всѧ̑ кѡ́зни дїа́вола си́лою крⷭ҇та̀ гдⷭ҇нѧ разрꙋши́лъ є҆сѝ: ра́дꙋйсѧ, ꙗ҆́кѡ похотѣ̑нїѧ грѣхѡ́внаѧ моли́твою и҆ терпѣ́нїемъ побѣди́лъ є҆сѝ.
Ра́дꙋйсѧ, ꙗ҆́кѡ ᲂу҆гожда́лъ є҆сѝ гдⷭ҇ꙋ всѧ́кимъ бл҃гоꙋгожде́нїемъ: ра́дꙋйсѧ, преꙋкраше́ннаѧ хра́мино добродѣ́телей.
Ра́дꙋйсѧ, красото̀ смиренномꙋ́дрїѧ и҆ воздержа́нїѧ: ра́дꙋйсѧ, ѻ҆́бразе кро́тости и҆ послꙋша́нїѧ.
Ра́дꙋйсѧ, по́стникѡвъ весе́лїе и҆ и҆́нокѡвъ похвало̀: ра́дꙋйсѧ, бо́лїй въ ли́цѣ преподо́бныхъ.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ д҃.
Бꙋ́рю внꙋ́трь и҆мѣ́ѧ помышле́нїй, недоꙋмѣва́ше ра́бъ бж҃їй, что̀ рече́тъ ѡ҆ не́мъ гдⷭ҇ь, є҆гда̀ лю́дїе проразꙋмѣва́хꙋ є҆го̀ досто́йна бы́ти ст҃и́тельства: ѻ҆ба́че всего̀ себѐ хрⷭ҇тꙋ̀ бг҃ꙋ предадѐ, томꙋ̀ ѡ҆ всѣ́хъ благодаре́нїе возсыла́ѧ, зовы́й: А҆ллилꙋ́їа.
І҆́косъ д҃.
Слы́шавше лю́дїе ѡ҆ бл҃гопло́дныхъ добро́тахъ дꙋшѝ твоеѧ̀, бг҃оно́сне тѵ́хѡне, жела́нїемъ вожделѣ́ша тѧ̀ ви́дѣти на сте́пени ст҃и́тельства. Є҆гда́ же собо́ръ а҆рхїере́євъ недоꙋмѣва́ше вда́ти тебѣ̀ же́злъ па́стырства, занѐ ю҆́нъ бы́лъ є҆сѝ, а҆́бїе трикра́ты свы́ше свидѣ́тельствованъ є҆сѝ, ꙗ҆́кѡ досто́йный сосꙋ́дъ бжⷭ҇твенныѧ бл҃года́ти, всѧ̑ немощна̑ѧ врачꙋ́ющїѧ и҆ ѡ҆скꙋдѣва̑ющаѧ восполнѧ́ющїѧ. Тѣ́мъ же, дивѧ́щесѧ чꙋ́дномꙋ промышле́нїю бг҃а ѡ҆ тебѣ̀, прино́симъ тѝ сицева̑ѧ бл҃гохвалє́нїѧ:
Ра́дꙋйсѧ, а҆рхїере́ю, ѿ самагѡ̀ гдⷭ҇а пронарече́нный: ра́дꙋйсѧ, мꙋ́жꙋ жела́нїй, пастѝ ста́до хрⷭ҇то́во свы́ше и҆збра́нный.
Ра́дꙋйсѧ, пастыренача́льника і҆и҃са благоволе́нїе: ра́дꙋйсѧ, і҆ера́рхѡвъ ᲂу҆краше́нїе.
Ра́дꙋйсѧ, ꙗ҆́кѡ ѿ ᲂу҆́тра жи́зни твоеѧ̀ на стражбꙋ̀ слове́снагѡ ста́да и҆збра́нъ бы́лъ є҆сѝ: ра́дꙋйсѧ, ꙗ҆́кѡ и҆ до ве́чера житїѧ̀ твоегѡ̀ сꙋ́щыѧ въ вѣ́рѣ нелѣ́ностнѡ назида́лъ є҆сѝ.
Ра́дꙋйсѧ, па́стырю до́брый, ꙗ҆́кѡ гото́въ бы́лъ є҆сѝ дꙋ́шꙋ твою̀ положи́ти за ѻ҆́вцы своѧ̑: ра́дꙋйсѧ, многосвѣ́тлый цр҃кве свѣти́льниче.
Ра́дꙋйсѧ, а҆пⷭ҇лѡвъ соприча́стниче: ра́дꙋйсѧ, вели́кихъ ст҃и́телей сопресто́льниче.
Ра́дꙋйсѧ, ꙗ҆́кѡ первопресто́льникꙋ па́ствы твоеѧ̀, митрофа́нꙋ ѡ҆сщ҃е́нномꙋ, равноче́стенъ показа́лсѧ є҆сѝ: ра́дꙋйсѧ, ꙗ҆́кѡ прее́мникѡмъ твои́мъ вѣ́рный ко спасе́нїю пꙋтеводи́тель содѣ́лалсѧ є҆сѝ.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ є҃.
