А҆ка́ѳїстъ ст҃о́мꙋ а҆́гг҃лꙋ храни́телю.
Конда́къ а҃.
И҆збра́нный ѿ гдⷭ҇а бг҃а на хране́нїе дꙋшѝ моеѧ̀ и҆ тѣлесѐ, ст҃ы́й а҆́гг҃ле, похва̑льнаѧ тѝ воспѣва́ти дерза́ю, недосто́йный ра́бъ тво́й: ты́ же, ꙗ҆́кѡ и҆мѣ́ѧй дерзнове́нїе къ цр҃ю̀ нбⷭ҇номꙋ, ѿ всѧ́кихъ мѧ̀ бѣ́дъ и҆ скорбе́й, ѿ вра̑гъ ви́димыхъ же и҆ неви́димыхъ защитѝ, зовꙋ́ща:
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
І҆́косъ а҃.
А҆́гг҃ле ст҃ы́й, по́сланный съ нб҃сѐ, во є҆́же храни́ти мѧ̀ и҆ рꙋководи́ти во все́й жи́зни мое́й, припа́даѧ молю́ ти сѧ са́мъ наста́ви и҆ вразꙋмѝ мѧ̀, начина́юща ѿ серде́чныѧ любвѐ и҆ ᲂу҆се́рдїѧ возглаша́ти пѣ́снєнныѧ тѝ хвалы̑:
Ра́дꙋйсѧ а҆́гг҃ле бж҃їй, предста́телю мо́й ᲂу҆ прест҃ы́ѧ трⷪ҇цы: ра́дꙋйсѧ, цр҃ѧ̀ ца́рствꙋющихъ безпло́тный во́ине.
Ра́дꙋйсѧ гдⷭ҇а госпо́дствꙋющихъ нбⷭ҇ный слꙋго̀: ра́дꙋйсѧ, ᲂу҆́мныхъ и҆ невеще́ственныхъ слꙋ́гъ є҆гѡ̀ сожи́телю.
Ра́дꙋйсѧ творѧ́й при́снѡ во́лю влⷣки своегѡ̀: ра́дꙋйсѧ, прїе́мый ѿ бг҃а повелѣ́нїе и҆ вла́сть храни́ти дꙋ́шꙋ мою̀.
Ра́дꙋйсѧ, никогда́же ѿлꙋча́ѧйсѧ менє̀, грѣ́шнагѡ: ра́дꙋйсѧ, вы́нꙋ спребыва́ѧй мѝ, недосто́йномꙋ.
Ра́дꙋйсѧ, соблюда́ѧй мѧ̀ на всѣ́хъ пꙋте́хъ мои́хъ: ра́дꙋйсѧ, сохранѧ́ѧй мѧ̀ ѿ всѧ́кагѡ ѕла̀.
Ра́дꙋйсѧ, ѿ бг҃а да́нный мѝ рꙋководи́телю на пꙋте́хъ житїѧ̀ моегѡ̀: ра́дꙋйсѧ, бл҃гі́й мо́й наста́вниче.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ в҃.
Ви́дѣвъ человѣколюби́вый гдⷭ҇ь, ꙗ҆́кѡ, по прегрѣше́нїи пра́ѻтца на́шегѡ а҆да́ма, всѝ человѣ́цы ᲂу҆до́бь прекло́нни сꙋ́ть ко грѣхꙋ̀, по свое́й неизрече́нной млⷭ҇ти посла́лъ є҆́сть во всю̀ зе́млю ст҃ы́хъ а҆́гг҃лѡвъ и҆ коемꙋ́ждо ѿ человѣ̑къ приста́ви храни́телѧ. и҆сполнѧ́юще ᲂу҆́бѡ повелѣ́нїе влⷣки своегѡ̀, ст҃і́и а҆́гг҃ли всегда̀ гото́ви сꙋ́ть помога́ти на́мъ, бг҃оꙋго́днѡ пою́щымъ: А҆ллилꙋ́їа.
І҆́косъ в҃.
Ра́зꙋмꙋ моемꙋ̀ просвѣще́нїе свы́ше и҆схода́тайствꙋй, ст҃ы́й а҆́гг҃ле, да возмогꙋ̀ позна́ти, что̀ є҆́сть во́лѧ бж҃їѧ бл҃га́ѧ и҆ ᲂу҆го́днаѧ и҆ соверше́ннаѧ, и҆ се́рдце моѐ напра́ви, є҆́же со ᲂу҆се́рдїемъ твори́ти ю҆̀, тебе́ же, храни́телѧ моего̀ да не преста́нꙋ восхвалѧ́ти сицевы́ми гла̑сы:
Ра́дꙋйсѧ, воспламенѧ́ѧй се́рдце моѐ любо́вїю къ бг҃ꙋ, созда́телю моемꙋ̀: ра́дꙋйсѧ, возбꙋжда́ѧй мѧ̀ на всѧ́къ де́нь же и҆ ча́съ приноси́ти є҆мꙋ̀ мл҃твы, прошє́нїѧ и҆ бл҃годарє́нїѧ.
Ра́дꙋйсѧ, ꙗ҆́кѡже стра́жемъ вѣ́рнымъ, стра́хомъ гдⷭ҇нимъ дꙋше́вный мо́й до́мъ ѡ҆гражда́ѧй: ра́дꙋйсѧ, всѧ̑ помышлє́нїѧ моѧ̑ къ распѧ́томꙋ за грѣхѝ мі́ра сп҃си́телю ᲂу҆стремлѧ́ѧй.
Ра́дꙋйсѧ, страда̑нїѧ є҆гѡ̀ и҆ кре́стнꙋю сме́рть въ па́мѧть мою̀ вперѧ́ѧй: ра́дꙋйсѧ, воспомина́нїемъ страсте́й гдⷭ҇нихъ блюсти́сѧ ѿ грѣхѡ́въ мѧ̀ поꙋча́ѧй.
Ра́дꙋйсѧ, бл҃года́тнагѡ свы́ше ѡ҆сѣне́нїѧ ст҃а́гѡ дх҃а проси́ти мѧ̀ наставлѧ́ѧй: ра́дꙋйсѧ, ꙗ҆́кѡ на крѡ́ткїѧ то́чїю и҆ смирє́нныѧ се́рдцемъ ми́лостивнѡ призира́ти є҆мꙋ̀, ᲂу҆тѣ́шителю, ᲂу҆вѣрѧ́ѧй мѧ̀.
Ра́дꙋйсѧ мы́слею ѡ҆ вездесꙋ́щїи бж҃їи всю́дꙋ ѡ҆крꙋжа́ѧй мѧ̀: ра́дꙋйсѧ, всевѣ́денїе є҆гѡ̀ ᲂу҆́мнымъ ѻ҆чесє́мъ мои̑мъ представлѧ́ѧй.
Ра́дꙋйсѧ, млⷭ҇рдїемъ є҆гѡ̀ къ ка́ющымсѧ грѣ́шникѡмъ се́рдце моѐ ᲂу҆тѣша́ѧй: ра́дꙋйсѧ, правосꙋ́дїемъ є҆гѡ̀ къ ѡ҆жестѡчє́ннымъ и҆ нераска̑ѧннымъ дꙋ́шꙋ мою̀ ᲂу҆страша́ѧй.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ г҃.
Си́лꙋ бжⷭ҇твенныѧ блгⷣти и҆спросѝ мѝ, храни́телю мо́й а҆́гг҃ле, во є҆́же неꙋкло́ннѡ и҆ непреткнове́ннѡ ходи́ти мѝ сп҃си́тельнымъ пꙋте́мъ хрⷭ҇то́выхъ за́повѣдей, се́рдцемъ же и҆ ᲂу҆сты̑ непреста́ннѡ сла́вити всест҃о́е и҆́мѧ бг҃а на́шегѡ и҆ пѣ́ти є҆мꙋ̀: А҆ллилꙋ́їа.
І҆́косъ г҃.
И҆́мамъ тѧ̀, бг҃оизбра́нный покрови́телю мо́й, ꙗ҆́коже свѣ́тлꙋю зарю̀, просвѣща́ющꙋю дꙋшѝ моеѧ̀ темнотꙋ̀ и҆ разгонѧ́ющꙋю мра́къ серде́чнагѡ невѣ́дѣнїѧ моегѡ̀: сегѡ̀ ра́ди, со ᲂу҆миле́нїемъ припа́даѧ, молю́ ти сѧ, да и҆ всѧ̑ моѧ̑ чꙋ́вствїѧ, потемнє́ннаѧ страстьмѝ, ѡ҆чи́стѧтсѧ, во є҆́же не блꙋжда́ти мѝ во тмѣ̀ грѣхо́внѣй. пречꙋ́днꙋю же свѣ́тлость твою̀ воспѣва́ю си́це:
Ра́дꙋйсѧ, ѕвѣздо̀ невече́рнѧгѡ свѣ́та, ѿ трисїѧ́ннагѡ бжⷭ҇тва̀ возсїѧ́вшаѧ и҆ менѐ вы́нꙋ ѡ҆зарѧ́ющаѧ: ра́дꙋйсѧ, пресвѣ́тлаѧ лꙋчѐ, помрачє́ннаѧ грѣхмѝ сердє́чнаѧ мѝ ѻ҆чеса̀ ѡ҆сїѧва́ющаѧ.
Ра́дꙋйсѧ, ꙗ҆́кѡ тщи́шисѧ напра́вити мѧ̀ на и҆́стинный пꙋ́ть во тмѣ̀ беззако́нїй заблꙋжда́ющаго: ра́дꙋйсѧ, ꙗ҆́кѡ предлага́еши мѝ за́пѡвѣди гдⷭ҇ни, а҆́ки зерца́ло длѧ всеѧ̀ жи́зни моеѧ̀.
Ра́дꙋйсѧ, ꙗ҆́кѡ поставлѧ́еши мѝ зако́нъ бж҃їй, а҆́ки свѣти́льникъ нога́ма мои́ма и҆ свѣ́тъ стезѧ́мъ мои̑мъ: ра́дꙋйсѧ, ꙗ҆́кѡ слове́съ є҆ѵⷢ҇лїа хрⷭ҇то́ва въ сла́дость послꙋ́шати поꙋча́еши мѧ̀.
Ра́дꙋйсѧ, ꙗ҆́кѡ ᲂу҆че́нїю бжⷭ҇твеннагѡ ᲂу҆чи́телѧ моегѡ̀ и҆ гдⷭ҇а несꙋмнѣ́ннѡ вѣ́ровати побꙋжда́еши мѧ̀: ра́дꙋйсѧ, ꙗ҆́кѡ въ повинове́нїи ᲂу҆ста́вѡмъ ст҃ы́ѧ цр҃кве ᲂу҆крѣплѧ́еши мѧ̀.
Ра́дꙋйсѧ, ꙗ҆́кѡ пра́вилѡмъ и҆ преда́нїємъ ст҃ы́хъ а҆пⷭ҇лъ и҆ ѻ҆тє́цъ покарѧ́тисѧ наставлѧ́еши мѧ̀: ра́дꙋйсѧ, ꙗ҆́кѡ во и҆сповѣ́данїи ст҃ы́ѧ и҆ правосла́вныѧ вѣ́ры ᲂу҆твержда́еши мѧ̀.
Ра́дꙋйсѧ, ꙗ҆́кѡ за сїѐ и҆сповѣ́данїе и҆ на сме́рть гото́ва мѧ̀ бы́ти ᲂу҆бѣжда́еши: ра́дꙋйсѧ, ꙗ҆́кѡ є҆ретїкѡ́мъ и҆ ѿстꙋ́пникѡмъ и҆́стинныѧ цр҃кве соѡбща́тисѧ возбранѧ́еши мѝ.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ д҃.
Бꙋ́рѧ жите́йскагѡ мо́рѧ сокрꙋша́етъ дꙋхо́вный мо́й кора́бль волна́ми мїрски́хъ попече́нїй, и҆ ми́ръ ᲂу҆бо́гїѧ дꙋшѝ моеѧ̀ мѧте́тсѧ, и҆ гдѣ̀ ѡ҆брѧ́щꙋ ти́хое приста́нище сп҃се́нїѧ; то́кмѡ на тѧ̀ по бз҃ѣ возлага́ю наде́ждꙋ, храни́телю мо́й а҆́гг҃ле, ꙗ҆́кѡ премꙋ́драго тѧ̀ ко́рмчаго въ мы́сленныхъ бꙋ́рѧхъ, смꙋща́ющихъ мѧ̀, стѧжа́хъ, бл҃года́рственнѣ ᲂу҆́бѡ пою̀ бг҃ꙋ моемꙋ̀: А҆ллилꙋ́їа.
І҆́косъ д҃.
Слы́шаще и҆ зрѧ́ще тѧ̀, бжⷭ҇твенный а҆́гг҃ле, крѣ́пкаго моего̀ блюсти́телѧ, ѕло́бнїи дꙋ́си поднебе́снїи не смѣ́ютъ прибли́житисѧ ко твое́й пречи́стѣй свѣ́тлости и҆ дꙋшегꙋби́тєльныѧ мѝ па́кѡсти дѣ́ѧти. сегѡ̀ ра́ди смире́ннѡ молю̀ тѧ̀, не ѿстꙋпѝ ѿ менє̀ за невоздержа́нїе моѐ, но при́снѡ ѿ лꙋка́вагѡ тѣ́хъ лови́тельства и҆ ко́зней соблюда́й мѧ̀, со ᲂу҆миле́нїемъ глаго́люща:
Ра́дꙋйсѧ, крѣ́пкимъ кро́вомъ кри́лъ твои́хъ ѡ҆сѣнѧ́ѧй мѧ̀ и҆ покрыва́ѧй: ра́дꙋйсѧ, ѡ҆́крестъ менє̀ съ пла́меннымъ мече́мъ при́снѡ ѡ҆полча́ѧйсѧ.
Ра́дꙋйсѧ, проти́вꙋ кнѧ́зѧ тмы̀ во бра́ни мѝ посо́бствꙋѧй: ра́дꙋйсѧ, лꙋка́выхъ є҆гѡ̀ слꙋжи́телей побѣжда́ти мѝ помога́ѧй.
Ра́дꙋйсѧ, ѿгонѧ́ѧй ѿ менє̀ дꙋшепа̑гꙋбныѧ де́мѡны, а҆́ки хи̑щныѧ пти̑цы: ра́дꙋйсѧ, вразꙋмлѧ́ѧй мѧ̀ бѣсѡ́вскїѧ кѡ́зни позна́ти, а҆́ки лꙋка̑выѧ лиси̑цы.
Ра́дꙋйсѧ, ѕвѣроѡбра́знаѧ тѣ́хъ на ᲂу҆́мъ и҆ се́рдце моѐ нападє́нїѧ ѿрѣва́ѧй: ра́дꙋйсѧ, порожде́нїѧ и҆́хъ, го́рдость и҆ не́нависть, и҆з̾ се́рдца моегѡ̀ и҆сторга́ѧй.
Ра́дꙋйсѧ, за́висть и҆ ѕлопомнѣ́нїе ѿ мы́слей мои́хъ прогонѧ́ѧй: ра́дꙋйсѧ, во ѿраже́нїе ѕлы́хъ по́мыслѡвъ кре́стнымъ зна́менїемъ себє̀ ѡ҆гражда́ти побꙋжда́ѧй мѧ̀.
Ра́дꙋйсѧ, на а҆́спїда и҆ васїлі́ска небоѧ́зненнѡ настꙋпа́ти ᲂу҆крѣплѧ́ѧй мѧ̀: ра́дꙋйсѧ, и҆мѣ́ѧй непобѣди́мое ѡ҆рꙋ́жїе проти́вꙋ всѣ́хъ врагѡ́въ мои́хъ.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ є҃.
Бг҃оте́чнѣй и҆ лꙋчеза́рнѣй ѕвѣздѣ̀, пꙋтеводи́вшей дре́влѣ вѡлхвы̀ на поклоне́нїе ро́ждшемꙋсѧ въ виѳлее́мѣ сп҃си́телю мі́ра, дерза́ю ᲂу҆подо́бити тѧ̀, бл҃гі́й мо́й храни́телю: неѿлꙋ́чнымъ бо и҆ свѣтоно́снымъ твои́мъ мѝ спребыва́нїемъ ᲂу҆казꙋ́еши мѝ пра́вый пꙋ́ть, ведꙋ́щїй въ го́рнїй виѳлее́мъ, въ нбⷭ҇ное црⷭ҇твїе, да та́мѡ съ ли̑ки а҆рха̑гг҃лъ и҆ а҆́гг҃лъ сподо́блюсѧ воспѣва́ти превѣ́чномꙋ цр҃ю̀ сла́вы: А҆ллилꙋ́їа.
І҆́косъ є҃.
Ви́дѧ мѧ̀ но́щїю содержи́ма мра́чною и҆ те́мнымъ ѡ҆́блакомъ страсте́й покрыва́ема, ст҃ы́й храни́телю дꙋшѝ моеѧ̀, не ѡ҆горчи́сѧ, не ѡ҆ста́ви менє̀, но подража́ѧй долготерпѣ́нїю сп҃си́телѧ моегѡ̀, пождѝ є҆щѐ, возбꙋжда́ѧ мѧ̀ къ покаѧ́нїю, до́ндеже ѻ҆чеса̀ моѧ̑ и҆злїю́тъ и҆сто́чники слє́зъ на ѡ҆мы́тїе дꙋше́вныѧ нечистоты̀ моеѧ̀. ѡ҆ се́мъ смире́ннѡ молю̀ тѧ̀ и҆ глаго́лю:
Ра́дꙋйсѧ, ꙗ҆́кѡ вы́нꙋ прино́сиши бг҃ꙋ ѡ҆ мнѣ̀ грѣ́шнѣмъ моли̑твы своѧ̑, ꙗ҆́кѡ кади́ло пред̾ ни́мъ благово́нное: ра́дꙋйсѧ, ꙗ҆́кѡ при́снѡ хода́тайствꙋеши пред̾ созда́телемъ мои́мъ ѡ҆ є҆́же сп҃сти́сѧ мѝ.
Ра́дꙋйсѧ, ꙗ҆́кѡ првⷣный гнѣ́въ є҆гѡ̀, дви́жимый на мѧ̀, свои́мъ предста́тельствомъ ѿвраща́еши: ра́дꙋйсѧ, ꙗ҆́кѡ про́сиши всемлⷭ҇рдаго гдⷭ҇а пода́ти проще́нїе ѕлы́хъ мои́хъ дѣѧ́нїй.
Ра́дꙋйсѧ, ꙗ҆́кѡ ᲂу҆милостивлѧ́еши є҆гѡ̀ бла́гость, да не погꙋби́тъ мѧ̀ со беззако́ньми мои́ми: ра́дꙋйсѧ, ꙗ҆́кѡ непреста́ннѡ мо́лишисѧ и҆скꙋпи́телю моемꙋ̀, да да́рꙋетъ мѝ вре́мѧ ко и҆справле́нїю.
Ра́дꙋйсѧ, ꙗ҆́кѡ возбꙋжда́еши мѧ̀ въ покаѧ́нїи препроводи́ти всѧ̑ дни̑ живота̀ моегѡ̀: ра́дꙋйсѧ, ꙗ҆́кѡ внꙋша́еши мѝ жела́нїе, да вы́нꙋ ка́юсѧ пред̾ гдⷭ҇емъ во всѣ́хъ мои́хъ прегрѣше́нїѧхъ.
Ра́дꙋйсѧ, ꙗ҆́кѡ вразꙋмлѧ́еши мѧ̀ на всѧ́кое вре́мѧ мы́сленнѡ себє̀ и҆спы́товати и҆ во грѣсѣ́хъ мои́хъ и҆сповѣ́доватисѧ: ра́дꙋйсѧ, ꙗ҆́кѡ влага́еши въ се́рдце моѐ сокрꙋше́нїе и҆ ско́рбь, занѐ прогнѣ́вахъ пребл҃га́го бг҃а моего̀.
Ра́дꙋйсѧ, ꙗ҆́кѡ побꙋжда́еши мѧ̀ ѡ҆пла́кивати ѡ҆каѧ́нное и҆ скве́рное житїѐ моѐ: ра́дꙋйсѧ, свѣтоно́сный и҆ неꙋмолка́ющїй хода́таю сп҃се́нїѧ моегѡ̀.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ ѕ҃.
Проповѣ́дꙋю велегла́снѡ при́сное твоѐ, храни́телю мо́й а҆́гг҃ле, ѡ҆ мнѣ̀, грѣ́шнѣмъ, попече́нїе: въ ско́рбѣхъ бо и҆ напа́стѣхъ, ꙗ҆́же въ се́мъ многомѧте́жнѣмъ мі́рѣ смꙋща́етъ ми́ръ дꙋшѝ моеѧ̀, ꙗ҆влѧ́еши мѝ сѧ̀ ско́рый ᲂу҆тѣ́шитель, вразꙋмлѧ́ѧ мѧ̀ ꙗ҆́кѡ всѧ̑ сїѧ̑ низпосыла́ютсѧ ѿ премꙋ́драгѡ созда́телѧ, а҆́ки врачевство̀ проти́вꙋ дꙋше́вныхъ недꙋ́гѡвъ мои́хъ, и҆ поꙋча́ѧ бл҃годѣ́ющемꙋ си́це нбⷭ҇номꙋ врачꙋ̀ воспѣва́ти: А҆ллилꙋ́їа.
І҆́косъ ѕ҃.
Возсїѧва́етъ въ дꙋшѝ мое́й, ѡ҆мрача́емой ско́рбїю и҆ ᲂу҆ны́нїемъ, свѣ́тъ бл҃года́тнагѡ ᲂу҆тѣше́нїѧ, и҆ се́рдце моѐ и҆сполнѧ́етсѧ весе́лїѧ и҆ ра́дости, є҆гда̀ непреста́нными твои́ми, ст҃ы́й а҆́гг҃ле, наставлє́нїи возбꙋжда́емь, дерза́ю ꙗ҆́кѡ мыта́рь, вопи́ти къ ще́дромꙋ бг҃ꙋ, да ми́лостивъ бꙋ́детъ и҆ прости́тъ мѝ прегрѣшє́нїѧ моѧ̑. не премолчѝ ᲂу҆̀бо, наста́вниче мо́й, вразꙋмлѧ́ѧ и҆ ᲂу҆крѣплѧ́ѧ мѧ̀, зовꙋ́ща тѝ:
Ра́дꙋйсѧ, помога́ѧй мѝ бл҃гі́й ꙗ҆ре́мъ сп҃си́тельнагѡ терпѣ́нїѧ съ любо́вїю носи́ти: ра́дꙋйсѧ, въ бѣда́хъ и҆ ѕлоключе́нїихъ ᲂу҆пова́нїемъ на гдⷭ҇а бг҃а ᲂу҆крѣплѧ́ѧй мѧ̀.
Ра́дꙋйсѧ, скѡ́рби и҆ болѣ̑зни мꙋ́жественнѣ преѡдолѣва́ти мѧ̀ поꙋча́ѧй: ра́дꙋйсѧ, всѧ́кꙋю печа́ль и҆ ᲂу҆ны́нїе ѿ се́рдца моегѡ̀ ѿгонѧ́ѧй.
Ра́дꙋйсѧ, проти́вꙋ врага̀, въ сѣ́ть ѿча́ѧнїѧ ᲂу҆лови́ти мѧ̀ хотѧ́ща, бра́тисѧ побꙋжда́ѧй мѧ̀: ра́дꙋйсѧ, словесе́мъ а҆пⷭ҇ла, ꙗ҆́кѡ всѝ хотѧ́щїи бл҃гоче́стнѡ жи́ти гони́ми бꙋ́дꙋтъ, вѣ́ровати ᲂу҆бѣжда́ѧй мѧ̀.
Ра́дꙋйсѧ, ѡ҆́бразъ терпѣ́нїѧ и҆ ѕлострада́нїѧ прїѧ́ти мѝ прⷪ҇ро́ки и҆ а҆пⷭ҇лы внꙋша́ѧй: ра́дꙋйсѧ, на ли́къ мч҃нкъ и҆ и҆сповѣ̑дникъ, за хрⷭ҇та̀ до и҆злїѧ́нїѧ кро́ве своеѧ̀ подвиза́вшихсѧ, во ᲂу҆тѣше́нїе мѝ показꙋ́ѧй.
Ра́дꙋйсѧ, страда́нїѧ сама́гѡ сп҃си́телѧ и҆ гдⷭ҇а вы́нꙋ ᲂу҆́мнымъ ѻ҆чесе́мъ мои́мъ представлѧ́ѧй: ра́дꙋйсѧ, наде́ждою бꙋ́дꙋщагѡ воздаѧ́нїѧ се́рдце моѐ ᲂу҆слажда́ѧй.
Ра́дꙋйсѧ, всера́достнымъ ѡ҆жида́нїемъ вѣ́чныхъ бл҃гъ дꙋ́шꙋ мою̀ ѡ҆живлѧ́ѧй: ра́дꙋйсѧ, бл҃гі́й и҆ при́сный мо́й ᲂу҆тѣ́шителю.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ з҃.
Хотѧ́й всѣ̑мъ человѣ́кѡмъ сп҃сти́сѧ, премилосе́рдый созда́тель мо́й посла̀ тѧ̀, а҆́гг҃ла своего̀, ꙗ҆́кѡ вѣ́рна мѝ стра́жа и҆ пѣ́стꙋна до́бра во всѣ́мъ житїѝ мое́мъ, да всю́дꙋ вспомоществꙋ́еши мѝ ст҃ы́ми твои́ми вдохновє́нїи, защища́еши проти́вꙋ ко́зней дїа́вола и҆ предꙋготовлѧ́еши мѧ̀ дѣ̑лы благи́ми вни́ти съ мꙋ́дрыми дѣ́вами въ нбⷭ҇ный черто́гъ, съ бг҃окра́сною пѣ́снїю: А҆ллилꙋ́їа.
І҆́косъ з҃.
Но́вꙋю показꙋ́етъ бл҃гость гдⷭ҇ь и҆ влⷣка мо́й на мнѣ̀ непотре́бнѣмъ и҆ па́че всѣ́хъ грѣ́шнѣйшемъ рабѣ̀ свое́мъ: презира́ѧ бо лю̑таѧ моѧ̑ и҆ тѧ̑жкаѧ, не погꙋби́лъ мѧ́ є҆сть со беззако́ньми мои́ми да́же до настоѧ́щагѡ днѐ и҆ часа̀, но долготерпѧ̀ на мнѣ̀, ми́лостивнѣ ѡ҆жида́етъ моего̀ ѡ҆браще́нїѧ и҆ серде́чнагѡ покаѧ́нїѧ. вѣ́рꙋю, бл҃гі́й храни́телю мо́й, ꙗ҆́кѡ твои́мъ при́снымъ пред̾ бг҃омъ за мѧ̀ хода́тайствомъ досе́лѣ храни́мь є҆́смь: тѣ́мже, любо́вїю къ тебѣ̀ подвиза́емый, взыва́ю:
Ра́дꙋйсѧ, ꙗ҆́кѡ ѡ҆бꙋрева́ющасѧ мѧ̀ въ мо́ри житїѧ̀ сегѡ̀ ѿ коне́чнагѡ потопле́нїѧ соблюда́еши: ра́дꙋйсѧ, ꙗ҆́кѡ и҆з̾ ро́ва беззако́нїй мои́хъ рꙋко́ю твоеѧ̀ по́мощи мѧ̀ и҆схища́еши.
Ра́дꙋйсѧ, ꙗ҆́кѡ грѣхо́вный со́нъ дꙋшевре́дныѧ моеѧ̀ лѣ́ности ѿрѧса́еши: ра́дꙋйсѧ, ꙗ҆́кѡ ᲂу҆́мъ мо́й, ѡ҆мраче́нный небреже́нїемъ, свѣ́тлымъ твои́мъ присꙋ́тствїемъ ѡ҆зарѧ́еши.
Ра́дꙋйсѧ, ꙗ҆́кѡ хла́дное и҆ ма́лѡ не ᲂу҆га́сшее се́рдце моѐ мл҃твами воспламенѧ́ти мѝ помога́еши: ра́дꙋйсѧ, ꙗ҆́кѡ на славосло́вїе бж҃їе при́снѡ мѧ̀ возставлѧ́еши.
Ра́дꙋйсѧ, ꙗ҆́кѡ настроѧ́еши гла́съ мо́й къ пѣснопѣ́нїѧмъ, и҆́миже досто́йнѡ и҆ пра́веднѡ є҆́сть хвали́ти творца̀ всѧ́ческихъ: ра́дꙋйсѧ, ꙗ҆́кѡ поꙋча́еши мѧ̀ прославлѧ́ти гдⷭ҇а моегѡ̀ не ᲂу҆сты̀ то́чїю, но и҆ се́рдцемъ.
Ра́дꙋйсѧ, ꙗ҆́кѡ ко и҆сполне́нїю прест҃ы́ѧ во́ли є҆гѡ̀ возбꙋжда́еши мѧ̀: ра́дꙋйсѧ, ꙗ҆́кѡ самоѿверже́нїю и҆ ѿрече́нїю моеѧ̀ ѕлы́ѧ во́ли приѡбꙋчи́ти мѧ̀ тщи́шисѧ.
Ра́дꙋйсѧ, ꙗ҆́кѡ голꙋби́нꙋ простотꙋ̀ и҆ а҆́гнчꙋ кро́тость стѧжа́ти мѝ преи́скреннѣ жела́еши: ра́дꙋйсѧ, ꙗ҆́кѡ ѡ҆ є҆́же младе́нческомꙋ неѕло́бїю и҆ ста́рческомꙋ доброразсꙋжде́нїю дарова́тисѧ мѝ хода́тайствꙋеши.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ и҃.
Стра́ненъ и҆ пришле́цъ є҆́смь на землѝ се́й: житїѐ моѐ сꙋ́етнѡ и҆ маловре́меннѡ є҆́сть: а҆́зъ же, ѡ҆каѧ́нный, сме́рти безвѣ́стное во ᲂу҆́мъ никогда́же прїе́млю, ни помышлѧ́ю ѡ҆ стра́шнѣмъ сꙋди́щи, въ не́мже и҆́мамъ првⷣномꙋ сꙋдїѝ предста́ти и҆ да́ти ѿвѣ́тъ ѡ҆ всѧ́комъ дѣ́лѣ же и҆ сло́вѣ. Тѣ́мже молю̀ тѧ̀, дꙋшѝ моеѧ̀ храни́телѧ, возбꙋдѝ мѧ̀ ско́ро ѿ сна̀ грѣхо́внагѡ, да не пости́гнетъ мѧ̀ ча́съ сме́рти неиспра́вленна и҆ да сподо́блюсѧ и҆спроси́ти ѿ всеми́лостивагѡ бг҃а беззако́нїємъ мои́мъ проще́нїе и҆ во гла́сѣ ра́дованїѧ воспѣва́ти є҆мꙋ̀: А҆ллилꙋ́їа.
І҆́косъ и҃.
Всѣ́хъ гдⷭ҇ь и҆ созда́тель мо́й, є҆гда̀ назна́менꙋетъ мѝ преста́витисѧ ѿ житїѧ̀ сегѡ̀, ты̀, бл҃гі́й храни́телю мо́й, прови́дѧй грѡ́зныѧ мꙋ́ки, дꙋховѡ́мъ ѕло́бы и҆ нераска́ѧннымъ грѣ́шникѡмъ ᲂу҆гото́ванныѧ и҆ менє̀ ѡ҆жида́ющыѧ, покры́й мѧ̀ твоегѡ̀ милосе́рдїѧ крила́ми, ꙗ҆́коже ѻ҆ре́лъ птенцы̀ своѧ̑, и҆ внегда̀ и҆счеза́ти ѿ менє̀ дꙋ́хꙋ моемꙋ̀, да ᲂу҆́зрю тѧ̀ бли́з̾ менє̀ предстоѧ́ща и҆ лю́тыѧ врагѝ ѿгонѧ́юща. Ѡ҆ се́мъ со ᲂу҆миле́нїемъ молю́ ти сѧ, вѣща́ѧ си́це:
Ра́дꙋйсѧ, ᲂу҆́мнымъ ѻ҆чесє́мъ мои́мъ го́рькїй и҆ стра́шный ча́съ сме́ртный представлѧ́ѧй: ра́дꙋйсѧ, ꙗ҆́кѡ неизбѣ́женъ, вкꙋ́пѣ же и҆ безвѣ́стенъ ча́съ то́й при́снѡ мѝ напомина́ѧй.
Ра́дꙋйсѧ, на кі́йждо де́нь, а҆́ки ᲂу҆жѐ на послѣ́днїй житїѧ̀ моегѡ̀ взира́ти мѧ̀ поꙋча́ѧй: ра́дꙋйсѧ, на всѧ́кое вре́мѧ ко и҆схо́дꙋ во и҆́нъ мі́ръ мѧ̀ прїꙋготовлѧ́ѧй.
Ра́дꙋйсѧ, дꙋше́вное ᲂу҆миле́нїе и҆ серде́чное сокрꙋше́нїе во мнѣ̀ рожда́ѧй: ра́дꙋйсѧ, вы́нꙋ жела́ѧй мѝ, да понѐ при кончи́нѣ дне́й мои́хъ пока́юсѧ.
Ра́дꙋйсѧ, люби́ти мі́ръ и҆ ꙗ҆́же въ мі́рѣ мѝ воспреща́ѧй: ра́дꙋйсѧ, пристра́стїе къ тлѣ́нномꙋ бога́тствꙋ и҆з̾ се́рдца моегѡ̀ и҆скоренѧ́ти помога́ѧй.
Ра́дꙋйсѧ, всѧ̑ бл҃га зємна́ѧ бы́ти привре́менна и҆ скоропреходѧ́ща мѝ показꙋ́ѧй: ра́дꙋйсѧ, ꙗ҆́кѡ всѧ̑ кра̑снаѧ мі́ра сегѡ̀ крі́нꙋ сѣ́льномꙋ подо́бна сꙋ́ть, вразꙋмлѧ́ѧй мѧ̀.
Ра́дꙋйсѧ, сла́вы чл҃вѣ́чи, а҆́ки тѣ́ни преходѧ́щїѧ, и҆ска́ти возбранѧ́ѧй мѝ: ра́дꙋйсѧ, ѿ є҆ди́наго бг҃а сла́вы нетле́нныѧ въ бꙋ́дꙋщемъ вѣ́цѣ взыска́ти побꙋжда́ѧй мѧ̀.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ ѳ҃.
Всѧ́къ грѣ́хъ содѣ́ѧхъ въ житїѝ се́мъ и҆ ве́сь живо́тъ мо́й во мно́зѣ прите́къ сꙋетѣ̀, къ концꙋ̀ прибли́жихсѧ: врази́ же моѝ ᲂу҆стремлѧ́ютсѧ на мѧ̀, а҆́лчꙋще поѧ́ти мѧ̀ и҆ низри́нꙋти во глꙋбинꙋ̀ а҆́довꙋ. Тѣ́мже молю́ ти сѧ, бл҃гі́й мо́й храни́телю, бꙋ́ди мѝ защи́титель, є҆гда̀ и҆́мамъ преходи́ти лю̑таѧ мыта̑рства, и҆ безбѣ́днѡ доведи́ мѧ до вра́тъ нбⷭ҇нагѡ црⷭ҇твїѧ, и҆дѣ́же ли́цы а҆́гг҃льстїи ра́достнѣ срѣта́ютъ восклица́ющихъ: А҆ллилꙋ́їа.
І҆́косъ ѳ҃.
Вѣті́йствꙋющїй ѧ҆зы́къ не мо́жетъ и҆зрещѝ, ꙗ҆́же сотвори́лъ мѝ є҆сѝ, ст҃ы́й храни́телю мо́й, во всѣ́мъ житїѝ мое́мъ: прїѧ́въ бо дꙋ́шꙋ мою̀ ѿ кꙋпе́ли ст҃а́гѡ креще́нїѧ, храни́лъ мѧ̀ є҆сѝ во младе́нчествѣ, ᲂу҆чи́лъ и҆ вразꙋмлѧ́лъ є҆сѝ во ѻ҆́трочествѣ, соблюда́лъ мѧ̀ є҆сѝ ѿ поползнове́нїѧ ко грѣхѡ́мъ въ во́зрастѣ ю҆́ношестѣмъ, наставлѧ́лъ є҆сѝ, прише́дша мѧ̀ въ мꙋ́жество, ѡ҆хранѧ́лъ є҆сѝ на всѣ̑хъ пꙋте́хъ мои́хъ да́же до ста́рости, ѡ҆блича́ѧ и҆ ᲂу҆тѣша́ѧ, всю́дꙋ помога́ѧ и҆ направлѧ́ѧ на пꙋ́ть сп҃се́нїѧ. Сегѡ̀ ра́ди бл҃года́рственнѡ вопїю̀ тѝ:
Ра́дꙋйсѧ, ꙗ҆́кѡ никогда́же лиша́еши мѧ̀ твоеѧ̀ по́мощи и҆ застꙋпле́нїѧ: ра́дꙋйсѧ, ꙗ҆́кѡ ѿ сна̀ востаю́ща мѧ̀ подвиза́еши ко бл҃годаре́нїю гдⷭ҇а, ᲂу҆крѣплѧ́ющагѡ си̑лы моѧ̑.
Ра́дꙋйсѧ, ꙗ҆́кѡ нача́токъ коегѡ́ждо днѐ мл҃твою ѡ҆сщ҃а́ти мѧ̀ поꙋча́еши: ра́дꙋйсѧ, ꙗ҆́кѡ воспреща́еши мѝ без̾ мл҃твы къ всебл҃го́мꙋ промысли́телю, дерзнове́ннѡ собо́ю что̀ начина́ти.
Ра́дꙋйсѧ, ꙗ҆́кѡ самонадѣ́ѧнїе и҆з̾ се́рдца моегѡ̀ и҆стреби́ти тщи́шисѧ: ра́дꙋйсѧ, ꙗ҆́кѡ сладча́йшее и҆́мѧ гдⷭ҇а і҆и҃са хрⷭ҇та̀ ᲂу҆сты̀ непреста́ннѡ произноси́ти и҆ во ᲂу҆мѣ̀ держа́ти мѧ̀ побꙋжда́еши.
Ра́дꙋйсѧ, ꙗ҆́кѡ во всѧ́кое вре́мѧ нꙋ̑жнаѧ то́чїю и҆ полє́знаѧ вѣща́ти ѧ҆зы́комъ мѝ внꙋша́еши: ра́дꙋйсѧ, ꙗ҆́кѡ ѿ праздносло́вїѧ, многоглаго́ланїѧ, па́че же и҆ кощꙋ́нства мѧ̀ ᲂу҆держава́еши.
Ра́дꙋйсѧ, ꙗ҆́кѡ ꙗ҆дꙋ́щꙋ и҆ пїю́щꙋ мѝ и҆лѝ и҆́но что̀ творѧ́щꙋ при́снѡ спребыва́еши: ра́дꙋйсѧ, ꙗ҆́кѡ воздержа́нїю въ пи́щи и҆ питїѝ прїѡбꙋчи́ти мѧ̀ пече́шисѧ.
Ра́дꙋйсѧ, ꙗ҆́кѡ спѧ́ща мѧ̀ храни́ти и҆ врага̀, хотѧ́ща и҆скꙋси́ти мѧ̀ со́нными мечта̑нїи, ѿгонѧ́еши: ра́дꙋйсѧ, ꙗ҆́кѡ воспѧща́еши мѧ̀ ѿ любостра́стнагѡ стремле́нїѧ и҆ во ѻ҆́чїю моє́ю цѣломꙋ́дренный сты́дъ влага́еши.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ і҃.
Сп҃стѝ всѣ́хъ прише́дый і҆и҃се мо́й пребл҃гі́й, со ᲂу҆миле́нїемъ молю́ ти сѧ, твои́мъ млⷭ҇рдїемъ простѝ мои́хъ ѕлы́хъ премно́жество и҆ безмѣ́рїе, преклонѧ́емый на сїѐ бжⷭ҇твенными мольба́ми твоегѡ̀ невеще́ственнагѡ слꙋжи́телѧ, є҆го́же мѝ приста́вилъ є҆сѝ и҆з̾ младе́нства, ꙗ҆́кѡ чл҃вѣколю́бецъ, храни́телѧ: да досто́инъ ꙗ҆влю́сѧ вни́ти въ черто́гъ сла́вы твоеѧ̀ и҆ со дꙋ́хи пра́ведныхъ воспѣ́ти: А҆ллилꙋ́їа.
І҆́косъ і҃.
Стѣна̀ тве́рда при́снѡ ꙗ҆влѧ́еши ми́ сѧ, ст҃ы́й а҆́гг҃ле, проти́вꙋ ᲂу҆хищре́нїй ѕло́бныхъ врагѡ́въ мои́хъ, и҆́щꙋщихъ вѣ́чныѧ поги́бели моеѧ̀ и҆ разслаблѧ́ющихъ дꙋ́шꙋ мою̀ лѣ́ностїю и҆ самозабве́нїемъ. Молю̀ ᲂу҆́бѡ тѧ̀, храни́телю мо́й, да твои́мъ хода́тайствомъ сподо́блюсѧ, при и҆схо́дѣ дꙋшѝ моеѧ̀ и҆з̾ тѣлесѣ̀ прича́стникъ бы́ти пречⷭ҇тагѡ тѣ́ла и҆ ст҃ѣ́йшїѧ кро́ве моегѡ̀ сп҃си́телѧ, ꙗ҆́кѡ да, ᲂу҆крѣпи́всѧ се́ю нетлѣ́нною пи́щею и҆ животворѧ́щимъ питїе́мъ, безтре́петнѡ прейдꙋ̀ во и҆́нъ мі́ръ, воспѣва́ѧ тѧ̀, моегѡ̀ бл҃годѣ́телѧ:
Ра́дꙋйсѧ, ꙗ҆́кѡ дана̀ тѝ є҆́сть вла́сть и҆ си́ла ѿража́ти де́мѡнскаѧ на мѧ̀ нападє́нїѧ: ра́дꙋйсѧ, ꙗ҆́кѡ прїѧ́лъ є҆сѝ ѿ бг҃а крѣ́пость на побѣжде́нїе неви́димыхъ врагѡ́въ мои́хъ.
Ра́дꙋйсѧ, ꙗ҆́кѡ ѿ всѧ́кагѡ ѕлодѣ́йства и҆ ко́зней дїа́вольскихъ могі́й и҆зба́вити мѧ̀: ра́дꙋйсѧ, ꙗ҆́кѡ го́рькихъ мыта́рствъ нача́льника, лю́тагѡ мїроде́ржца нападє́нїѧ ѿ менє̀ ѿрева́еши.
Ра́дꙋйсѧ, ꙗ҆́кѡ, ѡ҆гражда́емый твои́мъ присꙋ́тствїемъ, и҆́мамъ наде́ждꙋ въ ча́съ сме́рти не ᲂу҆страши́тисѧ мра́чныхъ ли́цъ дꙋхѡ́въ ѕло́бы: ра́дꙋйсѧ, ꙗ҆́кѡ храни́мый тобо́ю, ᲂу҆пова́ю безбѣ́днѡ прейтѝ воздꙋ̑шнаѧ мыта̑рства.
Ра́дꙋйсѧ, ꙗ҆́кѡ ᲂу҆крѣплѧ́емый твое́ю по́мощїю, ча́ю не ᲂу҆де́ржанъ бы́ти мнѣ̀ вра́тъ раѧ̀, мѝ вожделѣ́ннагѡ: ра́дꙋйсѧ, ꙗ҆́кѡ твоѐ за мѧ̀ предста́тельство си́льнѡ є҆́сть пред̾ бг҃омъ, є҆́же не вве́рженꙋ мѝ бы́ти во тмꙋ̀ кромѣ́шнꙋю.
Ра́дꙋйсѧ, ꙗ҆́кѡ при́снѡ внꙋша́еши мѝ ᲂу҆милостивлѧ́ти гдⷭ҇а слеза́ми покаѧ́нїѧ, да и҆зба́влюсѧ гее́нны а҆́дскїѧ: ра́дꙋйсѧ, ꙗ҆́кѡ побꙋжда́еши мѧ̀ де́нь и҆ но́щь моли́тисѧ, да не по́сланъ бꙋ́дꙋ со де́мѡны мꙋ́читисѧ.
Ра́дꙋйсѧ, неѿстꙋ́пный мо́й рꙋководи́телю и҆ пѣ́стꙋне: ра́дꙋйсѧ, крѣ́пкїй мо́й застꙋ́пниче и҆ ско́рый помо́щниче.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ а҃і.
Пѣ́нїе сїѐ, а҆́ще и҆ ѿ ᲂу҆се́рдїѧ моегѡ̀ тѝ приноси́мое, ст҃ы́й храни́телю мо́й, вѣ́мъ, ꙗ҆́кѡ не дово́льнѡ є҆́сть ко и҆з̾ѧвле́нїю моегѡ̀ серде́чнагѡ бл҃годаре́нїѧ за всѧ̑ бл҃га̑ѧ, ꙗ҆̀же мѝ сотвори́лъ є҆сѝ и҆ не престае́ши твори́ти да́же до сегѡ̀ днѐ и҆ часа̀: но и҆ ѡ҆ се́мъ молю́ ти сѧ, ѻ҆́бщагѡ мѝ съ тобо́ю созда́телѧ ᲂу҆ми́лостиви, да на стра́шнѣмъ сꙋдѣ̀ свое́мъ шꙋ́їѧ ча́сти и҆зба́витъ мѧ̀ и҆ сподо́битъ со всѣ́ми ст҃ы́ми воспѣва́ти є҆мꙋ̀: А҆ллилꙋ́їа.
І҆́косъ а҃і.
Свѣти́льникъ мо́й ᲂу҆гасѐ, є҆ле́а же бл҃ги́хъ дѣ́лъ, во є҆́же возжещѝ и҆̀, нѣ́сть мѝ: и҆ гдѣ̀ ѡ҆брѧ́щꙋсѧ а҆́зъ, ѡ҆каѧ́нный, сно́мъ грѣхо́внымъ ѿѧгче́нный, є҆гда̀ пости́гнетъ мѧ̀ внеза́пꙋ полꙋ́нощь, ча́съ кончи́ны моеѧ̀; но да не ᲂу҆слы́шꙋ и҆ а҆́зъ, ꙗ҆́коже ю҆рѡ́дивыѧ дѣ̑вы, гро́знагѡ гла́са жениха̀: не вѣ́мъ тѧ̀. Помозѝ мѝ, неꙋсыпа́емый храни́телю мо́й, напо́лнити сосꙋ́ды дꙋшѝ моеѧ̀ є҆ле́емъ бл҃ги́хъ дѣ́лъ, па́че же млⷭ҇рдїѧ и҆ смире́нїѧ. Ны́нѣ же прїимѝ ѿ менѐ сїѐ пѣ́нїе:
Ра́дꙋйсѧ, є҆ди́нагѡ гдⷭ҇а и҆мѣ́ти въ ра́зꙋмѣ при́снѡ мѝ внꙋша́ѧй: ра́дꙋйсѧ, за́повѣдь ѡ҆ любвѝ къ немꙋ̀, пребл҃го́мꙋ, въ се́рдцѣ мое́мъ ѡ҆бновлѧ́ѧй.
Ра́дꙋйсѧ, люби́ти є҆гѡ̀, созда́телѧ, всѣ́мъ ᲂу҆мо́мъ и҆ всѣ́мъ помышле́нїемъ мѧ̀ побꙋжда́ѧй: ра́дꙋйсѧ, и҆ къ бли̑жнимъ и҆́скреннюю любо́вь мою̀ бг҃оꙋго́днꙋ бы́ти непреста́ннѡ мѝ напомина́ѧй.
Ра́дꙋйсѧ, люби́ти и҆̀хъ не сло́вомъ и҆лѝ ѧ҆зы́комъ, но дѣ́ломъ и҆ и҆́стиною мѧ̀ поꙋча́ѧй: ра́дꙋйсѧ, во всѣ́хъ нꙋ́ждахъ и҆̀хъ помога́ти жела́нїе мѝ влага́ѧй.
Ра́дꙋйсѧ, ᲂу҆тѣша́ти скорбѧ́щихъ, застꙋпа́ти ѡ҆би́димыхъ мѧ̀ наставлѧ́ѧй: ра́дꙋйсѧ, ѿ и҆мѣ́нїй свои́хъ ᲂу҆дѣлѧ́ти бѣ̑днымъ и҆ неимꙋ́щымъ се́рдце моѐ преклонѧ́ѧй.
Ра́дꙋйсѧ, и҆ дꙋ́шꙋ мою̀, по за́повѣди сп҃си́телѧ, положи́ти за дрꙋ́ги своѧ̑ гото́вꙋ мѝ бы́ти возбꙋжда́ѧй: ра́дꙋйсѧ, закрыва́ѧй ѻ҆чеса̀ моѧ̑, є҆́же не зрѣ́ти мѝ прегрѣше́нїѧ бра́та моегѡ̀.
Ра́дꙋйсѧ, не попꙋща́ѧй мѝ ѡ҆сꙋжда́ти поползнꙋ́вшагосѧ на грѣ́хъ бли́жнѧго моего̀: ра́дꙋйсѧ, воспреща́ѧй мѝ ꙗ҆́ти вѣ́рꙋ ѡ҆глаго́льникѡмъ клевре́та моегѡ̀.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ в҃і.
Блгⷣть дана̀ тѝ є҆́сть ѿ всемогꙋ́щагѡ гдⷭ҇а, ст҃ы́й покрови́телю мо́й, є҆́же храни́ти мѧ̀ на всѣ́хъ пꙋте́хъ мои́хъ, да не ѡ҆ ка́мень ко́егѡ собла́зна преткне́тсѧ нога̀ моѧ̀, до́ндеже мѧ̀ предста́виши хрⷭ҇тꙋ̀ бг҃ꙋ сп҃се́на, є҆мꙋ́же немо́лчнѡ всѧ̑ си̑лы нбⷭ҇ныѧ взыва́ютъ: А҆ллилꙋ́їа.
І҆́косъ в҃і.
Пою̀ твоѐ досточꙋ́дное млⷭ҇рдїе и҆ мно́гое снисхожде́нїе, быстродви́жный ᲂу҆́ме, безпло́тный слꙋго̀ гдⷭ҇ень: ꙗ҆́кѡ не гнꙋша́ешисѧ грѣхо́вныѧ моеѧ̀ смра́дности и҆ не престае́ши приноси́ти ѡ҆ мнѣ̀, непотре́бнѣмъ, ст҃ы̑ѧ мл҃твы своѧ̑ ко ст҃ѣ́йшемꙋ прⷭ҇то́лꙋ трїѷпоста́снагѡ бг҃а, є҆́же не поги́бнꙋти мѝ во вѣ́ки, но црⷭ҇твїе нбⷭ҇ное наслѣ́довати. Бл҃говолѝ ᲂу҆̀бо прїѧ́ти ѿ дꙋше́вныхъ сокро́вищъ мои́хъ приноси́мое тѝ пѣснопѣ́нїе:
Ра́дꙋйсѧ, ꙗ҆́кѡ воспомина́нїемъ грѧдꙋ́щагѡ гро́знагѡ сꙋда̀ бж҃їѧ ѿ грѣхѡ́въ мѧ̀ ѿрева́еши: ра́дꙋйсѧ, ꙗ҆́кѡ дꙋ́шꙋ мою̀, а҆́ки невѣ́стꙋ, ко срѣ́тенїю прекра́снагѡ жениха̀ хрⷭ҇та̀ предꙋготовлѧ́ти возбꙋжда́еши мѧ̀.
Ра́дꙋйсѧ, ꙗ҆́кѡ при́снѡ жела́еши досто́йна мѧ̀ сотвори́ти бра́чнагѡ черто́га є҆гѡ̀: ра́дꙋйсѧ, ꙗ҆́кѡ вы́нꙋ ᲂу҆чи́ши мѧ̀ возжига́ти свѣти́льникъ дꙋшѝ моеѧ̀, да съ мꙋ́дрыми дѣ́вами, дꙋша́ми првⷣныхъ, вни́дꙋ въ ѻ҆́нь.
Ра́дꙋйсѧ, ꙗ҆́кѡ грѣхо́вныѧ ѻ҆де́жды моеѧ̀ совлачи́тисѧ побꙋжда́еши мѧ̀: ра́дꙋйсѧ, ꙗ҆́кѡ въ ри́зꙋ непоро́чности и҆ чистоты̀ ѡ҆блещи́сѧ мѝ спосо́бствꙋеши.
Ра́дꙋйсѧ, ꙗ҆́кѡ хода́тайствꙋеши, да на стра́шнѣмъ сꙋдѣ̀ хрⷭ҇то́вомъ ѡ҆деснꙋ́ю є҆гѡ̀ ста́ти сподо́блюсѧ: ра́дꙋйсѧ, ꙗ҆́кѡ ᲂу҆молѧ́еши бл҃гоꙋтро́бїе бж҃їе, да ли́кꙋ и҆збра́нныхъ свои́хъ сопричте́тъ мѧ̀.
Ра́дꙋйсѧ, ꙗ҆́кѡ подвиза́еши на мл҃твꙋ ко гдⷭ҇ꙋ и҆ сожи́телей твои́хъ нбⷭ҇ныхъ, да всели́тъ мѧ̀ съ ни́ми во црⷭ҇твїи свое́мъ: ра́дꙋйсѧ, до́брый и҆ бо́дрый блюсти́телю мо́й.
Ра́дꙋйсѧ, те́плый ѡ҆ мнѣ̀, грѣ́шнѣмъ, мл҃твенниче и҆ бл҃гі́й предста́телю: ра́дꙋйсѧ, по гдⷭ҇ѣ бз҃ѣ и҆ прест҃ѣ́й бцⷣѣ крѣ́пкое моѐ ᲂу҆пова́нїе.
Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.
Конда́къ г҃і.
Ѽ, пресла́вный и҆ ᲂу҆́мный свѣ́те, а҆́гг҃ле бж҃їй. Прїимѝ бл҃года́рственное сїѐ и҆ моле́бное пѣ́нїе, и҆, є҆гда̀ и҆́мамъ ѿ землѝ воста́ти на сꙋ́дъ, покажѝ тогда̀ млⷭ҇рдїе твоѐ на мнѣ̀, грѣ́шнѣмъ: предста́ни бли́з̾ менє̀ ти́хъ и҆ ра́достенъ, наде́ждою сп҃се́нїѧ ѿ̾е́млѧ стра́хъ мо́й, да въ селе́нїихъ ра́йскихъ сподо́блюсѧ вкꙋ́пѣ съ тобо́ю во вѣ́ки вѣкѡ́въ воспѣва́ти превѣ́чномꙋ цр҃ю̀ сла́вы: А҆ллилꙋ́їа.
Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.
Моли́тва.
Ѽ, ст҃ы́й а҆́гг҃ле, храни́телю и҆ покрови́телю мо́й бл҃гі́й! Съ сокрꙋше́ннымъ се́рдцемъ и҆ болѣ́зненною дꙋше́ю предстою̀ тѝ, молѧ́сѧ: ᲂу҆слы́ши мѧ̀, грѣ́шнагѡ раба̀ своегѡ̀ (и҆мⷬ҇къ), съ во́племъ крѣ́пкимъ и҆ пла́чемъ го́рькимъ вопїю́щагѡ: не помѧнѝ мои́хъ беззако́нїй и҆ непра́вдъ, и҆́миже а҆́зъ ѡ҆каѧ́нный прогнѣвлѧ́ю тѧ̀ по всѧ̑ днѝ и҆ часы̀, и҆ ме́рзостна себє̀ творю̀ пред̾ созда́телемъ на́шимъ гдⷭ҇емъ: ꙗ҆ви́сѧ мнѣ̀ млⷭ҇рдъ и҆ не ѿлꙋча́йсѧ менє̀ скве́рнагѡ да́же до кончи́ны моеѧ̀: возбꙋдѝ мѧ̀ ѿ сна̀ грѣхо́внагѡ и҆ посо́бствꙋй твои́ми мл҃твами про́чее вре́мѧ живота̀ моегѡ̀ без̾ поро́ка прейтѝ и҆ сотвори́ти плоды̀ досто́йны покаѧ́нїѧ, па́че же ѿ сме́ртныхъ паде́нїй грѣхо́вныхъ соблюди́ мѧ, да не поги́бнꙋ во ѿча́ѧнїи и҆ да не пора́дꙋетсѧ вра́гъ ѡ҆ поги́бели мое́й. Вѣ́мъ вои́стиннꙋ и҆ ᲂу҆сты̑ и҆сповѣ́дꙋю, ꙗ҆́кѡ никто́же тако́въ дрꙋ́гъ и҆ предста́тель, защи́титель и҆ побо́рникъ, ꙗ҆́коже ты̀, ст҃ы́й а҆́гг҃ле: предстоѧ̀ бо прⷭ҇то́лꙋ гдⷭ҇ню, мо́лишисѧ ѡ҆ мнѣ̀ непотре́бнѣмъ и҆ па́че всѣ́хъ грѣ́шнѣйшемъ, да не и҆зы́метъ пребл҃гі́й дꙋшѝ моеѧ̀ въ де́нь неча́ѧнїѧ моегѡ̀ и҆ въ де́нь творе́нїѧ ѕло́бы. Не преста́й ᲂу҆́бѡ ᲂу҆милостивлѧ́ѧ премлⷭ҇рдаго гдⷭ҇а и҆ бг҃а моего̀, да ѿпꙋ́ститъ согрѣшє́нїѧ моѧ̑, ꙗ҆́же сотвори́хъ во всѣ́мъ житїѝ мое́мъ, дѣ́ломъ, сло́вомъ и҆ всѣ́ми мои́ми чꙋ̑вствы, и҆ и҆́миже вѣ́сть сꙋдьба́ми да сп҃се́тъ мѧ̀: да нака́жетъ мѧ̀ здѣ̀ по свое́й неизрече́нной млⷭ҇ти, но да не ѡ҆бличи́тъ и҆ не и҆стѧ́жетъ мѧ̀ ѻ҆на́мѡ по своемꙋ̀ нелицепрїѧ́тномꙋ правосꙋ́дїю: да сподо́битъ мѧ̀ покаѧ́нїе принестѝ, съ покаѧ́нїемъ же бжⷭ҇твенное причаще́нїе досто́йнѣ прїѧ́ти, ѡ҆ се́мъ па́че молю̀, и҆ такова́гѡ да́ра всеꙋсе́рднѡ жела́ю. Въ стра́шный же ча́съ сме́рти неѿстꙋ́пенъ бꙋ́ди мѝ, бл҃гі́й храни́телю мо́й, прогонѧ́ѧ мра́чныѧ де́моны, и҆мꙋ́щыѧ ᲂу҆страши́ти притре́петнꙋю дꙋ́шꙋ мою̀: защитѝ мѧ̀ ѿ тѣ́хъ ловле́нїѧ, є҆гда̀ и҆́мамъ преходи́ти воздꙋ̑шнаѧ мыта̑рства, да храни́мъ тобо́ю, безбѣ́днѡ дости́гнꙋ раѧ̀ мѝ вожделѣ́ннагѡ, и҆дѣ́же ли́цы ст҃ы́хъ и҆ го́рнихъ си́лъ непреста́ннѡ восхвалѧ́ютъ всечестно́е и҆ великолѣ́пое и҆́мѧ въ трⷪ҇цѣ сла́вимагѡ бг҃а, ѻ҆ц҃а̀ и҆ сн҃а и҆ ст҃а́гѡ дх҃а, є҆мꙋ́же подоба́етъ че́сть и҆ поклоне́нїе во вѣ́ки вѣкѡ́въ. А҆ми́нь.