А҆ка́ѳїстъ ст҃и́телю ѳеодо́сїю черни́говскомꙋ.
Конда́къ а҃.
И҆збра́нный чꙋдотво́рче, вели́кїй ᲂу҆го́дниче хрⷭ҇то́въ, ст҃и́телю ѻ҆́тче ѳеодо́сїе, нетлѣ́нїемъ моще́й твои́хъ и҆ мно́жествомъ чꙋде́съ ѿ бг҃а просла́вленный, въ пѣ́снехъ ра́достныхъ ᲂу҆блажа́емъ тѧ̀, застꙋ́пника на́шегѡ. Ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свобожда́й, да зове́мъ тѝ: Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
І҆́косъ а҃.
А҆́гг҃лъ во пло́ти ꙗ҆ви́лсѧ є҆сѝ, бг҃омꙋ́дре ѳеодо́сїе, а҆́гг҃льскими нра́вы и҆змла́да себѐ ᲂу҆краша́ѧ: тѣ́мже и҆ а҆́гг҃лъ це́ркве черни́говскїѧ досто́йнѣ поста́вленъ бы́лъ є҆сѝ ѿ бг҃а, всѣ́хъ наставлѧ́ѧ ко сп҃се́нїю и҆ всѣ́мъ ꙗ҆влѧ́ѧ въ себѣ̀ пра́вило вѣ́ры и҆ ѡ҆́бразъ кро́тости, воздержа́нїѧ же и҆ любвѐ. Сегѡ̀ ра́ди, ча̑да твоѧ̑ сꙋ́ще, любо́вїю вопїе́мъ тѝ си́це:
Ра́дꙋйсѧ, а҆́гг҃ле земны́й и҆ человѣ́че нбⷭ҇ный: ра́дꙋйсѧ, нбⷭ҇ныхъ си́лъ собесѣ́дниче и҆ сослꙋжи́телю.
Ра́дꙋйсѧ, въ житїѝ твое́мъ безплѡ́тнымъ поревнова́вый: ра́дꙋйсѧ, и҆ по сме́рти съ ни́ми водвори́выйсѧ.
Ра́дꙋйсѧ, ѿ ю҆́ности хрⷭ҇та̀ всѣ́мъ се́рдцемъ твои́мъ возлюби́вый: ра́дꙋйсѧ, ѿ ᲂу҆́тра жи́зни твоеѧ̀ томꙋ̀ є҆ди́номꙋ порабо́тавый.
Ра́дꙋйсѧ, всѧ̑ за́пѡвѣди гдⷭ҇ни вѣ́рнѡ и҆ непоро́чнѡ сохрани́вый: ра́дꙋйсѧ, мно́гъ пло́дъ дꙋхо́вный ѡ҆ хрⷭ҇тѣ̀ сотвори́вый.
Ра́дꙋйсѧ, ᲂу҆се́рдною мл҃твою дꙋ́хъ тво́й ѡ҆крили́вый: ра́дꙋйсѧ, чтꙋ́щихъ любо́вїю па́мѧть твою̀ ѿ бѣ́дъ покрыва́ющїй.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ в҃.
Ви́дѣвъ сꙋетꙋ̀ мі́ра сегѡ̀ скороги́бнꙋщꙋю, всѣ́мъ се́рдцемъ возжела́лъ є҆сѝ, ѻ҆́тче ѳеодо́сїе, мі́ръ се́й ѡ҆ста́вити и҆ во и҆́ночестве бг҃ꙋ послꙋжи́ти. Тѣ́мже и҆́го хрⷭ҇то́во бл҃го́е и҆ ле́гкое ᲂу҆се́рднѣ воспрїѧ́въ, и҆́нокъ ст҃ы́ѧ ѻ҆би́тели кїево-пече́рскїѧ смире́нъ и҆ послꙋшли́въ бы́лъ є҆сѝ, воспѣва́ѧ всѣ́хъ творцꙋ̀ а҆́гг҃льскꙋю пѣ́снь: А҆ллилꙋ́їа.
І҆́косъ в҃.
Ра́зꙋмъ бг҃опросвѣще́нный тво́й ви́дѣвъ, ст҃и́тель кі́евскїй дїонѵ́сїй поста́ви тѧ̀, ѳеодо́сїе, а҆рхїдїа́кона собо́рныѧ це́ркве софі́и премꙋ́дрости бж҃їей, да слꙋ́жиши ѻ҆лтарю̀ гдⷭ҇ню при соверше́нїи та́инъ бж҃їихъ. Мы́ же, въ тебѣ̀ и҆збра́нный сосꙋ́дъ дх҃а ст҃а́гѡ вѣ́дꙋще, со ᲂу҆миле́нїемъ зове́мъ тѝ сицева̑ѧ:
Ра́дꙋйсѧ, под̾ кро́вомъ чꙋдотво́рцєвъ пече́рскихъ нача́ло по́двигѡвъ твои́хъ положи́вый: ра́дꙋйсѧ, ѿ ю҆́ности добродѣ́тельми мона́шескагѡ житїѧ̀ преизрѧ́днѡ себє̀ ᲂу҆краси́вый.
Ра́дꙋйсѧ, и҆́нокѡвъ пресвѣ́тлаѧ красото̀: ра́дꙋйсѧ, по́стникѡвъ пресла́внаѧ похвало̀.
Ра́дꙋйсѧ, ст҃и́телей бл҃гоговѣ́йныхъ люби́мый собесѣ́дниче: ра́дꙋйсѧ, послꙋша́нїѧ нелицемѣ́рный рачи́телю.