Бг҃оте́чнаѧ ѕвѣзда̀ ꙗ҆ви́лсѧ є҆сѝ всѣ̑мъ хрⷭ҇тїа́нѡмъ, свѧти́телю ѻ҆́ч҃е тѵ́хѡне: дѣѧ́нми бо и҆ ᲂу҆че́нми твои́ми не то́чїю во дни̑ живота̀ твоегѡ̀ до́брѣ назида́лъ є҆сѝ па́ствꙋ твою̀, но и҆ по честнѣ́мъ ᲂу҆спе́нїи твое́мъ всѣ̑мъ вѣ̑рнымъ показꙋ́еши пра̑вы стези̑ црⷭ҇твїѧ хрⷭ҇то́ва, и҆ наꙋча́еши при́снѡ взыва́ти къ бг҃ꙋ: А҆ллилꙋ́їа.
І҆́косъ є҃.
Ви́дѧ себѐ поста́влена на сте́пени а҆рхїере́йства, свѧти́телю ѻ҆́ч҃е на́шъ тѵ́хѡне, не да́лъ є҆сѝ сна̀ ѻ҆ча́мъ твои̑мъ, нижѐ вѣ́ждѡмъ дрема́нїѧ, поставлѧ́ѧ па́ствѣ твое́й па́стыри смы́слєнны и҆ всѧ̑ лю́ди ᲂу҆правлѧ́ѧ ко спасе́нїю. Мы́ же, вѣ́дꙋще тѧ̀ бы́ти пастыренача́льника бг҃омꙋ́дренна и҆ строи́телѧ до́мꙋ бж҃їѧ до́бра, взыва́емъ къ тебѣ̀:
Ра́дꙋйсѧ, крѣ́пкое корми́ло хрⷭ҇то́вы цр҃кве: ра́дꙋйсѧ, ни́вы гдⷭ҇ни ᲂу҆добре́нїе.
Ра́дꙋйсѧ, вѣ́рныхъ наде́жное ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.
Ра́дꙋйсѧ, хрⷭ҇то́ва вертогра́да дѣ́лателю неꙋсы́пный: ра́дꙋйсѧ, дꙋшетлѣ́нномꙋ ѕвѣ́рю ста́до твоѐ расхища́ти не попꙋсти́вый.
Ра́дꙋйсѧ, хра́мѡвъ благолѣ́пїѧ рачи́телю: ра́дꙋйсѧ, вѣ́рный та̑инъ ст҃ы́хъ строи́телю.
Ра́дꙋйсѧ, ꙗ҆́кѡ стра́жей до́мꙋ бж҃їѧ на стражбꙋ̀ недре́мленнꙋ ᲂу҆гото́валъ є҆сѝ: ра́дꙋйсѧ, ꙗ҆́кѡ па́стырємъ проповѣ́дати бл҃говре́меннѣ и҆ безвре́меннѣ заповѣ́далъ є҆сѝ.
Ра́дꙋйсѧ, бл҃гі́й и҆ вѣ́рный ра́бе бж҃їй: ра́дꙋйсѧ, ꙗ҆́кѡ вше́лъ є҆сѝ въ ра́дость гдⷭ҇а твоегѡ̀.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ ѕ҃.
Проповѣ́дникъ вои́стиннꙋ бл҃гоче́стїѧ ꙗ҆ви́лсѧ є҆сѝ, ст҃и́телю ѻ҆́ч҃е на́шъ тѵ́хѡне, є҆гда̀ ᲂу҆ви́дѣвъ безстꙋ́дное пра́зднество во гра́дѣ твое́мъ, ꙗ҆́кѡ до́бръ во́инъ хрⷭ҇то́въ, прите́клъ є҆сѝ на и҆́грище бѣсо́вское и҆ сло́вомъ вразꙋми́лъ є҆сѝ заблꙋ́ждшыѧ, наꙋча́ѧ всѣ́хъ взыва́ти є҆ди́номꙋ и҆́стинномꙋ бг҃ꙋ: А҆ллилꙋ́їа.
І҆́косъ ѕ҃.
Возсїѧ́лъ є҆сѝ, ꙗ҆́кѡ ѕвѣзда̀ лꙋчеза́рнаѧ, воро́нежской па́ствѣ, блиста́нїемъ ᲂу҆че́нїй твои́хъ ѡ҆зарѧ́ѧ дꙋ́шы вѣ́рныхъ и҆ разгонѧ́ѧ тмꙋ̀ нече́стїѧ и҆ сꙋевѣ́рїѧ. И҆ ны́нѣ сла́достїю писа́нїй твои́хъ насыща́еши всѧ̑ а҆́лчꙋщыѧ и҆ жа́ждꙋщыѧ пра́вды, и҆̀же благода́рнѣ и҆ взыва́ютъ къ тебѣ̀:
Ра́дꙋйсѧ, наста́вниче, всѣ́хъ къ нб҃сѝ направлѧ́ѧй: ра́дꙋйсѧ, проповѣ́дниче покаѧ́нїѧ, заблꙋ́ждшихъ къ и҆справле́нїю воззыва́ѧй.
Ра́дꙋйсѧ, сла́вы бж҃їѧ и҆́стинный ревни́телю: ра́дꙋйсѧ, стра́ннагѡ сꙋевѣ́рїѧ потреби́телю.
