Акафист святителю Михаилу, митрополиту Киевскому, чудотворцу

Конда́к 1.

Избра́нный от Христа́ Бо́га сосу́д, по́слан бы́л еси́ в зе́млю Росси́йскую и язы́к на́ш святы́м креще́нием просвети́л еси́ святи́телю о́тче Михаи́ле, те́мже Влады́це своему́ на небеси́ ны́не предстоя́, тому́ моли́ся приле́жно, от вся́ких бе́д и напа́стей изба́витися ста́ду твоему́, да зове́м ти́:

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

И́кос 1.

Арха́нгелов и а́нгелов Ца́рь, и всея́ тва́ри Созда́тель и Промысли́тель, милосе́рдие Свое́ яви́ к лю́дем страны́ на́шея, во тме́ идолослуже́ния ходи́вшим, и тя́, святи́телю Михаи́ле, я́ко апо́стола посла́, да сия́ просвети́ши све́том и́стиннаго богопозна́ния. И се́ твои́ми уче́ньми, я́же пе́рвее же́ртвы бесо́м приноша́ху, ны́не ду́ши своя́ дароно́сят Христу́. Тебе́ же благода́рственная сия́ возно́сят песнопе́ния:

Ра́дуйся, ве́ры Христо́вы усе́рдный насади́телю; ра́дуйся, идолослуже́ние искорени́вый.

Ра́дуйся, бесо́вския же́ртвы упраздни́вый; ра́дуйся, све́те, от восто́ка возсия́вый.

Ра́дуйся, тму́ идолобе́сия разгна́вый; ра́дуйся, уче́нием Христо́вым лю́ди просвети́вый.

Ра́дуйся, и́дольския тре́бы кресто́м разруши́вый; ра́дуйся, ни́ву Христо́ву до́бре возде́лавый.

Ра́дуйся, благопло́дная се́мена на не́й все́явый; ра́дуйся, медото́чная уста́ Христо́ва;

Ра́дуйся, свире́ль благозву́чная Ду́ха Свята́го.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 2.

Ви́дел еси́, святи́телю Михаи́ле, плоды́ трудо́в твоея́ про́поведи гра́ждане бо сла́внаго гра́да Ки́ева, и́стине твоего́ уче́ния все́ю душе́ю и се́рдцем вне́млюще, уве́роваша во Христа́ и́стиннаго Бо́га, ме́рзских же и́долов отврати́шася и о́вых у́бо сокруша́ху, ины́х же с поруга́нием в реку́ вмета́ху, в ни́хже бе́си: «О лю́те на́м», вопия́ху. Зря́ сия́, блаже́нне о́тче, ра́довался еси́ ду́хом твои́м, благода́рно поя́ Бо́гу: Аллилу́иа.

И́кос 2.

Ра́зум богодухнове́нен име́я, досточу́дне о́тче Михаи́ле, бу́ия лю́ди боже́ственным твои́м уче́нием до́бре наказа́в, и гла́дом душе́вным та́ющия, ева́нгельским сло́ва хле́бом напита́в, Христо́ви сия́ приве́л еси́: Ему́ же, святи́телю, моли́ся, о похваля́ющих тя́ си́це:

Ра́дуйся, Це́ркве красото́; ра́дуйся, архиере́ев добро́то.

Ра́дуйся, Правосла́вия свети́ло; ра́дуйся, благоче́стия пра́вило.

Ра́дуйся, люде́й росси́йских вели́кий учи́телю; ра́дуйся, проро́чествия во апо́столех Первозва́ннаго сла́вный соверши́телю.

Ра́дуйся, ли́ка Богоизбра́ннаго отце́в Пече́рских предстоя́телю; ра́дуйся, равноапо́столом Кири́ллу и Мефо́дию равностоя́телю.

Ра́дуйся, двана́десять сыно́в Влади́мира купе́лию Креще́ния отроди́вый; ра́дуйся, те́м все́й земли́ его́ усе́рдно послужи́вый.

Ра́дуйся, ве́ру Христо́ву распространи́вый; ра́дуйся, пре́лесть де́монскую низложи́вый.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 3.

Си́лою богоуго́дных моли́тв твои́х, свя́те, пра́отцем на́шим пособи́вый в Еди́наго И́стиннаго Бо́га уве́ровати, ло́жныя же бо́ги отри́нути и сокруши́ти, помози́ и на́м мла́том доброде́тельнаго жития́ сокруши́ти душе́вныя куми́ры на́ши: го́рдость у́бо смире́нием, сребролю́бие же нестяжа́нием, блу́д целому́дрием, гне́в кро́тостию, чревоуго́дие воздержа́нием, за́висть доброжела́нием, уны́ние же кре́пким на Бо́га упова́нием. Да та́ко избы́вше перу́нов духо́вных, возмо́жем Бо́гу предста́ти, Ему́ же ты́, о́тче, научи́л еси́ на́с ве́ровати и пе́ти непреста́нно: Аллилу́иа.

И́кос 3.

Иму́щи ква́с ве́ры во Христа́, жена́, богому́драя княги́ня О́льга, о́ный в са́тех люде́й росси́йских сокры́. Тобо́ю же, по во́ле Всемогу́щаго, все́ те́сто держа́вы Влади́мировы сква́сив, возрасте́ в ве́ру Христо́ву. Сего́ ра́ди приими́ от на́шего усе́рдия досто́йныя похвалы́ тебе́:

Ра́дуйся, Бо́жие к Руси́ благоволе́ние; ра́дуйся, моли́тв святы́я О́льги исполне́ние.

Ра́дуйся, славнодержа́внаго Влади́мира вели́кий советода́телю; ра́дуйся, новоизбра́нных люде́й Христо́вых му́дрый назида́телю.

Ра́дуйся, и́мже ца́рие на́ши и вси́ лю́дие росси́йстии спаса́ются; ра́дуйся, и́мже архиере́и на́ши, свяще́нницы же и мона́си хва́лятся.

Ра́дуйся, и́мже ни́щии от Бо́га богате́ют и прославля́ются; ра́дуйся, и́мже претружде́ннии ста́рцы чрез ве́ру Христо́ву в раи́ упокоева́ются.

Ра́дуйся, и́мже младе́нцы преста́вившиися «Оса́нна в вы́шних» вопию́т; ра́дуйся, и́мже души́ сыно́в росси́йских, я́ко и́скры, по сте́блию к небеси́ теку́т.

Ра́дуйся, земли́ на́шея прекра́сное благослове́ние; ра́дуйся, пресла́внаго гра́да Ки́ева освяще́ние.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 4.

Бу́рю и́долов сокруша́ющую ощути́вше, бе́си рыда́юще вопия́ху: «О лю́те на́шему окая́нству. Я́ко пре́жде почита́емы от все́х бы́хом, ны́не же поруга́ние от еди́наго подъе́млем прише́льца, и́же учи́т челове́ки во Христа́ у́бо ве́ровати, на́с же сокруша́ти, Еди́ному Бо́гу пою́ще: Аллилу́иа».

И́кос 4.

Слы́шим дре́вле от Боже́ственнаго Писа́ния, я́ко падо́ша сте́ны Иерихо́нския, Иису́сом Нави́ном, киво́ту обноси́му: ны́не же ве́мы, я́ко и́доли падо́ша тебе́, святи́телю Михаи́ле во страну́ Росси́йскую прише́дшу. Те́мже мы́, ча́да твоя́, тобо́ю в пресве́тлую Креще́ния оде́жду оде́яннии, благода́рно восхваля́ем тя́ си́це зову́ще:

Ра́дуйся, свети́льниче на гора́х Ки́евских све́тло возсия́вый; ра́дуйся, из тмы́ к све́ту лю́ди приведы́й.

Ра́дуйся, те́рние многобо́жия весьма́ истреби́вый; ра́дуйся, теплото́ю любве́ Боже́ственныя ду́ши оте́ц на́ших согре́вый.

Ра́дуйся, усты́ твои́ми Христа́ Сы́на Бо́жия пропове́давый; ра́дуйся, о́гненным язы́ком твои́м и́дольское нече́стие обличи́вый.

Ра́дуйся, в Триеди́наго Бо́га ве́ровати отцы́ на́ши научи́вый; ра́дуйся, добропло́дная древеса́ рая́ Иису́сова насади́вый.

Ра́дуйся, я́ко от тебе́ лю́дие росси́йстии водо́ю благода́ти умы́шася; ра́дуйся, я́ко тобо́ю душе́вная очеса́ и́х во святе́й купе́ли откры́шася.

Ра́дуйся; я́ко тобо́ю, во сла́ву Бо́жию, це́ркви мно́гия созда́шася; ра́дуйся, я́ко тобо́ю оби́тели и́ноков согради́шася.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 5.

Богосия́ннаго свети́льника тя́, Михаи́ле богому́дре, Вели́кий Влади́мир во омраче́нную идолослуже́нием Росси́йскую зе́млю приведе́, да и зде́ твои́м прише́ствием освятя́тся лю́дие и и́стинныя ве́ры позна́нием вразумя́тся, правосла́вно и богоуго́дно возноси́ти хвале́бную пе́снь Пресвяте́й Тро́ице: Аллилу́иа.

И́кос 5.

Слы́шав Патриа́рх Царягра́да, я́ко Влади́мир Креще́ние свято́е восприя́, и его́ я́ко святи́телей преднача́льника моля́ше: да му́драго учи́теля в Корсу́нь гра́д пришле́т и того́ митрополи́та земли́ Росси́йстей поста́вит, возра́довася зело́ и со освяще́нным собо́ром сове́т сотвори́в, избра́ тя́, свя́те, сие́ вели́кое послуша́ние испо́лнити. Лю́ди же росси́йстии тя́ сре́тивше и благогове́йный зра́к лица́ твоего́ ви́девше, бесе́ды же твоея́ сла́дость слы́шавше, глаго́лаху:

Ра́дуйся, благи́й на́ш наста́вниче; ра́дуйся, апо́стольския вла́сти и че́сти прее́мниче.

Ра́дуйся, во архиере́ех сла́вный; ра́дуйся, в ве́ре вели́кий.

Ра́дуйся, в повеле́ниих доброразсуди́тельный; ра́дуйся, в поуче́ниих пресла́достный.

Ра́дуйся, кро́ткий нра́вом; ра́дуйся, высо́кий по Бо́зе житие́м.

Ра́дуйся, пра́вды усе́рдный рачи́телю; ра́дуйся, непра́вды гро́зный обличи́телю.

Ра́дуйся, я́ко твои́ми моли́твами от ве́чныя сме́рти упова́ем избежа́ти; ра́дуйся, я́ко твои́ми уче́ньми жи́знь ве́чную ве́руем стяжа́ти.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 6.

Пропове́дник Христо́вы ве́ры яви́лся еси́ в Нове́граде, Михаи́ле свяще́нне, в о́нь же прише́д, и́долы сокруша́я, тре́бища разоря́я, лю́ди крести́л еси́, це́ркви созида́л еси́ и пресви́теры по градо́м и ве́сем поставля́л еси́, братолю́бию и христиа́нскому житию́ лю́ди поуча́я и увещева́я, да вси́ еди́ными усты́ и еди́ным се́рдцем с тобо́ю навы́кнут Христу́ Бо́гу пе́ти: Аллилу́иа.

И́кос 6.

Возсия́л еси́, святи́телю Христо́в, я́ко звезда́ пресве́тлая во Оте́чествии на́шем, и тьму́ идолобе́сия све́том Боже́ственных твои́х уче́ний до конца́ подави́л еси́. Сего́ ра́ди тя́, я́ко а́нгела Бо́жия, лю́ди росси́йстии почита́ху зову́ще:

Ра́дуйся, ве́ры на́шея во Христа́ нача́ло; ра́дуйся, Це́ркве Бо́жия в Руси́ основа́ние.

Ра́дуйся, иера́рхом в пропове́дании сло́ва Ева́нгельскаго о́бразе; ра́дуйся, и́ноком, в пу́ть богоуго́днаго жития́ теку́щим, пра́вило.

Ра́дуйся, пра́ведней жи́зни миря́ном вино́вниче; ра́дуйся, все́м доброде́тельно живу́щим вене́чниче.

Ра́дуйся, чистото́ю ду́шу твою́ украси́вый; ра́дуйся, пу́ть жития́ вре́меннаго во смире́нии ду́ха препроводи́вый.

Ра́дуйся, де́лы благи́ми све́тло просия́вый; ра́дуйся, премно́гими чудесы́ лю́ди удиви́вый.

Ра́дуйся, я́ко сло́во бла́го о па́стве твое́й Пастыренача́льнику Христу́ возда́л еси́; ра́дуйся, я́ко от руку́ Его́ пра́ведное воздая́ние прия́л еси́.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 7.

Хотя́ преблаги́й Бо́г но́выя лю́ди Себе́ избра́ти, пе́рвее в позна́ние Боже́ственное вели́каго во царе́х Влади́мира приведе́, и́же у́мным сия́нием благода́ти во святе́й купе́ли осве́щшеся, прия́т тя́ па́стыря вы́шним открове́нием, на Ру́сь же овца́м Свои́м, в неве́рии заблу́ждшим, приведе́. Та́же уче́нием и Креще́нием во и́мя Отца́, и Сы́на, и Свята́го Ду́ха в воде́ сия́ омы́в во дво́р Христо́в приве́л еси́. С ни́ми же ны́не престо́лу Его́ предстоя́, моли́ся да и на́с сподо́бит с тобо́ю на небеси́ приноси́ти пе́снь Ему́: Аллилу́иа.

И́кос 7.

Но́ваго тя́ апо́стола зри́м, архиере́е блаже́нне Михаи́ле, зе́млю Росси́йскую обтека́юща: я́ко дости́гнути тебе́ и ко гра́ду Росто́ву, иде́же люде́й вели́кое мно́жество крести́л еси́ и ве́ровати в Тро́ице Еди́ному Бо́гу научи́л еси́, благоче́стию и благоразу́мию ты́я наказа́в и це́ркви мно́гия воздви́г, пресви́теры же и диа́коны и́м поста́вил еси́, и уста́вы благоче́стны те́м препо́дал еси́, глаго́лющим тебе́ сицева́я:

Ра́дуйся, благода́тию Креще́ния главу́ Руси́, а́ки диади́мою увенча́вый; ра́дуйся, правосла́вием, а́ки пе́рстнем, зе́млю на́шу Христу́ обручи́вый.

Ра́дуйся, сию́ в благоче́стие, а́ки в порфи́ру ца́рскую облачи́вый; ра́дуйся, Ева́нгелие Христо́во, а́ки гри́вну злату́ю на вы́ю ея́ возложи́вый.

Ра́дуйся, Кре́ст Госпо́день в держа́ву непобеди́мую е́й дарова́вый; ра́дуйся, вся́ ча́да ея́ правосла́вная Христу́ Го́споду и Пречи́стей Его́ Ма́тери усынови́вый.

Ра́дуйся, женише́ Це́ркве пресве́тлый; ра́дуйся, сы́не Небе́снаго Отца́ пресла́вный.

Ра́дуйся, о́тче отце́в, велеле́пая красото́; ра́дуйся, па́стырю па́стырей, всехва́льная добро́то.

Ра́дуйся, и все́х родо́в росси́йских моли́твенниче; ра́дуйся, небе́сных А́нгелов собесе́дниче.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 8.

Стра́нствующим и блужда́ющим в пусты́ни идолослуже́ния сыно́м росси́йским бы́л еси́ путево́ждь в зе́млю обетова́нную преподо́бне о́тче Михаи́ле, а́ще и не четы́редесять ле́т я́коже Моисе́й, но четы́ре ле́та то́чию лю́ди Ки́евския страны́ детоводи́л еси́, не ма́нною тле́нною, но и́стинным хле́бом с небесе́ сше́дшим сия́ пита́я, и́же е́сть Христо́с Госпо́дь. Сему́ у́бо пое́м о тебе́ пе́снь: Аллилу́иа.

И́кос 8.

Ве́сь в Бо́зе бы́в, архипа́стырю приснопа́мятне угожда́ти тому́ при́сно па́ству твою́ поуча́л еси́, ча́д твоя́ духо́вная и умоля́я ничто́же любви́ Христо́вой предпочита́ти, мы́ же твои́х ча́д духо́вных вну́цы, тебе́ глаго́лем си́це:

Ра́дуйся Христа́ Го́спода все́ю душе́ю и се́рдцем возлюби́вый; ра́дуйся, ве́ровати Ему́ и люби́ти Его́ и на́с научи́вый.

Ра́дуйся, я́ко Бо́гу вельми́ угоди́л еси́; ра́дуйся, я́ко зако́н Боже́ственный на́м препо́дал еси́.

Ра́дуйся, Небе́снаго Влады́ки ра́бе благи́й и ве́рный; ра́дуйся, да́нный тебе́ тала́нт не сокры́вый, но трудолю́бно умно́живый.

Ра́дуйся, мно́гу ку́плю и́м сотвори́вый; ра́дуйся, похвалу́ ве́лию от Го́спода твоего́ получи́вый.

Ра́дуйся, под и́го благо́е Христо́во, со смире́нием вы́ю свою́ подклони́вый; ра́дуйся, тяготу́ дне́ и ва́р, в виногра́де Его́ со усе́рдием подъя́вый.

Ра́дуйся, дина́рия вме́сто Небе́сное Ца́рствие от Христа́ восприя́вый; ра́дуйся, в ра́йских оби́телех по труде́х твои́х сла́дце почи́вый.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 9.

Вси́ лю́дие росси́йстии, пе́рвее язы́ческим многобо́жием блужда́вшии, ны́не же тобо́ю, святи́телю Бо́жий Михаи́ле, до́бре наста́вленнии к Богове́дению приидо́ша и во святе́й купе́ли от слепоты́ разу́мных оче́с изба́вльшеся, Еди́наго Созда́теля своего́ прославля́ют, Тому́ воспева́юще: Аллилу́иа.

И́кос 9.

Вити́йство челове́ческое не довле́ет к прославле́нию трудо́в и по́двигов твои́х, духоно́сне о́тче, я́же ты́ подъя́л еси́: та́ко бо по ве́ре ревнова́л еси́, я́ко и к безбо́жным ага́ряном, к болга́ром и сарацы́ном му́жа не́коего Ма́рка Фило́софа на про́поведь посла́л и лю́ди ко Христу́ призыва́л. Ны́не же глаго́лем тебе́ си́це:

Ра́дуйся, подо́бно Илии́ по Го́споде Бо́зе поревнова́вый; ра́дуйся, о распростране́нии святы́я ве́ры Его́ мно́го пораде́вый.

Ра́дуйся, во сла́ву Христо́ву потруди́выйся; ра́дуйся, достопокланя́емое и́мя Его́ пред язы́ки пронесы́й.

Ра́дуйся, усе́рдием во уче́нии Христо́ве апо́столом уподо́бивыйся; ра́дуйся, во спасе́нии ду́ш челове́ческих самому́ Христу́ подража́вый.

Ра́дуйся, любве́ Боже́ственныя испо́лненный; ра́дуйся, сострада́нием к бли́жнему насыще́нный.

Ра́дуйся, гро́ме ка́пища язы́ческая разруша́яй; ра́дуйся, тимпа́не велегла́сный сла́ву Божества́ Христо́ва возвеща́яй.

Ра́дуйся, я́ко дерзнове́ние ве́лие ны́не ко Христу́ и́маши; ра́дуйся, я́ко престо́лу Его́ в ра́дости неизрече́нней предстои́ши.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 10.

Спасе́ния лю́дем жела́я и Це́ркви до́браго утвержде́ния, па́стырю на́ш преблаги́й, потща́лся се́й изря́дно вся́ устро́ити о росси́йстем пле́мени новоизбра́нных: па́стыри и учи́тели по градо́м поста́вил еси́ и те́м ста́до слове́сных ове́ц споручи́в, Пастыренача́льнику Христу́ сца́рствовати са́м отше́л еси́ на вели́кий пла́ч и рыда́ние па́ству твою́ и кня́зя Влади́мира подви́гнув, к моще́м твои́м припа́дающих, Бо́гу же жа́лостне зову́щих: Аллилу́иа.

И́кос 10.

Царя́ Небе́снаго Христа́ Бо́га ве́рный ра́б и служи́тель бы́л еси́, о́тче на́ш Михаи́ле, и а́ще о Го́споде сно́м сме́рти почи́л еси́, оба́че свято́е те́ло твое́ тле́нию бы́сть неприча́стно, неду́гом же челове́ческим врачева́тельно яви́ся. Те́мже ра́це моще́й твои́х предстоя́ще, моли́твенно восхваля́ем тя́:

Ра́дуйся, я́ко нетле́нием те́ла твоего́ на земли́ све́тиши; ра́дуйся, я́ко свя́тостию души́ твоея́ на небеси́ блиста́еши.

Ра́дуйся, страны́ Росси́йския пресве́тлое озаре́ние; ра́дуйся, вели́каго хра́ма сего́ преизря́дное украше́ние.

Ра́дуйся, гра́да твоего́ Ки́ева вели́кий засту́пниче; ра́дуйся, оби́тели Пече́рския усе́рдный моли́твенниче.

Ра́дуйся, о все́х ча́дех Це́ркве правосла́вныя те́плый пред Бо́гом хода́таю; ра́дуйся, все́м призыва́ющим тя́ на по́мощь ско́рый предста́телю.

Ра́дуйся, я́ко богоуго́дным житие́м твои́м, а́ки со́лнцем пресве́тлым все́х на́с просвеща́еши; ра́дуйся, я́ко апо́стольскими труда́ми твои́ми ве́сь ми́р удивля́еши.

Ра́дуйся, его́же те́ло пречестно́е я́ко кипари́с благово́нный, в Це́ркви Бо́жии благоуха́ет; ра́дуйся, его́же душа́ пресвята́я я́ко ке́др в раи́ Христо́ве в ра́дости процвета́ет.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 11.

Пе́нием хвале́бным велича́ем тя́, святи́телю Бо́жий Михаи́ле, и хода́тая у Престо́ла Небе́снаго Влады́ки име́ти тебе́ ча́ем. Не посрами́ у́бо ве́ры на́шея, па́стырю предо́брый, но приими́ моли́твы на́ша, я́ко кади́ло благово́нное, и умоли́ Христа́ да да́рует и на́м доброде́тельне жи́знь на́шу сконча́ти и с тобо́ю у Христа́ водвори́тися, да услы́шим гла́с тво́й к Нему́ о на́с: се́ а́з и де́ти, я́же ми́ да́л еси́, Го́споди, и к Нему́ с тобо́ю вку́пе воспое́м: Аллилу́иа.

И́кос 11.

Светоза́рная луча́ бы́л еси́, богому́дре о́тче Михаи́ле, во тме́ многобо́жия седя́щим, путеводя́щая к Со́лнцу Пра́вды Христу́ Бо́гу, Ему́ же моли́ся, во све́те за́поведей Его́ всегда́ на́м пребыва́ти, ра́достное пе́ние тебе́ принося́щим:

Ра́дуйся, свети́льниче Трисия́ннаго Све́та; ра́дуйся, заре́ Незаходи́маго Со́лнца.

Ра́дуйся, огню́ и́дольское нече́стие попаля́яй; ра́дуйся, пла́меню, ерети́ческая уче́ния пожига́яй.

Ра́дуйся, святи́телю, поуча́яй все́х, я́ко не́сть ина́го Бо́га, кроме́ Небе́снаго; ра́дуйся, челове́ков вразуми́телю, глаго́ляй, я́ко не́сть спасе́ния вне́ собо́рныя апо́стольския Це́ркве.

Ра́дуйся, на богоуго́дное житие́ наставля́яй; ра́дуйся, в Небе́сное Ца́рствие пу́ть показу́яй.

Ра́дуйся, звездо́ путеводя́щая ко Христу́; ра́дуйся, путю́, и́мже приидо́хом к и́стинному Бо́гу.

Ра́дуйся, ключу́, врата́ ра́йская сыново́м росси́йским отве́рзый. Ра́дуйся, хода́таю, безчи́сленное мно́жество си́х та́мо водвори́вый.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 12.

Благода́ть Бо́жия по ле́тех мно́зех те́ло твое́ свято́е нетле́нно в земли́ соблюде́, в це́ркви Десяти́нней положе́но, и я́ко сокро́вище многоце́нное па́стве твое́й це́ло и невреди́мо сие́ яви́, я́ко ниже́ оде́жд твои́х свяще́нных косну́тися тле́нию: отсю́ду у́бо ве́рою уразуме́хом, я́ко Христу́ предстои́ши и мо́лишися о почита́ющих тя́ и пою́щих Ему́ тебе́ ра́ди: Аллилу́иа.

И́кос 12.

Пою́ще свято́е и пресла́вное житие́ твое́, Михаи́ле равноапо́стольне, почита́ем твою́ свяще́нную па́мять, ре́вность же твою́ по Бо́зе восхваля́ем, любо́вь твою́ ко Христу́ и к бли́жнему превозно́сим. Ты́ же, о всеблаже́ннейший о́тче, не возгнуша́йся смире́нным си́м пе́нием:

Ра́дуйся, я́ко Престо́лу Пресвяты́я Тро́ицы предстои́ши; ра́дуйся, я́ко Всемогу́щаго о все́м ми́ре мо́лиши.

Ра́дуйся, я́ко со арха́нгелы и а́нгелы Трисвяту́ю пе́снь на Небеси́ пое́ши; ра́дуйся, я́ко со апо́столы в ра́йских оби́телех пребыва́еши.

Ра́дуйся, я́ко с ли́ки святи́телей пред Бо́гом о душа́х на́ших хода́тайствуеши; ра́дуйся, я́ко с полки́ преподо́бных спасе́нию на́шему споспешеству́еши.

Ра́дуйся, я́ко с Пречи́стою Де́вою Богоро́дицею, ру́це свои́ пречестны́я о ми́ре Оте́чества на́шего ко Христу́ воздева́еши; ра́дуйся, я́ко о соедине́нии люде́й непреста́нно Его́ умоля́еши.

Ра́дуйся, со проро́ки и му́ченики Вы́шняго Ца́рствия насле́дниче; ра́дуйся, рая́ Бо́жия со все́ми святы́ми единовсе́льниче.

Ра́дуйся, небе́сных вели́чий и красо́т зри́телю; ра́дуйся, безконе́чных сла́достей и блаже́нств ра́йских облада́телю.

Ра́дуйся, Михаи́ле, вели́кий иера́рше, Це́ркве Росси́йския пресла́вный первопресто́льниче.

Конда́к 13.

О всехва́льный и преди́вный чудотво́рче, о́тче на́ш Михаи́ле, Росси́йския страны́ пе́рвый святи́телю и все́х правосла́вных христиа́н предста́телю, приими́ сие́ ма́лое моле́ние на́ше, в похвалу́ тебе́ приноси́мое, и моли́твами твои́ми испроси́ на́м у Бо́га в ве́це се́м житие́ ти́хое и доброде́телей испо́лненное, да и в жи́зни бу́дущей сподо́бимся ку́пно с тобо́ю пе́ти в Тро́ице Еди́ному Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

Моли́тва.

О, святы́й вели́кий и пресла́вный архипа́стырю и о́тче на́ш Михаи́ле, страны́ Росси́йския первопресто́льниче и просвети́телю, все́х же племе́н христиа́нских благонаде́жный пред Бо́гом хода́таю, тебе́ припа́дающе мо́лимся: помози́ на́м бы́ти твоея́ к Бо́гу любве́ подража́тельми, е́ю же в земне́м животе́ твое́м преиспо́лнен бы́л еси́. Просвети́ умы́ и сердца́ на́ша све́том Боже́ственнаго уче́ния. Научи́ на́с тебе́ после́довати ве́рно и за́поведи Госпо́дни усе́рдно твори́ти, да яви́мся ча́да твоя́ не и́менем то́кмо, но и все́м житие́м, та́ко позна́емся. Моли́ся, равноапо́стольне иера́рше, о Це́ркви Росси́йстей, о гра́де твое́м и оби́тели, в не́й же нетле́нно мо́щи твоя́ святы́я почива́ют, и о все́м Оте́честве на́шем, при́зри ми́лостивно на вся́ ве́рныя твоя́ чти́тели, по́мощи твоея́ и́щущия: бу́ди все́м в боле́знех цели́тель, в ско́рбех и печа́лех уте́шитель, в беда́х и ну́ждах помо́щник, в ча́с же сме́ртный засту́пник и покрови́тель, да твое́ю по́мощию сподо́бимся и мы́ гре́шнии спасе́ние получи́ти и Ца́рствие Христо́во насле́довати. Е́й, святи́телю Христо́в, а́ще восхо́щеши мо́жеши по́мощи на́м, да на по́мощь твою́ упова́юще, просла́вим Ди́внаго во святы́х Свои́х Бо́га Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.