А҆ка́ѳїстъ ст҃о́мꙋ а҆рхїстрати́гꙋ бж҃їю мїхаи́лꙋ.
Конда́къ а҃.
И҆збра́нный нбⷭ҇ныхъ си̑лъ воево́до и҆ ро́да чл҃вѣ́ческагѡ застꙋ́пниче, сїѐ тебѣ̀, и҆̀же тобо́ю ѿ ско́рбныхъ и҆збавлѧ́еми, бл҃года́рственное прино́симъ пѣ́нїе: ты́ же, ꙗ҆́кѡ предстоѧ́й прⷭ҇то́лꙋ цр҃ѧ̀ сла́вы, ѿ всѧ́кихъ на́съ бѣ́дъ свобожда́й, да съ вѣ́рою и҆ любо́вїю въ похвалꙋ̀ тебѣ̀ зове́мъ:
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
І҆́косъ а҃.
Ꙗ҆́кѡ а҆́гг҃льскихъ ѻ҆гнезра́чныхъ ликѡ́въ предстоѧ́телѧ, а҆́гг҃льскими ᲂу҆́бѡ и҆ ѧ҆зы́ки подоба́ше восхвали́ти тѧ̀, мїхаи́ле: но до́ндеже, вразꙋмлѧ́еми тобо́ю, навы́кнемъ безпло́тныхъ гл҃го́лѡмъ, ᲂу҆слы́ши, а҆́ще и҆ ѿ чл҃вѣ́ческихъ, ѻ҆ба́че бл҃года́рныхъ, ᲂу҆сте́нъ сицева̑ѧ:
Ра́дꙋйсѧ, ѕвѣздо̀ мі́ра первоѡбра́знаѧ: ра́дꙋйсѧ, свѣщѐ и҆́стины и҆ пра́вды златоза́рнаѧ.
Ра́дꙋйсѧ, лꙋче́й свѣ́та несозда́ннагѡ пе́рвый во а҆́гг҃льскихъ ликостоѧ́нїихъ прїе́мниче: ра́дꙋйсѧ, а҆́гг҃лѡвъ и҆ а҆рха́гг҃лѡвъ нача́льниче.
Ра́дꙋйсѧ, въ не́мже наивѧ́щше свѣтлѣ́етсѧ сла́ва тво́рческїѧ десни́цы: ра́дꙋйсѧ, и҆́мже красꙋ́ютсѧ собо́ри всѣ́хъ сꙋще́ствъ безпло́тныхъ.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ в҃.
Прови́дѧще вѣ́ры ѻ҆чеса́ми вели́чїе дх҃о́вныѧ красоты̀ и҆ си́лꙋ молнїено́сныѧ десни́цы твоеѧ̀, а҆рха́гг҃ле бж҃їй, мы̀, ꙗ҆́кѡ земні́и и҆ пло́тїю ѡ҆бложе́ннїи, ᲂу҆дивле́нїемъ, ра́достїю и҆ бл҃годаре́нїемъ ко творцꙋ̀ всѧ́ческихъ и҆сполнѧ́емсѧ, зовꙋ́ще со всѣ́ми нбⷭ҇ными си́лами: А҆ллилꙋ́їа.
І҆́косъ в҃.
Ра́зꙋмъ чи́стъ и҆ свобо́денъ ѿ страсте́й и҆спросѝ на́мъ, пречꙋ́дный мїхаи́ле, нбⷭ҇ныхъ чинѡ́въ нача́льниче, да, возне́сшесѧ мы́слїю ѿ земны́хъ къ нбⷭ҇нымъ, хвале́бнꙋю пѣ́снь воспое́мъ тѝ си́це:
Ра́дꙋйсѧ, бж҃їѧ неизрече́нныѧ красоты̀ и҆ добро́ты ближа́йшїй зри́телю: ра́дꙋйсѧ, всебл҃ги́хъ совѣ́тѡвъ прест҃ы́ѧ трⷪ҇цы преи́скреннїй таи́нниче.
Ра́дꙋйсѧ, превѣ́чныхъ сꙋде́бъ трⷪ҇ческихъ вѣ́рный и҆сполни́телю: ра́дꙋйсѧ, є҆мꙋ́же съ любо́вїю ᲂу҆дивлѧ́ютсѧ небє́снаѧ вѡ́инства.
Ра́дꙋйсѧ, є҆гѡ́же съ вѣ́рою прославлѧ́ютъ земноро́днїи: ра́дꙋйсѧ, є҆гѡ́же трепе́щꙋтъ а҆́дскїѧ си̑лы.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ г҃.
Си́лꙋ неѡбори́мыѧ ре́вности по сла́вѣ бж҃їей въ себѣ̀ ꙗ҆влѧ́ѧ, ста́лъ є҆сѝ во главѣ̀ ликѡ́въ а҆́гг҃льскихъ, мїхаи́ле, проти́вꙋ ды́шащагѡ ѕло́бою прего́рдагѡ денни́цы, є҆мꙋ́же со те́мными клеврє́ты є҆гѡ̀ съ высоты̀ нбⷭ҇ныѧ въ преиспо́днюю низве́рженꙋ сꙋ́щꙋ, вѡ́инства нбⷭ҇наѧ, тобо́ю пресла́внѣ води̑маѧ, съ весе́лїемъ, ꙗ҆́кѡ є҆ди́ными ᲂу҆сты̑, пред̾ прⷭ҇то́ломъ бж҃їимъ возгласи́ша: А҆ллилꙋ́їа.
І҆́косъ г҃.
И҆́мать тебє̀, а҆рха́гг҃ле мїхаи́ле, ве́сь ро́дъ хрⷭ҇тїа́нскїй вели́ка застꙋ́пника и҆ ди́вна во бра́нехъ съ проти́вными помо́щника. Сегѡ̀ ра́ди пречꙋ́днагѡ покро́ва твоегѡ̀ сподо́битисѧ жела́юще, въ де́нь торжества̀ твоегѡ̀ взыва́емъ тѝ си́це:
Ра́дꙋйсѧ, и҆́мже сатана̀ ꙗ҆́кѡ мо́лнїѧ съ нб҃сѐ низве́ржесѧ: ра́дꙋйсѧ, и҆́мже храни́мый ро́дъ чл҃вѣ́ческїй къ нб҃сѝ восхо́дитъ.
Ра́дꙋйсѧ, всесвѣ́тлагѡ мі́ра го́рнѧгѡ преди́вное ᲂу҆краше́нїе: ра́дꙋйсѧ, па́дшагѡ мі́ра до́льнѧгѡ пресла́вное застꙋпле́нїе.
Ра́дꙋйсѧ, николи́же си́лами ѕла̀ побѣжде́нный: ра́дꙋйсѧ, со всѣ́ми а҆́гг҃лы бж҃їими во и҆́стинѣ и҆ пра́вдѣ на вѣ́ки бл҃года́тїю бж҃їею ᲂу҆твержде́нный.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ д҃.
Бꙋ́ри и҆скꙋше́нїй и҆ бѣ́дъ и҆зба́ви на́съ а҆́гг҃лѡвъ первопрⷭ҇то́льниче, съ любо́вїю и҆ ра́достїю пресвѣ́тлое торжество̀ твоѐ соверша́ющихъ: ты́ бо є҆сѝ въ бѣда́хъ вели́кїй помо́щникъ, и҆ въ ча́съ сме́рти ѿ ѕлы́хъ дꙋхѡ́въ храни́тель и҆ застꙋ́пникъ всѣ́хъ, вопїю́щихъ твоемꙋ̀ и҆ на́шемꙋ влⷣцѣ и҆ бг҃ꙋ: А҆ллилꙋ́їа.
І҆́косъ д҃.
Ви́дѧще твоѐ проти́вꙋ пѡ́лчищъ сатани́нскихъ дерзнове́нїе, всѝ чи́нове а҆́гг҃льстїи съ ра́достїю подвиго́шасѧ вослѣ́дъ тебє̀ на бра́нь за и҆́мѧ и҆ сла́вꙋ своегѡ̀ влⷣки, вопїю́ще: кто̀ ꙗ҆́кѡ бг҃ъ; мы́ же вѣ́дꙋще сатанꙋ̀ под̾ нога́ма твои́ма пове́ржена, тебѣ̀ ꙗ҆́кѡ побѣди́телю зове́мъ:
Ра́дꙋйсѧ, и҆́мже ми́ръ и҆ тишина̀ на нб҃сѝ водвори́шасѧ: ра́дꙋйсѧ, ѿ него́же дꙋ́хове ѕло́бы да́же до а҆́да низложи́шасѧ.
Ра́дꙋйсѧ, а҆́гг҃льскїѧ вѡ́инства и҆ си̑лы мі́ра неви́димагѡ ко и҆стребле́нїю ѕла̀ направлѧ́ѧй: ра́дꙋйсѧ, прю̀ и҆ возмꙋще́нїе стїхі́й мі́ра ви́димагѡ незри́мѡ ᲂу҆кроща́ѧй.
Ра́дꙋйсѧ, под̾е́млющыхъ бра́нь къ дꙋховѡ́мъ ѕло́бы поднебє́снымъ ди́вный спобо́рниче: ра́дꙋйсѧ, и҆знемога́ющымъ во и҆скꙋше́нїихъ и҆ напа́стехъ вѣ́ка сегѡ̀ крѣ́пкїй помо́щниче.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ є҃.