Ра́дꙋйсѧ, ꙗ҆́кѡ дꙋшетлѣ̑нныѧ ѻ҆бы̑чаи ѡ҆бличи́лъ є҆сѝ: ра́дꙋйсѧ, ꙗ҆́кѡ безстꙋ́дное и҆́грище ᲂу҆праздни́лъ є҆сѝ.
Ра́дꙋйсѧ, и҆́мже сатана̀ посрами́сѧ: ра́дꙋйсѧ, и҆́мже хрⷭ҇то́съ просла́висѧ.
Ра́дꙋйсѧ, ꙗ҆́кѡ и҆ по сме́рти твое́й дꙋ́шы вѣ́рныхъ назида́еши въ бл҃гоче́стїи сла́достїю писа́нїй твои́хъ: ра́дꙋйсѧ, ꙗ҆́кѡ въ ни́хъ сокро́вище, драгоцѣ́ннѣйшее зла́та и҆ сребра̀, на́мъ ѡ҆ста́вилъ є҆сѝ.
Ра́дꙋйсѧ, златоꙋ́сте рѡссі́йскїѧ цр҃кве: ра́дꙋйсѧ, па́ствы твоеѧ̀ при́сное ра́дованїе.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ з҃.
Хотѧ́й невозбра́ннѡ возноси́тисѧ дꙋ́хомъ въ гѡ́рнѧѧ селє́нїѧ, бл҃готи́шїе пꙋсты́ни возлюби́лъ є҆сѝ, бг҃оно́се ѻ҆́ч҃е тѵ́хѡне, и҆ та́мѡ всели́всѧ, сподо́билсѧ є҆сѝ ви́дѣти гдⷭ҇а, ѿ і҆кѡ́ны, а҆́ки ѿ голго́ѳы, къ тебѣ̀ грѧдꙋ́ща, вопїѧ̀ къ немꙋ̀: А҆ллилꙋ́їа.
І҆́косъ з҃.
Нѡ́вымъ по́двигѡмъ дꙋхѡ́внымъ вда́лъ є҆сѝ себѐ, бг҃оно́сне ѻ҆́ч҃е тѵ́хѡне, є҆гда̀ всесоверши́тельнагѡ дх҃а бл҃года́ть призва́ тѧ слꙋжи́ти гдⷭ҇еви въ безмо́лвїи: и҆мы́й бо по́мыслъ превы́ше мі́ра, возлюби́лъ є҆сѝ смире́нїе глꙋбо́кое и҆ моли̑твы непреста̑нныѧ. Сегѡ̀ ра́ди и҆ крѣ́пость дꙋхо́внꙋю подадѐ тебѣ̀ подвигополо́жникъ хрⷭ҇то́съ и҆ сподо́би тѧ̀ видѣ́нїй бл҃года́тныхъ, да и҆ мы̀, вѣ́дꙋще такова̑ѧ, ᲂу҆блажа́емъ тѧ̀:
Ра́дꙋйсѧ, люби́телю безмо́лвїѧ, дꙋ́хомъ твои́мъ въ вы́шнихъ ѡ҆бита́вый: ра́дꙋйсѧ, самоѿверже́нїе всецѣ́лое показа́вый.
Ра́дꙋйсѧ, во бдѣ́нїихъ и҆ моли́твахъ неѡсла́бнѡ пребыва́лъ є҆сѝ: ра́дꙋйсѧ, безстра́стїе ᲂу҆мерщвле́нїемъ страсте́й твои́хъ стѧжа́лъ є҆сѝ.
Ра́дꙋйсѧ, гдⷭ҇а распѧ́таго на крⷭ҇тѣ̀ вы́нꙋ пред̾ собо́ю предзрѣ́вый: ра́дꙋйсѧ, и҆ тѣле́сныма ѻ҆чи́ма ви́дѣти хрⷭ҇та̀ і҆и҃са сподо́бивыйсѧ.
Ра́дꙋйсѧ, ꙗ҆́кѡ пречⷭ҇тымъ стопа́мъ є҆гѡ̀ поклони́лсѧ є҆сѝ: ра́дꙋйсѧ, ꙗ҆́кѡ спаси́тєльныѧ ꙗ҆́звы є҆гѡ̀ ѡ҆блобыза́лъ є҆сѝ.
Ра́дꙋйсѧ, и҆спо́лнь весе́лїѧ, є҆гда̀ ꙗ҆ви́сѧ тебѣ̀ бг҃ома́терь со а҆пⷭ҇тѡлы: ра́дꙋйсѧ, ꙗ҆́кѡ въ славосло́вїи ликовствова́лъ є҆сѝ со а҆́гг҃лы.
Ра́дꙋйсѧ, таи́нниче бж҃їй, є҆щѐ на землѝ вкꙋси́вый нбⷭ҇ныхъ бла̑гъ: ра́дꙋйсѧ, а҆́гг҃ле земны́й и҆ человѣ́че нбⷭ҇ный.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ и҃.
Стра́нно и҆ вели́ко неѕло́бїе показа̀, пребл҃же́нный, є҆гда̀ є҆ди́нъ бꙋ́їй и҆ ѕлонра́вный ᲂу҆да́ри є҆го̀ въ лани́тꙋ: ѻ҆́нъ же, а҆́гнцꙋ хрⷭ҇тꙋ̀ поревнова́въ, до землѝ поклони́сѧ бїю́щемꙋ, молѧ̀ бг҃а ѡ҆ проще́нїи є҆мꙋ̀. Тѣ́мже дивѧ́щесѧ неѕло́бїю є҆гѡ̀, пое́мъ бг҃ꙋ: А҆ллилꙋ́їа.
І҆́косъ и҃.
Ве́сь и҆спо́лнь любвѐ хрⷭ҇то́вы, тѵ́хѡне бл҃госе́рде, дꙋ́шꙋ твою̀ полага́лъ є҆сѝ за дрꙋ́ги твоѧ̑, и҆ а҆́ки а҆́гг҃лъ храни́тель присꙋ́щь бы́лъ є҆сѝ бли̑жнимъ же и҆ да̑льнымъ, ѡ҆ѕло́блєнныѧ ᲂу҆кроща́ѧ, враждꙋ́ющыѧ примирѧ́ѧ, и҆ спасе́нїе всѣ̑мъ ᲂу҆строѧ́ѧ. Сегѡ̀ ра́ди чте́мъ ст҃ꙋ́ю па́мѧть твою̀ и҆ ᲂу҆се́рднѡ вопїе́мъ тѝ:
Ра́дꙋйсѧ, проповѣ́дниче любвѐ, є҆́юже бг҃ъ примирѝ себѣ̀ человѣ́ки: ра́дꙋйсѧ, ѻ҆́тче бл҃госе́рдый, взыска́вый спасе́нїѧ мно́гихъ.
Ра́дꙋйсѧ, смире́нїѧ и҆ неѕло́бїѧ ᲂу҆чи́телю: ра́дꙋйсѧ, терпѣ́нїѧ и҆ миролю́бїѧ наста́вниче.
Ра́дꙋйсѧ, ꙗ҆́кѡ за пра́вдꙋ претерпѣ́лъ є҆сѝ заꙋше́нїе: ра́дꙋйсѧ, ꙗ҆́кѡ за врагѝ твоѧ̑ ᲂу҆молѧ́лъ є҆сѝ гдⷭ҇а.
Ра́дꙋйсѧ, є҆гѡ́же любо́вь побѣдѝ всѧ́кꙋ враждꙋ̀: ра́дꙋйсѧ, є҆гѡ́же неѕло́бїе покорѝ бꙋ̑ѧѧ сердца̀.
Ра́дꙋйсѧ, миротво́рче благослове́нный: ра́дꙋйсѧ, мздꙋ̀ миротво́рцєвъ наслѣ́дивый. Ра́дꙋйсѧ, наꙋчи́вый за́повѣдемъ хрⷭ҇тѡ́вымъ и҆ сотвори́вый ѧ҆̀: ра́дꙋйсѧ, ве́лїй въ црⷭ҇твїи нбⷭ҇нѣмъ.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ ѳ҃.
Всѣ̑мъ бы́лъ є҆сѝ всѧ̑, ꙗ҆́коже и҆ ст҃ы́й па́ѵелъ, да всѧ́кѡ нѣ̑кїѧ спасе́ши, бг҃омꙋ́дре: сразсꙋжда́ѧ бо немощно́мꙋ є҆стествꙋ̀ человѣ́ческомꙋ, не ᲂу҆кори́лъ є҆сѝ бра́та твоегѡ̀, неподоба́ющыѧ постꙋ̀ снѣ̑ди ꙗ҆дꙋ́ща, но а҆́бїе сѣ́дши кꙋ́пнѡ съ дрꙋ́гомъ є҆гѡ̀, ѿ трапе́зы тоѧ̀ ма́лѡ вкꙋси́лъ є҆сѝ. Помина́юще ᲂу҆́бѡ таково́е бл҃госнисхожде́нїе твоѐ, вопїе́мъ къ просла́вльшемꙋсѧ въ тебѣ̀ человѣколю́бцꙋ бг҃ꙋ: А҆ллилꙋ́їа.
І҆́косъ ѳ҃.
Вѣті̑ѧ многовѣща̑нныѧ не возмо́гꙋтъ по достоѧ́нїю и҆зрещѝ твои́хъ благодѣѧ́нїй мно́жество, ст҃и́телю ѻ҆́ч҃е тѵ́хѡне: щедрода́тельнаѧ бо десни́ца твоѧ̀ всю́дꙋ досѧза́ше. Мы́ же, бл҃госе́рдїю твоемꙋ̀ подража́ти хотѧ́ще, во ᲂу҆дивле́нїи взыва́емъ къ тебѣ̀:
Ра́дꙋйсѧ, лꙋчꙋ̀ любвѐ бж҃їѧ: ра́дꙋйсѧ, сокро́вище милосе́рдїѧ сп҃сова неистощи́мое.
Ра́дꙋйсѧ, бли̑жнїѧ твоѧ̑ па́че себє̀ возлюби́вый: ра́дꙋйсѧ, въ ме́ньшихъ бра́тїѧхъ твои́хъ самаго̀ хрⷭ҇та̀ ви́дѣвый.
Ра́дꙋйсѧ, ꙗ҆́кѡ, ни́щыѧ помина́ѧ, хлѣ́бъ тво́й слеза́ми ѡ҆роша́лъ є҆сѝ: ра́дꙋйсѧ, ꙗ҆́кѡ питїѐ твоѐ пла́чемъ ѡ҆ ни́хъ растворѧ́лъ є҆сѝ.
Ра́дꙋйсѧ, ꙗ҆́кѡ и҆мѣ̑нїѧ твоѧ̑ неимꙋ́щымъ расточа́лъ є҆сѝ: ра́дꙋйсѧ, ꙗ҆́кѡ щедрода́тельнаѧ десни́ца твоѧ̀ николи́же ѡ҆скꙋдѣ̀.
Ра́дꙋйсѧ, ꙗ҆́кѡ больны̑ѧ и҆ въ темни́цѣ заключє́нныѧ посѣща́лъ є҆сѝ: ра́дꙋйсѧ, ꙗ҆́кѡ нꙋ̑жды бѣ́дныхъ предварѧ́лъ є҆сѝ.
Ра́дꙋйсѧ, сло́вомъ и҆ примѣ́ромъ затворє́нныѧ на бл҃госты́ню сердца̀ ѿверза́вый: ра́дꙋйсѧ, ми́лостивыхъ бл҃же́нство ѿ гдⷭ҇а стѧжа́вый.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ і҃.
Спасти́сѧ всѣ̑мъ хотѧ́й пребл҃гі́й гдⷭ҇ь ꙗ҆ви́ тѧ, ст҃и́телю ѻ҆́ч҃е на́шъ тѵ́хѡне, ѻ҆́бразъ житїѧ̀ пра́веднагѡ: кто́ бо не ᲂу҆мили́тсѧ, ви́дѧ твоѐ безмѣ́рное ко всѣ̑мъ бл҃госе́рдїе; Тѣ́мже ве́лїю къ на́мъ ми́лость бж҃їю сла́вѧще, вопїе́мъ: А҆ллилꙋ́їа.
І҆́косъ і҃.
Стѣна̀ бы́лъ є҆сѝ по́мощи и҆ застꙋпле́нїѧ всѣ̑мъ безпомѡ́щнымъ и҆ напа́ствꙋємымъ, ст҃и́телю тѵ́хѡне, и҆ милосе́рдїѧ неистощи́мое сокро́вище. Сегѡ̀ ра́ди сла́вѧще бг҃а, ди́внаго во ст҃ы́хъ свои́хъ, и҆ тѧ̀ ᲂу҆блажа́емъ:
Ра́дꙋйсѧ, безкро́вныхъ приста́нище: ра́дꙋйсѧ, всѣ́хъ безпомо́щныхъ ско́рый помо́щниче.
Ра́дꙋйсѧ, си́рыхъ пита́телю и҆ призрѣ́нїе: ра́дꙋйсѧ, скꙋ́дныхъ земледѣ́льцєвъ снабдѣ́нїе.
Ра́дꙋйсѧ, скорбѧ́щымъ прибѣ́жище: ра́дꙋйсѧ, печа̑льнымъ ᲂу҆тѣше́нїе.
Ра́дꙋйсѧ, ѡ҆би̑димымъ застꙋпле́нїе: ра́дꙋйсѧ, ѡ҆би́дѧщихъ вразꙋмле́нїе.
Ра́дꙋйсѧ, ᲂу҆гнетє́ннымъ защи́тниче: ра́дꙋйсѧ, си̑льнымъ мі́ра сегѡ̀ небоѧ́зненный сꙋда̀ бж҃їѧ провозвѣ́стниче.
Ра́дꙋйсѧ, ꙗ҆́кѡ за пра́вдꙋ претерпѣ́лъ є҆сѝ скѡ́рби: ра́дꙋйсѧ, ꙗ҆́кѡ стѧжа́лъ є҆сѝ блаже́нство гони́мыхъ ра́ди пра́вды.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ а҃і.
Пѣ́нїе ᲂу҆ гро́ба твоегѡ̀, ᲂу҆го́дниче бж҃їй, ст҃и́телю ѻ҆́ч҃е тѵ́хѡне, не ᲂу҆молчѐ ѿ днѐ бл҃же́ннагѡ ᲂу҆спе́нїѧ до днѐ свѣ́тлагѡ прославле́нїѧ твоегѡ̀: мно́зи бо вѣ́дѧхꙋ тѧ̀ бг҃оно́сна и҆ равноа́гг҃льна сꙋ́ща. Ны́нѣ же всѧ̀ рѡссі́йскаѧ землѧ̀ бл҃года́рнѣ вопїе́тъ просла́вльшемꙋ тѧ̀ бг҃ꙋ: А҆ллилꙋ́їа.
І҆́косъ а҃і.
Свѣти́ло бы́въ, всѧ̑ концы̀ землѝ рѡссі́йскїѧ ѡ҆зари́лъ є҆сѝ, ст҃и́телю приснопа́мѧтне. Є҆гда́ же приспѣ̀ вре́мѧ ѿше́ствїѧ твоегѡ̀, бж҃е́ственнїи а҆́гг҃ли прїѧ́ша ст҃ꙋ́ю дꙋ́шꙋ твою̀ и҆ въ нбⷭ҇ныѧ ѻ҆би́тєли вознесо́ша: тѣ́ло же твоѐ честно́е трⷪ҇ца вседѣ́тельнаѧ содѣ́ла нетлѣ́нно и҆ и҆сто́чникъ чꙋде́съ показа̀ на ᲂу҆твержде́нїе правосла́вныѧ вѣ́ры, на ѡ҆бличе́нїе же невѣ́рїѧ и҆ сꙋевѣ́рїѧ. Тѣ́мже помина́юще бл҃же́нное ᲂу҆спе́нїе и҆ ве́лїе твоѐ на нб҃сѝ и҆ на землѝ прославле́нїе, съ ра́достїю прино́симъ тѝ бл҃гохвалє́нїѧ сїѧ̑:
Ра́дꙋйсѧ, вели́кїй ᲂу҆го́дниче бж҃їй, тече́нїе бл҃гоче́стнѣ сконча́вый: ра́дꙋйсѧ, вѣ́рꙋ, наде́ждꙋ и҆ любо́вь до конца̀ сохрани́вый.
Ра́дꙋйсѧ, по трꙋдѣ́хъ стра́нствїѧ земна́гѡ сла́дцѣ въ селе́нїихъ нбⷭ҇ныхъ почи́вый: ра́дꙋйсѧ, ꙗ҆́кѡ сме́рть прїѧ́вый, тлѣ́нїѧ же не позна́вый.
Ра́дꙋйсѧ, со хрⷭ҇то́мъ, є҆го́же возлюби́лъ є҆сѝ, на вѣ́ки соедини́выйсѧ: ра́дꙋйсѧ, црⷭ҇твїѧ нбⷭ҇нагѡ и҆ сла́вы вѣ́чныѧ наслѣ́дниче.
Ра́дꙋйсѧ, ꙗ҆́кѡ нетлѣ́нїемъ моще́й твои́хъ спаси́тельнꙋю си́лꙋ воскресе́нїѧ хрⷭ҇то́ва ꙗ҆влѧ́еши: ра́дꙋйсѧ, ꙗ҆́кѡ ѻ҆́нымъ зарю̀ ѻ҆́бщагѡ воскресе́нїѧ на́мъ показꙋ́еши.
Ра́дꙋйсѧ, и҆́стины правосла́вїѧ несомнѣ́нное ᲂу҆вѣре́нїе: ра́дꙋйсѧ, въ цр҃кви присꙋ́щїѧ бл҃года́ти нело́жное и҆звѣще́нїе.
Ра́дꙋйсѧ, земна́гѡ ѻ҆те́чества твоегѡ̀ но́вое свѣти́ло и҆ ᲂу҆твержде́нїе: ра́дꙋйсѧ, ца́рства правосла́внагѡ покро́ве и҆ защище́нїе.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ в҃і.
Бл҃года́ть чꙋде́съ многоѻбра́зныхъ, всели́всѧ въ нб҃сѝ, прїѧ́лъ є҆сѝ ѿ гдⷭ҇а, преблаже́нне тѵ́хѡне. Сегѡ̀ ра́ди подае́ши и҆сцѣлє́нїѧ всѣ̑мъ, притека́ющымъ къ тебѣ̀ съ вѣ́рою. Мы́ же, дивѧ́щесѧ въ тебѣ̀ всемогꙋ́ществꙋ и҆ бла́гости бг҃а, вопїе́мъ є҆мꙋ̀: А҆ллилꙋ́їа.
І҆́косъ в҃і.
Пою́ще ди́вное прославле́нїе ст҃а́гѡ тѣлесѐ твоегѡ̀, ви́димъ тѧ̀, бг҃облаже́нне ст҃и́телю тѵ́хѡне, при́снѡ здѣ̀ и҆сточа́юща пото́ки чꙋде́съ, и҆ въ ᲂу҆дивле́нїи восхвалѧ́юще тѧ̀, зове́мъ:
Ра́дꙋйсѧ, живоно́сный и҆сто́чниче, благода́ть и҆сцѣле́нїй и҆злива́ѧй на́мъ ѿ всечестны́ѧ ра́ки твоеѧ̀: ра́дꙋйсѧ, всѣ́хъ ѡ҆держи́мыхъ недꙋ̑ги непосты́дное прибѣ́жище.
Ра́дꙋйсѧ, слѣпы́хъ прозрѣ́нїе: ра́дꙋйсѧ, нѣмы́хъ ꙗ҆́сное глаго́ланїе.
Ра́дꙋйсѧ, ꙗ҆́кѡ ѿ ѻ҆дра̀ разсла́блєнныѧ воздвиза́еши: ра́дꙋйсѧ, ꙗ҆́кѡ стꙋжа́ємыѧ ѿ бѣсѡ́въ свобожда́еши.
Ра́дꙋйсѧ, сꙋхорꙋ̑кїѧ и҆ слѧ́чєнныѧ къ дѣ́ланїю и҆справлѧ́ѧй: ра́дꙋйсѧ, хромы̑мъ и҆ нича́щымъ хожде́нїе подава́ѧй.
Ра́дꙋйсѧ, тѣле́съ на́шихъ бл҃госострада́тельный врачꙋ̀ и҆ хране́нїе: ра́дꙋйсѧ, и҆ дꙋ́шъ на́шихъ къ црⷭ҇твїю нбⷭ҇номꙋ возведе́нїе.
