Акафист новомученикам и исповедникам Церкви Русской

И҆збра́ннїи новомч҃нцы и҆ и҆сповѣ̑дницы рѡссі́йстїи, свидѣ́телїе хрⷭ҇тѡ́вы, а҆́гнцы новозакла́ннїи, кро́вїю свое́ю ри̑зы цр҃кве на́шеѧ ᲂу҆краси́вшїи. Вы̀, преще́нїй мꙋчи́телей не ᲂу҆боѧ́вшесѧ, любо́вь къ бг҃ꙋ да́же до сме́рти ꙗ҆ви́ли є҆стѐ и҆ въ жи́зни вѣ́чнѣй къ немꙋ̀ дерзнове́нїе стѧжа́ли є҆стѐ. Тѣ́мже предстоѧ́ще прⷭ҇то́лꙋ вседержи́телѧ, помина́йте на́съ, любо́вїю ва́съ почита́ющихъ и҆ вопїю́щихъ: Ра́дꙋйтесѧ, новомч҃нцы и҆ и҆сповѣ̑дницы рѡссі́йстїи, цр҃кве на́шеѧ похвало̀ и҆ ᲂу҆краше́нїе.

А҆́гг҃лѡвъ творе́цъ и҆ мі́ра зижди́тель ѿ вѣ́ка пред̾избра̀ ва́съ, ꙗ҆́кѡ вѣ̑рныѧ свидѣ́тєли своѧ̑ въ землѝ рѡссі́йстѣй, и҆ въ годи́нꙋ тѧ́жкихъ и҆спыта́нїй бл҃года́ть и҆ си́лꙋ ва́мъ дарова̀. вы̀ же вѣ́рꙋ правосла́внꙋю мі́рꙋ безбо́жномꙋ ꙗ҆ви́вше, тве́рдымъ и҆сповѣ́данїемъ, и҆згна́нїемъ и҆ терпѣ́нїемъ страда́нїй, хрⷭ҇та̀ просла́вили є҆стѐ. Сегѡ̀ ра́ди и҆ мы̀ прославлѧ́емъ ва́съ си́це:

Ви́дѧ ѻ҆те́чество на́ше въ бѣда́хъ и҆ ско́рбехъ сꙋ́щее, ст҃и́телю ѻ҆́тче тѵ́хѡне, бг҃оизбра́нный патрїа́рше землѝ на́шеѧ, призыва́лъ є҆сѝ вѣ̑рнаѧ ча̑да цр҃кве рѡссі́йскїѧ за хрⷭ҇та̀ и҆ вѣ́рꙋ правосла́внꙋю мꙋ́жественнѣ стоѧ́ти. Са́мъ же по всѧ̑ дни̑ ᲂу҆мира́ѧ за па́ствꙋ твою̀, и҆сповѣ́дникъ непоколеби́мый ꙗ҆ви́лсѧ є҆сѝ, воспѣва́ѧ бг҃ꙋ: А҆ллилꙋ́їа.

Ра́зꙋмомъ бжⷭ҇твеннымъ просвѣща́емь, ст҃и́телю ѻ҆́тче тѵ́хѡне, цр҃ковь рꙋ́сскꙋю мꙋ́дрѣ ᲂу҆пра́вилъ є҆сѝ, и҆ безбѡ́жныѧ гони́тєли ѡ҆блича́ѧ, па́ствꙋ твою̀ по́двиги новомч҃нкѡвъ почита́ти призыва́лъ є҆сѝ. Сегѡ̀ ра́ди вопїе́мъ тебѣ̀ си́це:

Си́лою, да́нною ва́мъ свы́ше, стрⷭ҇тоте́рпцы сла́внїи, царю̀ нїко́лае и҆ цари́це а҆леѯа́ндро, царе́вичꙋ а҆леѯі́е и҆ царє́вны ѻ҆́льго, татїа́но, марі́е и҆ а҆настасі́е, лише́нїе ца́рства и҆ сла́вы земны́ѧ со смире́нїемъ воспрїѧ́ли є҆стѐ. Страда́нїемъ же во́льнымъ да́же до сме́рти хрⷭ҇тꙋ̀ послѣ́довали є҆стѐ и҆ за ᲂу҆бива́ющыѧ вы̀ моли́лисѧ є҆стѐ, вопїю́ще бг҃ꙋ: А҆ллилꙋ́їа.

И҆мꙋ́ще вѣ́рꙋ несꙋмнѣ́ннꙋ, ꙗ҆́кѡ всѧ̑ ѿ бг҃а сꙋ́ть, и҆згна́нїе, порꙋга́нїе и҆ темни́чное заточе́нїе мꙋ́жественнѣ претерпѣ́ли є҆стѐ, ца́рственнїи стрⷭ҇тоте́рпцы, и҆ мч҃нческихъ вѣнцє́въ сподо́билисѧ є҆стѐ. Сегѡ̀ ра́ди вопїе́мъ ва́мъ си́це:

Бꙋ́рею гоне́нїй на цр҃ковь рꙋ́сскꙋю ѡ҆бдержи́ми, ст҃и́телїе бж҃їи, вѣ́рою и҆ страда́ньми мч҃нческими бл҃года́ть хрⷭ҇то́вꙋ стѧжа́ли є҆стѐ, и҆ кора́бль цр҃ко́вный неврежде́ннѡ сохрани́вше, подража́тєли пє́рвымъ мч҃нкѡмъ ꙗ҆ви́лисѧ є҆стѐ. Съ ни́ми же на нб҃сѣ́хъ взыва́ете бг҃ꙋ побѣ́днꙋю пѣ́снь: А҆ллилꙋ́їа.

Вѣ́дꙋще гла́съ є҆ѵⷢ҇льскїй, ꙗ҆́кѡ па́стырь до́брый дꙋ́шꙋ свою̀ полага́етъ за ѻ҆́вцы, сщ҃енномч҃нцы до́блїи, любвѐ ра́ди хрⷭ҇то́вы и҆ па́ствы своеѧ̀ и҆згна̑нїѧ, гла́дъ, хла́дъ, зно́й со́лнечный и҆ рабѡ́ты гѡ́рькїѧ претерпѣ́ли є҆стѐ, сме́ртїю мч҃нческою житїѐ своѐ ᲂу҆вѣнча́вше. Сегѡ̀ ра́ди и҆ мы̀ съ любо́вїю прославлѧ́емъ ва́съ си́це:

Бг҃освѣ̑тлыѧ ѕвѣ́зды на нб҃ѣ цр҃ко́внѣмъ ꙗ҆ви́лисѧ є҆стѐ, сщ҃енноисповѣ̑дницы рѡссі́йстїи, и҆ поношє́нїѧ, заточє́нїѧ, и҆згна̑нїѧ и҆ гѡ́рькїѧ рабѡ́ты претерпѣ́вше, гдⷭ҇а і҆и҃са хрⷭ҇та̀ мꙋ́жественнѣ и҆сповѣ́дали є҆стѐ. та́же бл҃гоче́стнѡ въ мі́рѣ пожи́вше, пꙋ́ть ко сп҃се́нїю во тьмѣ̀ безбо́жїѧ ꙗ҆ви́ли є҆стѐ, наꙋча́юще вѣ̑рныѧ при́снѡ бл҃года́рственнѡ пѣ́ти бг҃ꙋ: А҆ллилꙋ́їа.

Ви́дѣвше разоре́нїе землѝ рꙋ́сскїѧ и҆ беззако́нїе ве́лїе, ѡ҆пꙋстоши́вшее ю҆̀, вы̀, сщ҃енноисповѣ̑дницы сла́внїи, стра́ха и҆ сме́рти не ᲂу҆боѧ́лисѧ є҆стѐ, и҆ пѡ́двиги и҆сповѣ́дничества бл҃гоꙋха́юще, ꙗ҆́кѡ крі́ни се́льнїи посредѣ̀ пꙋсты́ни, процвѣлѝ є҆стѐ. Сегѡ̀ ра́ди прославлѧ́емъ ва́съ си́це:

Проповѣ́дꙋетъ цр҃ковь рѡссі́йскаѧ по́двиги ва́шѧ, прпⷣбномч҃нцы достосла́внїи, пѡ́ты трꙋдѡ́въ и҆ кро́вїю мꙋче́нїй зе́млю на́шꙋ ѡ҆ст҃и́вшїи. вы̀ бо слеза́ми покаѧ́нїѧ дꙋ́шы ва́шѧ ѡ҆мы́вше, въ же́ртвꙋ живꙋ́ю, бл҃гопрїѧ́тнꙋю гдⷭ҇еви, себѐ пред̾ꙋгото́вили є҆стѐ. Ны́нѣ же є҆мꙋ̀ дерзнове́ннѡ предстоитѐ и҆ взыва́ете побѣ́днꙋю пѣ́снь: А҆ллилꙋ́їа.

Возсїѧ̀ свѣ́тъ хрⷭ҇то́въ въ сердца́хъ ва́шихъ, прпⷣбномч҃нцы, вы̀ бо ꙗ҆́кѡ во́ини добропобѣ́днїи, мл҃твꙋ во всеѻрꙋ́жїе прїе́мше, вѣ́ры пра́выѧ ника́коже ѿпа́ли є҆стѐ, и҆ ᲂу҆́зы темни̑чныѧ, мꙋчє́нїѧ тѧ̑жкаѧ и҆ рабѡ́ты гѡ́рькїѧ претерпѣ́вше, лю́тꙋю сме́рть ѿ безбо́жныхъ прїѧ́ли є҆стѐ. Сегѡ̀ ра́ди прославлѧ́емъ ва́съ си́це:

Хотѧ́ще во дни̑ гоне́нїй безбо́жныхъ на цр҃ковь рꙋ́сскꙋю, вѣ́рꙋ тве́рдꙋю и҆ любо́вь ко гдⷭ҇ꙋ сохрани́ти, прпⷣбноисповѣ̑дницы чтⷭ҇ні́и, поношє́нїѧ, заточє́нїѧ, и҆згна̑нїѧ и҆ гѡ́рькїѧ рабѡ́ты, хрⷭ҇та̀ ра́ди претерпѣ́ли є҆стѐ. та́же бл҃гоче́стнѡ въ мі́рѣ пожи́вше, мнѡ́гимъ пꙋ́ть ко сп҃се́нїю показа́ли є҆стѐ, наꙋча́юще пѣ́ти бг҃ꙋ побѣ́днꙋю пѣ́снь: А҆ллилꙋ́їа.

Нѡ́выѧ и҆сповѣ́дники показа̀ ва́съ гдⷭ҇ь, прпⷣбнїи ѻ҆тцы̀ на́ши, є҆гда̀ прїи́де и҆спыта́ти лю́ди своѧ̑, ва́съ же, бл҃же́ннїи, ѡ҆брѣ́те рабы̑ бдѧ́щыѧ, смире́нїемъ и҆ добродѣ́тельми ᲂу҆крашє́нныѧ. Сегѡ̀ ра́ди прославлѧ́емъ ва́съ си́це:

Стра́нное чꙋ́до мі́рꙋ ꙗ҆ви́сте, новомч҃нцы рѡссі́йстїи, вы̀ бо, во страда́нїи крѣ́пость показа́вше, си́лою хрⷭ҇то́вою безбѡ́жныѧ ѡ҆долѣ́сте и҆ сме́ртїю ва́шею воскрⷭ҇нїе хрⷭ҇то́во проповѣ́дасте. Ны́нѣ же ᲂу҆ прⷭ҇то́ла бж҃їѧ предстоитѐ и҆ воспѣва́ете побѣ́днꙋю пѣ́снь: А҆ллилꙋ́їа.

Всѧ̑ кра̑снаѧ мі́ра сегѡ̀ презрѣ́вше, ст҃і́и новомч҃нцы рѡссі́йстїи, во слѣ́дъ гдⷭ҇ꙋ крⷭ҇тнымъ пꙋте́мъ послѣ́довали є҆стѐ и҆ по за́повѣди є҆ѵⷢ҇льстѣй мздꙋ̀ мно́гꙋ на нб҃сѣ́хъ ѡ҆брѣлѝ є҆стѐ. Сегѡ̀ ра́ди прїими́те ѿ на́съ похвалы̑ сицевы̑ѧ:

Всѧ́чєскаѧ страда̑нїѧ за хрⷭ҇та̀ претерпѣ́вше, и҆сповѣ̑дницы пресла́внїи, вѣ́рꙋ правосла́внꙋю сохрани́ли є҆стѐ, и҆ терпѣ́нїемъ гони́тєли цр҃кве рꙋ́сскїѧ посрами́вше, бл҃гоче́стїемъ въ мі́рѣ возсїѧ́ли є҆стѐ. Ны́нѣ же прⷭ҇то́лꙋ бж҃їю предстоитѐ и҆ воспѣва́ете хвале́бнꙋю пѣ́снь: А҆ллилꙋ́їа.

Вѣті̑и цр҃ко́внїи недоꙋмѣва́ютъ ка́кѡ воспѣ́ти ва́съ по достоѧ́нїю, но́вїи и҆сповѣ̑дницы цр҃кве рꙋ́сскїѧ, вы̀ бо въ ско́рбехъ, и҆згна́нїихъ и҆ заточе́нїихъ, хрⷭ҇та̀ и҆́стиннаго бг҃а просла́вили є҆стѐ и҆ вѣ̑рнымъ пꙋ́ть ко сп҃се́нїю ᲂу҆каза́ли є҆стѐ. мы̀ же прибѣга́юще къ мл҃твенномꙋ предста́тельствꙋ ва́шемꙋ, дерза́емъ ᲂу҆бл҃жа́ти ва́съ си́це:

Сп҃стѝ хотѧ̀ гдⷭ҇ь мно́жество же́нъ и҆ дѣ́въ, во ѻ҆би́тєли и҆́ночєскїѧ ты̑ѧ призва̀. во дни̑ же гоне́нїй безбо́жныхъ мꙋ́жескꙋю крѣ́пость и҆̀мъ дарова̀, є҆́же за и҆́мѧ своѐ пострада́ти и҆ терпѣ́нїемъ мно́гимъ црⷭ҇твїѧ нбⷭ҇нагѡ дости́гнꙋти, да ꙗ҆́кѡ мꙋ̑дрыѧ дѣ̑вы, въ черто́зѣ бра́чнѣмъ хрⷭ҇тꙋ̀ женихꙋ̀ воспѣва́ютъ пѣ́снь: А҆ллилꙋ́їа.

Стѣна̀ и҆ по́мощь бл҃гонаде́жнаѧ бы́сть бцⷣа ва́мъ, ст҃ы̑ѧ прпⷣбныѧ жєны̀, мч҃нцы и҆ и҆сповѣ̑дницы, въ ско́рбехъ, и҆згна́нїихъ и҆ ᲂу҆́захъ пребыва́ющымъ. вы̀ бо любо́вїю и҆ трꙋды̑ лю́демъ стра́ждꙋщымъ, ꙗ҆́кѡ самомꙋ̀ сн҃ꙋ є҆ѧ̀, послꙋжи́сте. Тѣ́мже съ бл҃годаре́нїемъ ва́съ ᲂу҆бл҃жа́емъ:

Пѣ́нїе всеꙋмиле́нное прино́симъ ва́мъ, новомч҃нцы и҆ и҆сповѣ̑дницы рѡссі́йскїѧ, вы̀ бо бл҃гоче́стнѡ въ зако́нѣ гдⷭ҇ни пожи́вшѧ, вѣ́рꙋ правосла́внꙋю сохрани́ли є҆стѐ, и҆ сме́ртїю мч҃нческою и҆ терпѣ́нїемъ страда́нїй за хрⷭ҇та̀ гони́тєли цр҃кве рꙋ́сскїѧ посрами́ли є҆стѐ. Ны́нѣ же во црⷭ҇твїи нбⷭ҇нѣмъ ликꙋ́ющѧ, воспѣва́ете бг҃ꙋ побѣ́днꙋю пѣ́снь: А҆ллилꙋ́їа.

Свѣ́томъ є҆ѵⷢ҇льскимъ просвѣщє́нныѧ и҆ за́пѡвѣди гдⷭ҇ни сохра́ньшыѧ, ст҃ы̑ѧ жєны̀ и҆ дѣ̑вы, добродѣ́тельное житїѐ во дни̑ гоне́нїй лю́тыхъ страда́нїемъ во́льнымъ ᲂу҆вѣнча́ли є҆стѐ и҆ вои́стиннꙋ нѡ́выѧ мч҃нцы и҆ и҆сповѣ̑дницы ꙗ҆ви́лисѧ є҆стѐ. Сегѡ̀ ра́ди воспѣва́емъ ва́съ си́це:

Бл҃года́тное ᲂу҆твержде́нїе цр҃кве на́шеѧ и҆́мамы ва́съ, новомч҃нцы и҆ и҆сповѣ̑дницы рѡссі́йстїи. вы̀ бо се́рдцемъ вѣ́рꙋюще въ пра́вдꙋ, ᲂу҆сты́ же гдⷭ҇а і҆и҃са хрⷭ҇та̀ во сп҃се́нїе и҆сповѣ́давше, заточє́нїѧ, и҆згна̑нїѧ, гѡ́рькїѧ рабѡ́ты и҆ сме́рть претерпѣ́ли є҆стѐ. Ны́нѣ же моли́тесѧ ко гдⷭ҇ꙋ ѡ҆ на́съ, земны́хъ сро́дницѣхъ ва́шихъ, да при́снѡ съ ва́ми пое́мъ бг҃ꙋ: А҆ллилꙋ́їа.

Пою́ще ва́шꙋ нбⷭ҇нꙋю сла́вꙋ, стрⷭ҇тоте́рпцы хрⷭ҇тѡ́вы, лобыза́емъ ꙗ҆́звы ва́шѧ, вы̀ бо стопа́мъ дре́внихъ мч҃нкъ послѣ́дꙋюще, не ᲂу҆клони́стесѧ ско́рби, ни ᲂу҆боѧ́стесѧ темни́цы, го́рькими рабо́тами, гла́домъ и҆ хла́домъ и҆зморе́ни бы́сте, и҆ многови́дными мꙋ́ками ᲂу҆мерщвлѧ́еми, ꙗ҆́кѡ а҆́гнцы неѕло́бивїи, вѣ́ры ра́ди пострада́сте и҆ сме́рть прїѧ́сте. Тѣ́мже прїими́те ѿ на́съ похвалы̑ сицевы̑ѧ:

Ѽ пресла́внїи новомч҃нцы и҆ и҆сповѣ̑дницы рѡссі́йстїи! Прїими́те ма́лое сїѐ моле́нїе на́ше, въ похвалꙋ̀ ва́мъ ны́нѣ приноси́мое, и҆ моли́тесѧ ко хрⷭ҇тꙋ̀ бг҃ꙋ, да ᲂу҆крѣпи́тъ въ лю́дехъ дꙋ́хъ братолю́бїѧ и҆ бл҃гоче́стїѧ, да ᲂу҆тверди́тъ во ѻ҆те́чествѣ на́шемъ вѣ́рꙋ правосла́внꙋю и҆ сподо́битъ на́съ кꙋ́пнѡ съ ва́ми воспѣва́ти є҆мꙋ̀: А҆ллилꙋ́їа.

А҆́гг҃лѡвъ творе́цъ и҆ мі́ра зижди́тель ѿ вѣ́ка пред̾избра̀ ва́съ, ꙗ҆́кѡ вѣ̑рныѧ свидѣ́тєли своѧ̑ въ землѝ рѡссі́йстѣй, и҆ въ годи́нꙋ тѧ́жкихъ и҆спыта́нїй бл҃года́ть и҆ си́лꙋ ва́мъ дарова̀. вы̀ же вѣ́рꙋ правосла́внꙋю мі́рꙋ безбо́жномꙋ ꙗ҆ви́вше, тве́рдымъ и҆сповѣ́данїемъ, и҆згна́нїемъ и҆ терпѣ́нїемъ страда́нїй, хрⷭ҇та̀ просла́вили є҆стѐ. Сегѡ̀ ра́ди и҆ мы̀ прославлѧ́емъ ва́съ си́це:

И҆збра́ннїи новомч҃нцы и҆ и҆сповѣ̑дницы рѡссі́йстїи, свидѣ́телїе хрⷭ҇тѡ́вы, а҆́гнцы новозакла́ннїи, кро́вїю свое́ю ри̑зы цр҃кве на́шеѧ ᲂу҆краси́вшїи. Вы̀, преще́нїй мꙋчи́телей не ᲂу҆боѧ́вшесѧ, любо́вь къ бг҃ꙋ да́же до сме́рти ꙗ҆ви́ли є҆стѐ и҆ въ жи́зни вѣ́чнѣй къ немꙋ̀ дерзнове́нїе стѧжа́ли є҆стѐ. Тѣ́мже предстоѧ́ще прⷭ҇то́лꙋ вседержи́телѧ, помина́йте на́съ, любо́вїю ва́съ почита́ющихъ и҆ вопїю́щихъ: Ра́дꙋйтесѧ, новомч҃нцы и҆ и҆сповѣ̑дницы рѡссі́йстїи, цр҃кве на́шеѧ похвало̀ и҆ ᲂу҆краше́нїе.

Ѽ ст҃і́и новомч҃нцы и҆ и҆сповѣ̑дницы рѡссі́йстїи: ст҃и́телїе и҆ па́стырїе цр҃кве хрⷭ҇то́вы, ца́рственнїи стрⷭ҇тоте́рпцы, бл҃говѣ́рнїи кн҃зїе и҆ кн҃ги̑ни, до́блїи во́ини, мона́си и҆ мїрсті́и, бл҃гочести́вїи мꙋ́жїе и҆ жєны̀, во всѧ́цѣмъ во́зрастѣ и҆ сосло́вїи за хрⷭ҇та̀ пострада́вшїи, вѣ́рность є҆мꙋ̀ да́же до сме́рти свидѣ́тельствовавшїи и҆ вѣне́цъ жи́зни ѿ негѡ̀ прїе́мшїи! Вы̀ во дни̑ гоне́нїѧ лю́тагѡ, зе́млю на́шꙋ ѿ безбо́жныхъ пости́гшагѡ, на сꙋди́щахъ, въ заточе́нїихъ и҆ про́пастехъ земны́хъ, въ го́рькихъ рабо́тахъ и҆ всѧ́кихъ ско́рбныхъ ѡ҆бстоѧ́нїихъ ѻ҆́бразъ терпѣ́нїѧ и҆ непосты́днагѡ ᲂу҆пова́нїѧ мꙋ́жественнѣ ꙗ҆ви́ли є҆стѐ. Ны́нѣ же въ раѝ сла́дости наслажда́ющесѧ, пред̾ прⷭ҇то́ломъ бж҃їимъ во сла́вѣ предстои́те и҆ при́снѡ хвалꙋ̀ и҆ хода́тайство со а҆́гг҃лы и҆ всѣ́ми ст҃ы́ми трїеди́номꙋ бг҃ꙋ возноси́те. Сегѡ̀ ра́ди мы̀, недо́стойнїи, мо́лимъ ва́съ, ст҃і́и срѡ́дницы на́ши: не забꙋ́дите земна́гѡ ѻ҆те́чества ва́шегѡ, грѣхо́мъ ка́їнова братоꙋбі́йства, порꙋга́нїемъ ст҃ы́нь, безбо́жїемъ и҆ на́шими беззакѡ́нїи ѡ҆тѧгче́ннагѡ. Оу҆моли́те гдⷭ҇а си́лъ, да ᲂу҆тверди́тъ цр҃ковь свою̀ непоколеби́мꙋ въ мі́рѣ се́мъ многомѧте́жнѣмъ и҆ лꙋка́вомъ: да возроди́тъ въ землѝ на́шей дꙋ́хъ братолю́бїѧ и҆ ми́ра: да па́ки бꙋ́демъ мы̀ црⷭ҇кое сщ҃е́нїе, ро́дъ бж҃їй, и҆збра́нный и҆ ст҃ы́й, при́снѡ съ ва́ми сла́вѧщїй ѻ҆ц҃а̀, и҆ сн҃а, и҆ ст҃а́го дх҃а, во вѣ́ки вѣкѡ́въ. А҆ми́нь.