Бг҃ото́чный и҆сто́чникъ превели́кихъ чꙋде́съ ꙗ҆ви́лсѧ є҆сѝ во хра́мѣ твое́мъ, и҆́же въ хѡ́нѣхъ: не то́чїю бо ѕмі́й вели́кїй и҆ стра́шный, на мѣ́стѣ то́мъ пребыва́вый, си́лою твое́ю потреби́сѧ, но и҆ стрꙋи̑ водны̑ѧ, всѧ́кїй недꙋ́гъ тѣле́сный врачꙋ́ющыѧ, ѿкры́шасѧ, да всѝ прославлѧ́ющемꙋ тѧ̀ влⷣцѣ а҆́гг҃лѡвъ съ вѣ́рою зовꙋ́тъ: А҆ллилꙋ́їа.
І҆́косъ є҃.
Слы́шаще и҆ вѣ́дꙋще тѧ̀ ꙗ҆́кѡ свѣти́ло вели́кое, посредѣ̀ ликѡ́въ а҆́гг҃льскихъ блиста́ющасѧ, пречꙋ́дный мїхаи́ле, къ тебѣ̀, по бз҃ѣ и҆ прест҃ѣ́й мт҃ри бж҃їей, прибѣга́емъ: ѡ҆зарѝ лꙋча́ми свѣ́та твоегѡ̀ всѣ́хъ на́съ вопїю́щихъ тѝ си́це:
Ра́дꙋйсѧ, вождю̀ и҆ храни́телю въ пꙋсты́ни наро́да бг҃оизбра́ннагѡ: ра́дꙋйсѧ, высо́кїй посре́дниче зако́на, рꙋко́ю мѡѷсе́а на сїна́и да́ннагѡ.
Ра́дꙋйсѧ, ᲂу҆ него́же сꙋдїи̑ и҆ вождѝ і҆и҃левы си́лꙋ и҆ покро́въ ѡ҆брѣта́хꙋ: ра́дꙋйсѧ, чрез̾ него́же прⷪ҇ро́цы и҆ первосщ҃е́нницы і҆ꙋде́йстїи да́ръ вѣ́дѣнїѧ ѿ всевѣ́дꙋщагѡ бг҃а прїима́хꙋ.
Ра́дꙋйсѧ, бг҃обоѧ́знєнныѧ законода́вцы та́йною премꙋ́дростїю снабдѣва́ѧй: ра́дꙋйсѧ, сꙋ́дъ и҆ пра́вдꙋ творѧ́щымъ бл҃гость на се́рдцѣ полага́ѧй.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ ѕ҃.
Провозвѣ́стника тѧ̀ бж҃їихъ сꙋде́бъ є҆гда̀ ᲂу҆зрѣ̀ нѣ́когда манѡ́е, недоꙋмѣ́нїѧ и҆ стра́ха и҆спо́лнисѧ, мнѧ̀ не жи́ти ктомꙋ̀ на землѝ: наꙋче́нъ же ѿ жены̀ своеѧ̀ ѡ҆ бл҃гости ꙗ҆вле́нїѧ и҆ кро́тости слове́съ твои́хъ, въ ра́дости ѡ҆ и҆мѣ́вшемъ роди́тисѧ, по словесѝ твоемꙋ̀, сы́нѣ свое́мъ самѱѡ́нѣ, благода́рнѣ возопѝ бг҃ꙋ: А҆ллилꙋ́їа.
І҆́косъ ѕ҃.
Возсїѧ́лъ є҆сѝ пречꙋ́днѡ сла́вою, мїхаи́ле, є҆гда̀ во ѡ҆́бразѣ человѣ́честѣ пред̾ і҆исꙋ́сомъ навѵ́номъ ста́лъ є҆сѝ, глаго́лѧ: и҆ззꙋ́й сапо́гъ съ нѡгꙋ̀ твоє́ю: а҆́зъ є҆́смь а҆рхїстрати́гъ си́лы гдⷭ҇ни. Таково́мꙋ ꙗ҆вле́нїю твоемꙋ̀ чꙋдѧ́щесѧ, съ любо́вїю вопїе́мъ тѝ:
Ра́дꙋйсѧ, бг҃овѣнча́нныхъ гла́въ неꙋсы́пный ѡ҆храни́телю: ра́дꙋйсѧ, противлѧ́ющихсѧ вла́сти, ꙗ҆́кѡ бж҃їю повелѣ́нїю проти́вѧщихсѧ, ско́рый низложи́телю.
Ра́дꙋйсѧ, ᲂу҆смири́телю наро́дныхъ треволне́нїй: ра́дꙋйсѧ, незри́мый ᲂу҆праздни́телю ѕлочести́выхъ ѻ҆бы́чаєвъ.
Ра́дꙋйсѧ, ꙗ҆́кѡ ты̀ просвѣща́еши сомнѧ́щихсѧ въ ча́съ лю́тыхъ недоꙋмѣ́нїй: ра́дꙋйсѧ, ꙗ҆́кѡ ты̀ и҆схища́еши и҆скꙋша́емыхъ ѿ пагꙋбоно́сныхъ наважде́нїй.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ з҃.
Хотѧ́й влⷣка всѧ́ческихъ показа́ти, ꙗ҆́кѡ жрє́бїи сынѡ́въ человѣ́ческихъ не самослꙋча́йнїи сꙋ́ть, но въ десни́цѣ є҆гѡ̀ вы́нꙋ содержа́тсѧ, даде́ тѧ ца́рствамъ земны́мъ застꙋ́пника и҆ храни́телѧ, да племена̀ и҆ наро́ды къ вѣ́чномꙋ црⷭ҇твїю бж҃їю ᲂу҆готовлѧ́еши. Сегѡ̀ ра́ди всѝ, вѣ́дꙋщїи ѡ҆ вели́цѣмъ слꙋже́нїи твое́мъ сп҃се́нїю чл҃вѣ́ческомꙋ, бл҃года́рнѣ зовꙋ́тъ бг҃ꙋ: А҆ллилꙋ́їа.
І҆́косъ з҃.
Но́ваѧ чꙋдеса̀ показа̀ на́мъ, а҆рхїстрати́же, тобо́ю на землѝ всѣ́хъ чꙋде́съ творе́цъ и҆ влⷣка, є҆гда̀ хра́мъ, во и҆́мѧ твоѐ созда́нный, ѿ потопле́нїѧ вода́ми рѣ́чными ди́внѡ спа́слъ є҆сѝ, стрꙋѧ́мъ пото́ка въ нѣ̑дра земна̑ѧ ᲂу҆стреми́тисѧ повелѣ́вый: є҆́же ви́дѧ бл҃же́нный а҆рхі́ппъ съ дх҃о́вными ча́ды свои́ми, бл҃года́рнѣ къ тебѣ̀ возопѝ:
Ра́дꙋйсѧ, ст҃ы́хъ хра́мѡвъ бж҃їихъ несокрꙋши́маѧ ѡ҆гра́до: ра́дꙋйсѧ, врагѡ́мъ вѣ́ры хрⷭ҇то́вы неѡбори́маѧ прегра́до.
Ра́дꙋйсѧ, є҆го́же велѣ́нїю стїхі́и покарѧ́ютсѧ: ра́дꙋйсѧ, и҆̀мже всѝ ѕло́бнїи за́мыслы сокрꙋша́ютсѧ.
Ра́дꙋйсѧ, вѣ̑рнымъ ра́дость ѿ прⷭ҇то́ла вседержи́телѧ и҆зносѧ́щїй: ра́дꙋйсѧ, невѣ́рныхъ на стезю̀ пра́вды и҆ и҆́стины приводѧ́щїй.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ и҃.
Стра́нное чꙋ́до си́лы твоеѧ̀, а҆рхїстрати́же бж҃їй, ᲂу҆вѣ́дѣ на себѣ̀ а҆ввакꙋ́мъ, є҆гда̀ по ма́нїю бж҃їю, восхи́тивъ, прине́слъ є҆сѝ є҆го̀ скороте́чнѣ ѿ і҆ꙋде́и въ вавѷлѡ́нъ, да́ти пи́щꙋ данїи́лꙋ, въ ро́вѣ со львы̀ заключе́нꙋ: тѣ́мже ᲂу҆ди́вльсѧ превели́комꙋ дѣ́йствїю си́лы твоеѧ̀, возопѝ съ вѣ́рою: А҆ллилꙋ́їа.
І҆́косъ и҃.
Ве́сь є҆сѝ въ вы́шнихъ, мїхаи́ле, прⷭ҇то́лꙋ цр҃ѧ̀ сла́вы предстоѧ́й: не дале́къ є҆сѝ и҆ ѿ ни́жнихъ, ра́тꙋѧ вы́нꙋ со врага́ми сп҃се́нїѧ чл҃вѣ́ческагѡ: тѣ́мже всѝ вожделѣ́ннагѡ ѻ҆те́чества нбⷭ҇нагѡ дости́гнꙋти хотѧ́щїи согла́снѡ тебѣ̀ зовꙋ́тъ:
Ра́дꙋйсѧ, нача́льниче трист҃а́гѡ а҆́гг҃льскагѡ пѣ́нїѧ: ра́дꙋйсѧ, земноро́дныхъ при́снѡ гото́вый предста́телю и҆ храни́телю.
Ра́дꙋйсѧ, прего́рдагѡ фараѡ́на съ невѣ́рными є҆гѵ́птѧны порази́вый странноѡбра́знѡ: ра́дꙋйсѧ, вѣ̑рныѧ і҆ꙋде́и пꙋтеводи́вый въ пꙋсты́ни пресла́внѡ.
Ра́дꙋйсѧ, и҆́мже ᲂу҆гаси́сѧ пла́мень пещѝ вавѷлѡ́нскїѧ: ра́дꙋйсѧ, и҆́мже посрами́шасѧ кѡ́зни бѣсо́вскїѧ.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ ѳ҃
Всѝ и҆́ноцы ст҃ы́ѧ горы̀ а҆ѳѡ́нскїѧ въ ра́достный тре́петъ прїидо́ша, ви́дѧще ка́кѡ бг҃обоѧ́зненна ѻ҆́трока, неи́стовнѡ ѿ нечести́выхъ златолю́бцевъ во глꙋбинꙋ̀ морскꙋ́ю съ ка́менемъ пове́ржена, спа́слъ є҆сѝ: тѣ́мже прїѧ́вшаѧ є҆го̀ ѡ҆би́тель, и҆́менемъ твои́мъ красꙋ́ющисѧ, бл҃года́рнѣ взыва́етъ ко гдⷭ҇ꙋ: А҆ллилꙋ́їа.
І҆́косъ ѳ҃.
Вѣті́й глаго́лы и҆ любомꙋ́дрѡвъ смы́слы не довлѣ́ютъ ко и҆зглаго́ланїю си́лы твоеѧ̀, мїхаи́ле, ка́кѡ во є҆ди́нꙋ но́щь сто̀ ѻ҆́смьдесѧтъ и҆ пѧ́ть ты́сѧщъ порази́лъ є҆сѝ ѿ во́євъ царѧ̀ а҆ссѷрі́йска сеннахїрі́ма, да нака́жетсѧ про́чее не хꙋ́лити и҆́мѧ гдⷭ҇не. Мы́ же, почита́юще ст҃ꙋ́ю ре́вность твою̀ ѡ҆ сла́вѣ бг҃а и҆́стиннагѡ, съ весе́лїемъ зове́мъ тѝ си́це:
Ра́дꙋйсѧ, правосла́вныхъ во́инствъ непобѣди́мый воево́до: ра́дꙋйсѧ, ѕловѣ́рныхъ ра́тей стра́хъ и҆ низложе́нїе.
Ра́дꙋйсѧ, пра́выѧ вѣ́ры и҆ бг҃опочита́нїѧ насади́телю: ра́дꙋйсѧ, дꙋшевре́дныхъ є҆ресе́й и҆ раско́лѡвъ и҆скорени́телю.
Ра́дꙋйсѧ, бл҃гочести́выѧ маккаве́и на по́ле бра́ни мно́гажды ᲂу҆крѣпи́вый: ра́дꙋйсѧ, нечести́вагѡ вождѧ̀ а҆нтїо́хова и҆лїодѡ́ра въ самѣ́мъ хра́мѣ порази́вый.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ і҃.
Спⷭ҇ти́сѧ хотѧ́щымъ на́мъ бꙋ́ди помо́щникъ тве́рдъ, а҆рхїстрати́же бж҃їй, и҆збавлѧ́ѧй и҆ хранѧ́й на́съ ѿ бѣ́дъ и҆ напа́стей, па́че же ѿ ѕлы́хъ на́выкѡвъ и҆ грѣхѡ́въ на́шихъ, да преспѣва́юще въ вѣ́рѣ, наде́ждѣ и҆ любвѝ хрⷭ҇то́вѣ, съ ра́достїю ѡ҆ преди́внѣмъ застꙋпле́нїи твое́мъ, ко влⷣцѣ а҆́гг҃лѡвъ и҆ человѣ́кѡвъ бл҃года́рнѣ зове́мъ: А҆ллилꙋ́їа.
І҆́косъ і҃.
Стѣна̀ є҆сѝ вѣ́рꙋющымъ человѣ́кѡмъ, а҆рхїстрати́же бж҃їй, и҆ сто́лпъ крѣ́покъ во бранѣ́хъ со врага́ми ви́димыми и҆ неви́димыми: сегѡ̀ ра́ди ѿ сѣте́й бѣсо́вскихъ тобо́ю и҆збавлѧ́еми, бл҃года́рнымъ се́рдцемъ и҆ ᲂу҆сты̀ зове́мъ си́це:
Ра́дꙋйсѧ, врагѡ́мъ вѣ́ры и҆ сопроти́вникѡмъ ст҃ы́ѧ цр҃кве непобѣди́мый противобо́рниче: ра́дꙋйсѧ, смире́ннымъ провозвѣ́стникѡмъ є҆ѵⷢ҇лїа неꙋтоми́мый споспѣ́шниче.
Ра́дꙋйсѧ, во тьмѣ̀ ѕловѣ́рїѧ сѣдѧ́щихъ свѣ́томъ вѣ́ры хрⷭ҇то́вы просвѣща́ѧй: ра́дꙋйсѧ, лжемꙋ́дрїемъ ѡ҆б̾юро́дѣвшихъ на стезю̀ и҆́стины и҆ покаѧ́нїѧ наставлѧ́ѧй.
Ра́дꙋйсѧ, гро́зный ѿмсти́телю кленꙋ́щымсѧ и҆́менемъ бж҃їимъ всꙋ́е: ра́дꙋйсѧ, молнїено́сный кара́телю глꙋмѧ́щихсѧ безꙋ́мнѣ ѡ҆ та́инствѣхъ ст҃ы́ѧ вѣ́ры.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ а҃і.
Пѣ́нїе всѧ́кое хвале́бное побѣжда́етсѧ мно́жествомъ чꙋде́съ твои́хъ, а҆рхїстрати́же бж҃їй, ꙗ҆́же совершє́на сꙋ́ть тобо́ю не то́чїю на нб҃сѝ и҆ на землѝ, но и҆ въ те́мныхъ сѣ́нѣхъ преиспо́днїѧ, и҆дѣ́же глꙋби́ннагѡ ѕмі́ѧ свѧза́лъ є҆сѝ ᲂу҆́зами си́лы гдⷭ҇ни, да и҆збавлѧ́емїи ѿ ѕло́бы є҆гѡ̀ бл҃гословѧ́тъ влⷣкꙋ нб҃сѐ и҆ землѝ, зовꙋ́ще: А҆ллилꙋ́їа.
І҆́косъ а҃і.
Свѣтоно́сный слꙋжи́тель и҆́стины и҆ чⷭ҇тоты̀ бг҃опочита́нїѧ ꙗ҆ви́лсѧ є҆сѝ а҆рхїстрати́же, є҆гда̀, прови́дѧ кѡ́зни дꙋ́ха тьмы̀, воспрети́лъ є҆сѝ є҆мꙋ̀ и҆́менемъ бж҃їимъ, да не де́рзнетъ сокрове́нное тѣ́ло почи́вшагѡ вождѧ̀ і҆и҃лева мѡѷсе́а ꙗ҆ви́ти ко ѡ҆бж҃е́нїю чꙋ́вственнымъ сыновѡ́мъ і҆и҃левымъ. Сегѡ̀ ра́ди, чтꙋ́ще ны́нѣ бл҃госвѣ́тлый собо́ръ тво́й, бл҃года́рнѣ вопїе́мъ тѝ:
Ра́дꙋйсѧ, чистотꙋ̀ бг҃овѣ́дѣнїѧ во дни̑ ве́тхагѡ завѣ́та средѝ і҆ꙋде́євъ сохрани́вый: ра́дꙋйсѧ, пле́велы заблꙋжде́нїй во дни̑ но́выѧ бл҃года́ти мно́гажды и҆скорени́вый.
Ра́дꙋйсѧ, ꙗ҆зы́ческихъ прорица́лищъ и҆ кꙋмі́рѡвъ и҆стреби́телю: ра́дꙋйсѧ, хрⷭ҇тїа́нскихъ подви́жникѡвъ и҆ страстоте́рпцєвъ ᲂу҆крѣпи́телю.
Ра́дꙋйсѧ, немощны̑ѧ дꙋ́хомъ си́лою бл҃года́ти бж҃їей и҆сполнѧ́ѧй: ра́дꙋйсѧ, и҆знемога́ющыѧ пло́тїю всеѻрꙋ́жїемъ вѣ́ры ѡ҆блека́ѧй.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ в҃і.
Бл҃года́ть ѿ бг҃а съ нб҃сѐ и҆спросѝ на́мъ, пою́щымъ во сла́вꙋ всечестна́гѡ и҆́мене твоегѡ̀, мїхаи́ле, да, ѡ҆сѣнѧ́еми твои́мъ застꙋпле́нїемъ, во всѧ́комъ бл҃гоче́стїи и҆ чистотѣ̀ поживе́мъ, до́ндеже ѿрѣшє́ннїи сме́ртїю ѿ ᲂу҆́зъ пло́ти, сподо́бимсѧ предста́ти ѻ҆гнезра́чномꙋ прⷭ҇то́лꙋ цр҃ѧ̀ сла́вы, и҆ съ ли̑ки а҆́гг҃льскими возопи́ти: А҆ллилꙋ́їа.
І҆́косъ в҃і.
Пою́ще многоѡбра̑знаѧ твоѧ̑ чꙋдеса̀, мїхаи́ле, во сп҃се́нїе на́ше содѣ́ѧннаѧ, мо́лимъ гдⷭ҇а и҆ влⷣкꙋ всѧ́ческихъ, да дꙋ́хъ ре́вности по сла́вѣ бж҃їей, и҆́же въ тебѣ̀, николи́же ѡ҆скꙋдѣ́етъ и҆ въ на́съ, зовꙋ́щихъ тѝ си́це:
Ра́дꙋйсѧ, вѣ́рныхъ рабѡ́въ бж҃їихъ, во вре́мѧ бл҃гопотре́бнѡ, на высотꙋ̀ вла́сти преди́внѣ поставлѧ́ѧй: ра́дꙋйсѧ, проде́рзыхъ и҆ недосто́йныхъ съ высоты̀ си́лы и҆ сла́вы незри́мѡ низлага́ѧй.
Ра́дꙋйсѧ, въ де́нь послѣ́днїй и҆збра́нныхъ ѿ четы́рехъ концє́въ землѝ и҆мѣ́ѧй собра́ти: ра́дꙋйсѧ, и҆́мже грѣ́шнїи, ꙗ҆́кѡ пле́велы, по гла́сꙋ бж҃їю, ѻ҆гню̀ вѣ́чномꙋ пре́дани бꙋ́дꙋтъ.
Ра́дꙋйсѧ, и҆́мже сатана̀ со а҆́ггєлы є҆гѡ̀ во є҆́зеро ѻ҆́гненное на вѣ́ки пове́ргнетсѧ: ра́дꙋйсѧ, и҆̀мже првⷣнїи во ѡ҆би́телехъ ѻ҆ц҃а̀ нбⷭ҇нагѡ пресла́внѣ водворѧ́тсѧ.
Ра́дꙋйсѧ, мїхаи́ле, вели́кїй а҆рхїстрати́же, со всѣ́ми нбⷭ҇ными си́лами.
Конда́къ г҃і.
Ѽ пречꙋ́дный а҆рха́гг҃лѡвъ и҆ а҆́гг҃лѡвъ нача́льниче, за преди́вное слꙋже́нїе твоѐ сп҃се́нїю ро́да чл҃вѣ́ческагѡ, прїимѝ ѿ на́съ возноси́мый къ тебѣ̀ ны́нѣ гла́съ хвалы̀, и҆ бл҃годаре́нїѧ, и҆ ꙗ҆́кѡ и҆спо́лнь си́лы бж҃їей, покры́й на́съ невеще́ственныма крило́ма твои́ма ѿ всѣ́хъ вра̑гъ ви́димыхъ и҆ неви́димыхъ, да прославлѧ́емомꙋ тобо́ю и҆ просла́вившемꙋ тѧ̀ гдⷭ҇ꙋ вы́нꙋ зове́мъ: А҆ллилꙋ́їа.
Се́й конда́къ глаго́летсѧ три́жды, та́же і҆́косъ а҃-й и҆ конда́къ а҃-й.
Моли́тва.
Ст҃ы́й и҆ вели́кїй а҆рха́гг҃ле бж҃їй мїхаи́ле, неисповѣди́мыѧ и҆ пресꙋ́щественныѧ трⷪ҇цы пе́рвый во а҆́гг҃лѣхъ предстоѧ́телю, ро́да же человѣ́ческагѡ приста́вниче и҆ храни́телю, сокрꙋши́вый съ вѡ́инствы свои́ми главꙋ̀ прего́рдагѡ денни́цы на нб҃сѝ и҆ посрамлѧ́ѧй вы́нꙋ ѕло́бꙋ и҆ кова́рства є҆гѡ̀ на землѝ! Къ тебѣ̀ прибѣга́емъ съ вѣ́рою и҆ тебѣ̀ мо́лимсѧ съ любо́вїю: бꙋ́ди щи́тъ несокрꙋши́мъ и҆ забра́ло тве́рдо ст҃ѣ́й це́ркви и҆ правосла́вномꙋ ѻ҆те́чествїю на́шемꙋ, ѡ҆гражда́ѧ и҆̀хъ молнїено́снымъ мече́мъ твои́мъ ѿ всѣ́хъ вра̑гъ, ви́димыхъ и҆ неви́димыхъ. Не ѡ҆ста́ви же, ѽ а҆рха́гг҃ле бж҃їй, по́мощїю и҆ застꙋпле́нїемъ твои́мъ и҆ на́съ, прославлѧ́ющихъ дне́сь ст҃о́е и҆́мѧ твоѐ: се́ бо, а҆́ще и҆ многогрѣ́шни є҆смы̀, ѻ҆ба́че не хо́щемъ въ беззако́нїихъ на́шихъ поги́бнꙋти, но є҆́же ѡ҆брати́тисѧ ко гдⷭ҇ꙋ и҆ ѡ҆живлє́ннымъ бы́ти ѿ негѡ̀ на дѣла̀ бл҃га́ѧ. Ѡ҆зарѝ ᲂу҆́бѡ ᲂу҆́мъ на́шъ свѣ́томъ лица̀ бж҃їѧ, и҆́же вы́нꙋ сїѧ́етъ на молнїеви́днемъ челѣ̀ твое́мъ, да возмо́жемъ разꙋмѣ́ти, что́ є҆сть во́лѧ бж҃їѧ ѡ҆ на́съ бл҃га́ѧ и҆ соверше́ннаѧ, и҆ вѣ́дѣти всѧ̑, ꙗ҆́же подоба́етъ на́мъ твори́ти и҆ ꙗ҆́же презира́ти и҆ ѡ҆ставлѧ́ти. Оу҆крѣпѝ бл҃года́тїю гдⷭ҇нею сла́бꙋю во́лю и҆ немощно́е произволе́нїе на́ше, да, ᲂу҆тверди́вшесѧ въ зако́нѣ гдⷭ҇немъ, преста́немъ про́чее вла́ѧтисѧ земны́ми пѡ́мыслы и҆ похотѣ̑нїи пло́ти, ᲂу҆влека́ющесѧ, по подо́бїю несмы́сленныхъ дѣте́й, скороги́бнꙋщими красота́ми мі́ра сегѡ̀, ꙗ҆́кѡ ра́ди тлѣ́ннаго и҆ земна́го безꙋ́мнѣ забыва́ти вѣ̑чнаѧ и҆ нбⷭ҇наѧ. Над̾ всѣ́ми же си́ми и҆спросѝ на́мъ свы́ше дх҃ъ и҆́стиннагѡ покаѧ́нїѧ, нелицемѣ́рнꙋю печа́ль по бз҃ѣ и҆ сокрꙋше́нїе ѡ҆ грѣсѣ́хъ на́шихъ, да ѡ҆стаю́щее на́мъ число̀ дне́й вре́меннагѡ живота̀ на́шегѡ и҆ждиве́мъ не во ᲂу҆гожде́нїи чꙋ́вствъ и҆ рабо́тѣ страстє́мъ на́шимъ, но во и҆зглажде́нїи ѕѡ́лъ, содѣ́ѧнныхъ на́ми, слеза́ми вѣ́ры и҆ сокрꙋше́нїѧ серде́чнагѡ, по́двигами чⷭ҇тоты̀ и҆ ст҃ы́ми дѣла́ми млⷭ҇рдїѧ. Є҆гда́ же прибли́зитсѧ ча́съ ѡ҆конча́нїѧ на́шегѡ, ѡ҆свобожде́нїѧ ѿ ᲂу҆́зъ бре́ннагѡ сегѡ̀ тѣлесѐ, не ѡ҆ста́ви на́съ, а҆рха́гг҃ле бж҃їй, беззащи́тныхъ проти́вꙋ дꙋхѡ́въ ѕло́бы поднебе́сныхъ, ѡ҆бы́кшихъ прегражда́ти дꙋшѐ человѣ́честѣй восхо́дъ въ гѡ́рнѧѧ, да, ѡ҆хранѧ́еми тобо́ю, безпреткнове́ннѣ дости́гнемъ ѻ҆́ныхъ пресла́вныхъ селе́нїй ра́йскихъ, и҆дѣ́же нѣ́сть печа́ль, ни воздыха́нїе, но жи́знь безконе́чнаѧ, и҆, сподо́бльшесѧ ᲂу҆зрѣ́ти пресвѣ́тлое лицѐ всебл҃га́го гдⷭ҇а и҆ влⷣки на́шегѡ, па́дше со слеза́ми ᲂу҆ но́гъ є҆гѡ̀, въ ра́дости и҆ ᲂу҆миле́нїи воскли́кнемъ: сла́ва тебѣ̀, дража́йшїй и҆скꙋпи́телю на́шъ, и҆́же за премно́гꙋю любо́вь твою̀ къ на́мъ, недостѡ́йнымъ, бл҃говоли́лъ є҆сѝ посла́ти а҆́гг҃лы твоѧ̀ въ слꙋже́нїе сп҃се́нїю на́шемꙋ! А҆ми́нь.