Ра́дꙋйсѧ, є҆мꙋ́же сора́дꙋютсѧ а҆́гг҃ли, и҆ ѡ҆ не́мже веселѧ́тсѧ человѣ́цы: ра́дꙋйсѧ, и҆́мже бг҃ъ ди́венъ во ст҃ы́хъ свои́хъ ꙗ҆влѧ́етсѧ.
Ра́дꙋйсѧ, тѵ́хѡне, вели́кїй и҆ пресла́вный чꙋдотво́рче.
Конда́къ г҃і.
Ѽ вели́кїй и҆ пресла́вный чꙋдотво́рче, ст҃и́телю хрⷭ҇то́въ ѻ҆́ч҃е тѵ́хѡне: прїимѝ сїѐ похва́льное пѣ́нїе ѿ на́съ недосто́йныхъ во ᲂу҆миле́нїи тебѣ̀ приноси́мое, и҆ твои́мъ те́плымъ предста́тельствомъ ᲂу҆ прⷭ҇то́ла бж҃їѧ и҆спросѝ на́мъ ᲂу҆твержде́нїе въ вѣ́рѣ и҆ до́брыхъ дѣ́лѣхъ, и҆збавле́нїе ѿ всѣ́хъ бѣ́дъ и҆ напа́стей въ жи́зни се́й, въ сме́ртнѣмъ же ᲂу҆спе́нїи на́шемъ бл҃гꙋ́ю наде́ждꙋ спасе́нїѧ: да сподо́бимсѧ въ ра́дости вѣ́чной воспѣва́ти ди́вномꙋ во ст҃ы́хъ бг҃ꙋ: А҆ллилꙋ́їа.
Се́й конда́къ глаго́ли три́жды. Посе́мъ і҆́косъ а҃-й и҆ конда́къ а҃-й.
Моли́тва а҃.
Ѽ вели́кїй ᲂу҆го́дниче бж҃їй и҆ пресла́вный чꙋдотво́рче, ст҃и́телю ѻ҆́ч҃е на́шъ тѵ́хѡне! со ᲂу҆миле́нїемъ прекло́нше колѣ̑на и҆ припа́даѧ къ ра́цѣ честны́хъ и҆ многоцѣле́бныхъ моще́й твои́хъ, хва́лимъ, сла́вимъ и҆ велича́емъ просла́вльшаго тѧ̀ бг҃а и҆ на́мъ недостѡ́йнымъ показа́вшаго въ тебѣ̀ ве́лїю ми́лость, и҆ всеꙋсе́рднѡ, вѣ́рою и҆ любо́вїю чтꙋ́щїи ст҃ꙋ́ю па́мѧть твою̀, мо́лимъ тѧ̀: принесѝ моли́твꙋ на́шꙋ къ всѧ̑ содержа́щемꙋ и҆ спаса́ющемꙋ человѣколю́бцꙋ гдⷭ҇ꙋ, є҆мꙋ́же ты̀ ны́нѣ съ ли̑ки а҆́гг҃лъ и҆ со всѣ́ми ст҃ы́ми предстои́ши, да ᲂу҆тверди́тъ во ст҃ѣ́й свое́й правосла́внѣй цр҃кви живы́й дꙋ́хъ пра́выѧ вѣ́ры и҆ бл҃гоче́стїѧ, да всѝ чле́ны є҆ѧ̀, чи́стїи ѿ сꙋемꙋ́дрїѧ и҆ сꙋевѣ́рїѧ, дꙋ́хомъ и҆ и҆́стиною покланѧ́ютсѧ є҆мꙋ̀ и҆ ᲂу҆се́рднѡ пекꙋ́тсѧ ѡ҆ соблюде́нїи є҆гѡ̀ за́повѣдей, па́стырємъ є҆ѧ̀ да да́стъ ст҃ꙋ́ю ре́вность попече́нїѧ ѡ҆ спасе́нїи ввѣ́ренныхъ и҆̀мъ люде́й - пра́вѡ вѣ́рꙋющыѧ соблюда́ти, сла̑быѧ и҆ немощны̑ѧ въ вѣ́рѣ ᲂу҆крѣплѧ́ти, невѣ́дꙋщыѧ наставлѧ́ти, проти̑вныѧ ѡ҆блича́ти. И҆ па́ки припа́дающе, съ ᲂу҆пова́нїемъ, ꙗ҆́коже ча̑да ѻ҆ц҃а̀ на́мъ сꙋ́ща, мо́лимъ тѧ̀, ст҃и́телю тѵ́хѡне, вѣ́рꙋемъ бо, ꙗ҆́кѡ ты̀, на нб҃сѣ́хъ живы́й, лю́биши ны̀ то́ю же любо́вїю, є҆́юже всѧ̑ бли̑жнїѧ твоѧ̑ возлюби́лъ є҆сѝ, внегда̀ пребыва́ти тебѣ̀ на землѝ, и҆спросѝ ᲂу҆ всеми́лостивагѡ гдⷭ҇а и҆ всѣ̑мъ на́мъ пода́ти да́ръ коемꙋ́ждо бл҃гопотре́бенъ и҆ всѧ̑, ꙗ҆̀же къ животꙋ̀ вре́менномꙋ и҆ вѣ́чномꙋ полє́знаѧ, мі́ра ᲂу҆мире́нїе, градѡ́въ на́шихъ ᲂу҆твержде́нїе, землѝ плодоно́сїе, ѿ гла́да и҆ па́гꙋбы и҆збавле́нїе, ѿ наше́ствїѧ и҆ноплеме́нныхъ сохране́нїе, скорбѧ́щымъ ᲂу҆тѣше́нїе, недꙋ́гꙋющымъ и҆сцѣле́нїе, па́дшымъ возставле́нїе, заблꙋжда́ющымъ на пꙋ́ть и҆́стины возвраще́нїе, подвиза́ющымсѧ въ дѣ́лѣхъ бл҃ги́хъ ᲂу҆крѣпле́нїе, бл҃годѣ́лающымъ преспѣ́ѧнїе, роди́телємъ бл҃гослове́нїе, ча́дѡмъ въ стра́сѣ гдⷭ҇немъ воспита́нїе и҆ наꙋче́нїе, наста́вникѡмъ вѣ́дѣнїе и҆ бл҃гоче́стїе, невѣ́дꙋщымъ вразꙋмле́нїе, си̑рымъ, неимꙋ́щымъ и҆ ᲂу҆бѡ́гимъ по́мощь и҆ застꙋпле́нїе, ѿходѧ́щымъ ѿ сегѡ̀ вре́меннагѡ житїѧ̀ къ вѣ́чномꙋ бл҃го́е ᲂу҆готовле́нїе и҆ напꙋ́тствованїе, ѿше́дшымъ бл҃же́нное ᲂу҆покое́нїе. Си́хъ всѣ́хъ, наипа́че, просѝ на́мъ, свѧ́тче тѵ́хѡне, ᲂу҆ щедрода́вца бг҃а, ꙗ҆́кѡ и҆мы́й ве́лїе къ немꙋ̀ дерзнове́нїе: тебе́ бо стѧжа́хомъ при́снаго застꙋ́пника и҆ те́плаго моли́твенника ѡ҆ на́съ пред̾ гдⷭ҇емъ, є҆мꙋ́же подоба́етъ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Моли́тва в҃.
Ѽ всехва́льный ст҃и́телю и҆ ᲂу҆го́дниче хрⷭ҇то́въ, ѻ҆́ч҃е на́шъ тѵ́хѡне! а҆́гг҃льски пожи́въ на землѝ, ты̀ ꙗ҆́кѡ а҆́гг҃лъ бл҃гі́й ꙗ҆ви́лсѧ є҆сѝ и҆ въ ди́внѣмъ твое́мъ прославле́нїи. Вѣ́рꙋемъ ѿ всеѧ̀ дꙋшѝ и҆ помышле́нїѧ, ꙗ҆́кѡ ты̀, бл҃госе́рдый на́шъ помо́щниче и҆ моли́твенниче, твои́ми нело́жными хода́тайствы и҆ бл҃года́тїю, ѻ҆би́льнѡ дарова́нною тебѣ̀ ѿ гдⷭ҇а, при́снѡ спосо́бствꙋеши на́шемꙋ спасе́нїю. Прїимѝ ᲂу҆́бѡ, ᲂу҆блажа́емый ᲂу҆го́дниче хрⷭ҇то́въ, и҆ въ ча́съ се́й на̑ша недостѡ́йнаѧ молє́нїѧ: свободи́ ны твои́мъ застꙋпле́нїемъ ѿ ѡ҆блега́ющагѡ на́съ сꙋесло́вїѧ и҆ сꙋемꙋ́дрїѧ, неправовѣ́рїѧ и҆ ѕловѣ́рїѧ человѣ́ческагѡ. Потщи́сѧ ско́рый ѡ҆ на́съ предста́телю, бг҃опрїѧ́тнымъ твои́мъ хода́тайствомъ ᲂу҆моли́ти гдⷭ҇а, да проба́витъ своѧ̑ вели̑кїѧ и҆ бога̑тыѧ млⷭ҇ти на на́съ грѣ́шныхъ и҆ недосто́йныхъ рабѣ́хъ свои́хъ, да ᲂу҆врачꙋ́етъ свое́ю благода́тїю неисцѣ̑льныѧ ꙗ҆́звы и҆ стрꙋ́пы растлѣ́нныхъ дꙋ́шъ и҆ тѣле́съ на́шихъ, да раствори́тъ ѡ҆каменѣ̑лаѧ сердца̀ на̑ша слеза́ми ᲂу҆миле́нїѧ и҆ сокрꙋше́нїѧ ѡ҆ премно́гихъ согрѣше́нїихъ на́шихъ, и҆ да и҆зба́витъ ны̀ вѣ́чныхъ мꙋ́къ и҆ ѻ҆гнѧ̀ гее́нскагѡ: всѣ̑мъ же вѣ̑рнымъ лю́демъ свои̑мъ да да́рꙋетъ въ ны́нѣшнемъ вѣ́цѣ ми́ръ и҆ тишинꙋ̀, здра́вїе и҆ спасе́нїе и҆ во все́мъ благо́е поспѣше́нїе, да та́кѡ, ти́хое и҆ безмо́лвное житїѐ пожи́вше во всѧ́комъ благоче́стїи и҆ чистотѣ̀, сподо́бимсѧ со а҆́гг҃лы и҆ со всѣ́ми ст҃ы́ми сла́вити и҆ воспѣва́ти всест҃о́е и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь.