А҆ка́ѳїстъ прест҃ѣ́й бцⷣѣ, ꙗ҆вле́нїѧ ра́ди чꙋдотво́рныѧ є҆ѧ̀ і҆кѡ́ны каза́нскїѧ.
Конда́къ а҃.
И҆збра́ннѣй ѿ всѣ́хъ родѡ́въ застꙋ́пницѣ ро́да хрⷭ҇тїа́нскагѡ, покро́вомъ своеѧ̀ бл҃гости покрыва́ющей странꙋ̀ на́шꙋ правосла́внꙋю, благода́рствєннаѧ пѣ̑нїѧ прино́симъ тѝ, бцⷣе, ѡ҆ ꙗ҆вле́нїи чꙋ́дныѧ твоеѧ̀ і҆кѡ́ны. Ты́ же, ꙗ҆́кѡ всемлⷭ҇тиваѧ всѣ́хъ притека́ющихъ къ тебѣ̀ помо́щнице, застꙋпа́й на́съ во всѣ́хъ ско́рбехъ и҆ нꙋ́ждахъ, бѣда́хъ и҆ напа́стехъ, да зове́мъ тѝ:
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
І҆́косъ а҃.
А҆́гг҃лъ предста́тель по́сланъ бы́сть рещѝ бцⷣѣ: ра́дꙋйсѧ, є҆гда̀ бг҃ъ сло́во воплоща́шесѧ во ᲂу҆тро́бѣ є҆ѧ̀: и҆ мы̀ грѣ́шнїи, прославлѧ́юще ꙗ҆вле́нїе чꙋ́дныѧ є҆ѧ̀ і҆кѡ́ны и҆ бжⷭ҇твеннаго млⷣнца сп҃са хрⷭ҇та̀, со ᲂу҆миле́нїемъ вопїе́мъ бл҃года́тнѣй:
Ра́дꙋйсѧ, бг҃оизбра́ннаѧ ѻ҆трокови́це: ра́дꙋйсѧ, мт҃и бж҃їѧ.
Ра́дꙋйсѧ, цр҃и́це небесѐ и҆ землѝ: ра́дꙋйсѧ, свѣ́тлое цр҃кве нбⷭ҇ныѧ и҆ земны́ѧ ᲂу҆краше́нїе.
Ра́дꙋйсѧ, а҆́гг҃лы чти́маѧ: ра́дꙋйсѧ, пѣва́емаѧ ѿ серафі̑мъ.
Ра́дꙋйсѧ, свѣ́тлое прⷪ҇ро́ческое сбытїѐ: ра́дꙋйсѧ, а҆пⷭ҇лѡвъ похвало̀.
Ра́дꙋйсѧ, мч҃нческое и҆сповѣ́данїе: ра́дꙋйсѧ, прпⷣбныхъ вѣ́нче.
Ра́дꙋйсѧ, првⷣныхъ весе́лїе: ра́дꙋйсѧ, грѣ́шныхъ ᲂу҆пова́нїе.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ в҃.
Ви́дѧщи, всенепоро́чнаѧ, съ высоты̀ нбⷭ҇нагѡ жили́ща своегѡ̀, и҆дѣ́же съ сн҃омъ твои́мъ въ сла́вѣ пребыва́еши, ско́рбь рабѡ́въ твои́хъ въ новопросвѣще́ннѣмъ гра́дѣ, ꙗ҆́кѡ гнѣ́внагѡ ра́ди бж҃їѧ посѣще́нїѧ вѣ́ра хрⷭ҇то́ва порꙋга́ема быва́етъ а҆га́рѧнскимъ ѕловѣ́рїемъ, бл҃говоли́ла є҆сѝ ꙗ҆ви́ти і҆кѡ́нꙋ свою̀, чꙋдесы̀ ю҆̀ прославлѧ́ющи, да ᲂу҆твержда́емїи зна́менїѧми твоеѧ̀ блгⷣти, хрⷭ҇толюби́вїи лю́дїе вѣ́рнѡ вопїю́тъ бг҃ꙋ: А҆ллилꙋ́їа.
І҆́косъ в҃.
Ра́зꙋмъ трикра́тнагѡ ꙗ҆вле́нїѧ бг҃омт҃ре мꙋ́драѧ ѻ҆трокови́ца разꙋмѣ́ти и҆́щꙋщи, течѐ ко власте́мъ, повѣ́дающи и҆̀мъ ди́вное ꙗ҆вле́нїе и҆ гро́зное преще́нїе: мы́ же, дивѧ́щесѧ свы́ше да́нномꙋ ѻ҆трокови́цѣ вразꙋмле́нїю, бл҃гоговѣ́йнѡ вопїе́мъ къ преблгⷭ҇ве́ннѣй:
Ра́дꙋйсѧ, ᲂу҆стна́ми дѣте́й хвалꙋ̀ бг҃ови соверша́ющаѧ: ра́дꙋйсѧ, та̑йны блгⷣти бж҃їѧ ю҆́нымъ ѿкрыва́ющаѧ.
Ра́дꙋйсѧ, невѣ́рныхъ сꙋмни́телное слы́шанїе: ра́дꙋйсѧ, вѣ́рныхъ и҆звѣ́стнаѧ похвало̀.
Ра́дꙋйсѧ, мо́лнїе, невѣ́рныхъ ᲂу҆страша́ющаѧ: ра́дꙋйсѧ, сла́вою чꙋде́съ твои́хъ вѣ́рныхъ смы́слы ѡ҆зарѧ́ющаѧ.
Ра́дꙋйсѧ, а҆га́рѧнскагѡ ѕловѣ́рїѧ ѡ҆бличе́нїе: ра́дꙋйсѧ, горды́ни и҆́хъ низложе́нїе.
Ра́дꙋйсѧ, вѣ́ры хрⷭ҇тїа́нскїѧ ᲂу҆твержде́нїе: ра́дꙋйсѧ, почита́нїѧ ст҃ы́хъ і҆кѡ́нъ ѡ҆сщ҃е́нїе.
Ра́дꙋйсѧ, ско́рбь на́шꙋ въ ра́дость претворѧ́ющаѧ: ра́дꙋйсѧ, несꙋмнѣ́нною наде́ждою на́съ ᲂу҆веселѧ́ющаѧ.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ г҃.
Си́ла вы́шнѧгѡ блгⷣтїю бг҃омт҃ре ᲂу҆мꙋдрѝ и҆ ᲂу҆крѣпѝ ѻ҆трокови́цꙋ къ и҆ска́нїю многоцѣ́ннагѡ бж҃їѧ да́ра, и҆ та̀ съ вѣ́рою дерза́ющи ѡ҆ гдⷭ҇ѣ, пристꙋпѝ къ трꙋдꙋ̀, и҆ скры́тое въ землѝ ѡ҆брѣ́тши сокро́вище ст҃ы́ѧ і҆кѡ́ны бг҃омт҃рни, ра́достнѡ возопѝ къ бг҃ꙋ: А҆ллилꙋ́їа.
І҆́косъ г҃.
И҆мѣ́ющи бл҃гоꙋтро́бное промышле́нїе ѡ҆ новопросвѣще́нныхъ лю́дехъ гра́да каза́ни, ѿ пречⷭ҇тны́ѧ твоеѧ̀ і҆кѡ́ны то́ки чꙋде́съ и҆сточи́ла є҆сѝ, влⷣчце, слѣпы̑мъ тѣле́сныма ѻ҆чи́ма зрѣ́нїе подава́ющи, ѡ҆мраче́нныхъ же дꙋше́внѡ свѣ́томъ бг҃опозна́нїѧ и҆ бл҃гоче́стїѧ ѡ҆зарѧ́ющи, дѣ́вствꙋющымъ под̾ ѡ҆сѣне́нїемъ твоеѧ̀ і҆кѡ́ны приста́нище небꙋ́рное да́рꙋющи. Сегѡ̀ ра́ди зове́мъ тѝ:
Ра́дꙋйсѧ, ꙗ҆вле́нїемъ і҆кѡ́ны твоеѧ̀ тмꙋ̀ лю́тыхъ ѡ҆бстоѧ́нїй ѿгонѧ́ющаѧ: ра́дꙋйсѧ, лꙋча́ми чꙋде́съ всѣ́хъ просвѣща́ющаѧ.
Ра́дꙋйсѧ, слѣпы́хъ прозрѣ́нїе: ра́дꙋйсѧ, ѡ҆мраче́нныхъ смы́сломъ просвѣще́нїе.
Ра́дꙋйсѧ, сла́во правосла́вїѧ: ра́дꙋйсѧ, ти́хое приста́нище и҆́щꙋщихъ спⷭ҇нїѧ.
Ра́дꙋйсѧ, мт҃и цѣломⷣрїѧ: ра́дꙋйсѧ, покро́ве и҆ ѡ҆гражде́нїе дѣ́вства.
Ра́дꙋйсѧ, є҆́юже ликовствꙋ́етъ всѐ мно́жество вѣ́рныхъ: ра́дꙋйсѧ, є҆ѧ́же ра́ди рыда́етъ де́монское по́лчище.
Ра́дꙋйсѧ, всѣ́хъ хрⷭ҇тїа́нъ вожделѣ́ннаѧ помо́щнице: ра́дꙋйсѧ, всѣ́хъ скорбѧ́щихъ ра́досте.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ д҃.
Бꙋ́рю смѧте́нїй и҆ крамо́лы врага́ми воздви́гнꙋтꙋю въ странѣ̀ на́шей ᲂу҆толи́ти тща́щьсѧ бл҃же́нный гермоге́нъ, списа́тель чꙋде́съ твоеѧ̀, бг҃омт҃и, і҆кѡ́ны, сле́знѡ пред̾ не́ю молѧ́шесѧ, и҆ ви́дѣвъ, ꙗ҆́кѡ во́инствꙋ правосла́вномꙋ въ щи́тъ и҆ побѣ́дное зна́менїе твоѧ̀ і҆кѡ́на дарова́сѧ, вѣ́рою ᲂу҆крѣплѧ́емый до конца̀ живота̀ своегѡ̀ вопїѧ́ше бг҃ꙋ: А҆ллилꙋ́їа.
І҆́косъ д҃.
Слы́шавше правосла́внїи во́ини ѿкрове́ннꙋю прпⷣбнымъ се́ргїемъ ст҃и́телю а҆рсе́нїю та́йнꙋ, ꙗ҆́кѡ предста́телствомъ бг҃омт҃ре сꙋ́дъ ѡ҆б̾ ѻ҆те́чествѣ на́шемъ преложе́нъ на млⷭ҇ть, і҆кѡ́нꙋ бг҃омт҃рню, ꙗ҆́кѡ зна́мѧ побѣ́дное прїи́мше, и҆схи́тиша ма́терь градѡ́въ рꙋ́сскихъ и҆з̾ рꙋ́къ сꙋпоста̑тъ и҆ возопи́ша застꙋ́пницѣ хрⷭ҇тїа́нъ:
Ра́дꙋйсѧ, мт҃и бг҃а вы́шнѧгѡ: ра́дꙋйсѧ, ꙗ҆́кѡ за всѣ́хъ мо́лиши сн҃а твоего̀, хрⷭ҇та̀ бг҃а на́шего.
Ра́дꙋйсѧ, ꙗ҆́кѡ всѣ̑мъ твори́ши спⷭ҇ти́сѧ въ держа́вный тво́й покро́въ прибѣга́ющымъ: ра́дꙋйсѧ, застꙋ́пнице всѣ́хъ сꙋ́щихъ въ ско́рбехъ и҆ болѣ́знехъ.
Ра́дꙋйсѧ, всѣ̑мъ молѧ́щымсѧ сокрꙋше́ннымъ се́рдцемъ пред̾ пречⷭ҇тымъ твои́мъ ѡ҆́бразомъ полє́знаѧ да́рꙋющаѧ: ра́дꙋйсѧ, и҆збавле́нїе ѕѡ́лъ всѣ̑мъ, невозвра́тнѡ наде́ждꙋ и҆мꙋ́щымъ на тѧ̀.
Ра́дꙋйсѧ, ти́хое и҆ до́брое приста́нище: ра́дꙋйсѧ, ско́раѧ помо́щнице.
Ра́дꙋйсѧ, гото́вый и҆ те́плый покро́ве спⷭ҇нїѧ: ра́дꙋйсѧ, и҆сточа́ющаѧ на́мъ неѡскꙋ̑дныѧ млⷭ҇ти.
Ра́дꙋйсѧ, предварѧ́ющаѧ на по́мощь: ра́дꙋйсѧ, и҆збавлѧ́ющаѧ ѿ всѣ́хъ бѣ́дъ.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ є҃.
Бг҃оте́чнаѧ ѕвѣзда̀ ꙗ҆ви́сѧ твоѧ̀, бг҃омт҃и, і҆кѡ́на, всю̀ странꙋ̀ рѡссі́йскꙋю ѡ҆бтека́ющаѧ, лꙋча́ми чꙋде́съ твои́хъ ѡ҆сїѧва́ющаѧ всѣ́хъ блꙋжда́ющихъ по мо́рю стра́стнагѡ житїѧ̀, мра́къ печа́лей и҆ мглꙋ̀ всѧ́кихъ недꙋ̑гъ и҆ скорбе́й прогонѧ́ющаѧ и҆ наставлѧ́ющаѧ на пꙋ́ть спⷭ҇нїѧ съ вѣ́рою къ тебѣ̀ притека́ющихъ и҆ вопїю́щихъ къ бг҃ꙋ: А҆ллилꙋ́їа.
І҆́косъ є҃.
Ви́дѣвъ ца́рь пе́тръ, ꙗ҆́кѡ ѿ ст҃ы́ѧ і҆кѡ́ны бг҃омт҃ре блгⷣтїю бж҃їею содѣва́ютсѧ мнѡ́гаѧ чꙋдеса̀, прїе́млетъ ю҆̀ въ пꙋтеводи́телницꙋ во́инствꙋ своемꙋ̀ и҆ въ де́нь бра́ни на све́євъ въ щи́тъ и҆ покро́въ, и҆ побѣди́въ до конца̀ врага̀, по́мощїю бг҃омт҃ре, тѣ́мъ ка́мень соверше́нный во ѡ҆снова́нїе но́вагѡ ца́рствꙋющагѡ гра́да положѝ, і҆кѡ́нꙋ же твою̀ чꙋ́днꙋю, ꙗ҆́кѡ ѡ҆сщ҃е́нїе, ꙗ҆́кѡ щи́тъ и҆ ѡ҆гражде́нїе, въ се́рдце гра́да поста́ви. Сегѡ̀ ра́ди вопїе́мъ пречⷭ҇тѣй:
Ра́дꙋйсѧ, жили́ще и҆ до́ме хрⷭ҇та̀ бг҃а на́шегѡ: ра́дꙋйсѧ, вмѣсти́лище неизрѣче́нныѧ є҆гѡ̀ сла́вы.
Ра́дꙋйсѧ, гра́де ѡ҆дш҃евле́нный, при́снѡ црⷭ҇твꙋющїй: ра́дꙋйсѧ, пала́то преꙋкраше́ннаѧ.
Ра́дꙋйсѧ, ра́досте градѡ́въ и҆ ве́сей: ра́дꙋйсѧ, непобѣди́мое хрⷭ҇тїа́нъ въ бѣда́хъ храни́лище и҆ предгра́дїе.
Ра́дꙋйсѧ, цр҃кве правосла́вныѧ похвало̀: ра́дꙋйсѧ, ски́птра царе́й ᲂу҆твержде́нїе.
Ра́дꙋйсѧ, хрⷭ҇толюби́вагѡ во́инства помо́щнице: ра́дꙋйсѧ, врагѡ́въ ѡ҆долѣ́нїе.
Ра́дꙋйсѧ, ѿ бѣ́дъ и҆збавле́нїе: ра́дꙋйсѧ, мт҃рними твои́ми щедро́тами всѣ́хъ посѣща́ющаѧ.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ ѕ҃.
Предстоѧ́ще пред̾ пречⷭ҇тымъ твои́мъ ѡ҆́бразомъ а҆рхїере́євъ сосло́вїе, ца́рїе и҆ кнѧ́зи и҆ всѝ лю́дїе, мона́си и҆ мїрсті́и, проповѣ́дꙋютъ, гпⷭ҇жѐ бг҃ороди́телнице, вели̑кїѧ твоѧ̑ млⷭ҇ти, ꙗ҆́кѡ гра́ды ѡ҆гражда́еши, ѻ҆би́тєли покрыва́еши, вє́си защища́еши, и҆ вѣ́дꙋще тѧ̀ вои́стиннꙋ помо́щницꙋ си́льнꙋ и҆ непобѣди́мꙋ, со слеза́ми прино́сѧтъ тѝ моли̑твы, да простре́ши къ сн҃ꙋ твоемꙋ̀ бг҃онѡ́сныѧ рꙋ́ки за лю́ди твоѧ̑, є҆́же и҆зба́вити на́съ ѿ всѣ́хъ бѣ́дъ и҆ напа́стей, да благода́рнѣ вопїе́мъ бг҃ꙋ: А҆ллилꙋ́їа.
І҆́косъ ѕ҃.
Возсїѧ́вши просвѣще́нїе и҆́стинное и҆ ѿгна́вши ле́сть а҆га́рѧнскꙋю во новопросвѣще́ннѣй странѣ̀, и҆ въ но́вѣмъ ца́рствꙋющемъ гра́дѣ свѣ́тиши свѣ́томъ чꙋде́съ и҆ млⷭ҇тей: притека́ющїи бо съ вѣ́рою ко твое́й і҆кѡ́нѣ цѣльбоно́снѣй, и҆ скорбе́й и҆збавле́нїе и҆ недꙋ́гѡвъ и҆сцѣле́нїе и҆ ра́дости всѧ́кїѧ и҆сполне́нїе прїе́млютъ, вопїю́ще тебѣ̀ ᲂу҆се́рднѡ:
Ра́дꙋйсѧ, неистощи́мый и҆сто́чниче ст҃ы́ни: ра́дꙋйсѧ, многотекꙋ́щаѧ рѣко̀ бжⷭ҇твенныѧ блгⷣти.
Ра́дꙋйсѧ грѣ́шныхъ съ бг҃омъ примире́нїе: ра́дꙋйсѧ, грѣхѡ́въ на́шихъ ѡ҆чище́нїе.
Ра́дꙋйсѧ, бл҃гоче́стїѧ наста́внице: ра́дꙋйсѧ, въ до́брыхъ дѣ́лѣхъ ᲂу҆твержде́нїе и҆ по́моще.
Ра́дꙋйсѧ, дѡ́брыѧ ѻ҆бѣ́ты прїе́млющаѧ: ра́дꙋйсѧ, бл҃ги̑мъ намѣ́ренїємъ спосо́бствꙋющаѧ.
Ра́дꙋйсѧ, ѕлы̑ѧ начина̑нїѧ разрꙋша́ющаѧ: ра́дꙋйсѧ, вра̑жїѧ кѡ́зни расторга́ющаѧ.
Ра́дꙋйсѧ, ско́раѧ человѣ́кѡмъ помо́щнице: ра́дꙋйсѧ, млⷭ҇ть сꙋгꙋ́бѡ на́мъ подаю́щаѧ.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ з҃.
Хотѧ́щꙋ благослове́нномꙋ царю̀ и҆сповѣ́дати млⷭ҇ти преблгⷭ҇ве́нныѧ цр҃и́цы нб҃а и҆ землѝ и҆ по си́лѣ бл҃года́рствєннаѧ принестѝ ѡ҆ и҆збавле́нїи ца́рства є҆гѡ̀ ѿ наше́ствїѧ и҆ноплеме́нныхъ, ди́вномꙋ хра́мꙋ, созда́нномꙋ въ че́сть пречꙋ́дныѧ і҆кѡ́ны, побѣ̑днаѧ въ да́ръ принесѐ, да всѝ памѧтꙋ́юще млⷭ҇ть бг҃омт҃ре, спа́сшїѧ гра́дъ се́й и҆ ца́рство, вы́нꙋ воспѣва́ютъ бг҃ꙋ благода́рными ᲂу҆сты̀: А҆ллилꙋ́їа.
І҆́косъ з҃.
Но́вомꙋ ца́рствꙋющемꙋ гра́дꙋ ст҃а́ѧ і҆кѡ́на твоѧ̀, бг҃омт҃и, вои́стиннꙋ ꙗ҆ви́сѧ бл҃га́ѧ ѻ҆диги́трїѧ, ꙗ҆́коже дре́вле въ царегра́дѣ: къ тебѣ́ бо прибѣга́ютъ ца́рїе, по́мощи твоеѧ̀ на нача́ло пꙋтѝ и҆ дѣ́лъ свои́хъ просѧ́ще и҆ благода́рствєннаѧ приносѧ́ще молє́нїѧ пред̾ пречⷭ҇тою і҆кѡ́ною твое́ю за и҆збавле́нїе ѿ скорбе́й и҆ напа́стей, тебѐ помо́щницꙋ и҆ застꙋ́пницꙋ крѣ́пкꙋю вѣ́даютъ. Тѣ́мже благода́рственнѡ вопїе́мъ тѝ:
Ра́дꙋйсѧ, рѡссі́йскїѧ страны̀ покро́ве: ра́дꙋйсѧ, правосла́вїѧ въ не́й ѡ҆гражде́нїе и҆ ᲂу҆твержде́нїе.
Ра́дꙋйсѧ, несокрꙋши́мый щи́те царе́й на́шихъ: ра́дꙋйсѧ, бронѐ и҆́хъ неꙋѧзви́маѧ.
Ра́дꙋйсѧ, кѡ́зни врагѡ́въ ѡ҆блича́ющаѧ: ра́дꙋйсѧ, ꙗ҆́кѡ паꙋти́нꙋ и҆́хъ растерза́ющаѧ.
Ра́дꙋйсѧ, нече́стїѧ ѡ҆бличе́нїе: ра́дꙋйсѧ, крамо́лы разрꙋше́нїе.
Ра́дꙋйсѧ, ю҆́ныхъ ѿ заблꙋжде́нїй и҆справле́нїе: ра́дꙋйсѧ, ста́рцєвъ ᲂу҆тѣше́нїе.
Ра́дꙋйсѧ, дꙋшевре́дныхъ ᲂу҆че́нїй низложе́нїе: ра́дꙋйсѧ, дꙋшеполе́зныхъ зна́нїй дарова́нїе.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ и҃.
Стра́ннѡ и҆ сꙋмни́телнѡ невѣ́рꙋющымъ слы́шати, ка́кѡ ѿ і҆кѡ́ны твоеѧ̀ то́ки блгⷣти и҆стека́ютъ, вонѧ̀ живо́тнаѧ бл҃гоꙋха́етъ: мы́ же вѣ́рꙋюще сло́вꙋ рече́нномꙋ тобо́ю, влⷣчце, къ первонапи́саннѣй і҆кѡ́нѣ: съ тобо́ю моѧ̀ блгⷣть и҆ си́ла, ᲂу҆пова́емъ ꙗ҆́кѡ и҆ съ се́ю і҆кѡ́ною блгⷣть твоѧ̀ вы́нꙋ: тѣ́мже бл҃гоговѣ́йнѡ предстоѧ́ще лобыза́емъ ю҆̀, покланѧ́емсѧ є҆́й, ꙗ҆́кѡ тебѣ̀ само́й сꙋ́щей, че́сть бо і҆кѡ́ны на первоѡбра́зное восхо́дитъ, и҆ твоѧ̀ блгⷣть се́ю і҆кѡ́ною зна́мєнїѧ и҆ чꙋдеса̀ содѣва́етъ всѣ̑мъ съ вѣ́рою притека́ющымъ къ тебѣ̀ и҆ вопїю́щымъ бг҃ꙋ: А҆ллилꙋ́їа.
І҆́косъ и҃.
Всѧ̀ бы́вши горѣ̀, къ нбⷭ҇нымъ взѧ́та, и҆ земны́хъ не ѡ҆ставлѧ́еши, бг҃омт҃и, сщ҃е́ннымъ твои́мъ предста́телствомъ: и҆́маши бо мт҃рнее дерзнове́нїе ко хрⷭ҇тꙋ̀ бг҃ꙋ на́шемꙋ. Тѣ́мже ᲂу҆твердѝ въ ми́рѣ глꙋбо́цѣ правосла́вныхъ житїѐ: и҆ ѻ҆те́чество на́ше возвы́си, и҆ всѧ̑ полє́знаѧ всегда̀ да́рꙋй рабѡ́мъ твои̑мъ, да велича́юще воспѣва́емъ тѝ:
Ра́дꙋйсѧ, невмѣсти́магѡ вмѣсти́лище: ра́дꙋйсѧ, носи́ло всегѡ̀ бжⷭ҇тва̀.
Ра́дꙋйсѧ прозѧ́бшаѧ кла́съ нбⷭ҇ный: ра́дꙋйсѧ, мі́ръ ве́сь дꙋшепа́гꙋбнагѡ гла́да и҆зба́вльшаѧ.
Ра́дꙋйсѧ, вы́нꙋ хода́тайствꙋющаѧ за ро́дъ на́шъ: ра́дꙋйсѧ, ꙗ҆́кѡ мно́гѡ мо́жетъ мл҃тва твоѧ̀ пред̾ сн҃омъ твои́мъ и҆ бг҃омъ.
Ра́дꙋйсѧ, всѣ́хъ на́съ при крⷭ҇тѣ̀ сн҃а твоегѡ̀ ᲂу҆сынови́вшаѧ: ра́дꙋйсѧ, всегда̀ мт҃рнюю любо́вь къ на́мъ ꙗ҆влѧ́ющаѧ.
Ра́дꙋйсѧ, хода́таице вѣ́чныхъ бл҃гъ: ра́дꙋйсѧ, и҆ во вре́меннѣй жи́зни полє́знаѧ на́мъ подаю́щаѧ.
Ра́дꙋйсѧ, и҆звѣ́стное прибѣ́жище на́ше во всѣ́хъ ско́рбныхъ ѡ҆бстоѧ́нїихъ: ра́дꙋйсѧ, несꙋмнѣ́нное ᲂу҆тѣше́нїе въ печа́лехъ.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ ѳ҃.
Всѧ́кагѡ є҆стества̀ а҆́гг҃льскагѡ превы́сшаѧ ꙗ҆ви́ласѧ є҆сѝ, прест҃а́ѧ дв҃о: бг҃а бо зачала̀ є҆сѝ пло́тїю, невмѣсти́маго всѣ́ми вмѣсти́ла є҆сѝ во ᲂу҆тро́бѣ твое́й, на рꙋка́хъ носи́ла є҆сѝ носѧ́щаго ве́сь мі́ръ дла́нїю: тѣ́мже ꙗ҆́кѡ чⷭ҇тнѣ́йшꙋю херꙋві̑мъ и҆ сла́внѣйшꙋю без̾ сравне́нїѧ серафі̑мъ велича́юще тѧ̀, вопїе́мъ ѡ҆ тебѣ̀ бг҃ꙋ: А҆ллилꙋ́їа.
І҆́косъ ѳ҃.
Вѣті̑ѧ многовѣща̑нныѧ, ꙗ҆́кѡ ры̑бы безгла̑сныѧ ви́димъ ѡ҆ тебѣ̀, бцⷣе: недоꙋмѣ́етъ бо всѧ́къ ѧ҆зы̑къ благохвали́ти тѧ̀ по достоѧ́нїю, и҆зꙋмѣва́етъ же ᲂу҆́мъ и҆ премі́рный пѣ́ти тѧ̀, бцⷣе: ѻ҆ба́че бл҃га́ѧ сꙋ́щи, прїимѝ и҆ ѿ на́съ а҆рха́гг҃льскїй гла́съ тебѣ̀ вопїю́щихъ:
Ра́дꙋйсѧ, блгⷣтнаѧ: ра́дꙋйсѧ, ꙗ҆́кѡ гдⷭ҇ь съ тобо́ю.
Ра́дꙋйсѧ, блгⷭ҇ве́ннаѧ въ жена́хъ: ра́дꙋйсѧ, ѡ҆брѣ́тшаѧ блгⷣть ᲂу҆ бг҃а.
Ра́дꙋйсѧ, роди́вшаѧ спⷭ҇телѧ мі́рꙋ: ра́дꙋйсѧ, мт҃и сн҃а бж҃їѧ.
Ра́дꙋйсѧ, роди́телнице вѣ́чнагѡ цр҃ѧ̀: ра́дꙋйсѧ, и҆зрасти́вшаѧ на́мъ пло́дъ живота̀.
Ра́дꙋйсѧ, ѡ҆сщ҃е́ннаѧ дх҃омъ ст҃ы́мъ: ра́дꙋйсѧ, ѡ҆сѣне́ннаѧ си́лою всевы́шнѧгѡ.
Ра́дꙋйсѧ, вѣ́рнаѧ рабо̀ гдⷭ҇нѧ: ра́дꙋйсѧ, ꙗ҆́кѡ тѧ̀ бл҃жа́тъ всѝ ро́ди.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ і҃.
Спⷭ҇тѝ хотѧ́щи мнѡ́гїѧ ѿ находѧ́щихъ ѕѡ́лъ, скорбе́й и҆ болѣ́зней, чꙋ́днꙋю і҆кѡ́нꙋ твою̀, бг҃омт҃и, дарова́ла є҆сѝ, є҆ѧ́же ра́ди слѣпі́и прозира́ютъ, хромі́и хо́дѧтъ, разсла́бленнїи возстаю́тъ, бѣснꙋ́ющїисѧ и҆сцѣлѧ́ютсѧ, землѝ плодоно́сїе подае́тсѧ, лю́дїе ѿ смертоно́сныѧ ꙗ҆́звы и҆збавлѧ́ютсѧ, гра́ды и҆ до́мы ѿ ѻ҆гнѧ̀ спаса́ютсѧ: тѣ́мже прославлѧ́юще бг҃а, даю́щаго на́мъ такѡвы́ѧ млⷭ҇ти вопїе́мъ є҆мꙋ̀ ᲂу҆се́рднѡ: А҆ллилꙋ́їа.
І҆́косъ і҃.
Стѣна̀ є҆сѝ, бцⷣе, странѣ̀ рѡссі́йстѣй, градѡ́мъ ѡ҆гражде́нїе и҆ сла́ва, правосла́вномꙋ во́инствꙋ на врагѝ ᲂу҆крѣпле́нїе. Тѣ́мже благодарѧ́ще тѧ̀, вопїе́мъ:
Ра́дꙋйсѧ, прославлѧ́ющихъ тѧ̀ прославлѧ́ющаѧ: ра́дꙋйсѧ, нечтꙋ́щихъ тѧ̀ посрамлѧ́ющаѧ.
Ра́дꙋйсѧ, врагѡ́въ ᲂу҆страше́нїе: ра́дꙋйсѧ, ѿ наше́ствїѧ и҆ноплеме́нныхъ и҆збавле́нїе.
Ра́дꙋйсѧ, царе́й сла́во: ра́дꙋйсѧ, во́инѡвъ крѣ́посте.
Ра́дꙋйсѧ, въ дни̑ бра́ни забра́ло и҆ ѡ҆гражде́нїе: ра́дꙋйсѧ, (въ дни̑ ми́ра) живоно́сный са́де, ᲂу҆веселѧ́ющїй сердца̀ вѣ́рныхъ.
Ра́дꙋйсѧ, ѡ҆рꙋ́жїе, є҆гѡ́же трепе́щꙋтъ де́мони: ра́дꙋйсѧ, сп҃си́телный є҆ле́й, ᲂу҆маща́ющїй грѣхѡ́вныѧ ра̑ны ка́ющихсѧ.
Ра́дꙋйсѧ, те́плое на́ше ᲂу҆пова́нїе: ра́дꙋйсѧ, несꙋмнѣ́ннаѧ на́ша наде́ждо.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ а҃і.
Пѣ́нїе хвале́бное и҆ благода́рственное прино́сѧтъ тебѣ̀, влⷣчце: припа́дающе къ і҆кѡ́нѣ твое́й и҆ любе́знѡ лобыза́юще ю҆̀, дѣ́въ ли́цы, под̾ держа́внымъ покро́вомъ твои́мъ ти́хое и҆ ми́рное и҆́ноческое житїѐ провожда́ющїи, и҆ возложи́вше на тѧ̀ всѐ ᲂу҆пова́нїе, ра́достнѡ вопїю́тъ бг҃ꙋ: А҆ллилꙋ́їа.
І҆́косъ а҃і.
Ꙗ҆́кѡ свѣтопрїе́мнꙋю свѣщꙋ̀, зри́мъ твою̀ чⷭ҇тнꙋ́ю і҆кѡ́нꙋ, прест҃а́ѧ влⷣчце: та́ бо невеще́ственный ѻ҆́гнь блгⷣти твоеѧ̀ воспрїи́мши, и҆ въ подо́бїихъ є҆ѧ̀ нѡ́вы возжига́етъ свѣти́лники, прича́стны тоѧ́жде си́лы блгⷣтныѧ, и҆ ѡ҆зарѧ́етъ чꙋдесы̀, наставлѧ́ющи на пꙋ́ть спⷭ҇нїѧ всѣ́хъ вопїю́щихъ тѝ си́це:
Ра́дꙋйсѧ, невѣ́сто неневѣ́стнаѧ: ра́дꙋйсѧ, бг҃оизбра́ннаѧ ѻ҆трокови́це, мт҃и дв҃о.
Ра́дꙋйсѧ, до́браѧ наста́внице непоро́чнагѡ двⷭ҇тва: ра́дꙋйсѧ, храните́лнице ревнꙋ́ющихъ ѡ҆ чⷭ҇тотѣ̀.
Ра́дꙋйсѧ, же́нъ похвало̀: ра́дꙋйсѧ, дѣ́въ велича́нїе.
Ра́дꙋйсѧ, вдѡ́въ застꙋпле́нїе: ра́дꙋйсѧ, сиро́тъ призрѣ́нїе.
Ра́дꙋйсѧ, ни́щихъ пита́телнице: ра́дꙋйсѧ, наги́хъ ѡ҆дѣѧ́нїе.
Ра́дꙋйсѧ, печа́льныхъ ᲂу҆тѣше́нїе: ра́дꙋйсѧ, скорбѧ́щихъ весе́лїе.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ в҃і.
Блгⷣть да́ти восхотѣ́вши почита́ющымъ тѧ̀ съ любо́вїю, бг҃ороди́телнице, присꙋ́щꙋю тѝ си́лꙋ блгⷣтнꙋю ѡ҆ста́вила є҆сѝ во ст҃ы́хъ твои́хъ і҆кѡ́нахъ: и҆́бо бжⷭ҇твеннаѧ блгⷣть, спребыва́ющи тѣ̑мъ (і҆кѡ́намъ), зна́мєнїѧ и҆ чꙋдеса̀ вы́нꙋ содѣва́етъ и҆ дꙋше́вныхъ и҆ тѣле́сныхъ недꙋ̑гъ и҆сцѣле́нїе всѣ̑мъ съ вѣ́рою приходѧ́щымъ подае́тъ твои́ми бг҃омт҃рними непреста́нными къ бг҃ꙋ мл҃твами ѡ҆ вопїю́щихъ є҆мꙋ̀: А҆ллилꙋ́їа.
І҆́косъ в҃і.
Пою́ще твоѧ̑ чꙋдеса̀ бы̑вшаѧ въ дрє́внѧѧ и҆ настоѧ̑щаѧ времена̀, хва́лимъ тѧ̀, ꙗ҆́кѡ живоно́сный и҆сто́чникъ блгⷣти, ꙗ҆́кѡ неисто́щимꙋю рѣкꙋ̀ чꙋде́съ, ꙗ҆́кѡ бе́зднꙋ млⷭ҇ти и҆ щедро́тъ, и҆ всѐ ᲂу҆пова́нїе по бз҃ѣ возлага́юще на тѧ̀ и҆ въ се́й и҆ въ бꙋ́дꙋщей жи́зни, прославлѧ́юще тѧ̀ вопїе́мъ:
Ра́дꙋйсѧ, хрⷭ҇тїа́нъ непосты́дное ᲂу҆пова́нїе: ра́дꙋйсѧ, вѣ́рныхъ сп҃си́тельное прибѣ́жище.
Ра́дꙋйсѧ, ненаде́жныхъ надѣ́ѧнїе: ра́дꙋйсѧ, ѿча́ѧнныхъ спⷭ҇нїе.
Ра́дꙋйсѧ, ба́не, ѡ҆мыва́ющаѧ со́вѣсть: ра́дꙋйсѧ, росо̀, ѡ҆живлѧ́ющаѧ дꙋ́шы.
Ра́дꙋйсѧ, болѣ́зней враче́вство ско́рое и҆ безме́здное: ра́дꙋйсѧ, ѿ всѣ́хъ бѣ́дъ бы́строе и҆збавле́нїе.
Ра́дꙋйсѧ, ᲂу҆тѣ́шителнице во всѧ́кой ско́рби: ра́дꙋйсѧ, и҆з̾ глꙋбины̀ поги́бели сп҃са́ющаѧ.
Ра́дꙋйсѧ, ѿра́до въ де́нь сме́рти: ра́дꙋйсѧ, є҆ди́наѧ наде́ждо и҆ по сме́рти.
Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.
Конда́къ г҃і.
Ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во, прїимѝ ны́нѣ ма́лое сїѐ моле́нїе, и҆ вели́чїѧ ра́ди бл҃гости твоеѧ̀ и҆ бе́здны щедро́тъ твои́хъ, не помѧнѝ мно́жества грѣхѡ́въ на́шихъ, но и҆спо́лни во бл҃ги́хъ прошє́нїѧ на̑ша, подава́ющи тѣ́лꙋ здра́вїе, дꙋшѝ спⷭ҇нїе, и҆збавлѧ́ющи ѿ всѧ́кїѧ нꙋ́жды и҆ печа́ли, и҆ црⷭ҇твїѧ нбⷭ҇нагѡ наслѣ́дники сотворѧ́ющи всѣ́хъ вѣ́рнѡ вопїю́щихъ бг҃ꙋ: А҆ллилꙋ́їа.
Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.
Моли́тва.
Ѽ прест҃а́ѧ гпⷭ҇жѐ влⷣчце бцⷣе! Со стра́хомъ, вѣ́рою и҆ любо́вїю припа́дающе пред̾ чⷭ҇тно́ю і҆кѡ́ною твое́ю, мо́лимъ тѧ̀: не ѿвратѝ лица̀ твоегѡ̀ ѿ прибѣга́ющихъ къ тебѣ̀, ᲂу҆молѝ, млⷭ҇рдаѧ мт҃и, сн҃а твоего̀ и҆ бг҃а на́шего, гдⷭ҇а і҆и҃са хрⷭ҇та̀, да сохрани́тъ ми́рнꙋ странꙋ̀ на́шꙋ, цр҃ковь свою̀ ст҃ꙋ́ю да непозы́блемꙋ соблюде́тъ ѿ невѣ́рїѧ, є҆ресе́й и҆ раско́ла. Не и҆́мамы бо и҆ны́ѧ по́мощи, не и҆́мамы и҆ны́ѧ наде́жды ра́звѣ тебє̀, пречⷭ҇таѧ дв҃о: ты̀ є҆сѝ всеси́льнаѧ хрⷭ҇тїа́нъ помо́щница и҆ застꙋ́пница. И҆зба́ви всѣ́хъ съ вѣ́рою тебѣ̀ молѧ́щихсѧ ѿ паде́нїй грѣхо́вныхъ, ѿ навѣ́та ѕлы́хъ человѣ̑къ, ѿ всѧ́кихъ и҆скꙋше́нїй, скорбе́й, бѣ́дъ и҆ ѿ напра́сныѧ сме́рти: да́рꙋй на́мъ дх҃ъ сокрꙋше́нїѧ, смире́нїе се́рдца, чистотꙋ̀ помышле́нїй, и҆справле́нїе грѣхо́вныѧ жи́зни и҆ ѡ҆ставле́нїе прегрѣше́нїй, да всѝ благода́рнѣ воспѣва́юще вели̑чїѧ твоѧ̑, сподо́бимсѧ нбⷭ҇нагѡ црⷭ҇твїѧ и҆ та́мѡ со всѣ́ми ст҃ы́ми просла́вимъ пречⷭ҇тно́е и҆ великолѣ́пое и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а. А҆ми́нь.