Акафист Пресвятой Богородице пред иконой «Неупиваемая Чаша»

И҆зрѧ́дное и҆ ди́вное вспоможе́нїе на́мъ дарова́сѧ, ѻ҆́бразъ тво́й чтⷭ҇ны́й, бцⷣе дв҃о, ꙗ҆́кѡ и҆зба́вльшесѧ ꙗ҆вле́нїемъ є҆гѡ̀ недꙋ́гѡвъ дꙋше́вныхъ и҆ тѣле́сныхъ и҆ ско́рбныхъ ѡ҆бстоѧ́нїй, бл҃года̑рныѧ хвалы̑ прино́симъ тѝ, всемлⷭ҇тиваѧ застꙋ́пнице. Ты́ же, гпⷭ҇жѐ, приклони́сѧ бл҃гоꙋтро́бнѡ къ на́шымъ воздыха́нїємъ и҆ во́плємъ сердє́чнымъ, и҆ и҆сцѣле́нїе пода́ждь стра́ждꙋщымъ, да съ вѣ́рою воззове́мъ тѝ:

А҆́гг҃льстїи чи́ни и҆ првⷣникѡвъ со́нми непреста́ннѡ сла́вѧтъ тѧ̀, цр҃и́цꙋ бцⷣꙋ, хода́таицꙋ ѡ҆ ро́дѣ человѣ́честѣмъ, въ беззако́нїихъ погрꙋже́ннѣмъ и҆ во грѣсѣ́хъ пребыва́ющемъ, да́рꙋеши бо на́мъ во ᲂу҆тѣше́нїе и҆ сп҃се́нїе млⷭ҇ть свою̀ чрез̾ чꙋдотвѡ́рныѧ і҆кѡ̑ны твоѧ̑, и҆̀хже, ꙗ҆́кѡ ѕвѣ́зды небє́сныѧ, по все́й землѝ на́шей зри́мъ. Ко є҆ди́номꙋ же ѿ си́хъ ѻ҆бразѡ́въ, неꙋпива́емаѧ ча́ша и҆менꙋ́емомꙋ, припа́дающе, и҆з̾ глꙋбины̀ се́рдца взыва́емъ тѝ:

Ви́дѧщи, пречⷭ҇таѧ влⷣчце, скѡ́рби сердє́чныѧ, мꙋ̑ки дꙋшє́вныѧ, покаѧ́нїе и҆́скреннее человѣ́кѡвъ, гꙋби́тельнымъ поро́комъ пїѧ́нства ѡ҆держи́мыхъ, бл҃говоли́ла є҆сѝ дарова́ти бг҃оспаса́емомꙋ гра́дꙋ се́рпꙋховꙋ млⷭ҇ть твою̀ ꙗ҆вле́нїемъ пречꙋ́днагѡ ѻ҆́браза твоегѡ̀, да всѝ, съ вѣ́рою и҆ сокрꙋше́ннымъ се́рдцемъ къ немꙋ̀ припа́дающїи и҆ и҆сцѣле́нїе ѿ тѧ́жкагѡ недꙋ́га своегѡ̀ ѡ҆брѣта́ющїи, ᲂу҆се́рднѡ вопїю́тъ бг҃ꙋ: А҆ллилꙋ́їа.

Разꙋмѣ́въ трикра́тное ꙗ҆вле́нїе прпⷣбнагѡ варлаа́ма и҆ повелѣ́нїе ѿ негѡ̀ во гра́дъ се́рпꙋховъ ше́ствовати, человѣ́къ нѣ́кїй, стра́стїю пїѧ́нства ѡ҆держи́мый, ѡ҆брѣ́те та́мѡ въ монастырѣ̀ і҆кѡ́нꙋ твою̀ ст҃ꙋ́ю, неꙋпива́емаѧ ча́ша и҆менꙋ́емꙋю. Мы́ же, ви́дѧще таково́е ѡ҆ на́съ грѣ́шныхъ попече́нїе, со бл҃гоговѣ́нїемъ воспѣва́емъ тѝ такова̑ѧ:

Си́ла вы́шнѧгѡ бл҃года́тїю влⷣчцы ᲂу҆крѣпѝ нѣ́коего человѣ́ка, недꙋ́гомъ пїѧ́нства стра́ждꙋщаго, є҆гда̀ то́й разсла́бленѣ и҆мы́й но́зѣ, потща́сѧ гра́да се́рпꙋхова дости́гнꙋти, повелѣ́нїе бцⷣы, чрез̾ прпⷣбнаго варлаа́ма рече́нное, и҆сполнѧ́ѧ. Ѡ҆брѣ́тъ же во гра́дѣ се́мъ і҆кѡ́нꙋ пречⷭ҇тыѧ бг҃омт҃ре, а҆́бїе и҆сцѣлѣ̀ ѿ недꙋ́га своегѡ̀, дꙋше́внагѡ и҆ тѣле́снагѡ, и҆ съ тре́петомъ воззва̀ бг҃ꙋ: А҆ллилꙋ́їа.

И҆мꙋ́ще и҆сто́чникъ неѡскꙋдѣва́емый, неꙋпива́емꙋю ча́шꙋ нбⷭ҇ныхъ дарова́нїй, не то́кмѡ лю́дїе гра́да се́рпꙋхова, но и҆ всѝ правосла́внїи хрⷭ҇тїа́не ѿ и҆ны́хъ градѡ́въ и҆ ве́сей, къ твоемꙋ̀ пречꙋ́дномꙋ ѻ҆́бразꙋ притека́юще и҆ пред̾ си́мъ и҆сцѣлє́нїѧ ѡ҆брѣта́юще, бл҃года́рными ᲂу҆сты̑ вопїю́тъ тѝ си́це:

Бꙋ́рю внꙋ́трь и҆мꙋ́ще помышле́нїй сꙋмни́тельныхъ, ѻ҆ба́че съ покаѧ́нїемъ и҆́скреннимъ къ твоемꙋ̀ неизрече́нномꙋ млⷭ҇рдїю притека́юще, пїѧ́нственною стра́стїю ѡ҆держи́мїи и҆сцѣле́нїе полꙋча́ютъ, и҆ ѿ всеѧ̀ дꙋшѝ зовꙋ́тъ рожде́нномꙋ ѿ тебє̀ сп҃си́телю на́шемꙋ: А҆ллилꙋ́їа.

Слы́ша гдⷭ҇ь тѧ̑жкїѧ скѡ́рби, вѡ́пли и҆ пла́чь же́нъ, ста́рицъ, дѣте́й, и҆́хже срѡ́дницы ѡ҆бꙋрева́еми сꙋ́ть пїѧ́нственною стра́стїю и҆лѝ безꙋ́мїемъ наркоти́ческимъ ѡ҆держи́ми, дарова̀ и҆̀мъ, пренепоро́чнаѧ, твою̀ і҆кѡ́нꙋ, ѿ неѧ́же всѝ просѧ́щїи ᲂу҆тѣше́нїе и҆ ра́дость дꙋхо́внꙋю ѡ҆брѣта́ютъ, и҆ вопїю́тъ тѝ со слеза́ми такова̑ѧ:

Бг҃оте́чнꙋю ѕвѣздꙋ̀, чтⷭ҇нꙋ́ю і҆кѡ́нꙋ твою̀, показа́ла є҆сѝ на́мъ, влⷣчце мі́ра, ю҆́же зрѧ́ще и҆ съ вѣ́рою серде́чною молѧ́щесѧ тебѣ̀, бцⷣе, глаго́лемъ: пїѧ́нствомъ и҆ и҆ны́ми недꙋ̑ги дꙋше́вными и҆лѝ тѣле́сными стра́ждꙋщыѧ и҆сцѣлѝ, вѣ̑рныѧ же наꙋчѝ воспѣва́ти хвалꙋ̀ бг҃ꙋ: А҆ллилꙋ́їа.

Ви́дѧще чꙋдеса̀ пресла̑внаѧ и҆ зна́мєнїѧ пречꙋ̑днаѧ, не то́кмѡ ѿ і҆кѡ́ны твоеѧ̀, бг҃омт҃и, во гра́дѣ се́рпꙋховѣ ꙗ҆вле́нныѧ, быва́ємаѧ, но и҆ ѿ ꙗ҆̀же по подо́бїю сеѧ̀ і҆кѡ́ны и҆з̾ѡбраже́нїй, припа́дающе къ ни̑мъ, смире́ннѡ глаго́лемъ тѝ:

Проповѣ́дꙋюще чꙋдеса̀ твоѧ̑, бг҃ороди́тельнице, мо́лимъ тѧ̀, пречⷭ҇таѧ, со слеза́ми: и҆зба́ви всѣ́хъ на́съ ѿ па́гꙋбнагѡ къ вїнопи́тїю пристра́стїѧ и҆ ѿ паде́нїй грѣхо́вныхъ, подвиза́ющи воспѣва́ти бг҃ови: А҆ллилꙋ́їа.

Возсїѧ̀ свѣ́тлость бжⷭ҇твенныѧ сла́вы ѿ і҆кѡ́ны твоеѧ̀, дв҃о бг҃оѻтрокови́це, и҆дѣ́же гдⷭ҇ь на́шъ і҆и҃съ хрⷭ҇то́съ ꙗ҆́кѡ млⷣнцъ зри́тсѧ, ѻ҆́бразъ та̑инъ свои́хъ пречⷭ҇тыхъ на́мъ ꙗ҆влѧ́ѧй, и҆ ѿ страсте́й ме́рзкихъ съ вѣ́рою притека́ющымъ и҆збавле́нїе да́рꙋетъ. Мы́ же тебѣ̀, пречⷭ҇тѣй є҆гѡ̀ мт҃ри, вы́нꙋ ѡ҆ на́съ сн҃а своего̀ ᲂу҆молѧ́ющей, гла́сы немѡ́лчныѧ прино́симъ сицевы̑ѧ:

Хотѧ̀ человѣ́къ нѣ́кїй возбл҃годари́ти тѧ̀, влⷣчце, и҆сцѣле́нїѧ ра́ди ѿ недꙋ́га пїѧ́нственнагѡ, ᲂу҆красѝ твою̀, бг҃омт҃и, пречꙋ́днꙋю і҆кѡ́нꙋ, во гра́дѣ се́рпꙋховѣ пребыва́ющꙋю, со бл҃годаре́нїемъ воспѣва́ѧ бг҃ꙋ: А҆ллилꙋ́їа.

Ди̑внаѧ чꙋдеса̀ ви́димъ, пречⷭ҇таѧ, ѿ і҆кѡ́ны твоеѧ̀ ст҃ы́ѧ: стра́стїю пїѧ́нства стра́ждꙋщїи, къ твоемꙋ̀ мт҃рнемꙋ предста́тельствꙋ прибѣга́юще, ѿ тѧ́жкагѡ недꙋ́га своегѡ̀ и҆збавлѧ́ютсѧ, и҆ хвалꙋ̀ тебѣ̀ приносѧ́ще, зовꙋ́тъ такова̑ѧ:

Стра́нно и҆ сꙋмни́тельно невѣ́рꙋющымъ слы́шати, ка́кѡ і҆кѡ́на твоѧ̀ ст҃а́ѧ бжⷭ҇твенныхъ и҆сцѣле́нїй и҆сточа́етъ стрꙋи̑. Мы́ же, ѻ҆́ной бл҃гоговѣ́йнѡ поклонѧ́ющесѧ, лобыза́емъ ю҆̀, вопїю́ще бг҃ꙋ: А҆ллилꙋ́їа.

Всѐ ᲂу҆пова́нїе стра́ждꙋщїи недꙋ́гомъ пїѧ́нства на тѧ̀, дв҃о чⷭ҇таѧ, возлага́ютъ: приклони́сѧ къ не́мощемъ на́шымъ, ᲂу҆врачꙋ́й стра̑сти, кто́ бо на́съ грѣ́шныхъ и҆зведе́тъ и҆з̾ ро́ва поги́бели, а҆́ще не ты̀, влⷣчце; сегѡ̀ ра́ди, колѣ̑на пред̾ твои́мъ чтⷭ҇ны́мъ ѻ҆́бразомъ прекло́ньше, воспѣва́емъ тѝ та́кѡ:

Всѧ́кое є҆стество̀ а҆́гг҃льское ᲂу҆диви́сѧ дѣ́лꙋ твоегѡ̀ млⷭ҇рдїѧ, гдⷭ҇и, ꙗ҆́кѡ дарова́лъ є҆сѝ грѣ́шномꙋ ро́дꙋ человѣ́ческомꙋ тве́рдꙋю застꙋ́пницꙋ и҆ помо́щницꙋ, къ на́шымъ не́мощемъ приклонѧ́ющꙋюсѧ и҆ ѿ го́рькагѡ недꙋ́га пїѧ́нства свобожда́ющꙋю, вѣ̑рныѧ же наꙋча́ющꙋю пѣ́ти тебѣ̀: А҆ллилꙋ́їа.

Вѣті̑и многовѣща́ннїи недоꙋмѣ́ютъ восхвали́ти по достоѧ́нїю ди́вное, бг҃омт҃и, і҆кѡ́ны твоеѧ̀ ꙗ҆вле́нїе, нижѐ мы̀ грѣ́шнїи ѿ скве́рныхъ ᲂу҆сте́нъ на́шихъ возмо́жемъ просла́вити застꙋ́пницꙋ на́шꙋ, ꙗ҆́коже подоба́етъ. Ѻ҆ба́че, дꙋше́ю и҆ се́рдцемъ ра́дꙋющесѧ, тебѣ̀ глаго́лемъ:

Сп҃стѝ хотѧ́щи мнѡ́гїѧ, чꙋ́днꙋю і҆кѡ́нꙋ твою̀, приснодв҃о, пїѧ́нствомъ недꙋ́гꙋющымъ дарова́ла є҆сѝ, да всѝ ѡ҆держи́мїи се́ю стра́стїю къ чꙋдотво́рномꙋ ѻ҆́бразꙋ твоемꙋ̀ притека́ютъ, и҆ и҆сцѣле́нїе полꙋчи́вше, во ᲂу҆миле́нїи взыва́ютъ бг҃ꙋ: А҆ллилꙋ́їа.

Стѣна̀ є҆сѝ и҆ щи́тъ, бг҃омт҃и, пїѧ́нства недꙋ́гомъ стра́ждꙋщымъ, и҆ всѣ̑мъ ᲂу҆се́рднѡ къ тебѣ̀ притека́ющымъ и҆ і҆кѡ́нꙋ твою̀ ст҃ꙋ́ю бл҃гоговѣ́йнѡ чтꙋ́щымъ, сїю́ бо на́мъ дарова̀ бл҃ги́хъ пода́тель гдⷭ҇ь въ по́мощь и҆ цѣльбꙋ̀ ѿ гꙋби́тельныѧ стра́сти, и҆ тѣ́мъ наказꙋ́етъ на́мъ пѣ́ти тебѣ̀ такова̑ѧ:

Пѣ́нїе на́ше смире́нное, ѿ любвѐ и҆ ᲂу҆се́рдїѧ тебѣ̀ приноси́мое, не пре́зри, чⷭ҇таѧ, и҆ не ѿвратѝ ли́ка твоегѡ̀ ѿ стра́ждꙋщихъ недꙋ́гомъ пїѧ́нства и҆ ѿча́ѧвшихсѧ, но помозѝ и҆̀мъ и҆ на́мъ ѡ҆чи́ститисѧ ѿ всѧ́кїѧ скве́рны грѣхо́вныѧ, да возмо́жемъ досто́йнѡ и҆ пра́веднѡ пѣ́ти бг҃ꙋ: А҆ллилꙋ́їа.

Свѣтопрїе́мнꙋю свѣщꙋ̀ зри́мъ тѧ̀, прест҃а́ѧ дв҃о, тво́й бо ѻ҆́бразъ ст҃ы́й лꙋча́ми бл҃года́ти твоеѧ̀ мглꙋ̀ грѣхо́внꙋю прогонѧ́етъ и҆ на свѣ́тлꙋю стезю̀ добродѣ́телей наставлѧ́етъ съ вѣ́рою зовꙋ́щихъ тѝ такова̑ѧ:

Бл҃года́ть бж҃їѧ, предста́тельствомъ твои́мъ, ѽ бг҃омт҃и, подава́етсѧ всѣ̑мъ скорбѧ́щымъ, ѡ҆бездо́лєннымъ, вдова́мъ и҆ ста́рицамъ, наипа́че же пїѧ́нственнымъ недꙋ́гомъ стра́ждꙋщымъ, и҆ не тщѝ ѿхо́дѧтъ сі́и, пречⷭ҇таѧ, ѿ неꙋпива́емыѧ ча́ши бжⷭ҇твенныхъ дарова́нїй твои́хъ, но неѡскꙋ́днѡ цѣльбы̑ полꙋча́юще, всебл҃га́ѧ, бл҃года́рственнѡ вопїю́тъ бг҃ꙋ: А҆ллилꙋ́їа.

Пою́ще твоѧ̑ чꙋдеса̀ и҆ ве́лїю млⷭ҇ть, стра́стїю пїѧ́нства ѡ҆держи̑мымъ ꙗ҆вле́ннꙋю, мо́лимъ тѧ̀, влⷣчце, сп҃сѝ и҆ поми́лꙋй, и҆ наста́ви на стезю̀ пра́вꙋ, и҆ не ѡ҆ста́ви на́съ, покро́ва твоегѡ̀ и҆́щꙋщихъ и҆ зовꙋ́щихъ тѝ:

Ѽ премлⷭ҇тиваѧ мт҃и сладча́йшагѡ гдⷭ҇а на́шегѡ і҆и҃са хрⷭ҇та̀! Ны́нѣшнее на́ше ᲂу҆слы́ши моле́нїе и҆ и҆зба́ви на́съ ѿ всѣ́хъ недꙋ́гѡвъ дꙋше́вныхъ и҆ тѣле́сныхъ, наипа́че же и҆сцѣлѝ пїѧ́нствомъ стра́ждꙋщыѧ, да не во ѕлѣ̀ поги́бнꙋтъ, но да сп҃се́ннїи тобо́ю при́снѡ вопїю́тъ бг҃ꙋ: А҆ллилꙋ́їа.

А҆́гг҃льстїи чи́ни и҆ првⷣникѡвъ со́нми непреста́ннѡ сла́вѧтъ тѧ̀, цр҃и́цꙋ бцⷣꙋ, хода́таицꙋ ѡ҆ ро́дѣ человѣ́честѣмъ, въ беззако́нїихъ погрꙋже́ннѣмъ и҆ во грѣсѣ́хъ пребыва́ющемъ, да́рꙋеши бо на́мъ во ᲂу҆тѣше́нїе и҆ сп҃се́нїе млⷭ҇ть свою̀ чрез̾ чꙋдотвѡ́рныѧ і҆кѡ̑ны твоѧ̑, и҆̀хже, ꙗ҆́кѡ ѕвѣ́зды небє́сныѧ, по все́й землѝ на́шей зри́мъ. Ко є҆ди́номꙋ же ѿ си́хъ ѻ҆бразѡ́въ, неꙋпива́емаѧ ча́ша и҆менꙋ́емомꙋ, припа́дающе, и҆з̾ глꙋбины̀ се́рдца взыва́емъ тѝ:

И҆зрѧ́дное и҆ ди́вное вспоможе́нїе на́мъ дарова́сѧ, ѻ҆́бразъ тво́й чтⷭ҇ны́й, бцⷣе дв҃о, ꙗ҆́кѡ и҆зба́вльшесѧ ꙗ҆вле́нїемъ є҆гѡ̀ недꙋ́гѡвъ дꙋше́вныхъ и҆ тѣле́сныхъ и҆ ско́рбныхъ ѡ҆бстоѧ́нїй, бл҃года̑рныѧ хвалы̑ прино́симъ тѝ, всемлⷭ҇тиваѧ застꙋ́пнице. Ты́ же, гпⷭ҇жѐ, приклони́сѧ бл҃гоꙋтро́бнѡ къ на́шымъ воздыха́нїємъ и҆ во́плємъ сердє́чнымъ, и҆ и҆сцѣле́нїе пода́ждь стра́ждꙋщымъ, да съ вѣ́рою воззове́мъ тѝ:

Ѽ премлⷭ҇рдаѧ влⷣчце! Къ твоемꙋ̀ застꙋпле́нїю ны́нѣ прибѣга́емъ, моле́нїй на́шихъ не пре́зри, но ско́рѡ и҆сцѣлѝ тѧ́жкимъ недꙋ́гомъ пїѧ́нства ѡ҆держи́мыхъ бра́тїй и҆ се́стръ на́шихъ и҆ тогѡ̀ ра́ди ѿ ма́тере своеѧ̀, цр҃кве хрⷭ҇то́вы, и҆ ѿ сп҃се́нїѧ ѿпа́дающихъ. ѽ всемлⷭ҇тиваѧ мт҃и бж҃їѧ, косни́сѧ серде́цъ и҆́хъ и҆ ско́рѡ возста́ви ѿ паде́нїй грѣхо́вныхъ, и҆сцѣлѝ ѧ҆̀ и҆ ко сп҃си́тельномꙋ воздержа́нїю приведѝ. Оу҆молѝ сн҃а своего̀, хрⷭ҇та̀ бг҃а на́шего, да прости́тъ на́мъ согрѣшє́нїѧ на̑ша и҆ не ѿврати́тъ млⷭ҇ти своеѧ̀ ѿ люде́й свои́хъ, но да ᲂу҆крѣпи́тъ и҆̀хъ въ трезвѣ́нїи и҆ цѣломꙋ́дрїи. Прїимѝ, прест҃а́ѧ бцⷣе, мл҃твы роди́телей, ѡ҆ ча́дѣхъ свои́хъ сле́зы пролива́ющихъ: же́нъ, ѡ҆ мꙋже́хъ свои́хъ рыда́ющихъ: ча̑дъ, си́рыхъ и҆ ᲂу҆бо́гихъ, заблꙋ́ждшими ѡ҆ста́вленныхъ, и҆ всѣ́хъ на́съ, къ і҆кѡ́нѣ твое́й припа́дающихъ. И҆ да прїи́детъ се́й во́пль на́шъ мл҃твами твои́ми ко прⷭ҇то́лꙋ всевы́шнѧгѡ. покры́й и҆ соблюдѝ на́съ ѿ лꙋка́вагѡ ловле́нїѧ и҆ всѣ́хъ ко́зней вра́жїихъ, въ стра́шный же ча́съ и҆схо́да на́шегѡ помозѝ проитѝ непреткнове́ннѡ воздꙋ̑шнаѧ мыта̑рства и҆ мл҃твами твои́ми и҆зба́ви вѣ́чнагѡ ѡ҆сꙋжде́нїѧ, да покры́етъ на́съ млⷭ҇ть бж҃їѧ во вѣ́ки вѣкѡ́въ. А҆ми́нь.