А҆ка́ѳїстъ ст҃и́телю мїхаи́лꙋ, митрополі́тꙋ кі́евскомꙋ, чꙋдотво́рцꙋ.
Конда́къ а҃.
И҆збра́нный ѿ хрⷭ҇та̀ бг҃а сосꙋ́дъ, по́сланъ бы́лъ є҆сѝ въ зе́млю рѡссі́йскꙋю и҆ ꙗ҆зы́къ на́шъ ст҃ы́мъ креще́нїемъ просвѣти́лъ є҆сѝ, ст҃и́телю ѻ҆́тче мїхаи́ле. тѣ́мже влⷣцѣ своемꙋ̀ на нб҃сѝ ны́нѣ предстоѧ̀, томꙋ̀ моли́сѧ прилѣ́жнѡ, ѿ всѧ́кихъ бѣ́дъ и҆ напа́стей и҆зба́витисѧ ста́дꙋ твоемꙋ̀, да зове́мъ тѝ:
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
І҆́косъ а҃.
А҆рха́гг҃лѡвъ и҆ а҆́гг҃лѡвъ цр҃ь, и҆ всеѧ̀ тва́ри созда́тель и҆ промысли́тель, млⷭ҇рдїе своѐ ꙗ҆вѝ къ лю́демъ страны̀ на́шеѧ, во тмѣ̀ і҆дѡлослꙋже́нїѧ ходи́вшымъ, и҆ тѧ̀, ст҃и́телю мїхаи́ле, ꙗ҆́кѡ а҆пⷭ҇ла посла̀, да сїѧ̑ просвѣти́ши свѣ́томъ и҆́стиннагѡ бг҃опозна́нїѧ. и҆ сѐ твои́ми ᲂу҆че́ньми, ꙗ҆́же пе́рвѣе жє́ртвы бѣсѡ́мъ приноша́хꙋ, ны́нѣ дꙋ́ши своѧ̑ дароно́сѧтъ хрⷭ҇тꙋ̀. тебѣ́ же бл҃года́рствєннаѧ сїѧ̑ возно́сѧтъ пѣснопѣ̑нїѧ:
Ра́дꙋйсѧ, вѣ́ры хрⷭ҇то́вы ᲂу҆се́рдный насади́телю: ра́дꙋйсѧ, і҆дѡлослꙋже́нїе и҆скорени́вый.
Ра́дꙋйсѧ, бѣсѡ́вскїѧ жє́ртвы ᲂу҆праздни́вый: ра́дꙋйсѧ, свѣ́те, ѿ восто́ка возсїѧ́вый.
Ра́дꙋйсѧ, тмꙋ̀ і҆дѡлобѣ́сїѧ разгна́вый: ра́дꙋйсѧ, ᲂу҆че́нїемъ хрⷭ҇то́вымъ лю́ди просвѣти́вый.
Ра́дꙋйсѧ, і҆́дольскїѧ трє́бы кресто́мъ разрꙋши́вый: ра́дꙋйсѧ, ни́вꙋ хрⷭ҇то́вꙋ до́брѣ воздѣ́лавый.
Ра́дꙋйсѧ, бл҃гоплѡ́днаѧ сѣ́мена на не́й всѣ́ѧвый: ра́дꙋйсѧ, медотѡ́чнаѧ ᲂу҆ста̀ хрⷭ҇то́ва.
Ра́дꙋйсѧ, свирѣ́ль бл҃гозвꙋ́чнаѧ дх҃а ст҃а́гѡ.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ в҃.
Ви́дѣлъ є҆сѝ, ст҃и́телю мїхаи́ле, плоды̀ трꙋдѡ́въ твоеѧ̀ про́повѣди: гра́ждане бо сла́внагѡ гра́да кі́ева, и҆́стинѣ твоегѡ̀ ᲂу҆че́нїѧ все́ю дꙋше́ю и҆ се́рдцемъ внѣ́млюще, ᲂу҆вѣ́роваша во хрⷭ҇та̀ и҆́стиннагѡ бг҃а, ме́рзскихъ же і҆́дѡлѡвъ ѿврати́шасѧ и҆ ѻ҆́выхъ ᲂу҆́бѡ сокрꙋша́хꙋ, и҆ны́хъ же съ порꙋга́нїемъ въ рѣкꙋ̀ вмета́хꙋ, въ ни́хже бѣ́си: ѽ лю́тѣ на́мъ, вопїѧ́хꙋ. зрѧ̀ сїѧ̑, бл҃же́нне ѻ҆́тче, ра́довалсѧ є҆сѝ дꙋ́хомъ твои́мъ, бл҃года́рнѡ поѧ̀ бг҃ꙋ: А҆ллилꙋ́їа.
І҆́косъ в҃.
Ра́зꙋмъ бг҃одꙋхнове́ненъ и҆мѣ́ѧ, досточꙋ́дне ѻ҆́тче мїхаи́ле, бꙋ̑їѧ лю́ди бж҃е́ственнымъ твои́мъ ᲂу҆че́нїемъ до́брѣ наказа́въ, и҆ гла́домъ дꙋше́внымъ та́ющыѧ, є҆ѵⷢ҇льскимъ сло́ва хлѣ́бомъ напита́въ, хрⷭ҇то́ви сїѧ̀ приве́лъ є҆сѝ: є҆мꙋ́же, ст҃и́телю, моли́сѧ, ѡ҆ похвалѧ́ющихъ тѧ̀ си́це:
Ра́дꙋйсѧ, цр҃кве красото̀: ра́дꙋйсѧ, а҆рхїере́євъ добро́то.
Ра́дꙋйсѧ, правосла́вїѧ свѣти́ло: ра́дꙋйсѧ, бл҃гоче́стїѧ пра́вило.
Ра́дꙋйсѧ, люде́й рѡссі́йскихъ вели́кїй ᲂу҆чи́телю: ра́дꙋйсѧ, прⷪ҇ро́чествїѧ во а҆пⷭ҇лѣхъ первозва́ннагѡ сла́вный соверши́телю.
Ра́дꙋйсѧ, ли́ка бг҃оизбра́ннагѡ ѻ҆ц҃є́въ пече́рскихъ предстоѧ́телю: ра́дꙋйсѧ, равноапо́столѡмъ кѷрі́ллꙋ и҆ меѳо́дїю равностоѧ́телю.
Ра́дꙋйсѧ, двана́десѧть сынѡ́въ влади́мїра кꙋпѣ́лїю креще́нїѧ ѿроди́вый: ра́дꙋйсѧ, тѣ́мъ все́й землѝ є҆гѡ̀ ᲂу҆се́рднѡ послꙋжи́вый.
Ра́дꙋйсѧ, вѣ́рꙋ хрⷭ҇то́вꙋ распространи́вый: ра́дꙋйсѧ, пре́лесть де́мѡнскꙋю низложи́вый.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ г҃.
Си́лою бг҃оꙋго́дныхъ мл҃твъ твои́хъ, свѧ́те, пра́ѻтцємъ на́шымъ пособи́вый въ є҆ди́наго и҆́стиннаго бг҃а ᲂу҆вѣ́ровати, ло́жныѧ же бо́ги ѿри́нꙋти и҆ сокрꙋши́ти, помозѝ и҆ на́мъ мла́томъ добродѣ́тельнагѡ житїѧ̀ сокрꙋши́ти дꙋшє́вныѧ кꙋми́ры на́шѧ: го́рдость ᲂу҆́бѡ смире́нїемъ, сребролю́бїе же нестѧжа́нїемъ, блꙋ́дъ цѣломꙋ́дрїемъ, гнѣ́въ кро́тостїю, чревоꙋго́дїе воздержа́нїемъ, за́висть доброжела́нїемъ, ᲂу҆ны́нїе же крѣ́пкимъ на бг҃а ᲂу҆пова́нїемъ. да та́кѡ и҆збы́вше перꙋ́нѡвъ дꙋхо́вныхъ, возмо́жемъ бг҃ꙋ предста́ти, є҆мꙋ́же ты̀, ѻ҆́тче, наꙋчи́лъ є҆сѝ на́съ вѣ́ровати и҆ пѣ́ти непреста́ннѡ: А҆ллилꙋ́їа.
І҆́косъ г҃.
И҆мꙋ́щи ква́съ вѣ́ры во хрⷭ҇та̀, жена̀, бг҃омꙋ́драѧ кн҃ги́нѧ ѻ҆́льга, ѻ҆́ный въ са́тѣх люде́й рѡссі́йскихъ сокры̀. тобо́ю же, по во́лѣ всемогꙋ́щагѡ, всѣ̀ тѣ́сто держа̑вы влади́мїровы сква́сивъ, возрастѐ въ вѣ́рꙋ хрⷭ҇то́вꙋ. сегѡ̀ ра́ди прїимѝ ѿ на́шегѡ ᲂу҆се́рдїѧ достѡ́йныѧ похвалы̀ тебѣ̀:
Ра́дꙋйсѧ, бж҃їе къ рꙋсѝ бл҃говоле́нїе: ра́дꙋйсѧ, мл҃твъ ст҃ы́ѧ ѻ҆́льги и҆сполне́нїе.
Ра́дꙋйсѧ, славнодержа́внагѡ влади́мїра вели́кїй совѣтода́телю: ра́дꙋйсѧ, новоизбра́нныхъ люде́й хрⷭ҇то́выхъ мꙋ́дрый назида́телю.
Ра́дꙋйсѧ, и҆́мже ца́рїе на́шѧ и҆ всѝ лю́дїе рѡссі́йстїи сп҃са́ютсѧ: ра́дꙋйсѧ, и҆́мже а҆рхїере́є на́шѧ, сщ҃е́нницы же и҆ мона́си хва́лѧтсѧ.
Ра́дꙋйсѧ, и҆́мже ни́щїи ѿ бг҃а богате́ютъ и҆ прославлѧ́ютсѧ: ра́дꙋйсѧ, и҆́мже претрꙋжде́ннїи ста́рцы чрез̾ вѣ́рꙋ хрⷭ҇то́вꙋ въ раѝ ᲂу҆покоева́ютсѧ.
Ра́дꙋйсѧ, и҆́мже младє́нцы преста́вившїисѧ, ѡ҆са́нна въ вы́шнихъ, вопїю́тъ: ра́дꙋйсѧ, и҆́мже дꙋшѝ сынѡ́въ рѡссі́йскихъ, ꙗ҆́кѡ и҆́скры, по сте́блїю къ нб҃сѝ текꙋ́тъ.
Ра́дꙋйсѧ, землѝ на́шеѧ прекра́сное бл҃гослове́нїе: ра́дꙋйсѧ, пресла́внагѡ гра́да кі́ева ѡ҆свѧще́нїе.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ д҃.
Бꙋ́рю і҆́дѡлѡвъ сокрꙋша́ющꙋю ѡ҆щꙋти́вше, бѣ́си рыда́юще вопїѧ́хꙋ: ѽ лю́тѣ на́шемꙋ ѡ҆каѧ́нствꙋ. ꙗ҆́кѡ пре́жде почита́емы ѿ всѣ́хъ бы́хомъ, ны́нѣ же порꙋга́нїе ѿ є҆ди́нагѡ под̾е́млемъ прише́льца, и҆́же ᲂу҆чи́тъ человѣ́ки во хрⷭ҇та̀ ᲂу҆́бѡ вѣ́ровати, на́съ же сокрꙋша́ти, є҆ди́номꙋ бг҃ꙋ пою́ще: А҆ллилꙋ́їа.
І҆́косъ д҃.
Слы́шимъ дре́влѣ ѿ бжⷭ҇твеннагѡ писа́нїѧ, ꙗ҆́кѡ падо́ша стѣ́ны і҆ерїхѡ́нскїѧ, і҆исꙋ́сомъ навѵ́номъ, кївѡ́тꙋ ѡ҆бноси́мꙋ: ны́нѣ же вѣ́мы, ꙗ҆́кѡ і҆́дѡли падо́ша тебѣ̀, ст҃и́телю мїхаи́ле, во странꙋ̀ рѡссі́йскꙋю прише́дшꙋ. тѣ́мже мы̀, ча̑да твоѧ̑, тобо́ю въ пресвѣ́тлꙋю креще́нїѧ ѡ҆де́ждꙋ ѡ҆дѣ́ѧннїи, бл҃года́рнѡ восхвалѧ́емъ тѧ̀ си́це зовꙋ́ще:
Ра́дꙋйсѧ, свѣти́льниче на гора́хъ кі́евскихъ свѣ́тлѡ возсїѧ́вый: ра́дꙋйсѧ, и҆з̾ тмы̀ къ свѣ́тꙋ лю́ди приведы́й.
Ра́дꙋйсѧ, те́рнїе многобо́жїѧ весьма̀ и҆стреби́вый: ра́дꙋйсѧ, теплото́ю любвѐ бжⷭ҇твенныѧ дꙋ́ши ѻ҆тє́цъ на́шихъ согрѣ́вый.
Ра́дꙋйсѧ, ᲂу҆сты̀ твои́ми хрⷭ҇та̀ сн҃а бж҃їѧ проповѣ́давый: ра́дꙋйсѧ, ѻ҆́гненнымъ ꙗ҆зы́комъ твои́мъ і҆́дѡльское нече́стїе ѡ҆бличи́вый.
Ра́дꙋйсѧ, въ трїеди́наго бг҃а вѣ́ровати ѻ҆тцы̀ на́шѧ наꙋчи́вый: ра́дꙋйсѧ, добропло́днаѧ древеса̀ раѧ̀ і҆и҃сова насади́вый.
Ра́дꙋйсѧ, ꙗ҆́кѡ ѿ тебѣ̀ лю́дїе рѡссі́йстїи водо́ю бл҃года́ти ᲂу҆мы́шасѧ: ра́дꙋйсѧ, ꙗ҆́кѡ тобо́ю дꙋшє́внаѧ ѻ҆чеса̀ и҆́хъ во ст҃ѣ́й кꙋпѣ́ли ѿкры́шасѧ.
Ра́дꙋйсѧ. ꙗ҆́кѡ тобо́ю, во сла́вꙋ бж҃їю, це́ркви мнѡ́гїѧ созда́шасѧ: ра́дꙋйсѧ, ꙗ҆́кѡ тобо́ю ѡ҆би́тєли и҆́нокѡвъ согради́шасѧ.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ є҃.
Бг҃осїѧ́ннаго свѣти́льника тѧ̀, мїхаи́ле бг҃омꙋ́дре, вели́кїй влади́мїръ во ѡ҆мраче́ннꙋю і҆дѡлослꙋже́нїемъ рѡссі́йскꙋю зе́млю приведѐ, да и҆ здѣ̀ твои́мъ прише́ствїемъ ѡ҆ст҃ѧ́тсѧ лю́дїе и҆ и҆́стинныѧ вѣ́ры позна́нїемъ вразꙋмѧ́тсѧ, правосла́внѡ и҆ бг҃оꙋго́днѡ возноси́ти хвале́бнꙋю пѣ́снь прест҃ѣ́й трⷪ҇цѣ: А҆ллилꙋ́їа.
І҆́косъ є҃.
Слы́шавъ патрїа́рхъ царѧгра́да, ꙗ҆́кѡ влади́мїръ креще́нїе ст҃о́е воспрїѧ̀, и҆ є҆гѡ̀ ꙗ҆́кѡ ст҃и́телей преднача́льника молѧ́ше: да мꙋ́драго ᲂу҆чи́телѧ въ корсꙋ́нь гра́дъ пришле́тъ и҆ того̀ митрополі́та землѝ рѡссі́йстѣй поста́витъ, возра́довасѧ ѕѣлѡ̀ и҆ со ѡ҆сщ҃е́ннымъ собо́ромъ совѣ́тъ сотвори́въ, и҆збра̀ тѧ̀, свѧ́те, сїѐ вели́кое послꙋша́нїе и҆спо́лнити. лю́ди же рѡссі́йстїи тѧ̀ срѣ́тивше и҆ бл҃гоговѣ́йный зра́къ лица̀ твоегѡ̀ ви́дѣвше, бесѣ́ды же твоеѧ̀ сла́дость слы́шавше, глаго́лахꙋ:
Ра́дꙋйсѧ, благі́й на́шъ наста́вниче: ра́дꙋйсѧ, а҆пⷭ҇льскїѧ вла́сти и҆ че́сти прее́мниче.
Ра́дꙋйсѧ, во а҆рхїере́ехъ сла́вный: ра́дꙋйсѧ, въ вѣ́рѣ вели́кїй.
Ра́дꙋйсѧ, въ повелѣ́нїихъ доброразсꙋди́тельный: ра́дꙋйсѧ, въ поꙋче́нїихъ пресла́достный.
Ра́дꙋйсѧ, кро́ткїй нра́вомъ: ра́дꙋйсѧ, высо́кїй по бз҃ѣ житїе́мъ.
Ра́дꙋйсѧ, пра́вды ᲂу҆се́рдный рачи́телю: ра́дꙋйсѧ, непра́вды гро́зный ѡ҆бличи́телю.
Ра́дꙋйсѧ, ꙗ҆́кѡ твои́ми мл҃твами ѿ вѣ́чныѧ сме́рти ᲂу҆пова́емъ и҆збѣжа́ти: ра́дꙋйсѧ, ꙗ҆́кѡ твои́ми ᲂу҆че́ньми жи́знь вѣ́чнꙋю вѣ́рꙋемъ стѧжа́ти.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ ѕ҃.
Проповѣ́дникъ хрⷭ҇то́вы вѣ́ры ꙗ҆ви́лсѧ є҆сѝ въ новѣ́градѣ, мїхаи́ле свѧще́нне, въ ѻ҆́нь же прише́дъ, і҆́дѡлы сокрꙋша́ѧ, трє́бища разорѧ́ѧ, лю́ди крести́лъ є҆сѝ, це́ркви созида́лъ є҆сѝ и҆ пресвѵ́теры по градѡ́мъ и҆ ве́сємъ поставлѧ́лъ є҆сѝ, братолю́бїю и҆ хрⷭ҇тїа́нскомꙋ житїю̀ лю́ди поꙋча́ѧ и҆ ᲂу҆вѣщева́ѧ, да всѝ є҆ди́ными ᲂу҆сты̑ и҆ є҆ди́нымъ се́рдцемъ съ тобо́ю навы́кнꙋтъ хрⷭ҇тꙋ̀ бг҃ꙋ пѣ́ти: А҆ллилꙋ́їа.
І҆́косъ ѕ҃.
Возсїѧ́лъ є҆сѝ, ст҃и́телю хрⷭ҇то́въ, ꙗ҆́кѡ ѕвѣзда̀ пресвѣ́тлаѧ во ѻ҆те́чествїи на́шемъ, и҆ тьмꙋ̀ і҆дѡлобѣ́сїѧ свѣ́томъ бжⷭ҇твенныхъ твои́хъ ᲂу҆че́нїй до конца̀ подави́лъ є҆сѝ. сегѡ̀ ра́ди тѧ̀, ꙗ҆́кѡ а҆́гг҃ла бж҃їѧ, лю́ди рѡссі́йстїи почита́хꙋ зовꙋ́ще:
Ра́дꙋйсѧ, вѣ́ры на́шеѧ во хрⷭ҇та̀ нача́ло: ра́дꙋйсѧ, цр҃кве бж҃їѧ въ рꙋсѝ ѡ҆снова́нїе.
Ра́дꙋйсѧ, і҆ера́рхѡмъ въ проповѣ́данїи сло́ва є҆ѵⷢ҇льскагѡ ѡ҆́бразе: ра́дꙋйсѧ, и҆́нокѡмъ, въ пꙋ́ть бг҃оꙋго́днагѡ житїѧ̀ текꙋ́щымъ, пра́вило.
Ра́дꙋйсѧ, пра́веднѣй жи́зни мїрѧ́нѡмъ вино́вниче: ра́дꙋйсѧ, всѣ̑мъ добродѣ́тельнѡ живꙋ́щымъ вѣне́чниче.
Ра́дꙋйсѧ, чистото́ю дꙋ́шꙋ твою̀ ᲂу҆краси́вый: ра́дꙋйсѧ, пꙋ́ть житїѧ̀ вре́меннагѡ во смире́нїи дꙋ́ха препроводи́вый.
Ра́дꙋйсѧ, дѣ́лы бл҃ги́ми свѣ́тлѡ просїѧ́вый: ра́дꙋйсѧ, премно́гими чꙋдесы̀ лю́ди ᲂу҆диви́вый.
Ра́дꙋйсѧ, ꙗ҆́кѡ сло́во бла́гѡ ѡ҆ па́ствѣ твое́й пастыренача́льникꙋ хрⷭ҇тꙋ̀ возда́лъ є҆сѝ: ра́дꙋйсѧ, ꙗ҆́кѡ ѿ рꙋкꙋ̑ є҆гѡ̀ пра́ведное воздаѧ́нїе прїѧ́лъ є҆сѝ.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ з҃.
Хотѧ̀ преблагі́й бг҃ъ нѡ́выѧ лю́ди себѣ̀ и҆збра́ти, пе́рвѣе въ позна́нїе бжⷭ҇твенное вели́каго во царѣ́хъ влади́мїра приведѐ, и҆́же ᲂу҆́мнымъ сїѧ́нїемъ бл҃года́ти во ст҃ѣ́й кꙋпѣ́ли ѡ҆свѣ́щшесѧ, прїѧ́тъ тѧ̀ па́стырѧ вы́шнимъ ѿкрове́нїемъ, на рꙋ́сь же ѻ҆вца́мъ свои́мъ, въ невѣ́рїи заблꙋ́ждшымъ, приведѐ. та́же ᲂу҆че́нїемъ и҆ креще́нїемъ во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а въ водѣ̀ сїѧ̑ ѡ҆мы́въ во дво́ръ хрⷭ҇то́въ приве́лъ є҆сѝ, съ ни́ми же ны́нѣ прⷭ҇то́лꙋ є҆гѡ̀ предстоѧ̀, моли́сѧ да и҆ на́съ сподо́битъ съ тобо́ю на нб҃сѝ приноси́ти пѣ́снь є҆мꙋ̀: А҆ллилꙋ́їа.
І҆́косъ з҃.
Но́вагѡ тѧ̀ а҆пⷭ҇ла зри́мъ, а҆рхїере́е бл҃же́нне мїхаи́ле, зе́млю рѡссі́йскꙋю ѡ҆бтека́юща: ꙗ҆́кѡ дости́гнꙋти тебѣ̀ и҆ ко гра́дꙋ росто́вꙋ, и҆дѣ́же люде́й вели́кое мно́жество крести́лъ є҆сѝ и҆ вѣ́ровати въ трⷪ҇цѣ є҆ди́номꙋ бг҃ꙋ наꙋчи́лъ є҆сѝ, бл҃гоче́стїю и҆ бл҃горазꙋ́мїю ты̑ѧ наказа́въ и҆ цє́ркви мнѡ́гїѧ воздви́гъ, пресвѵ́теры же и҆ дїа́коны и҆̀мъ поста́вилъ є҆сѝ, и҆ ᲂу҆ста́вы бл҃гоче́стны тѣ̑мъ препо́далъ є҆сѝ, глаго́лющымъ тебѣ̀ сицева̑ѧ:
Ра́дꙋйсѧ, бл҃года́тїю креще́нїѧ главꙋ̀ рꙋсѝ, а҆́ки дїади́мою ᲂу҆вѣнча́вый: ра́дꙋйсѧ, правосла́вїемъ, а҆́ки пе́рстнемъ, зе́млю на́шꙋ хрⷭ҇тꙋ̀ ѡ҆брꙋчи́вый.
Ра́дꙋйсѧ, сїю̀ въ бл҃гоче́стїе, а҆́ки въ порфѵ́рꙋ ца́рскꙋю ѡ҆блачи́вый: ра́дꙋйсѧ, є҆ѵⷢ҇лїе хрⷭ҇то́во, а҆́ки гри́внꙋ златꙋ́ю на вы́ю є҆ѧ̀ возложи́вый.
Ра́дꙋйсѧ, крⷭ҇тъ гдⷭ҇ень въ держа́вꙋ непобѣди́мꙋю є҆́й дарова́вый: ра́дꙋйсѧ, всѧ̑ ча̑да є҆ѧ̀ правосла́внаѧ хрⷭ҇тꙋ̀ гдⷭ҇ꙋ и҆ пречи́стѣй є҆гѡ̀ мт҃ри ᲂу҆сынови́вый.
Ра́дꙋйсѧ, женишѐ цр҃кве пресвѣ́тлый: ра́дꙋйсѧ, сы́не нбⷭ҇нагѡ ѻ҆ц҃а̀ пресла́вный.
Ра́дꙋйсѧ, ѻ҆́тче ѻ҆тцє́въ, велелѣ́паѧ красото̀: ра́дꙋйсѧ, па́стырю па́стырей, всехва́льнаѧ добро́то.
Ра́дꙋйсѧ, и҆ всѣ́хъ родѡ́въ рѡссі́йскихъ мл҃твенниче: ра́дꙋйсѧ, нбⷭ҇ныхъ а҆́гг҃лѡвъ собесѣ́дниче.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ и҃.
Стра́нствꙋющымъ и҆ блꙋжда́ющымъ въ пꙋсты́ни і҆дѡлослꙋже́нїѧ сынѡ́мъ рѡссі̑йскимъ бы́лъ є҆сѝ пꙋтево́ждь въ зе́млю ѡ҆бѣтова́ннꙋю, прпⷣбне ѻ҆́тче мїхаи́ле, а҆́ще и҆ не четы́редесѧть лѣ́тъ ꙗ҆́кѡже мѡѷсе́й, но четы́ре лѣ́та то́чїю лю́ди кі́евскїѧ страны̀ дѣтоводи́лъ є҆сѝ, не ма́нною тлѣ́нною, но и҆́стиннымъ хлѣ́бомъ съ нб҃сѐ сше́дшимъ сїѧ̑ пита́ѧ, и҆́же є҆́сть хрⷭ҇то́съ гдⷭ҇ь. семꙋ̀ ᲂу҆́бѡ пое́мъ ѡ҆ тебѣ̀ пѣ́снь: А҆ллилꙋ́їа.
І҆́косъ и҃.
Ве́сь въ бз҃ѣ бы́въ, а҆рхїпа́стырю приснопа́мѧтне ᲂу҆гожда́ти томꙋ̀ при́снѡ па́ствꙋ твою̀ поꙋча́лъ є҆сѝ, ча̑дъ твоѧ̑ дꙋхѡ́внаѧ и҆ ᲂу҆молѧ́ѧ ничто́же любвѝ хрⷭ҇то́вой предпочита́ти, мы́ же твои́хъ ча́дъ дꙋхѡ́вныхъ внꙋ́цы, тебѣ̀ глаго́лемъ си́це:
Ра́дꙋйсѧ хрⷭ҇та̀ гдⷭ҇а все́ю дꙋше́ю и҆ се́рдцемъ возлюби́вый: ра́дꙋйсѧ, вѣ́ровати є҆мꙋ̀ и҆ люби́ти є҆гѡ̀ и҆ на́съ наꙋчи́вый.
Ра́дꙋйсѧ, ꙗ҆́кѡ бг҃ꙋ вельмѝ ᲂу҆годи́лъ є҆сѝ: ра́дꙋйсѧ, ꙗ҆́кѡ зако́нъ бжⷭ҇твенный на́мъ препо́далъ є҆сѝ.
Ра́дꙋйсѧ, нбⷭ҇нагѡ влⷣки ра́бе благі́й и҆ вѣ́рный: ра́дꙋйсѧ, да́нный тебѣ̀ тала́нтъ не сокры́вый, но трꙋдолю́бнѡ ᲂу҆мно́живый.
Ра́дꙋйсѧ, мно́гꙋ кꙋ́плю и҆́мъ сотвори́вый: ра́дꙋйсѧ, похвалꙋ̀ ве́лїю ѿ гдⷭ҇а твоегѡ̀ полꙋчи́вый.
Ра́дꙋйсѧ, под̾ и҆́го благо́е хрⷭ҇то́во, со смире́нїемъ вы́ю свою̀ подклони́вый: ра́дꙋйсѧ, тѧготꙋ̀ днѐ и҆ ва́ръ, въ вїногра́дѣ є҆гѡ̀ со ᲂу҆се́рдїемъ под̾ѧ́вый.
Ра́дꙋйсѧ, дина́рїѧ вмѣ́стѡ нбⷭ҇ное црⷭ҇твїе ѿ хрⷭ҇та̀ воспрїѧ́вый: ра́дꙋйсѧ, въ ра́йскихъ ѡ҆би́телехъ по трꙋдѣ́хъ твои́хъ сла́дцѣ почи́вый.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ ѳ҃.
Всѝ лю́дїе рѡссі́йстїи, пе́рвѣе ꙗ҆зы́ческимъ многобо́жїемъ блꙋжда́вшїи, ны́нѣ же тобо́ю, ст҃и́телю бж҃їй мїхаи́ле, до́брѣ наста́вленнїи къ бг҃овѣ́денїю прїидо́ша и҆ во ст҃ѣ́й кꙋпѣ́ли ѿ слѣпоты̀ разꙋ́мныхъ ѻ҆че́съ и҆зба́вльшесѧ, є҆ди́наго созда́телѧ своегѡ̀ прославлѧ́ютъ, томꙋ̀ воспѣва́юще: А҆ллилꙋ́їа.
І҆́косъ ѳ҃.
Виті́йство человѣ́ческое не довлѣ́етъ къ прославле́нїю трꙋдѡ́въ и҆ по́двигѡвъ твои́хъ, дꙋхоно́сне ѻ҆́ч҃е, ꙗ҆́же ты̀ под̾ѧ́лъ є҆сѝ: та́кѡ бо по вѣ́рѣ ревнова́лъ є҆сѝ, ꙗ҆́кѡ и҆ къ безбѡ́жнымъ а҆га́рѧнѡмъ, къ болга́рѡмъ и҆ сарацы́нѡмъ мꙋ́жа нѣ́коегѡ ма́рка фїло́софа на про́повѣдь посла́лъ и҆ лю́ди ко хрⷭ҇тꙋ̀ призыва́лъ. ны́нѣ же глаго́лемъ тебѣ̀ си́це:
Ра́дꙋйсѧ, подо́бнѡ и҆лїѝ по гдⷭ҇ѣ бз҃ѣ поревнова́вый: ра́дꙋйсѧ, ѡ҆ распростране́нїи ст҃ы́ѧ вѣ́ры є҆гѡ̀ мно́гѡ порадѣ́вый.
Ра́дꙋйсѧ, во сла́вꙋ хрⷭ҇то́вꙋ потрꙋди́выйсѧ: ра́дꙋйсѧ, достопокланѧ́емое и҆́мѧ є҆гѡ̀ пред̾ ꙗ҆зы́ки пронесы́й.
Ра́дꙋйсѧ, ᲂу҆се́рдїемъ во ᲂу҆че́нїи хрⷭ҇то́вѣ а҆пⷭ҇лѡмъ ᲂу҆подо́бивыйсѧ: ра́дꙋйсѧ, во сп҃се́нїи дꙋ́шъ человѣ́ческихъ самомꙋ̀ хрⷭ҇тꙋ̀ подража́вый.
Ра́дꙋйсѧ, любвѐ бжⷭ҇твенныѧ и҆спо́лненный: ра́дꙋйсѧ, сострада́нїемъ къ бли́жнемꙋ насыще́нный.
Ра́дꙋйсѧ, гро́ме ка̑пища ꙗ҆зы́чєскаѧ разрꙋша́ѧй: ра́дꙋйсѧ, тѷмпа́не велегла́сный сла́вꙋ бжⷭ҇тва̀ хрⷭ҇то́ва возвѣща́ѧй.
Ра́дꙋйсѧ, ꙗ҆́кѡ дерзнове́нїе ве́лїе ны́нѣ ко хрⷭ҇тꙋ̀ и҆́маши: ра́дꙋйсѧ, ꙗ҆́кѡ прⷭ҇то́лꙋ є҆гѡ̀ въ ра́дости неизрече́ннѣй предстои́ши.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ і҃.
Сп҃се́нїѧ лю́демъ жела́ѧ и҆ цр҃кви до́брагѡ ᲂу҆твержде́нїѧ, па́стырю на́шъ пребл҃гі́й, потща́лсѧ сѣ́й и҆зрѧ́днѡ всѧ̑ ᲂу҆стро́ити ѡ҆ рѡссі́йстѣмъ пле́мени новоизбра́нныхъ: па́стыри и҆ ᲂу҆чи́тели по градѡ́мъ поста́вилъ є҆сѝ и҆ те́мъ ста́до слове́сныхъ ѻ҆ве́цъ спорꙋчи́въ, пастыренача́льникꙋ хрⷭ҇тꙋ̀ сца́рствовати са́мъ ѿше́лъ є҆сѝ на вели́кїй пла́чъ и҆ рыда́нїе па́ствꙋ твою̀ и҆ кнѧ́зѧ влади́мїра подви́гнꙋвъ, къ мощє́мъ твои̑мъ припа́дающихъ, бг҃ꙋ же жа́лостнѣ зовꙋ́щихъ: А҆ллилꙋ́їа.
І҆́косъ і҃.
Цр҃ѧ̀ нбⷭ҇нагѡ хрⷭ҇та̀ бг҃а вѣ́рный ра́бъ и҆ слꙋжи́тель бы́лъ є҆сѝ, ѻ҆́тче на́шъ мїхаи́ле, и҆ а҆́ще ѡ҆ гдⷭ҇ѣ сно́мъ сме́рти почи́лъ є҆сѝ, ѻ҆ба́че ст҃о́е тѣ́ло твоѐ тлѣ́нїю бы́сть неприча́стно, недꙋ́гѡмъ же человѣ́чєскимъ врачева́тельно ꙗ҆ви́сѧ. тѣ́мже ра́цѣ моще́й твои́хъ предстоѧ́ще, моли́твеннѡ восхвалѧ́емъ тѧ̀:
Ра́дꙋйсѧ, ꙗ҆́кѡ нетлѣ́нїемъ тѣ́ла твоегѡ̀ на землѝ свѣ́тиши: ра́дꙋйсѧ, ꙗ҆́кѡ ст҃остїю дꙋшѝ твоеѧ̀ на нб҃сѝ блиста́еши.
Ра́дꙋйсѧ, страны̀ рѡссі́йскїѧ пресвѣ́тлое ѡ҆заре́нїе: ра́дꙋйсѧ, вели́кагѡ хра́ма сегѡ̀ преизрѧ́дное ᲂу҆краше́нїе.
Ра́дꙋйсѧ, гра́да твоегѡ̀ кі́ева вели́кїй застꙋ́пниче: ра́дꙋйсѧ, ѡ҆би́тели пече́рскїѧ ᲂу҆се́рдный мл҃твенниче.
Ра́дꙋйсѧ, ѡ҆ всѣ́хъ ча́дѣхъ цр҃кве правосла́вныѧ те́плый пред̾ бг҃омъ хода́таю: ра́дꙋйсѧ, всѣ̑мъ призыва́ющымъ тѧ̀ на по́мощь ско́рый предста́телю.
Ра́дꙋйсѧ, ꙗ҆́кѡ бг҃оꙋго́днымъ житїе́мъ твои́мъ, а҆́ки со́лнцемъ пресвѣ́тлымъ всѣ́хъ на́съ просвѣща́еши: ра́дꙋйсѧ, ꙗ҆́кѡ а҆пⷭ҇льскими трꙋда́ми твои́ми ве́сь мі́ръ ᲂу҆дивлѧ́еши.
Ра́дꙋйсѧ, є҆го́же тѣ́ло пречестно́е ꙗ҆́кѡ кѷпарі́съ бл҃гово́нный, въ цр҃кви бж҃їи бл҃гоꙋха́етъ: ра́дꙋйсѧ, є҆го́же дꙋша̀ прест҃а́ѧ ꙗ҆́кѡ ке́дръ въ раѝ хрⷭ҇то́вѣ въ ра́дости процвѣта́етъ.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ а҃і.
Пѣ́нїемъ хвале́бнымъ велича́емъ тѧ̀, ст҃и́телю бж҃їй мїхаи́ле, и҆ хода́таѧ ᲂу҆ прⷭ҇то́ла нбⷭ҇нагѡ влⷣки и҆мѣ́ти тебѣ̀ ча́емъ. не посрамѝ ᲂу҆́бѡ вѣ́ры на́шеѧ, па́стырю предо́брый, но прїимѝ моли̑твы на́шѧ, ꙗ҆́кѡ кади́ло бл҃гово́нное, и҆ ᲂу҆молѝ хрⷭ҇та̀ да да́рꙋетъ и҆ на́мъ добродѣ́тельнѣ жи́знь на́шꙋ сконча́ти и҆ съ тобо́ю ᲂу҆ хрⷭ҇та̀ водвори́тисѧ, да ᲂу҆слы́шимъ гла́съ тво́й къ немꙋ̀ ѡ҆ на́съ: сѐ а҆́зъ и҆ дѣ́ти, ꙗ҆̀же мѝ да́лъ є҆сѝ, гдⷭ҇и, и҆ къ немꙋ̀ съ тобо́ю вкꙋ́пѣ воспое́мъ: А҆ллилꙋ́їа.
І҆́косъ а҃і.
Свѣтоза́рнаѧ лꙋча̀ бы́лъ є҆сѝ, бг҃омꙋ́дре ѻ҆́ч҃е мїхаи́ле, во тмѣ̀ многобо́жїѧ сѣдѧ́щымъ, пꙋтеводѧ́щаѧ къ сл҃нцꙋ пра́вды хрⷭ҇тꙋ̀ бг҃ꙋ, є҆мꙋ́же моли́сѧ, во свѣ́тѣ за́повѣдей є҆гѡ̀ всегда̀ на́мъ пребыва́ти, ра́достное пѣ́нїе тебѣ̀ приносѧ́щымъ:
Ра́дꙋйсѧ, свѣти́льниче трисїѧ́ннагѡ свѣ́та: ра́дꙋйсѧ, зарѐ незаходи́магѡ сл҃нца.
Ра́дꙋйсѧ, ѻ҆гню̀ і҆́дѡльское нече́стїе попалѧ́ѧй: ра́дꙋйсѧ, пла́меню, є҆реті́чєскаѧ ᲂу҆чє́нїѧ пожига́ѧй.
Ра́дꙋйсѧ, ст҃и́телю, поꙋча́ѧй всѣ́хъ, ꙗ҆́кѡ нѣ́сть и҆на́гѡ бг҃а, кромѣ̀ нбⷭ҇нагѡ: ра́дꙋйсѧ, человѣ́кѡвъ вразꙋми́телю, глаго́лѧй, ꙗ҆́кѡ нѣ́сть сп҃се́нїѧ внѣ̀ собо́рныѧ а҆пⷭ҇льскїѧ цр҃кве.
Ра́дꙋйсѧ, на бг҃оꙋго́дное житїѐ наставлѧ́ѧй: ра́дꙋйсѧ, въ нбⷭ҇ное црⷭ҇твїе пꙋ́ть показꙋ́ѧй.
Ра́дꙋйсѧ, ѕвѣздо̀ пꙋтеводѧ́щаѧ ко хрⷭ҇тꙋ̀: ра́дꙋйсѧ, пꙋтю̀, и҆́мже прїидо́хомъ къ и҆́стинномꙋ бг҃ꙋ.
Ра́дꙋйсѧ, ключꙋ̀, врата̀ ра̑йскаѧ сыновѡ́мъ рѡссі́йскимъ ѿве́рзый: ра́дꙋйсѧ, хода́таю, безчи́сленное мно́жество си́хъ та́мѡ водвори́вый.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ в҃і.
Блгⷣть бж҃їѧ по лѣ́тѣхъ мно́зѣхъ тѣ́ло твоѐ ст҃о́е нетлѣ́ннѡ въ землѝ соблюдѐ, въ це́ркви десѧти́ннѣй положе́но, и҆ ꙗ҆́кѡ сокро́вище многоце́нное па́ствѣ твое́й цѣ́лѡ и҆ невреди́мѡ сїѐ ꙗ҆вѝ, ꙗ҆́кѡ нижѐ ѻ҆де́ждъ твои́хъ сщ҃е́нныхъ коснꙋ́тисѧ тлѣ́нїю: ѿсю́дꙋ ᲂу҆́бѡ вѣ́рою ᲂу҆разꙋмѣ́хомъ, ꙗ҆́кѡ хрⷭ҇тꙋ̀ предстои́ши и҆ мо́лишисѧ ѡ҆ почита́ющихъ тѧ̀ и҆ пою́щихъ є҆мꙋ̀ тебѣ̀ ра́ди: А҆ллилꙋ́їа.
І҆́косъ в҃і.
Пою́ще ст҃о́е и҆ пресла́вное житїѐ твоѐ, мїхаи́ле равноапⷭ҇льне, почита́емъ твою̀ сщ҃е́ннꙋю па́мѧть, ре́вность же твою̀ по бз҃ѣ восхвалѧ́емъ, любо́вь твою̀ ко хрⷭ҇тꙋ̀ и҆ къ бли́жнемꙋ превозно́симъ. ты́ же, ѡ҆ всебл҃же́ннѣйшїй ѻ҆́тче, не возгнꙋша́йсѧ смире́ннымъ си́мъ пѣ́нїемъ:
Ра́дꙋйсѧ, ꙗ҆́кѡ прⷭ҇то́лꙋ прест҃ы́ѧ трⷪ҇цы предстои́ши: ра́дꙋйсѧ, ꙗ҆́кѡ всемогꙋ́щаго ѡ҆ все́мъ мі́рѣ мо́лиши.
Ра́дꙋйсѧ, ꙗ҆́кѡ со а҆рха́гг҃лы и҆ а҆́гг҃лы трист҃ꙋ́ю пѣ́снь на нб҃сѝ пое́ши: ра́дꙋйсѧ, ꙗ҆́кѡ со а҆пⷭ҇лы въ ра́йскихъ ѡ҆би́телехъ пребыва́еши.
Ра́дꙋйсѧ, ꙗ҆́кѡ съ ли́ки ст҃и́телей пред̾ бг҃омъ ѡ҆ дꙋша́хъ на́шихъ хода́тайствꙋеши: ра́дꙋйсѧ, ꙗ҆́кѡ съ полкѝ прпⷣбныхъ сп҃се́нїю на́шемꙋ споспѣшествꙋ́еши.
Ра́дꙋйсѧ, ꙗ҆́кѡ съ пречⷭ҇тою дѣ́вою бцⷣею, рꙋ́цѣ своѝ пречестны̑ѧ ѡ҆ ми́рѣ ѻ҆те́чества на́шегѡ ко хрⷭ҇тꙋ̀ воздѣва́еши: ра́дꙋйсѧ, ꙗ҆́кѡ ѡ҆ соедине́нїи люде́й непреста́ннѡ є҆гѡ̀ ᲂу҆молѧ́еши.
Ра́дꙋйсѧ, со прⷪ҇ро́ки и҆ мч҃ники вы́шнѧгѡ црⷭ҇твїѧ наслѣ́дниче: ра́дꙋйсѧ, раѧ̀ бж҃їѧ со всѣ́ми ст҃ы́ми є҆диновсе́льниче.
Ра́дꙋйсѧ, нбⷭ҇ныхъ вели́чїй и҆ красо́тъ зри́телю: ра́дꙋйсѧ, безконе́чныхъ сла́достей и҆ бл҃же́нствъ ра́йскихъ ѡ҆блада́телю.
Ра́дꙋйсѧ, мїхаи́ле, вели́кїй і҆ера́рше, цр҃кве рѡссі́йскїѧ пресла́вный первопресто́льниче.
Конда́къ г҃і.
Ѽ всехва́льный и҆ преди́вный чꙋдотво́рче, ѻ҆́тче на́шъ мїхаи́ле, рѡссі́йскїѧ страны̀ пе́рвый ст҃и́телю и҆ всѣ́хъ правосла́вныхъ хрⷭ҇тїа́нъ предста́телю, прїимѝ сїѐ ма́лое моле́нїе на́ше, въ похвалꙋ̀ тебѣ̀ приноси́мое, и҆ мл҃твами твои́ми и҆спросѝ на́мъ ᲂу҆ бг҃а въ вѣ́цѣ се́мъ житїѐ ти́хое и҆ добродѣ́телей и҆спо́лненное, да и҆ въ жи́зни бꙋ́дꙋщей сподо́бимсѧ кꙋ́пнѡ съ тобо́ю пѣ́ти въ трⷪ҇цѣ є҆ди́номꙋ бг҃ꙋ: А҆ллилꙋ́їа.
Конда́къ се́й глаго́лн г҃-жды, та́же і҆́косъ а҃-й и҆ конда́къ а҃-й.
Моли́тва.
Ѽ ст҃ы́й вели́кїй и҆ пресла́вный а҆рхїпа́стырю и҆ ѻ҆́тче на́шъ мїхаи́ле, страны̀ рѡссі́йскїѧ первопресто́льниче и҆ просвѣти́телю, всѣ́хъ же племе́нъ хрⷭ҇тїа́нскихъ бл҃гонаде́жный пред̾ бг҃омъ хода́таю, тебѣ̀ припа́дающе мо́лимсѧ: помозѝ на́мъ бы́ти твоеѧ̀ къ бг҃ꙋ любвѐ подража́тельми, є҆́юже въ земнѣ́мъ животѣ̀ твое́мъ преиспо́лненъ бы́лъ є҆сѝ. просвѣтѝ ᲂу҆мы̀ и҆ сердца̀ на̑ша свѣ́томъ бжⷭ҇твеннагѡ ᲂу҆че́нїѧ. наꙋчѝ на́съ тебѣ̀ послѣ́довати вѣ́рнѡ и҆ за́пѡвѣди гдⷭ҇ни ᲂу҆се́рднѡ твори́ти, да ꙗ҆ви́мсѧ ча́да твоѧ̀ не и҆́менемъ то́кмѡ, но и҆ всѣ́мъ житїе́мъ, та́кѡ позна́емсѧ. моли́сѧ, равноапⷭ҇льне і҆ера́рше, ѡ҆ це́ркви рѡссі́йстѣй, ѡ҆ гра́дѣ твое́мъ и҆ ѡ҆би́тели, въ не́йже нетлѣ́ннѡ мо́щи твоѧ̀ ст҃ы́ѧ почива́ютъ, и҆ ѡ҆ всѣ́мъ ѻ҆те́чествѣ на́шемъ, при́зри ми́лостивнѡ на всѧ̑ вѣ̑рныѧ твоѧ̑ чти́тели, по́мощи твоеѧ̀ и҆́щꙋщыѧ: бꙋ́ди всѣ̑мъ въ болѣ́знехъ цѣли́тель, въ ско́рбехъ и҆ печа́лехъ ᲂу҆тѣ́шитель, въ бѣда́хъ и҆ нꙋ́ждахъ помо́щникъ, въ ча́съ же сме́ртный застꙋ́пникъ и҆ покрови́тель, да твое́ю по́мощїю сподо́бимсѧ и҆ мы̀ грѣ́шнїи сп҃се́нїе полꙋчи́ти и҆ црⷭ҇твїе хрⷭ҇то́во наслѣ́довати. є҆́й, ст҃и́телю хрⷭ҇то́въ, а҆́ще восхо́щеши мо́жеши по́мощи на́мъ, да на по́мощь твою̀ ᲂу҆пова́юще, просла́вимъ ди́внагѡ во ст҃ы́хъ свои́хъ бг҃а ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.