Ра́дꙋйсѧ, подви́жниче смире́нный, на гдⷭ҇а всѐ ᲂу҆пова́нїе возложи́вый: ра́дꙋйсѧ, ᲂу҆едине́ннагѡ житїѧ̀ до́брый ревни́телю.
Ра́дꙋйсѧ, и҆збра́нниче хрⷭ҇то́въ пребл҃же́нный: ра́дꙋйсѧ, бг҃омъ да́нный на́мъ застꙋ́пниче непреѡбори́мый.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ г҃.
Си́ла бж҃їѧ ѡ҆сѣнѝ тѧ̀, ѻ҆́тче ѳеодо́сїе, є҆гда̀ во і҆ере́а посщ҃е́нъ бы́лъ є҆сѝ ѿ ст҃и́телѧ дїонѵ́сїа и҆ во и҆гꙋ́мена ѡ҆би́тели корсꙋ́нскїѧ ѿ негѡ̀ поста́вленъ, да пасе́ши хрⷭ҇то́во ста́до и҆ рꙋково́диши и҆́ноки ко сп҃се́нїю, воспѣва́ѧ кꙋ́пнѡ съ ни́ми хвале́бнꙋю пѣ́снь въ трⷪ҇цѣ сла́вимомꙋ бг҃ꙋ: А҆ллилꙋ́їа.
І҆́косъ г҃.
И҆мѣ́ѧ смире́нїе нелицемѣ́рное, пра́хъ и҆ пе́пелъ себѐ и҆менова́лъ є҆сѝ, пребл҃же́нне ѳеодо́сїе, и҆ запреще́нїе ѿ а҆рхїере́а, непови́ненъ сы́й, безро́потнѡ поне́слъ є҆сѝ: тѣ́мже и҆ мы̀, ᲂу҆блажа́юще таково́е, вои́стиннꙋ хрⷭ҇топодража́тельное, неѕло́бїе твоѐ, воспѣва́емъ тебѣ̀ си́це:
Ра́дꙋйсѧ, а҆́гнче неѕло́бивый, никомꙋ́же ѕла̀ за ѕло̀ возда́вый: ра́дꙋйсѧ, ꙗ҆́кѡ запреще́нїе а҆рхїере́йское носѧ̀, послꙋша́нїе вели́кое ꙗ҆ви́лъ є҆сѝ.
Ра́дꙋйсѧ, ꙗ҆́кѡ тогда̀ и҆ є҆пїтрахи́ли коснꙋ́тисѧ не дерза́лъ є҆сѝ: ра́дꙋйсѧ, смире́нїемъ и҆ преда́нїемъ себє̀ въ во́лю бж҃їю врага̀ побѣди́вый.
Ра́дꙋйсѧ, и҆́ноче бг҃олюбе́зный, прпⷣбїемъ и҆ кро́тостїю бл҃гоꙋкраше́нный: ра́дꙋйсѧ, по́стническимъ житїе́мъ, ꙗ҆́кѡ безкро́внымъ мч҃ничествомъ ᲂу҆вѣнча́нный.
Ра́дꙋйсѧ, мона́шествꙋющимъ ѻ҆те́цъ и҆ наста́вникъ бг҃омꙋ́дрый: ра́дꙋйсѧ, ѡ҆би́телей и҆́ноческихъ многоѻ́пытный рꙋководи́телю.
Ра́дꙋйсѧ, престо́ла бж҃їѧ вѣ́рный и҆ бл҃гоговѣ́йный слꙋжи́телю: ра́дꙋйсѧ, пред̾ бг҃омъ те́плый ѡ҆ на́съ хода́таю.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ д҃.
Бꙋ́рю гоне́нїй на цр҃ковь бж҃їю во гра́дѣ кі́евѣ воздви́же мꙋдрова́нїе лати́нское: ты́ же, бг҃омꙋ́дре ѳеодо́сїе, во и҆гꙋ́мена ѡ҆би́тели вы́дꙋбецкїѧ тогда̀ поста́вленъ бы́въ, сїю̀ ѿ лжеꙋче́нїѧ ѡ҆гради́лъ є҆сѝ, ᲂу҆твержда́ѧ бра́тїю свою̀ въ правосла́внѣй вѣ́рѣ непоро́чнѡ воспѣва́ти бг҃ꙋ: А҆ллилꙋ́їа.
І҆́косъ д҃.
Слы́шавъ бг҃оꙋго́дное житїѐ твоѐ, ѻ҆́тче ѳеодо́сїе, ст҃и́тель бж҃їй ла́зарь, призва̀ тѧ̀ ѿ кі́ева въ черни́говъ и҆, поста́вивъ во а҆рхїмандрі́та пречⷭ҇тны́ѧ ѡ҆би́тели є҆ле́цкїѧ, сотворѝ помо́щника себѣ̀ во ᲂу҆правле́нїи церко́внѣмъ: ты̀ же съ любо́вїю сыно́внею послꙋжи́лъ є҆сѝ є҆мꙋ̀ и҆ вои́стиннꙋ досто́инъ ꙗ҆ви́лсѧ є҆сѝ, да воспѣва́емъ тѝ сицева̑ѧ:
Ра́дꙋйсѧ, ста́рцꙋ ст҃и́телю съ любо́вїю послꙋжи́вый: ра́дꙋйсѧ, ꙗ҆́кѡ сы́нъ ѻ҆тцꙋ̀ во всѣ́мъ є҆мꙋ̀ послꙋ́шенъ бы́вый.
Ра́дꙋйсѧ, ста́рость є҆гѡ̀ ᲂу҆поко́ивый: ра́дꙋйсѧ, трꙋды̀ ст҃и́тельскїѧ є҆мꙋ̀ ѡ҆блегчи́вый.
Ра́дꙋйсѧ, бл҃голѣ́пїѧ церко́внагѡ ᲂу҆се́рдный рачи́телю: ра́дꙋйсѧ, преда́нїй а҆пⷭ҇льскихъ вѣ́рный храни́телю.
Ра́дꙋйсѧ, пра́вды ре́вностный блюсти́телю: ра́дꙋйсѧ, до́лга па́стырскагѡ непоколеби́мый и҆сполни́телю.
Ра́дꙋйсѧ, ѻ҆лтарѧ̀ гдⷭ҇нѧ слꙋжи́телю непоро́чный: ра́дꙋйсѧ, па́стыремъ свѣ́тлый ѡ҆́бразе.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ є҃.
Бг҃оте́чнꙋю ѕвѣздꙋ̀, къ го́рнемꙋ і҆ерⷭ҇ли́мꙋ пꙋтеводѧ́щꙋю и҆ добродѣ́тельми свѣ́тлѡ сїѧ́ющꙋю, зрѧ́ще тѧ̀, преди́вный ѳеодо́сїе, и҆́ноцы же и҆ мїрсті́и съ любо́вїю послѣ́довахꙋ тебѣ̀, внима́юще твоемꙋ̀ ᲂу҆че́нїю дꙋшеполе́зномꙋ и҆ взира́юще на ѡ҆́бразъ чи́стагѡ житїѧ̀ твоегѡ̀, поꙋча́хꙋсѧ взыва́ти съ тобо́ю бг҃ꙋ, ди́вномꙋ во ст҃ы́хъ свои́хъ: А҆ллилꙋ́їа.
І҆́косъ є҃.
Ви́дѣвъ себѐ ст҃и́тель ла́зарь ста́ростїю преꙋтрꙋжде́на и҆ въ си́лахъ тѣле́сныхъ и҆знемо́гша, возжела̀ и҆мѣ́ти тѧ̀, ѳеодо́сїе, прее́мника по себѣ̀ во ст҃и́тельствѣ и҆ просѝ ст҃ѣ́йшагѡ патрїа́рха моско́вскагѡ посвѧти́ти тѧ̀ во а҆рхїепⷭ҇копа. Мы̀ же въ се́мъ бж҃їе зва́нїе, є҆́же на тебѣ̀, ᲂу҆разꙋмѣва́юще, любо́вїю прославлѧ́емъ тѧ̀ си́це:
Ра́дꙋйсѧ, а҆рхїере́ю бж҃їй, ѿ предвѣ́чнагѡ а҆рхїере́а ди́внѡ пред̾избра́нный: ра́дꙋйсѧ, а҆пⷭ҇лѡвъ досто́йный прее́мниче и҆ ᲂу҆се́рдный ревни́телю.
Ра́дꙋйсѧ, ст҃и́телю хрⷭ҇то́въ, ѿ собо́ра ст҃и́телей рѡссі́йскихъ ѡ҆сщ҃е́нный: ра́дꙋйсѧ, і҆ера́рше бл҃гі́й и҆ нищелюби́вый.
Ра́дꙋйсѧ, а҆рхїпа́стырю, ми́лостивый и҆ сострада́тельный: ра́дꙋйсѧ, ст҃и́телємъ митрофа́нꙋ и҆ дими́трїю собесѣ́дниче и҆ сопресто́льниче.
Ра́дꙋйсѧ, а҆рхїере́євъ правосла́вныхъ красото̀: ра́дꙋйсѧ, па́стырю до́брый, дꙋ́шꙋ твою̀ за ѻ҆́вцы положи́ти гото́вый.
Ра́дꙋйсѧ, ᲂу҆чи́телю златослове́сный: ра́дꙋйсѧ, бг҃освѣ́тлый свѣти́льниче цр҃кве хрⷭ҇то́вы, во тьмѐ вѣ́ка сегѡ̀ возсїѧ́вшїй.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ ѕ҃.
Проповѣ́дникъ не сло́вомъ то́чїю, но и҆ дѣ́ломъ ꙗ҆ви́лсѧ є҆сѝ хрⷭ҇то́ва ᲂу҆че́нїѧ, ст҃и́телю ѳеодо́сїе, ꙗ҆́кѡ па́стырь до́брый, по ѡ҆́бразꙋ пастыренача́льника хрⷭ҇та̀ всѣ́хъ съ любо́вїю наставлѧ́ѧ ко сп҃се́нїю, всѣ̑мъ ѡ҆́бразъ житїѧ̀ по за́повѣдємъ хрⷭ҇тѡ́вымъ подава́ѧ и҆ всѣ́хъ поꙋча́ѧ взыва́ти при́снѡ бг҃ꙋ: А҆ллилꙋ́їа.
І҆́косъ ѕ҃.
Возсїѧ́лъ є҆сѝ, ꙗ҆́кѡ ᲂу҆́тро свѣтоза́рное, странѣ̀ черни́говстѣй, ст҃и́телю бж҃їй ѳеодо́сїе, и҆ па́ствꙋ, тебѣ̀ ввѣ́реннꙋю, свѣ́томъ добродѣ́телей твои́хъ ѡ҆зари́лъ є҆сѝ, смире́нїемъ высѡ́каѧ стѧжава́ѧ и҆ нищетꙋ̀ и҆́ноческꙋю соблюда́ѧ, всѧ̑ бо, ꙗ҆̀же и҆мѣ́лъ є҆сѝ, неимꙋ́щимъ ᲂу҆се́рднѣ раздава́лъ є҆сѝ. Ѡ҆ се́мъ дивѧ́щесѧ, ꙗ҆́кѡ нищелю́бца соверше́ннагѡ ᲂу҆блажа́емъ тѧ̀, зовꙋ́ще:
Ра́дꙋйсѧ, милосе́рдїѧ и҆сто́чниче неисчерпа́емый: ра́дꙋйсѧ, си̑рымъ прибѣ́жище бл҃гонаде́жное.
Ра́дꙋйсѧ, вдови́цамъ ми́лостивый покрови́телю: ра́дꙋйсѧ, а҆́лчꙋщихъ неѡскꙋ́дный пита́телю.
Ра́дꙋйсѧ, ѡ҆би̑димымъ ско́рый застꙋ́пниче: ра́дꙋйсѧ, скорбѧ́щимъ бл҃гонаде́жный ᲂу҆тѣ́шителю.
Ра́дꙋйсѧ, сꙋ́щимъ въ бѣда́хъ гото́вый помо́щниче: ра́дꙋйсѧ, младе́нцємъ до́брый воспита́телю.
Ра́дꙋйсѧ, ю҆́ношамъ и҆ дѣ́вамъ въ цѣломꙋ́дрїи наста́вниче: ра́дꙋйсѧ, ста́рцємъ и҆ немощны̑мъ тве́рдое ᲂу҆крѣпле́нїе.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ з҃.
Хотѧ̀ всѣ́мъ се́рдцемъ твои́мъ є҆ди́номꙋ гдⷭ҇ꙋ бл҃гоꙋгожда́ти, по́двигомъ до́брымъ до конца̀ подвиза́лсѧ є҆сѝ, ѳеодо́сїе, трꙋды̀ къ трꙋдѡ́мъ во смире́нїи прилага́ѧ, посто́мъ и҆ бдѣ́нїемъ съ моли́твою пло́ть твою̀ ᲂу҆мерщвлѧ́ѧ и҆ любо́вїю всѣ́хъ согрѣва́ѧ. Тѣ́мже и҆ сподо́билсѧ є҆сѝ є҆щѐ на землѝ досто́йно и҆ пра́веднѡ воспѣва́ти а҆́гг҃льскꙋю пѣ́снь бг҃ꙋ: А҆ллилꙋ́їа.
І҆́косъ з҃.
Но́вагѡ тѧ̀ моли́твенника и҆ чꙋдотво́рца преди́внагѡ ꙗ҆вѝ гдⷭ҇ь въ странѣ̀ рѡссі́йстѣй, ст҃и́телю ѻ҆́тче ѳеодо́сїе: тѣ́мже и҆ свѣ́тлѡ красꙋ́етсѧ тобо́ю цр҃ковь правосла́внаѧ, ꙗ҆́кѡ дерзнове́нїе ве́лїе ко хрⷭ҇тꙋ̀ и҆́маши, є҆мꙋ́же моли́сѧ, ст҃и́телю, ѡ҆ на́съ грѣ́шныхъ, любо́вїю тебѣ̀ вопїю́щихъ сицева̑ѧ:
Ра́дꙋйсѧ, пресвѣ́тлый свѣти́льниче вѣ́ры правосла́вныѧ: ра́дꙋйсѧ, правосла́вїѧ стра́же неꙋсыпа́ющїй.
Ра́дꙋйсѧ, бл҃гоче́стїѧ ре́вностный побо́рниче: ра́дꙋйсѧ, це́ркве бж҃їѧ сто́лпе непоколеби́мый.
Ра́дꙋйсѧ, хра́мино добродѣ́телей преꙋкраше́ннаѧ: ра́дꙋйсѧ, безстра́стїѧ и҆ чистоты̀ ревни́телю преизрѧ́дный.
Ра́дꙋйсѧ, моли́твы сокро́вище неистощи́мое: ра́дꙋйсѧ, та́инъ бж҃їихъ вѣ́рный строи́телю.
Ра́дꙋйсѧ, па́ствꙋ твою̀ въ вѣ́рѣ и҆ бл҃гоче́стїи соблюда́ѧй: ра́дꙋйсѧ, со ст҃ы́ми сликова́нїѧ въ нбⷭ҇номъ црⷭ҇твїи сподо́бивыйсѧ.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ и҃.
Стра́нствїе земно́е бг҃оꙋго́днѣ соверши́въ, ст҃и́телю ѻ҆́тче ѳеодо́сїе, ст҃ѡ и҆ пра́веднѡ почи́лъ є҆сѝ ѡ҆ гдⷭ҇ѣ сно́мъ сме́рти, ꙗ҆́же бы́сть тебѣ̀ прохожде́нїе ѿ трꙋдѡ́въ на поко́й вѣ́чный: прїѧ́лъ бо є҆сѝ ѿ хрⷭ҇та̀ бг҃а вѣне́цъ сла́вы нетлѣ́нный и҆ водвори́лсѧ є҆сѝ со ст҃ы́ми воспѣва́ти є҆мꙋ̀ вѣ́чнѡ хвале́бнꙋю пѣ́снь: А҆ллилꙋ́їа.
І҆́косъ и҃.
Ве́сь є҆сѝ любо́вь неоскꙋдѣва́ющаѧ, ст҃и́телю бж҃їй ѳеодо́сїе: ꙗ҆́кѡже бо въ житїѝ се́мъ, та́кѡ и҆ по преставле́нїи къ бг҃ꙋ ча̑дъ твои́хъ не ѡ҆ставлѧ́еши: на всѣ́хъ, къ тебѣ̀ вѣ́рою притека́ющихъ, млⷭ҇тивне призира́еши, болѧ́щимъ и҆сцѣле́нїе подава́ѧ, скорбѧ́щихъ ᲂу҆тѣша́ѧ, ѿ бѣ́дъ и҆збавлѧ́ѧ. Сегѡ̀ ра́ди, благода́рни сꙋ́ще, воспѣва́емъ тѝ си́це:
Ра́дꙋйсѧ, нищетꙋ̀ дꙋхо́внꙋю ѿ ю҆́ности возлюби́вый: ра́дꙋйсѧ, хрⷭ҇тꙋ̀ въ ме́ньшихъ бра́тїѧхъ є҆гѡ̀ вѣ́рнѡ послꙋжи́вый.
Ра́дꙋйсѧ, двє́ри милосе́рдїѧ бж҃їѧ на́мъ ѿверза́ющїй: ра́дꙋйсѧ, гнѣ́въ бж҃їй, пра́веднѡ на ны̀ дви́жимый, на ми́лость прелага́ющїй.
Ра́дꙋйсѧ, по ѿше́ствїи твое́мъ къ бг҃ꙋ съ на́ми пребыва́ющїй: ра́дꙋйсѧ, ᲂу҆мерщвлє́нныѧ грѣха́ми дꙋ́ши бл҃года́тїю хрⷭ҇то́вою ѡ҆живлѧ́ющїй.
Ра́дꙋйсѧ, и҆сто́чниче сострада́нїѧ, къ лю́демъ приснотекꙋ́щїй: Ра́дꙋйсѧ, ѡ҆мраче́нныхъ заблꙋжде́нїѧми бл҃гостный просвѣти́телю.
Ра́дꙋйсѧ, съ нбⷭ҇ныхъ высо́тъ на ско́рби на́ши призира́ющїй: ра́дꙋйсѧ, всѣ́хъ на́съ любо́вїю твое́ю ѡ҆б̾е́млющїй.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ ѳ҃.
Всѝ лю́дїе черни́говстїи просла́виша бг҃а, є҆гда̀ ᲂу҆слы́шаша ѡ҆ пресла́вномъ ꙗ҆вле́нїи твое́мъ, ст҃и́телю ѳеодо́сїе, прее́мникꙋ твоемꙋ̀ а҆рхїепⷭ҇кпꙋ і҆ѡа́ннꙋ, є҆го́же ѿ недꙋ́га тѧ́жка и҆сцѣли́лъ є҆сѝ, ꙗ҆влѧ́ѧ дерзнове́нїе твоѐ ко гдⷭ҇ꙋ. Сегѡ̀ ра́ди и҆ потща́сѧ гро́бъ тво́й бл҃гоꙋкраси́ти и҆ подо́бїе лица̀ твоегѡ̀ над̾ ни́мъ поста́вити, зовы́й ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.
І҆́косъ ѳ҃.
Вѣті́и многовѣща́ннїи не возмо́гꙋтъ восхвали́ти тѧ̀ по достоѧ́нїю вѣ́чныѧ сла́вы досто́йнагѡ, ст҃и́телю ѻ҆́тче ѳеодо́сїе: и҆ кто̀ мо́жетъ повѣ́дати мнѡ́гаѧ и҆ пресла́внаѧ чꙋдеса̀ твоѧ̑, ꙗ҆̀же и҆сточи́лъ є҆сѝ ѿ нетлѣ́нныхъ моще́й и҆ і҆кѡ́нъ твои́хъ ст҃ы́хъ: ѡ҆ се́мъ ᲂу҆̀бо ра́дꙋющесѧ и҆ бг҃а, ст҃ы́хъ свои́хъ прославлѧ́ющагѡ, сла́вѧще, вопїе́мъ тѝ си́це:
Ра́дꙋйсѧ, въ пресвѣ́тлыхъ ра́йскихъ черто́зѣхъ ѻ҆бита́ющїй: ра́дꙋйсѧ, нетлѣ́нїемъ моще́й твои́хъ зарю̀ ѻ҆́бщагѡ воскресе́нїѧ на́мъ пред̾показꙋ́ющїй.
Ра́дꙋйсѧ, въ видѣ́нїихъ во бл҃го вѣ́рꙋющимъ ꙗ҆влѧ́ющїйсѧ: ра́дꙋйсѧ, въ со́нїѧхъ на мл҃твꙋ къ твоемꙋ̀ хода́тайствꙋ призыва́ющїй.
Ра́дꙋйсѧ, сле́зы и҆ воздыха̑нїѧ скорбѧ́щихъ съ любо́вїю ᲂу҆толѧ́ющїй: ра́дꙋйсѧ, прошє́нїѧ трꙋжда́ющихсѧ и҆ ѡ҆бремене́нныхъ ско́рѡ и҆сполнѧ́ющїй.
Ра́дꙋйсѧ, ѿ внеза́пныѧ сме́рти вѣ́рныхъ и҆збавлѧ́ющїй: ра́дꙋйсѧ, да́нныѧ бг҃ꙋ ѡ҆бѣ́ты и҆сполнѧ́ти побꙋжда́ющїй.
Ра́дꙋйсѧ, слѣпы̑мъ прозрѣ́нїе, глꙋхи̑мъ слы́шанїе подаю́щїй: ра́дꙋйсѧ, ѻ҆́тче чадолюби́вый, ꙗ҆́кѡже ко́кошъ под̾ крилѣ̀, дꙋхѡ́внаѧ ча̑да твоѧ̑ ᲂу҆ гро́ба твоегѡ̀ собира́ющїй.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ і҃.
Сп҃се́нїе вѣ́чное ᲂу҆наслѣ́довалъ є҆сѝ, ст҃и́телю ѳеодо́сїе, и҆ свѣ́тлѡ ны́нѣ ликꙋ́еши со а҆́гг҃лы и҆ всѣ́ми ст҃ы́ми, при́снѡ созерца́ѧ пресвѣ́тлое лицѐ хрⷭ҇та̀ бг҃а на́шегѡ, є҆го́же моли́ти не преста́й за ны̀ грѣ̑шныѧ, да твои́мъ застꙋпле́нїемъ сподо́бимсѧ кꙋ́пнѡ съ тобо́ю воспѣва́ти є҆мꙋ̀: А҆ллилꙋ́їа.
І҆́косъ і҃.
Стѣна̀ ѡ҆гражде́нїѧ въ цр҃кви правосла́вней ꙗ҆влѧ́ешисѧ, ст҃и́телю бж҃їй, мно́жествомъ ди́вныхъ чꙋде́съ твои́хъ вѣ̑рныѧ ᲂу҆твержда́ющаѧ и҆ ꙗ҆вле́нїемъ си́лы бж҃їей всѧ̑ є҆реті́чєскаѧ мꙋдрова̑нїѧ ѿража́ющаѧ: наста́вникѡвъ бо раско́ла нетлѣ́нїемъ моще́й твои́хъ ѕѣлѡ̀ ᲂу҆диви́лъ є҆сѝ и҆ и҆сповѣ́дати и҆́стинꙋ правосла́вїѧ возбꙋди́лъ є҆сѝ. Тѣ́мже со стра́хомъ и҆ бл҃гоговѣ́нїемъ вкꙋ́пѣ съ вѣ́рными взыва́хꙋ тѝ си́це:
Ра́дꙋйсѧ, прославле́нїемъ моще́й твои́хъ всѣ́хъ на́съ ра́дости и҆спо́лнивый: ра́дꙋйсѧ, нетлѣ́нїемъ тѣлесѐ твоегѡ̀ невѣ́рїе глаго́лемыхъ староѡбрѧ́дцевъ въ вѣ́рꙋ претвори́вый.
Ра́дꙋйсѧ, є҆́ресь штꙋ́нды чꙋдесы̀ пресла́вными посрами́вый: ра́дꙋйсѧ, женꙋ̀ ѿ лю́торовы є҆́реси кре́стное зна́менїе правосла́внѣ полага́ти наꙋчи́вый.
Ра́дꙋйсѧ, младе́нцꙋ слѣпо́мꙋ ᲂу҆ моще́й твои́хъ внеза́пꙋ прозрѣ́нїе дарова́вый: ра́дꙋйсѧ, нѣмотствꙋ́ющїй ѧ҆зы́къ пома́занїемъ є҆ле́ѧ ѿ лампа́ды твоеѧ̀ разрѣши́вый.
Ра́дꙋйсѧ, тѣ́мъ же є҆ле́емъ стрꙋ́пы неисцѣ̑льныѧ и҆сцѣлѧ́ѧй: ра́дꙋйсѧ, бли́з̾ сме́рти сꙋ́щихъ болѧ́щихъ къ жи́зни возвраща́ѧй.
Ра́дꙋйсѧ, ꙗ҆́кѡ лише́ннїи ра́зꙋма ᲂу҆ моще́й твои́хъ бл҃года́тїю хрⷭ҇то́вою и҆сцѣлѧ́ютсѧ: ра́дꙋйсѧ, ꙗ҆́кѡ и҆ пелены̑ ѿ гро́ба твоегѡ̀ чꙋдодѣ́йствꙋютъ.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ а҃і.
Пѣ́нїе мл҃твенное не ᲂу҆молка́ше ᲂу҆ моще́й твои́хъ, ст҃и́телю ѳеодо́сїе, ѿ днѐ погребе́нїѧ да́же до днѐ прославле́нїѧ твоегѡ̀ со ст҃ы́ми, є҆гда̀ собо́ръ ст҃и́телей цр҃кве рѡссі́йскїѧ со сла́вою и҆з̾ пеще́ры мо́щи твоѧ̑ и҆знесѐ и҆ въ собо́рнѣй це́ркви гра́да черни́гова на ѻ҆́бщее поклоне́нїе че́стнѣ положѝ. Прїимѝ ᲂу҆́бѡ и҆ на́ше смире́нное пѣ́нїе хвале́бное и҆ помозѝ на́мъ покаѧ́нїемъ ѡ҆чи́ститисѧ, да во и҆сполне́нїи за́повѣдей хрⷭ҇то́выхъ преꙋспѣва́юще и҆ тобо́ю наставлѧ́еми, съ тобо́ю бл҃года́рственнѣ вопїе́мъ бг҃ꙋ: А҆ллилꙋ́їа.
І҆́косъ а҃і.
Свѣти́льникъ бл҃года́тный бы́въ въ житїѝ твое́мъ, ст҃и́телю ѳеодо́сїе, ти́химъ свѣ́томъ смире́нїѧ и҆ любвѐ на свѣ́щницѣ цр҃кве хрⷭ҇то́вы сїѧ́ющїй, и҆ по преставле́нїи твое́мъ возсїѧ́лъ є҆сѝ, ꙗ҆́кѡ со́лнце, преди́вными чꙋдесы̀ мглꙋ̀ раско́ла и҆ є҆ресе́й разгонѧ́ѧ, и҆ вѣ́рныхъ сердца̀ къ бг҃ꙋ ѡ҆браща́ѧ. Тѣ́мже, съ любо́вїю пра́зднꙋюще ст҃ꙋ́ю па́мѧть твою̀, вопїе́мъ тѝ:
Ра́дꙋйсѧ, ѕвѣздо̀ лꙋчеза́рнаѧ, над̾ земле́ю черни́говскою возсїѧ́вшаѧ: ра́дꙋйсѧ, и҆ всю̀ странꙋ̀ рѡссі́йскꙋю свѣ́томъ свои́мъ ѡ҆зари́вшаѧ.
Ра́дꙋйсѧ, гра́да черни́гова сла́во и҆ ѡ҆гражде́нїе: ра́дꙋйсѧ, всеѧ̀ землѝ на́шеѧ стра́же неꙋсы́пный и҆ те́плый моли́твенниче.
Ра́дꙋйсѧ, ᲂу҆ прⷭ҇то́ла царѧ̀ ца́рствꙋющихъ за царѧ̀ на́шегѡ предста́тельствꙋющїй: ра́дꙋйсѧ, ꙗ҆́кѡ и҆́мѧ твоѐ по все́й странѣ̀ на́шей ѿ конца̀ въ коне́цъ прославлѧ́етсѧ.
Ра́дꙋйсѧ, ꙗ҆́кѡ ꙗ҆вле́нїи твои́ми невѣ̑рныѧ въ вѣ́рꙋ правосла́внꙋю ѡ҆браща́еши: ра́дꙋйсѧ, ꙗ҆́кѡ чꙋдесы̑ твои́ми и҆носла̑вныѧ къ правосла́вїю наставлѧ́еши.
Ра́дꙋйсѧ, ꙗ҆́кѡ съ нбⷭ҇ными си́лами при́снѡ бг҃ꙋ воспѣва́еши: ра́дꙋйсѧ, ꙗ҆́кѡ на нбⷭ҇ѣ́хъ вы́нꙋ сла́вꙋ є҆гѡ̀ созерца́еши.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ в҃і.
Благода́ти бж҃їей сосꙋ́дъ и҆збра́нный бы́лъ є҆сѝ, ст҃и́телю ѳеодо́сїе: бл҃года́ть бж҃їю и҆ въ по́мощь не́мощи на́шей и҆спросѝ ᲂу҆ гдⷭ҇а, да се́ю бл҃года́тїю сп҃са́еми, присноборю́щїѧ ны̀ стра̑сти побѣди́мъ, и҆ то́ю ᲂу҆крѣплѧ́еми, пода́телѧ всѣ́хъ бла́гъ гдⷭ҇а і҆и҃са всегда̀ съ тобо́ю прославлѧ́емъ, зовꙋ́ще є҆мꙋ̀: А҆ллилꙋ́їа.
І҆́косъ в҃і.
Пою́ще мнѡ́гаѧ и҆ пресла̑внаѧ чꙋдеса̀ твоѧ̑ и҆ прославлѧ́юще вели̑кїѧ по́двиги твоѧ̑, ст҃и́телю ѻ҆́тче на́шъ ѳеодо́сїе, со ᲂу҆миле́нїемъ се́рдца сла́вимъ, хва́лимъ и҆ велича́емъ возвели́чившагѡ тѧ̀ гдⷭ҇а, въ тебѣ̀ ꙗ҆́вльшаго на́мъ но́вое зна́менїе своегѡ̀ бл҃говоле́нїѧ къ цр҃кви правосла́внѣй, ꙗ҆́кѡ вѣ́чномꙋ столпꙋ̀ и҆ ᲂу҆твержде́нїю и҆́стины: тебѣ̀ же, ꙗ҆́кѡ те́пломꙋ предста́телю на́шемꙋ пред̾ бг҃омъ, возглаша́емъ сицева̑ѧ:
Ра́дꙋйсѧ, въ вертогра́дѣ гдⷭ҇ни ѿ ᲂу҆́тра до ве́чера жи́зни твоеѧ̀ до́брѣ потрꙋди́выйсѧ: ра́дꙋйсѧ, въ ра́дость гдⷭ҇а своегѡ̀, ꙗ҆́кѡ ра́бъ благі́й и҆ вѣ́рный, вше́дый.
Ра́дꙋйсѧ, житїе́мъ твои́мъ пꙋ́ть въ ѻ҆би́тели нбⷭ҇ныѧ на́мъ показа́вый: ра́дꙋйсѧ, вѣнце́мъ безсме́ртїѧ и҆ сла́вы нбⷭ҇ныѧ ᲂу҆вѣнча́нный.
Ра́дꙋйсѧ, нб҃а цр҃ко́внагѡ ѕвѣздо̀ пресвѣ́тлаѧ: ра́дꙋйсѧ, землѝ рѡссі́йскїѧ похвало̀ пречꙋ́днаѧ.
Ра́дꙋйсѧ, ꙗ҆́кѡ со всѣ́ми ст҃ы́ми въ го́рнихъ ѡ҆бита́еши: ра́дꙋйсѧ, ꙗ҆́кѡ и҆ на́съ грѣ́шныхъ на землѝ любо́вїю посѣща́еши.
Ра́дꙋйсѧ, и҆́мже хрⷭ҇то́съ просла́висѧ: ра́дꙋйсѧ, и҆́мже сатана̀ посрами́сѧ.
Ра́дꙋйсѧ, ᲂу҆го́дниче бж҃їй, ст҃и́телю ѳеодо́сїе, чꙋдотво́рче пресла́вный.
Конда́къ г҃і.
Ѽ, вели́кїй ᲂу҆го́дниче бж҃їй и҆ чꙋдотво́рче, ст҃и́телю ѻ҆́тче на́шъ ѳеодо́сїе! Прїимѝ сїѐ ма́лое моле́нїе на́ше, въ похвалꙋ̀ тебѣ̀, а҆́ще и҆ недосто́йнѣ, ѡ҆ба́че съ любо́вїю сыно́внею приноси́мое, и҆ ᲂу҆молѝ гдⷭ҇а бг҃а и҆зба́витисѧ на́мъ ѿ всѧ́кихъ бѣ́дъ, скорбе́й и҆ напа́стей, ѿ междоꙋсо́бныѧ бра́ни и҆ внеза́пныѧ сме́рти, и҆ ѿ мꙋче́нїй вѣ́чныхъ въ бꙋ́дꙋщемъ вѣ́цѣ, и҆ сподо́битисѧ въ вѣ́чнѣй жи́зни съ тобо́ю воспѣва́ти є҆мꙋ̀: А҆ллилꙋ́їа.
Се́й конда́къ глаго́летсѧ три́жды. Та́же і҆́косъ а҃-й и҆ конда́къ а҃-й.
Мл҃тва.
Ѽ, сщ҃е́ннаѧ главо̀, крѣ́пкїй на́шъ моли́твенниче и҆ застꙋ́пниче, ст҃и́телю ѳеодо́сїе, ᲂу҆слы́ши на́съ, съ вѣ́рою призыва́ющихъ тѧ̀ и҆ ᲂу҆се́рдно припа́дающихъ къ ра́це честны́хъ и҆ многоцѣле́бныхъ моще́й твои́хъ (и҆лѝ: і҆кѡ́нѣ твое́й). Помина́й на́съ ᲂу҆ прⷭ҇то́ла вседержи́телева и҆ не преста́й моли́тисѧ за ны̀. Вѣ́мы, ꙗ҆́кѡ грѣхѝ на́ши разлꙋча́ютъ на́съ междꙋ̀ на́ми и҆ тобо́ю, и҆ недосто́йни є҆смы̀ толи́кагѡ ѻ҆тца̀ и҆ хода́таѧ. Но ты̀, бы́въ подража́тель человѣколю́бїѧ бж҃їѧ, не преста́ни вопїѧ̀ ѡ҆ на́съ ко гдⷭ҇ꙋ, и҆спросѝ предста́тельствомъ твои́мъ ᲂу҆ всеми́лостивѣйшагѡ бг҃а на́шегѡ ми́ръ це́ркви є҆гѡ̀, на землѝ во́инствꙋющей, па́стыремъ є҆ѧ̀ си́лꙋ ре́вностнѡ подвиза́тисѧ ѡ҆ сп҃се́нїи люде́й. Оу҆молѝ нбⷭ҇нагѡ ѻ҆ц҃а̀ всѣ́мъ на́мъ пода́ти да́ръ, коемꙋ́ждо бл҃гопотре́бенъ, вѣ́рꙋ и҆́стиннꙋю, наде́ждꙋ тве́рдꙋю и҆ любо́вь неѡскꙋдѣва́ющꙋю, градѡ́въ на́шихъ ᲂу҆твержде́нїе, мі́ра ᲂу҆мире́нїе, ѿ гла́да и҆ па́гꙋбы и҆збавле́нїе, ѿ наше́ствїѧ и҆ноплеме́нникѡвъ сохране́нїе, ю҆́нымъ и҆ младе́нцємъ бл҃го́е въ вѣ́рѣ возраста́нїе, ста́рымъ и҆ немѡщны́мъ ᲂу҆тѣше́нїе и҆ подкрѣпле́нїе, болѧ́щимъ и҆сцѣле́нїе, сирота́мъ и҆ вдови́цамъ млⷭ҇ть и҆ застꙋпле́нїе, заблꙋ́ждшимъ и҆справле́нїе, бѣ́дствꙋющимъ бл҃говре́меннꙋю по́мощь. Не посрамѝ на́съ въ ᲂу҆пова́нїи на́шемъ, споспѣ́шествꙋй, ꙗ҆́кѡ ѻ҆те́цъ чадолюби́вый, и҆ на́мъ понестѝ и҆́го хрⷭ҇то́во во бл҃годꙋ́шїи и҆ терпѣ́нїи, и҆ всѣ́хъ ᲂу҆пра́ви въ ми́рѣ и҆ покаѧ́нїи непосты́днѡ сконча́ти живо́тъ сво́й и҆ црⷭ҇твїѧ бж҃їѧ наслѣ́дникомъ бы́ти, и҆дѣ́же ты̀ ны́нѣ водворѧ́ешисѧ со а҆́гг҃лы и҆ всѣ́ми ст҃ы́ми, прославлѧ́ѧ бг҃а, въ трⷪ҇цѣ сла́вимагѡ, ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь.