Акафист Пресвятой Богородице пред иконой «Знамение» Новгородская

Взбра́ннѣй воево́дѣ, влⷣчцѣ на́шей бцⷣѣ, зна́менїемъ і҆кѡ́ны є҆ѧ̀ ст҃ы́ѧ ди́внꙋю побѣ́дꙋ лю́демъ нова́града дарова́вшей, благода́рственное возглаша́емъ пѣ́нїе. Ты́ же, всебл҃га́ѧ застꙋ́пнице на́ша, ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ и҆ ѿ вра̑гъ ви́димыхъ и҆ неви́димыхъ защитѝ, да зове́мъ тѝ:

А҆́гг҃лѡвъ цр҃и́це и҆ всеѧ̀ тва́ри влⷣчце, пречтⷭ҇аѧ дв҃о бцⷣе, пресла́внымъ зна́менїемъ і҆кѡ́ны твоеѧ̀ ст҃ы́ѧ всю̀ странꙋ̀ рѡссі́йскꙋю бл҃года́тнѡ ѡ҆зари́ла є҆сѝ и҆ стрꙋи̑ чꙋде́съ ѿ неѧ̀ и҆сточи́ла є҆сѝ вѣ̑рнымъ. Тѣ́мже, со ᲂу҆се́рдїемъ и҆ любо́вїю припа́дающе ко пречтⷭ҇но́мꙋ твоемꙋ̀ ѡ҆́бразꙋ, со ᲂу҆миле́нїемъ прино́симъ тѝ бл҃гохвалє́нїѧ сицева̑ѧ:

Ви́дѣвъ ѡ҆ѕлобле́нїе нова́града, крѣ́пцѣ вою́емагѡ ѿ во́євъ сꙋ́ждальскихъ, ст҃и́тель хрⷭ҇то́въ і҆ѡа́ннъ сле́знѡ молѧ́шесѧ ѡ҆ и҆збавле́нїи и҆ спасе́нїи гра́да и҆ ᲂу҆слы́ша гла́съ свы́ше, да и҆́детъ во хра́мъ преѡбраже́нїѧ гдⷭ҇нѧ и҆, взе́мъ та́мѡ і҆кѡ́нꙋ прест҃ы́ѧ бцⷣы, да и҆знесе́тъ ю҆̀ на забра̑ла гра́да проти́вꙋ по́лчищъ, є҆гѡ̀ вою́ющихъ. Таково́е велѣ́нїе бж҃їе ᲂу҆слы́шавъ, ст҃и́тель благода́рственнѡ возопѝ сп҃сꙋ хрⷭ҇тꙋ̀: А҆ллилꙋ́їа.

Разꙋмѣ́въ во́лю бж҃їю во гла́сѣ нбⷭ҇нѣмъ, ст҃и́тель хрⷭ҇то́въ і҆ѡа́ннъ прїи́де ко хра́мꙋ преѡбраже́нїѧ гдⷭ҇нѧ взѧ́ти і҆кѡ́нꙋ бг҃омт҃ре, и҆ є҆гда̀ молѧ́шесѧ пред̾ не́ю, подви́жесѧ і҆кѡ́на ѿ мѣ́ста своегѡ̀ на рꙋ́цѣ є҆гѡ̀ чєстны́ѧ, и҆ то́й съ пѣ́нїемъ моле́бнымъ и҆знесѐ ю҆̀ на забра̑ла гра́да, глаго́лѧ наро́дꙋ: дерза́йте, мт҃и бо бг҃а на́шегѡ съ на́ми є҆́сть. Сегѡ̀ ра́ди, ви́дѣвше твоѐ къ ни̑мъ бл҃говоле́нїе, въ прише́ствїи чꙋде́снѣмъ і҆кѡ́ны твоеѧ̀ ꙗ҆вле́нное, въ пѣ́снехъ возглаша́емъ бл҃гохвалє́нїѧ сицева̑ѧ:

Си́лою бж҃їею ᲂу҆крѣпле́нъ, ст҃и́тель хрⷭ҇то́въ і҆ѡа́ннъ вознесѐ ст҃ꙋ́ю і҆кѡ́нꙋ твою̀, влⷣчце бцⷣе, посредѣ̀ са́мыѧ бра́ни, и҆дѣ́же стрѣ́лы ѿ сопроти́вныхъ, ꙗ҆́кѡ до́ждь, па́дахꙋ, и҆ є҆ди́на ѿ ни́хъ чтⷭ҇ны́й ли́къ тво́й на і҆кѡ́нѣ ᲂу҆стрѣлѝ: а҆́бїе же і҆кѡ́на твоѧ̀ ли́къ сво́й ѿ полкѡ́въ вражде́бныхъ ѿвратѝ и҆ сле́зы ѿ ѻ҆че́съ и҆сточѝ, и҆̀хже собира́ѧ въ фелѡ́нь свою̀, ст҃и́тель хрⷭ҇то́въ і҆ѡа́ннъ наро́дѡмъ дерза́ти повелѣ̀: ѻ҆ни́ же, ꙗ҆́кѡ крѣ́пка нѣ́коегѡ храни́телѧ и҆мꙋ́ще, на сопроти̑вныѧ ᲂу҆стреми́шасѧ и҆ до конца̀ побѣди́ша тѣ́хъ, зовꙋ́ще гдⷭ҇ꙋ си́лъ: А҆ллилꙋ́їа.

И҆мѣ́ѧше тѧ̀ вои́стинꙋ вели́кїй но́вградъ вои́тельницꙋ держа́внꙋю, бг҃ороди́тельнице всебл҃га́ѧ, є҆гда̀, па́че надѣ́ѧнїѧ, зна́менїемъ і҆кѡ́ны твоеѧ̀ ст҃ы́ѧ побѣди́ти си̑льныѧ полкѝ сопроти́вныхъ лю́демъ нова́града помогла̀ є҆сѝ. Тѣ́мже, пѣ́нїе побѣ́дное тебѣ̀ приносѧ́ще, взыва́емъ си́це:

Бꙋ́рѧ недоꙋме́нїѧ смꙋща́етъ мѝ ᲂу҆́мъ: ка́кѡ возмогꙋ̀ недосто́йными ᲂу҆сты̑ воспѣ́ти чꙋдеса̀ твоѧ̑, бг҃омт҃и влⷣчце, ꙗ҆̀же ст҃о́ю і҆кѡ́ною зна́менїѧ твоегѡ̀ въ новѣ́градѣ ꙗ҆ви́ла є҆сѝ, дарова́въ ю҆̀ въ по́мощь и҆ застꙋпле́нїе всѣ̑мъ правосла́внымъ лю́демъ ѿ вра́гъ ви́димыхъ и҆ неви́димыхъ: тѣ́мже, велича́юще неизчє́тныѧ млⷭ҇ти твоѧ̑ къ на́мъ смиренномꙋ́дреннѣ воспѣва́емъ просла́вльшемꙋ тѧ̀ сн҃ꙋ твоемꙋ̀ и҆ бг҃ꙋ: А҆ллилꙋ́їа.

Слы́шавше ѡ҆ ди́внѣмъ чꙋдесѝ ст҃ы́ѧ і҆кѡ́ны зна́менїѧ твоегѡ̀ въ новѣ́градѣ, пречтⷭ҇аѧ дв҃о, ка́кѡ лю́дїе новогра́дстїи, и҆мꙋ́ще сїю̀, си́лою твое́ю и҆ посо́бїемъ бжⷭ҇твеннагѡ зра́ка твоегѡ̀ пресла́вное ѡ҆долѣ́нїе на сопроти́вныѧ показа́ша, со бл҃гоговѣ́нїемъ и҆ ра́достїю покланѧ́емсѧ семꙋ̀ чꙋ́дномꙋ ѡ҆́бразꙋ твоемꙋ̀ и҆ хвале́бнѣ зове́мъ тѝ:

Бг҃освѣ́тлаѧ ѕвѣзда̀ і҆кѡ́на зна́менїѧ твоегѡ̀, бцⷣе дв҃о, вели́кїй но́вградъ сїѧ́нїемъ мно́гихъ чꙋде́съ дꙋхо́внѡ просвѣтѝ, неѡскꙋ́днѡ и҆сточа́ющи бл҃года̑тныѧ и҆сцѣле́нїѧ всѣ̑мъ вѣ̑рнымъ, со ᲂу҆се́рдїемъ къ не́й притека́ющымъ. Не лишѝ и҆ на́съ бл҃года́тнагѡ твоегѡ̀ ѡ҆заре́нїѧ и҆ млⷭ҇рдыхъ щедрѡ́тъ твои́хъ, бг҃олѣ́пнымъ поклоне́нїемъ чествꙋ́ющихъ чꙋдотво́рнꙋю і҆кѡ́нꙋ твою̀, да бл҃года́рственнѡ воспѣва́емъ бг҃ꙋ: А҆ллилꙋ́їа.

Ви́дѣвше чꙋдеса̀ пресла̑внаѧ, ѿ і҆кѡ́ны зна́менїѧ твоегѡ̀ бы̑вшаѧ, влⷣчце пребл҃га́ѧ, лю́дїе нова́града со ᲂу҆се́рдїемъ къ не́й притека́хꙋ и҆ въ недꙋ́зѣхъ свои́хъ и҆сцѣле́нїѧ бл҃года̑тнаѧ ѿ неѧ̀ прїе́млѧхꙋ. Къ не́йже ны́нѣ приходѧ́ще, покланѧ́емсѧ, и҆ чествꙋ́емъ, и҆ ѿ жела́нїѧ се́рдца цѣлꙋ́емъ, и҆сцѣле́нїй бл҃года́ть почерпа́юще, и҆ недꙋ́гъ тѣле́сныхъ, и҆ дꙋше́вныхъ страсте́й свобожда́емсѧ, зовꙋ́ще тѝ и҆ глаго́люще:

Проповѣ́дꙋетъ новгра́дъ пресла́вное застꙋпле́нїе твоѐ, пречтⷭ҇аѧ влⷣчце, ка́кѡ во дни̑ наше́ствїѧ врагѡ́въ си́льныхъ и҆ воѡрꙋже́нныхъ ѿ ст҃ы́ѧ і҆кѡ́ны зна́менїѧ твоегѡ̀ по́мощь твою̀ бл҃года́тнꙋю лю́демъ твои̑мъ дарова́ла є҆сѝ, враждє́бныѧ полкѝ со стꙋдо́мъ вспѧ́ть ѡ҆брати́ла є҆сѝ, гра́дъ же тво́й цѣ́лъ и҆ невреди́мъ ѿ ни́хъ сохра́нши, да всѝ пою́тъ сп҃си́телю бг҃ꙋ: А҆ллилꙋ́їа.

Возсїѧ́ла є҆сѝ лꙋча́ми вели́кихъ чꙋде́съ въ новѣ́градѣ, бцⷣе дв҃о, и҆ і҆кѡ́нꙋ зна́менїѧ твоегѡ̀ бл҃года́тнымъ и҆сточе́нїемъ сле́зъ ди́внѡ просла́вила є҆сѝ, неизчє́тныѧ млⷭ҇ти ѿ неѧ̀ ще́дрѡ подава́ющи всѣ̑мъ скорбѧ́щымъ и҆ ѡ҆бременє́ннымъ. Посѣтѝ ᲂу҆̀бо и҆ дꙋ́шы на́шѧ, недꙋ́гꙋющїѧ страстьмѝ грѣхо́вными, гпⷭ҇жѐ всебл҃га́ѧ, и҆ бꙋ́ди на́мъ помо́щница во сп҃се́нїе, да бл҃года́рственнѡ тебѣ̀ зове́мъ:

Хотѧ́щи ꙗ҆ви́ти, влⷣчце, не то́кмѡ вели́комꙋ новꙋ́градꙋ, но и҆ всемꙋ̀ правосла́вномꙋ рѡссі́йскомꙋ жи́тельствꙋ пресла̑внаѧ чꙋдеса̀ твоѧ̑ ѿ і҆кѡ́ны зна́менїѧ твоегѡ̀, сїю̀ во мно́гихъ градѣ́хъ, ѡ҆би́телехъ и҆ ве́сехъ ѿ лѣ́тъ дре́внихъ до дні́й на́шихъ ди́вными чꙋдесы̀ просла́вила є҆сѝ: слѣпы̑мъ прозрѣ́нїе, разсла́блєннымъ ᲂу҆крѣпле́нїе и҆ мнѡ́гимъ болѧ́щымъ и҆сцѣле́нїе млⷭ҇тивнѡ ѿ неѧ̀ да́рꙋющи и҆ си́мъ подвиза́ющи лю́ди велича́ти тѧ̀, возвели́чившꙋю ро́дъ на́шъ, и҆ пѣ́ти хрⷭ҇тꙋ̀ бг҃ꙋ: А҆ллилꙋ́їа.

Но́вградъ и҆ всю̀ зе́млю рѡссі́йскꙋю ди́внаѧ і҆кѡ́на зна́менїѧ твоегѡ̀, бцⷣе дв҃о, чꙋдесы̀ бл҃года́тными ѡ҆сїѧ̀, млⷭ҇ти твоѧ̑ бога̑тыѧ вѣ̑рнымъ проѧви́вши. Сїю̀ ᲂу҆́бѡ бг҃олѣ́пнымъ поклоне́нїемъ чествꙋ́юще, хвале́бнѡ тебѣ̀, влⷣчце, взыва́емъ:

Стра́нствꙋюще въ ю҆до́ли се́й земно́й, многоско́рбнѣй и҆ многомѧте́жнѣй, го́рнѧгѡ гра́да і҆ерⷭ҇ли́ма нбⷭ҇нагѡ взыскꙋ́емъ и҆ тебѐ, влⷣчце, мо́лимъ: пꙋтево́дствꙋй на́мъ по стезѝ за́повѣдей хрⷭ҇то́выхъ и҆ сохранѝ на́съ ѿ паде́нїй грѣхо́вныхъ, ᲂу҆дивѝ на на́съ млⷭ҇ть твою̀ и҆ ѡ҆сѣнѝ на́съ твои́мъ застꙋпле́нїемъ, да, твое́ю по́мощїю сп҃са́еми, сподо́бимсѧ кꙋ́пнѡ со всѣ́ми ст҃ы́ми воспѣва́ти бг҃ꙋ: А҆ллилꙋ́їа.

Всѣ́хъ скорбѧ́щихъ ᲂу҆тѣ́шительнице и҆ бѣ́дствꙋющихъ помо́щнице, всебл҃га́ѧ бг҃ороди́тельнице, не пре́зри на́съ, припа́дающихъ къ тебѣ̀ пред̾ пречⷭ҇тымъ ѡ҆́бразомъ твои́мъ, но посѣтѝ на́съ млⷭ҇тивнѡ щедро́тами твои́ми: и҆, ꙗ҆́кѡже дре́вле ѻ҆тцє́мъ на́шымъ по́мощь твою̀ держа́внꙋю ꙗ҆ви́ла є҆сѝ, та́кѡ и҆ на́съ, смире́нныхъ, не лишѝ твоегѡ̀ застꙋпле́нїѧ во вре́мѧ бл҃гопотре́бнѡ, да не постыди́мсѧ во ᲂу҆пова́нїи на́шемъ, є҆́же по бз҃ѣ крѣ́пкѡ на тѧ̀ возлага́емъ и҆ зове́мъ тѝ:

Всѧ̑ а҆́гг҃льскїѧ вѡ́инства бл҃гоговѣ́йнѡ тебѣ̀ слꙋ́жатъ, нб҃сѐ и҆ землѝ цр҃и́це, человѣ́ческїй же ро́дъ немѡ́лчныѧ хвалы̀ тебѣ̀ прино́ситъ, го́рнихъ и҆ до́льнихъ влⷣчце, и҆ твою̀ ст҃ꙋ́ю і҆кѡ́нꙋ поклоне́нїемъ досточе́стнымъ почита́етъ. Сїю́ бо во ѿра́дꙋ и҆ ᲂу҆тѣше́нїе на́мъ дарова́ла є҆сѝ, всебл҃га́ѧ, и҆ зна́менїѧ мт҃рнїѧ любвѐ твоеѧ̀ ѻ҆́ною на́мъ прⷭ҇нѡ ꙗ҆влѧ́еши, да пое́мъ тобо́ю бл҃годѣ́ющемꙋ на́мъ бг҃ꙋ: А҆ллилꙋ́їа.

Вѣті̑и сꙋемꙋ́дреннїи человѣ́честїи не мо́гꙋтъ пости́гнꙋти бжⷭ҇твеннꙋю та́йнꙋ прⷭ҇нодв҃ства твоегѡ̀, мр҃і́е бцⷣе, ка́кѡ въ ржⷭ҇твѣ̀ и҆ по ржⷭ҇твѣ̀ ключѝ двⷭ҇тва твоегѡ̀ цѣ̑лы сохрани́ла є҆сѝ, а҆́гг҃лѡвъ и҆ человѣ́кѡвъ ᲂу҆диви́вши. тѣ́мже тѧ̀ бл҃гоче́стнѡ мт҃рь и҆ дв҃ꙋ и҆сповѣ́дꙋюще, прⷭ҇нѡ тѧ̀ ᲂу҆блажа́емъ и҆ хвале́бнѡ тебѣ̀ воспѣва́емъ:

Сп҃си́телѧ па́дшемꙋ человѣ́чествꙋ родила̀ є҆сѝ, пречтⷭ҇аѧ дв҃о, и҆ сего̀, ꙗ҆́кѡ младе́нца, во ѡ҆б̾ѧ́тїихъ твои́хъ носи́ла є҆сѝ. Є҆гѡ́же бжⷭ҇твенное и҆з̾ѡбраже́нїе и҆ на і҆кѡ́нѣ зна́менїѧ твоегѡ̀ на́мъ ꙗ҆влѧ́еши и҆ мнѡ́гїѧ млⷭ҇ти и҆ щедрѡ́ты твоѧ̑ на́мъ да́рꙋеши. Сегѡ̀ ра́ди со бл҃гоговѣ́нїемъ и҆ вѣ́рою чествꙋ́емъ ѡ҆́бразъ чꙋдотво́рный тво́й, влⷣчце, и҆ мо́лимсѧ тебѣ̀ приле́жнѡ: бꙋ́ди на́мъ покро́въ и҆ защи́та въ де́нь сꙋ́дный, да твои́мъ мт҃рнимъ предста́тельствомъ поми́лꙋетъ на́съ сꙋдїѧ̀ првⷣный, сн҃ъ тво́й и҆ бг҃ъ, и҆ сподо́битъ на́съ десна́гѡ стоѧ́нїѧ и҆ пѣ́нїѧ є҆мꙋ̀ со и҆збра́нными: А҆ллилꙋ́їа.

Стѣна̀ неѡбори́маѧ и҆ и҆сто́чникъ чꙋде́съ і҆кѡ́на твоѧ̀ ст҃а́ѧ ꙗ҆ви́сѧ, бцⷣе дв҃о, не то́кмѡ вели́комꙋ новꙋ́градꙋ, но и҆ все́й странѣ̀ рѡссі́йстѣй. Сїю̀, ꙗ҆́кѡ зна́менїе побѣ́дное, и҆мꙋ́ще, вѡ́инства правосла̑вныѧ врагѡ́въ побѣжда́ютъ, и҆ ст҃и́телїе є҆́ю бл҃гоꙋкраша́ютсѧ, и҆ всѧ́къ во́зрастъ вѣ́рныхъ ᲂу҆тѣше́нїе бл҃года́тное ѿ неѧ̀ прїе́млетъ. Оу҆тѣ́ши и҆ на́съ твои́мъ, всемлⷭ҇тиваѧ влⷣчце, бл҃говоле́нїемъ и҆ млⷭ҇тїю, да хвале́бнѡ взыва́емъ къ тебѣ̀:

Пѣ́нїе на́ше смире́нное не пре́зри, всемлⷭ҇тиваѧ цр҃и́це, и҆ ᲂу҆тро́бꙋ щедро́тъ твои́хъ не затворѝ на́мъ, всеще́драѧ влⷣчце: се́ бо, ѡ҆бнища́вше въ до́брыхъ дѣ́лѣхъ, къ сокро́вищницѣ млⷭ҇ти твоеѧ̀, чꙋдотво́рнѣй і҆кѡ́нѣ твое́й, со ᲂу҆се́рдїемъ притека́емъ, всебл҃га́ѧ, и҆ припа́дающе мо́лимсѧ: ѡ҆зарѝ на́съ свѣ́томъ бжⷭ҇твенныѧ блгⷣти твоеѧ̀ и҆ наꙋчѝ на́съ вѣ́рнѡ и҆сполнѧ́ти за́пѡвѣди сн҃а твоегѡ̀ и҆ бг҃а, да досто́йнѡ возмо́жемъ пѣ́ти є҆мꙋ̀: А҆ллилꙋ́їа.

Свѣ́та невече́рнѧгѡ прїѧ́телище, свѣ́тлыми лꙋча́ми чꙋде́съ твои́хъ просвѣща́еши на́съ, помраче́нныхъ грѣхо́вною мгло́ю, бг҃ороди́тельнице пречтⷭ҇аѧ, и҆ приво́диши къ немо́лчномꙋ славосло́вїю твоегѡ̀ прест҃а́гѡ и҆́мене. Зна́менїемъ і҆кѡ́ны твоеѧ̀ ст҃ы́ѧ вои́стинꙋ ꙗ҆ви́ла є҆сѝ воево́дство твоѐ держа́вное, гпⷭ҇жѐ всебл҃га́ѧ, є҆го́же свѣ́тлѡ пра́зднꙋюще, ра́достнѡ зове́мъ тѝ:

Блгⷣть и҆ млⷭ҇ть свы́ше пода́ждь на́мъ, влⷣчце, ѿ і҆кѡ́ны твоеѧ̀ ст҃ы́ѧ, ю҆́же въ зна́менїе застꙋпле́нїѧ твоегѡ̀ на́мъ дарова́ла є҆сѝ, чꙋдесы̀, ѿ неѧ̀ быва́ющими, правосла́внꙋю вѣ́рꙋ въ на́съ ᲂу҆твержда́ющи, невѣ́рїе же посрамлѧ́ющи. Тѣ́мже покланѧ́емсѧ тебѣ̀ и҆ мо́лимсѧ: въ правосла́вїи соблюдѝ на́съ, всебл҃га́ѧ, и҆ сподо́би до коне́чнагѡ дыха́нїѧ на́шегѡ вѣ́рнѡ пѣ́ти бг҃ꙋ: А҆ллилꙋ́їа.

Пою́ще чꙋдеса̀ твоѧ̑ ѿ і҆кѡ́ны зна́менїѧ твоегѡ̀ ꙗ҆влє́ннаѧ, бцⷣе дв҃о, хва́лимъ, сла́вимъ и҆ велича́емъ тѧ̀, чтⷭ҇нѣ́йшꙋю вои́стинꙋ херꙋві̑мъ и҆ сла́внѣйшꙋю без̾ сравне́нїѧ серафі̑мъ. Ты́ же, всебл҃га́ѧ застꙋ́пнице на́ша, покры́й на́съ держа́внымъ твои́мъ покро́вомъ и҆ и҆зба́ви на́съ ѿ всѧ́кихъ бѣ́дъ и҆ и҆скꙋше́нїй вра́жїихъ, да воспѣва́емъ тебѣ̀ непреста́ннѡ гла́сомъ хвале́нїѧ:

Ѽ, всепѣ́таѧ мт҃и сладча́йшагѡ сп҃си́телѧ на́шегѡ, гдⷭ҇а і҆и҃са хрⷭ҇та̀! Ны́нѣшнее на́ше прїе́мши приноше́нїе, ѿ всѧ́кїѧ и҆зба́ви на́съ напа́сти и҆ ско́рби, и҆ вѣ́чныѧ и҆змѝ мꙋ́ки всѣ́хъ пред̾ ст҃о́ю і҆кѡ́ною твое́ю съ вѣ́рою и҆ любо́вїю покланѧ́ющихсѧ и҆ ѡ҆ тебѣ̀ бл҃года́рнѡ зовꙋ́щихъ бг҃ꙋ: А҆ллилꙋ́їа.

А҆́гг҃лѡвъ цр҃и́це и҆ всеѧ̀ тва́ри влⷣчце, пречтⷭ҇аѧ дв҃о бцⷣе, пресла́внымъ зна́менїемъ і҆кѡ́ны твоеѧ̀ ст҃ы́ѧ всю̀ странꙋ̀ рѡссі́йскꙋю бл҃года́тнѡ ѡ҆зари́ла є҆сѝ и҆ стрꙋи̑ чꙋде́съ ѿ неѧ̀ и҆сточи́ла є҆сѝ вѣ̑рнымъ. Тѣ́мже, со ᲂу҆се́рдїемъ и҆ любо́вїю припа́дающе ко пречтⷭ҇но́мꙋ твоемꙋ̀ ѡ҆́бразꙋ, со ᲂу҆миле́нїемъ прино́симъ тѝ бл҃гохвалє́нїѧ сицева̑ѧ:

Взбра́ннѣй воево́дѣ, влⷣчцѣ на́шей бцⷣѣ, зна́менїемъ і҆кѡ́ны є҆ѧ̀ ст҃ы́ѧ ди́внꙋю побѣ́дꙋ лю́демъ нова́града дарова́вшей, благода́рственное возглаша́емъ пѣ́нїе. Ты́ же, всебл҃га́ѧ застꙋ́пнице на́ша, ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ и҆ ѿ вра̑гъ ви́димыхъ и҆ неви́димыхъ защитѝ, да зове́мъ тѝ:

Ѽ, прест҃а́ѧ и҆ преблгⷭ҇ве́ннаѧ мт҃и сладча́йшагѡ гдⷭ҇а на́шегѡ і҆и҃са хрⷭ҇та̀! Припа́даемъ и҆ покланѧ́емсѧ тебѣ̀ пред̾ ст҃о́ю чꙋдотво́рною і҆кѡ́ною твое́ю, воспомина́юще ди́вное зна́менїе твоегѡ̀ застꙋпле́нїѧ, вели́комꙋ новꙋ́градꙋ ѿ неѧ̀ ꙗ҆вле́нное во дни̑ ра́тнагѡ на се́й гра́дъ наше́ствїѧ. Смире́ннѡ мо́лимъ тѧ̀, всеси́льнаѧ ро́да на́шегѡ застꙋ́пнице: ꙗ҆́коже дре́вле ѻ҆тцє́мъ на́шымъ на по́мощь ᲂу҆скори́ла є҆сѝ, та́кѡ и҆ ны́нѣ на́съ, немощны́хъ и҆ грѣ́шныхъ, сподо́би твоегѡ̀ мт҃рнѧгѡ застꙋпле́нїѧ и҆ бл҃гопопече́нїѧ. Сп҃сѝ и҆ сохранѝ, влⷣчце, под̾ кро́вомъ млⷭ҇ти твоеѧ̀ цр҃ковь ст҃ꙋ́ю, гра́дъ тво́й, всю̀ странꙋ̀ на́шꙋ правосла́внꙋю и҆ всѣ́хъ на́съ, припа́дающихъ къ тебѣ̀ съ вѣ́рою и҆ любо́вїю ᲂу҆миле́ннѡ просѧ́щихъ со слеза́ми твоегѡ̀ застꙋпле́нїѧ. Є҆́й, гпⷭ҇жѐ всемлⷭ҇тиваѧ! Оу҆млⷭ҇рдисѧ на ны̀, ѡ҆бꙋрева́ємыѧ грѣхѝ мно́гими, прострѝ ко хрⷭ҇тꙋ̀ гдⷭ҇ꙋ бг҃опрїи́мнѣи рꙋ́цѣ твоѝ и҆ предста́тельствꙋй за на́съ пред̾ бл҃гостїю є҆гѡ̀, просѧ́щи на́мъ проще́нїѧ прегрѣше́нїй на́шихъ, бл҃гоче́стнагѡ ми́рнагѡ житїѧ̀, бл҃гі́ѧ хрⷭ҇тїа́нскїѧ кончи́ны и҆ до́брагѡ ѿвѣ́та на стра́шнѣмъ сꙋдѣ̀ є҆гѡ̀, да, сп҃са́еми всеси́льными твои́ми къ немꙋ̀ мл҃твами, бл҃же́нство ра́йское ᲂу҆наслѣ́дꙋемъ и҆ со всѣ́ми ст҃ы́ми воспое́мъ пречтⷭ҇но́е и҆ великолѣ́пое и҆́мѧ достопокланѧ́емыѧ трⷪ҇цы, ѻ҆ц҃а̀, и҆ сн҃а, и҆ ст҃а́гѡ дх҃а, и҆ твоѐ ве́лїе къ на́мъ млⷭ҇рдїе во вѣ́ки вѣкѡ́въ. А҆ми́нь.